1. Kiebhi o athu kiene mu di bhakula ni mukonda diahi?

O ATHU ene mu di bhakula mu vondadi iâ, phala ku bhanga o ima iala ni valolo ku mienhu iâ. O jitata a bhana o kithangana kiâ, o nguzu iâ, ni kitadi kiâ phala o mbote ia an’ê. O minzangala ene múia mu lenga mu Jijoko ja jixi joso, a kalakala kiavulu, a di suínisa ué kiavulu, phala ku bhana kijingu ku jixi jâ. Mukonda dia kiki, ene ka tena ku tonoka kiavulu kála ki bhanga o minzangala ia mukuá. Jezú ua di bhakuile ué mu ima ia kexile ni valolo ku muenhu uê. Muéne ka kexile mu sota ku kala mvuama, ka kexile ué ni an’a. Mu veji dia kiki, muéne ua di bhakuile mu ku bhanga o ima ia Utuminu. (Mat. 4:17; Luka 9:58) Kiene kimoxi ué, o akaied’iê a xile ima iavulu ku dima, mukonda dia Utuminu ua Nzambi. O ku kuatekesa o athu kuijiia o Utuminu, kiexile o kima kia betele-kota phala ene, mukonda dia kiki, ene a bhangele ioso phala ku boka o njimbu ia Utuminu iú. (Mat. 4:18-22; 19:27) Kienhiki, tua tokala ku di ebhuidisa: ‘Kima kiahi kia beta-kota ku muenhu uami?’

2. (a) Kiebhi kiene mu di bhakula o Jikidistá joso ja kidi? (b) Ikalakalu iahi ia mukuá iene mu bhanga o Jikidistá?

² Saí ima ia tokala o ku bhanga o Jikidistá joso ja kidi, se a mesena ku kala ni ukamba ni Jihova. O ima íii, ia lungu ni kithangana, ni nguzu ia bhakula mu kusamba, mu ku tanga o Bibidia, mu ubhezelu ku muiji, mu kuia mu iônge, ni kuboka o njimbu iambote. * (Josu. 1:8; Mat. 28:19, 20; Jihe. 10:24, 25) Mukonda dia nguzu ietu i tu bhanga ni kikuatekesu kia Jihova, o kikalakalu kia kuboka o njimbu a mu ki bhanga ku mundu uoso, athu avulu a mu ‘banda ku mulundu ua Jihova.’  (Iza. 2:2) Phala ku kuatekesa o kikalakalu kia Utuminu, jiphange javulu a di bhakula mu ku kalakala mu Betele, mu ku kuatekesa ku tunga o Ididi Ionene ia Ubhezelu, ku iudika o iônge ia makota, ni ku kuatekesa o jiphange ji bhita mu mavuua. O ikalakalu íii, ki iene ia-nda tu bhangesa ku tambula o muenhu ua kalelaku, maji ikalakalu ia tokala phala ku kuatekesa o Utuminu.

3. (a) Mbote iahi i tu katula kioso ki tu di bhakula ku Utuminu? (b) Ibhuidisu iahi i tua tokala ku xinganeka?

³ Lelu, kua bhindamena dingi ku kuatekesa o Utuminu. Kisangusangu kia dikota ku mona kuila, jiphange javulu a mu di bhakula mu ku kuatekesa o kikalakalu kia Jihova! (Tanga Jisálamu 54:6.) O ukexilu iú ua ku bhana, u tu bhekela kisangusangu, tu katula ué mbote kioso ki tua mu kingila o Utuminu ua Nzambi. (Mate. 16:15; Ika. 20:35) Etu enioso tua tokala ku di tonginina ni ku di ibhuidisa kiki: O kuila saí kima ki tua tokala ku bhanga phala ku kalakala dingi mu Utuminu? Ihi i tua mu bhanga ni nguzu ietu ni kithangana kietu, ni kitadi ni uhete uetu? Mukonda diahi tua tokala ku di langa kioso ki tu di bhakula? Tu di longe phangu i tua tokala ku kaiela phala ku di bhakula, phala ku bandekesa o kisangusangu kietu.

4. Jisata jahi ja kexile mu bhanga mu Izalaiele m’ukulu?

⁴ M’ukulu, o athu mu Izalaiele a tokalele ku bhana jisata phala ku a loloka o ituxi iâ. Kua bhingile jisata phala o athu ku a xikina kua Jihova. Saí jisata akexile mu ji bhana mu vondadi iâ, maji ja mukuá akexile mu ji bhinga. (Iji. 23:37, 38) O ujitu uoso ua túbhia, a kexile mu u bhana ué kala ujitu kua Jihova. Phangu imoxi ia sata ia bhanene kua Jihova, o sata ia bhanene kioso kia tungu o Tembulu mu izuua ia Solomá.—2 Mal. 7:4-6.

5. Ihi ia kexile mu bhinga Jihova ku jingadiama?

⁵ Jihova uejidile kiambote kuila o jiselevende jê joso, ka tenene ku bhana o jisata ja makota, mukonda dia kiki, muéne ua kexile mu bhinga ku muthu, ioso ia tenene o ku bhana. O kitumu kia Jihova kiambele kuila, o manhinga a kiama a tokalele ku a zuzina, akexile mu lombolola o “kizuzumbia ngó kia ima iambote ianda kuiza-ku” bhu kaxi ka mon’ê Jezú. (Jihe. 10:1-4) Maji Jihova, ka kexile mu jijidika kiavulu o athu ku belesela o kitumu kieniókio. Mu kifika, se muthu ka kexile ni mbudi, Nzambi ua kexile  mu xikina diembe. Kiki kilombolola kuila, né muéne o ngadiama ueji tena ku bhana sata kua Jihova ni ku sanguluka. (Iji. 1:3, 10, 14; 5:7) Sumbala o iama ki i difuile, maji kuexile ima iiadi ia tokalele ku bhana o athu akexile mu bhana o jisata mu vondadi iâ.

6. Ima iahi iiadi ia tokalele ku bhanga o athu akexile mu bhana o jisata, ni mukonda diahi kua bhingile ku belesela o kitumu kiki?

⁶ Kia dianga, o muthu ua tokalele ku bhana o kima kiê kia valolo. Jihova uambele ku kifuxi kuila, o jisata ja tokalele ji kala jambote, phala ku ji “xikina.” (Iji. 22:18, 20) Se o kiama kiexile kinema mba kiexile haxi, Jihova keji ku ki xikina. Kaiadi, o muthu ua kexile mu bhana o sata, ua tokalele kuzela, kala kia bhingile o kitumu. Se o muthu ua xidile, muéne ua tokalele ku dianga ku bhana sata ia ituxi, ni sata ia ku diela, phala ku kala dingi ni ukamba ni Jihova, ande dia ku bhana o sata mu vondadi iê. (Iji. 5:5, 6, 15) Enhá exile maka a dikota. Jihova uambele kuila, se muthu ua xidile, udia ku sata, muéne ua tokalele kufuá. (Iji. 7:20, 21) Maji se o muthu ua zelele, mba o sata iê ia kexile iambote, muéne ueji sanguluka kiavulu ni ku kala ni kitongoluelu kia zele.—Tanga 1 Malunda 29:9.

7, 8. (a) Mabesá ahi a tambula o jiphange a di bhakula mu kikalakalu kia Utuminu? (b) Ima iahi ia valolo i tuala na-iu, i tu tena ku bhana kua Jihova?

⁷ Lelu, jiphange javulu a di bhakula mu sidivisu ia Jihova, mu kiki, muéne u sanguluka kiavulu. O ku kalakala kiavulu phala ku kuatekesa o jiphange jetu, ku bhekela kisangusangu kia dikota. Saí phange ua mu kuatekesa ku tunga o Ididi ia Ubhezelu, ni ku kuatekesa o jiphange a bhita mu mavuua, uambe kuila, ki bhonza ku jimbulula o kisangusangu kijila mu ku bhanga o kikalakalu kiki. Muéne uambe: “O ku mona o kisangusangu kia jiphange ni kisakidilu kiâ, kioso kia kala ni Kididi Kia Ubhezelu kia ubhe, mba kioso ki tu a kuatekesa kia bhita mu mavuua, ki tu bhangesa ku mona kuila, o nguzu ietu ni kikalakalu ki tua bhange, kiala ni valolo.”

⁸ O kilunga kia Jihova mu izuua ietu, kiene mu kuatekesa o kikalakalu kia Utuminu. Ku muvu ua 1904, o phang’etu C. T. Russell ua soneka: “Kala muthu mudietu ua tokala ku bhanga ioso ia tena, phala ku bhana o kithangana kiê, ni kitadi kiê, ni ima ia mukuá, phala ku bhana kijingu kua Jihova.” Sumbala ki tu bhonza ku di  bhakula mu kikalakalu kia Jihova, maji o ku bhanga kiki, ki tu bhekela mabesá avulu. (2 Sam. 24:21-24) O kuila tu tena ku bhana o ima i tuala na-iu phala ku kuatekesa o kikalakalu kia Utuminu?

9. Kitendelesu kiahi kia bhanene Jezú ki tu sanga mu divulu dia Luka 10:2-4, ki tu kuatekesa phala ki tu zange o kithangana kietu?

⁹O kithangana kietu. Ku bhinga kithangana kiavulu ni nguzu iavulu phala ku soneka ni ku bhanga o madivulu metu, ku iudika o iônge, ku tunga Ididi ia Ubhezelu, ni ku kuatekesa o jiphange a bhita mu mavuua ni ku bhanga dingi ikalakalu ia mukuá. Etu tuala ngó ni 24 a ji ola ku kizuua. Maji né kiki, Jezú ua tu bhana kitumu ki tena ku tu kuatekesa ku bhana valolo ku kithangana kietu. Kioso kia tumikisa o maxibulu mê mu ukunji, Jezú ua a tendelesa: “Ki mu imane mu ku menekena ue muthu uoso-uoso mu njila.” (Luka 10:2-4) Mukonda diahi Jezú ua a tendelesa kiki? Saí diiala uambe: “Mu izuua ia Jezú ka kexile mu di menekena ni lukuaku, maji mu veji dia kiki, akexile mu dibhabha ku makunda veji javulu, katé muene ni ku fukama bhoxi. O ku bhanga kiki, kua kexile mu ku a katula kithangana kiavulu.” Jezú ka kexile mu longa o akaiedi’ê ku kala indanda. Maji muéne ua kexile mu ku a kuatekesa kuijiia kuila, ene ka kexile ni kithangana kiavulu, ni kuila o kithangana kiexile kithangana phala ku boka. (Efe. 5:16) O kuila tu tena ku belesela o kitendelesu kiki, phala tu kale dingi ni kithangana kia ku kuatekesa mu sidivisu ia Utuminu?

10, 11. (a) Mu ukexilu uahi, o kitadi ki tu bhana mu vondadi ietu kia mu kuatekesa o kikalakalu kia Utuminu ku mundu uoso? (b) Ndunge iahi i tu sanga mu divulu dia 1 Kolindo 16:1, 2 i tu kuatekesa?

¹⁰O kitadi kietu. Ku bhinga kitadi kiavulu phala ku kuatekesa o sidivisu ia Utuminu ku mundu uoso. Mivu joso, ku bhinga mazunda ni mazunda a ji dolale, phala ku kuatekesa o ibhindamu ia tufunga tua ilunga, ni aboki a katunda, ni akunji a jixi joso. Tundé ku muvu ua 1999, a tungu-ku kiá 24.500 a Ididi ia Ubhezelu mu jixi mua kambe o jimbongo. Né kiki, kua bhingi dingi 6.400 a Ididi ia Ubhezelu. Ku jimbeji joso ene mu bhanga 100 a mazunda a Mulangidi ni Despertai!. O kikalakalu kios’iki, ene mu ki bhanga ni kitadi ki mu bhana mu vondadi ienu.

¹¹ O poxolo Phaulu ua xisa phangu phala ku i kaiela. O phangu íii, ia lungu ni kitadi ki bhana o athu mu vondadi iâ. (Tanga 1 Kolindo 16:1, 2.) Bhu kaxi ka nzumbi ikôla, Phaulu ua suínisa o jiphange jê mu Kolindo kuila, a tokalele kuijiia kiá ku dimatekenu dia semana, se kitadi kuxi kieji bhana, ka tokalele ku kingila katé ku disukilu dia semana. Kála kia bhitile ku hama ia dianga, o jiphange mu izuua ietu, a bhaka ué kitadi phala ku bhana mu vondadi iâ, kala kia tena. (Luka 21:1-4; Ika. 4:32-35) Jihova u bhana valolo ku ukexilu iú ua mundu uê.

12, 13. Mukonda diahi saí athu a banza kuila kalá ni uhete mba nguzu iavulu phala ku kuatekesa o kikalakalu kia Jihova, maji kiebhi Jihova kia-nda ku a kuatekesa?

¹²O nguzu ietu ni uhete uetu. Jihova u tu kuatekesa phala tu tene ku kalakala mu ku kuatekesa o sidivisu ia Utuminu. Muéne u kanena ku tu kuatekesa kioso ki tu bhuila. (Iza. 40:29-31) O kuila tu xinganeka kuila ki tuala ni uhete phala ku di bhakula mu kikalakalu kia Utuminu? O kuila tu banza kuila saí jiphange ja beta-kota mu uhete? Lembalala kuila Jihova u tena ku tu bhana uhete, kála kia bhangele ni Bezalele ni Aholiiabe.—Mak. 31:1-6.

¹³ Jihova u tu suínisa ku bhana o ima ietu ia valolo, sé ku kala ni hele. (Jisa. 3:27) Kioso kia kexile mu tunga o tembulu, Jihova ua zuelela akua Jijudé mu Jeluzaleme, phala ku xinganeka mu ima ia kexile mu bhanga, phala ku kuatekesa o kikalakalu  kia Utuminu. (Aje. 1:2-5) Ene a landukile, mu kiki, ka kexile mu ta o sidivisu ia Jihova ku pholo ia mienhu iâ. Kima kiambote ku tonginina kiambote se tua mu ta o sidivisu ia Jihova ku pholo. O kuila tu tena ku di tonginina kiambote, phala kuijiia kiebhi ki tu tena ku kuatekesa dingi mu sidivisu ia Utuminu mu izuua íii i sukidila-ku?

14, 15. (a) Kiebhi ki tu suínisa o phangu ia jiphange jetu kalá ni jimbongo javulu? (b) Ihi i tua mesena ku bhanga ué?

¹⁴ Athu avulu a tungu mu jixi mua kambe jimbongo. O kilunga kietu, kiene mu kalakala kiavulu phala ku ‘kuatekesa’ o jiphange jetu mu jixi jiji. (2 Kol. 8:14) Maji né kiki, katé muene ni jiphange kala ni jimbongo javulu, a bhana valolo ku ujitu uala na-u ua ku bhana. Jihova u sanguluka kiavulu kioso kia mona kuila, o athu enhá kalá ni jimbongo javulu, maji a mu bhana o ima ia tena o ku bhana.—2 Kol. 9:7.

¹⁵ Saí ixi mu África, o jiphange a katula mbandu ia mábhia mâ, anga a sumbisa o ibundu i tunda-mu, phala ku kuatekesa o kikalakalu kia Utuminu. Mu ixi ienhii, o jiphange a mesenene ku kuatekesa mu sidivisu ia ku tunga o Ididi ia Ubhezelu. Maji o kikalakalu kiki, a kexile mu ki bhanga mu thembu ia tokalele muia ku mábhia mâ. Maji mukonda dia ku mesena kiavulu ku kuatekesa mu sidivisu ia ku tunga o Ididi ia Ubhezelu, ene a kexile mu dianga kuia mu tunga, kioso kia zubha, kiene kia kexile múia mu mábhia. Kiki kilondekesa kuila, akexile ni ukexilu ua ku bhana! Kiki ki tu lembalesa o jiphange mu Masedonha iokulu. Ene akexile ni “uadiama uâ uazongo,” maji né kiki, ene a diondela Phaulu phala ku a ehela ku bhana kitadi ku jiphange jâ. (2 Kol. 8:1-4) Tua tokala ué ku ‘bhana kala kioso kia soko o kubhanduluka kuetu, ni kioso kiasoko mabesá ma tu bhana Jihova Nzambi ietu.’—Tanga Matendelelu 16:17.

16. Kiebhi ki tu tena kuijiia kuila o ima ietu i tu bhana kua Jihova muéne u i xikina?

¹⁶ Kioso ki tu di bhakula, tua tokala ku di langa, phala ki tu jimbe o ima ia beta-o-kota mu valolo, kála o jindandu jetu. Kála kia bhangele akua Izalaiele iokulu, tua tokala ku bhanga ioso phala Nzambi ku xikina o jisata jetu. Ihi i tena ku bhangesa Jihova ku kamba ku tambula o jisata jetu? Tua tokala kuijiia kuila, o kikalakalu kietu kia beta-o-kota, o ku langa o muiji uetu ni ku bheza Jihova. Tu tena ku kuatekesa ku tunga o Ididi ia Ubhezelu, ku kuatekesa o athu ió a bhiti mu mavuua, mba ku bhanga ima ia mukuá phala ku kuatekesa o Utuminu. Maji se ki tu dikila ué o ibhindamu ia muiji uetu mu nzumbi mba mu xitu, Jihova kanda ‘xikina’ o jisata jetu. Ki tu tena ku bhana kua Jihova o ima ki tuala na-iu. (Tanga 2 Kolindo 8:12.) Tua tokala ué ku kolokota mu ku suínisa o ukamba uetu ni Jihova, phala muéne ku tu xikina. (1 Kol. 9:26, 27) Tu tena ku dielela kuila se tu belesela o itumu ia Bibidia, o jisata jetu ja-nda tu sangulukisa, ni ku ji “xikina” kua Jihova.

17, 18. Ihi i tu banza ia lungu ni jiphange a mu di bhakula mu ku kuatekesa o ikalakalu ia Utuminu, ni ihi i tua tokala o ku xinganeka?

¹⁷ Jiphange javulu a mu di ‘bhakula kala sata io bhakuile kua Nzambi,’ phala ku bhanga o kikalakalu kia Utuminu. (Fil. 2:17) Etu tu sakidila kiavulu o jiphange ala ni ukexilu ua ku di bhakula. O ahatu ni an’a a jiphange jetu ala ku pholo mu ku kuatekesa o ikalakalu ia Utuminu, a tokala ué ku a ximana, mukonda ene a kuatekesa uê.

¹⁸ Ku bhinga ku suína phala ku kuatekesa o kikalakalu kia Utuminu. Tu sambe ni tu xinganeke kiebhi ki tu tena ku kalakala phala Jihova. Ijiia kuila lelu tua mu tambula mabesá avulu, maji o mabesá a beta-o-kota, tua-nda ku a tambula ku hádia, “ku mundu uà keza-ku.”—Mar. 10:28-30.