1, 2. Ihi ia xinganekene o jipoxolo, ande dia Jezú ku bhanga o njila ia sukina phala kuia mu Jeluzaleme?

‘O DIULU dia zele, etu tu tena o ku mona o dieji dia mu fukunuka. Mu usuku ua bhitile, o alangidi mu Jeluzaleme sumbala a ki mono ué. Kioso o makota a Inzo ia ku fundisa, kia mono kiki, a bhana o ngolokela ia kuila o mbeji ia Nizá ia mateka kiá. O ngolokela ia bhana o akunji, ia di muange ni lusolo luoso. Katé muene ni athu kuku evu o ngolokela íii. Jezú ua mesene kuia mu Jeluzaleme ande dia fesa ia Phasu ku mateka.’

² Íii iexile o ixinganeku ia jipoxolo, kioso kia kexile ni Jezú, ande dia ku bhanga o njila ia sukina phala kuia mu Jeluzaleme. Mu kithangana kieniókio, ene a kexile ku Peleia, ku sámbua ia Ngiji ia Njolodá. (Mat. 19:1; 20:17, 29; Mar. 10:1, 32, 46) Mukonda o Jijudé ejidile se thembu kuxi ia tokalele o ku mateka o kizuua kia dianga kia mbeji ia Nizá, ene a kexile mu kingila 13 dia izuua phala ku bhanga o fesa ia Phasu, kioso ki boba o dikumbi, mu kizuua kia 14 kia mbeji ia Nizá.

3. Mukonda diahi o Jikidistá a-ndala kuijiia kiambote o kizuua kia Phasu?

³ O kizuua kia Lembalasa ia Kufuá Kua Jezú, kia lungu ni kizuua kia Phasu, kia-nda bhita kioso ki boba o dikumbi ku mbeji ia Kasamanu, ku kizuua kia 14, ku muvu ua 2014. Kiki kia-nda kala kizuua kia katunda phala o Jikidistá ja kidi, ni athu ene mu kuíza mu fesa íii. Mukonda diahi? Mukonda dia íii i tua tange mu divulu dia 1 Kolindo 11:23-25 jambe: ‘Ngana Jezú, usuku uenhó ua mu bhakuile ku jinguma, ua katuile o mbolo. O kia zubha ku sakidila Nzambi, anga u i bukula, uixi: Iú u lombolola o mukutu uami uo bhane mukonda dienu. Mu bhanga jinga kienhiki mu ku ngi banze-me. Kiene kimoxi ué kia bhangele ku kopho.’

4. (a) Ibhuidisu iahi sumbala i ua tokala o ku di bhanga ia lungu ni Lembalasa ia Kufuá Kua Jezú? (b) Kiebhi kiene mu sola o kizuua kia Lembalasa ia Kufuá Kua Jezú ku mivu ioso? (Tala o kaxa  “Lembalasa ia Kufuá Kua Jezú ku Muvu ua 2014.”)

⁴ Ki kuala phata kuila eie ua-nda kala ué mu kizuua  kieniókio, kia fesa ia tumina Jezú ku maxibulu mê, phala ku i bhanga ku mivu ioso mu ku lembalala o ufuilu ué. Ande dia kizuua kieniókio, ua tokala u dibhuidisa: ‘Kiebhi ki tua tokala o ku di pelepalala phala o Lembalasa ia Kufuá Kua Jezú? Ima iahi iene mu londekesa mu Lembalasa ia Kufuá Kua Jezú? Kiebhi kia tokala o ku bhanga o kiônge kiki? Mukonda diahi o Lembalasa ia Kufuá Kua Jezú ni ima ia londekesa-mu, iala ni valolo phala eme?’

5. Ihi iambele Jezú ku maxibulu mê phala ku pelepalala o fesa ia Phasu?

⁵ Kioso kiambele Jezú ku jipoxolo jê phala ku pelepalala o dixilu phala o fesa ia Phasu, muéne ka a ambela phala ku iukisa-mu ima iavulu. Mu veji dia kiki, muéne ua mesenene ku sanga ngó dixilu dia zele dia soko phala muéne ni maxibulu mê. (Tanga Marku 14:12-16.) O jipoxolo eji pelepalala ioso ia tokelele phala o fesa ia Phasu, kála o mbolo ni vinhu. Kioso kia zubha o fesa ia Phasu, Jezú ua zuela ia lungu ni mbolo ni vinhu.

6. (a) Kioso kia bhiti o fesa ia Phasu, ihi ia zuela Jezú ia lungu ni mbolo? (b) Kiebhi kia bhanga o mbolo ia Lembalasa ia Kufuá Kua Jezú?

⁶ O poxolo Matesu, ua kexile ué bhenhobho, ua soneka: “Jezú u katula mbolo, u sakidila Nzambi, hé u i bukujula, anga u i uanena jixibulu, uixi: Amenu, mu die.” (Mat. 26:26) O “mbolo” ki i kexile ni felemendu, kála o mbolo ia bhangele mu Phasu. (Mak. 12:8; Mate. 16:3) O mbolo a i bhangele ni tiliku ni menha. Ka i bhangele ni felemendu, né móngua. Ia kexile kála bulaxa, ki i bhonzele ku i bukujula. elu, ande dia kizuua kia Lembalasa ia Kufuá Kua Jezú, o tufunga a bhinga muthu phala ku bhanga o mbolo ni tiliku ni menha, anga a iohá. (Se ki bhuala tiliku, a tena ku i bhanga ni fuba ia luoso, mba fuba ia masa mba ia masambala.) Mba a tena ué ku bhanga o mbolo ia Jijudé, maji ioio ki iambata maiaki né jisebhola.

7. Ihi ia kexile mu kopho ia kuatele Jezú bhu maku mu Lembalasa? Vinhu ia ukexilu uahi ia tokala o ku kala mu Lembalasa ia Kufuá Kua Jezú?

⁷ Matesu ua suluka uixi: “[Jezú] anga u katula kopho, u sakidila Nzambi, anga u a bhana, uixi: Nuenu-ku enuenu oso.” (Mat. 26:27,  28) O ia kuatele Jezú bhu maku, ia kexile kopho ia vinhu ia kusuka. (Ki iexile sumu ia mividi, mukonda o thembu ia jiuva ja mividi ia bhitile kiá.) Ku Phasu ia dianga ia bhangele ku Ijitu ki bhu kexile vinhu, maji Jezú kambe kuila ka tokele ku nua vinhu mu fesa ia Phasu. Mu Lembalasa ia Kufuá Kua Jezú, bhua kexile vinhu. Mu kiki, o Jikidistá lelu, mu ku bhanga o Lembalasa ia Kufuá Kua Jezú, muene mu kala vinhu. Kuma ki ku bhingile dingi kima phala ku bhana valolo ia manhinga a Jezú, kiene ué kimoxi, ki ku bhingi vinhu ia te kalu phala kulombolola o manhinga a Jezú. Mu kiki, ku bhinga ngó vinhu ia kusuka. Ki kale vinhu io bhange ku bhata, mba ia sumba mu maloja.

8. Mukonda diahi o Jikidistá a bhana valolo ku mbolo ni vinhu?

⁸ Poxolo Phaulu uambela o Jikidistá ka kexile jipoxolo kuila, a tokalele o ku bhanga jinga o Lembalasa ia Kufuá Kua Jezú. Phaulu ua sonekena o jiphange mu Kolindo: ‘O kia zubha ku sakidila Nzambi, anga u i bukujula, uixi: Iú u lombolola o mukutu uami uo bhane mukonda dienu. Mu bhanga jinga kienhiki mu ku ngi banze-me.’ (1 Kol. 11:23, 24) Kiene ué kimoxi, o Jikidistá lelu ene mu bhanga jinga o Lembalasa íii ku mivu ioso, ni ku bhana valolo ia kuijiia o dilomboluelu dia mbolo ni vinhu.

9. Ihi iene mu banza o athu ia lungu ni mbolo ia londekesa Jezú?

⁹ Athu amukuá a jingeleja, amba kuila Jezú ua zuela o mukutu ué ua xitu: ‘Iú uene o mukutu uami.’ Mu kiki, athu avulu a xikina kuila kuexile madiuanu, o mbolo ia kitukile o mukutu ua Jezú. Maji ki kiene kia bhitile. * O mukutu ua Jezú ua kexile bhu kaxi ka jipoxolo, kála o mbolo ué ieji kudia. Mu kidi, Jezú ua kexile mu ta ifika kála kia kexile mu bhanga mu ithangana ia mukuá.—Nzuá 2:19-21; 4:13, 14; 10:7; 15:1.

10. Ihi i lombolola o mbolo iene mu kala mu Lembalasa ia Kufuá Kua Jezú?

 ¹⁰ O mbolo ia kexile mu mona o maxibulu, ieji kudia ene, ia lomboluele o mukutu ua Jezú. Mukutu uebhi? Mu kithangana kieniókio, o jiselevende ja Nzambi, a mono kuila Jezú, kioso kia bukujula o mbolo, o ifuba iê ki i bukujuka, mu kiki, ene a banze kuila, o mbolo ia lombolola ngó o “mukutu ua Kristu,” o kilunga kia Jikidistá a a undu. (Efe. 4:12; Loma 12:4, 5; 1 Kol. 10:16, 17; 12:27) Mu ku bhita ithangana, kioso kia tokuesa o Mikanda Ikôla, a tongolola kuila, o mbolo ia lombolola o mukutu ua xitu ua Jezú. O Bibidia i zuela mu veji javulu kuila, Jezú mu “xitu ua tale hadi,” katé mu kufuá kuê ku taka. Mu kiki, mu Lembalasa ia Kufuá Kua Jezú, o mbolo ilombolola o mukutu ua xitu, ua bhana Jezú phala ku “tu ambatela ituxi ietu.”—1 Phe. 2:21-24; 4:1; Nzuá 19:33-36; Jihe. 10:5-7.

11, 12. (a) Ihi ia zuela Jezú ia lungu ni vinhu? (b) Ihi ilombolola o vinhu mu Lembalasa ia Kufuá Kua Jezú?

¹¹ Kiki kia-nda tu kuatekesa o kuijiia kiambote ia zuela Jezú ia lungu ni vinhu. Tu tanga: ‘Kiene kimoxi ué kia bhangele ku kopho, kia zubha o kudia fesa, u i kuata, uixi: (Kiki kizuelu kietu.) O kopho íii, kiene o kikutu kiobhe bhu kaxi ka Nzambi ni athu, kiojike kidimbu ni manhinga mami.’ (1 Kol. 11:25) Ji Bibidia javulu ji zuela ué kienhiki, kála kia zuela o Bibidia ia lungulula Robert Young, iambe: “O kopho, o kikutu kiobhe kia manhinga mami.” O kuila o kopho ia kuatele Jezú, iexile o kikutu kiobhe? Kana. O kizuelu “kopho,” kilombolola o vinhu ia kexile mu kopho. Ihi ia zuela Jezú ia lombolola o vinhu? O vinhu ilombolola o manhinga mê eji bhubha phala kua satela.

¹² Mu divulu dia Marku tu sanga-mu o izuelu iambe: “Iá, ene o manhinga mami, a lunduluka mu mulonga ua athu avulu. Ene o manhinga a kuatesa o Kikutu Kiòbhe bhu kaxi ka Nzambi ni athu.” (Mar. 14:24) Kiene, o manhinga a Jezú eji kua “zunza mukonda dia mundu phala kuloloka o ituxi.” (Mat. 26:28) Mu kiki, o vinhu ia kusuka, iene ilombolola o manhinga a Jezú. Bhu kaxi ka manhinga a Jezú, o “ituxi ietu iòloloke.”—Tanga Efezo 1:7.

13. O Lembalasa ia Kufuá Kua Jezú, a i bhanga kiebhi?

¹³ Se kiki kiene o kizuua kiê kia dianga kia kuia mu kiônge kia Lembalasa ia Kufuá Kua Jezú kia Jimbangi ja Jihova, ihi i ua kingila o ku mona-mu? O Lembalasa ia-nda bhita mu kididi kia tokala ni kia zele, mua-nda kala ididi ia soko, phala ene oso kuívua kiambote o dilomboluelu dia kiônge. Sumbala mua-nda kala ué ithulu, maji eie kua-nda mona ima iavulu, ilondekesa kala fesa ia dikota. Kafunga kamoxi uala ni uhete ua ku longa, ua-nda bhanga diskursu dia bhebhuluka ni ku xila kuoso, di lombolola izuela o Bibidia ia lungu ni Lembalasa ia Kufuá Kua Jezú. Muéne ua-nda kuatekesa o athu oso ku bhana valolo ku íii ia bhange Jezú phala etu. Kristu uafú kala sata, phala etu tu kale ni muenhu. (Tanga Loma 5:8-10.) O kafunga ua-nda zuela ué o idielelu iiadi ia kanena o Bibidia phala o Jikidistá.

14. Idielelu iahi iiadi, ia-nda zuela o kafunga mu Lembalasa ia Kufuá Kua Jezú?

¹⁴ O kidielelu kia dianga, kia lungu ni ku tumina ni Kristu ku diulu. Ki Jikidistá javulu a dielela o kuia ku diulu, kála o jipoxolo jê ja fiiele. (Luka 12:32; 22:19, 20; Dij. 14:1) O kidielelu kia mukuá, phala o mundu uavulu ua mu sidivila Nzambi ni ufiiele uoso mu thembu ietu. Ene ala ni kidielelu kia ku kala ni muenhu ua kalelaku mu palaízu mu ixi. O vondadi ia Nzambi, a-nda i bhanga mu ixi kála kiene mu i bhanga ku diulu, kala kiene mu bhinga o Jikidistá tundé ukulu. (Mat. 6:10) O Mikanda Ikôla izuela o muenhu ua madiuanu ua-nda kala nau ku hádia ni hádia.—Iza. 11:6-9; 35:5, 6; 65:21-23.

15, 16. Ihi ia bhanga ni mbolo mu Lembalasa ia Kufuá Kua Jezú?

 ¹⁵ Kioso kia-nda zubha o kulombolola o idielelu iiadi íii, o kafunga ua-nda zuela kuma, kiki kiene o kithangana kia ku bhanga kála kia tumine Jezú ku jipoxolo jê o ku bhanga. Kála kia ki zuela kiá, kua-nda kala mbolo sé felemendu ni vinhu ia kusuka, o ima íii, ia-nda kala bhu mbandu ia kafunga ua-nda bhanga o diskursu. Muéne ua-nda tanga o isoneku ia Bibidia, ilombolola ihi ia zuelele ni ihi ia bhangele Jezú ni mbolo. Mu kifika, mu divulu dia Matesu tu tanga-mu: ‘Jezú u katula mbolo, u sakidila Nzambi, hé u i bukujula, anga u i uanena jixibulu, uixi: Amenu, mu diê. Iene i lombolola o mukutu uami.’ (Mat. 26:26) Jezú ua bukujula o mbolo sé felemendu, phala ku bhana ku jipoxolo jê ja kexile kumoxi ni muéne. Mu kizuua kia 14 kia mbeji ia Kasamanu, mu Lembalasa ia Kufuá Kua Jezú, eie ua-nda mona jimbolo sé felemendu bhu dilonga.

¹⁶ Kua-nda kala malonga a soko, phala ku bhitisa o mbolo ku athu oso a-nda kala-bho, sé ku laleka. Ka-nda ku i bhanga ni ijila ioso-ioso. Kia dianga, a-nda bhanga musambu, mu ku suluka, a-nda bhitisa o malonga a jimbolo ni ku xila kuoso. Sumbala ki athu avulu, mba sé muthu ua-nda diá ku mbolo, kála kia bhitile mu ilunga iavulu ku muvu ua 2013, mu Lembalasa ia Kufuá Kua Jezú.

17. Mu Lembalasa ia Kufuá Kua Jezú, kiebhi kia kaiela o itendelesu ia Jezú ia lungu ni vinhu?

¹⁷ Mu ku suluka, o kafunga ua-nda tanga mu divulu dia Matesu ihi ia bhangele Jezú ni vinhu: ‘Nuenu-ku enuenu oso. Kuma íii ilombolola o manhinga mami, ma di zunza mukonda dia mundu phala ku loloka o ituxi. Ene o manhinga ma kuatesa o Kikutu kiobhe bhu kaxi ka athu ni Nzambi.’ (Mat. 26:27, 28) Mu ku kaiela o itendelesu ia Jezú, a-nda bhanga dingi o musambu, kiene kia bhitisa o ‘jikopho’ ja vinhu ku athu ala mu kiônge.

18. Se athu a tolo, mba né muene muthu umoxi ua-nda kudia ku mbolo ni kúnua ku vinhu, mukonda diahi ene oso a tokala kuia mu kiônge kia Lembalasa ia Kufuá Kua Jezú?

¹⁸ Mu kizuua kieniókio, a-nda diá ku mbolo ni kúnua o vinhu, ió ngó a-nda ku tumina kumoxi ni Jezú ku diulu. Mu kiki, avulu a-nda kala mu Lembalasa ia Kufuá Kua Jezú, a-nda tambula ngó o mbolo ni vinhu, n’a i bhitisa ué ku akuâ. (Tanga Luka 22:28-30; 2 Tim. 4:18) Né muene avulu ka-nda kudia ku mbolo né kúnua ku vinhu, o Jikidistá joso a tokala kuia mu Lembalasa ia Kufuá Kua Jezú. Mukonda diahi? Mukonda, mu ku kala mu kiônge, a mu londekesa kuila a mu bhana valolo ku sata ia bhana Jezú. Mu kithangana kia kiônge, ene a banza ku mabesá a-nda bheka o sata ia kukula kua Jezú. Mu kifika, ene ala ni kidielelu kia ku kala bhu kaxi ka “mundu uavulu,” ua-nda bhuluka ku “hadi ia dikota.” Iá ene o abhezi a “sukula izuatu iâ, ia a izelesa mu manhinga ma Kambudi.”—Dij. 7:9, 14-17.

19. Ihi i u tena o ku bhanga, phala ku kala polondo ni kuia mu kiônge ni ku katula mbote mu Lembalasa ia Kufuá Kua Jezú?

¹⁹ O Jimbangi ja Jihova mu ixi ioso, a di pelepalala phala kuia mu kiônge kiki kia katunda. Ande dia kizuua kia Lembalasa ia Kufuá Kua Jezú, tua-nda kuixana athu avulu phala kuia mu kiônge kiki. Ande dia kizuua kiki, tua-nda tanga ué isoneku iala mu Bibidia ia lungu ni kiebhi kia bhange Jezú, ni ihi ia bhitile ande dia Lembalasa ia Kufuá Kua Jezú ku muvu ua 33 K.K. Tua-nda bhanga ioso phala tu kale mu kiônge. Tua tokala tu bhixila selu, ande dia muimbu ni musambu, phala ku sangesa o ajitu ni kuívua o milongi ioso. Etu enioso tua tokala mu kilunga, ni ajitu, tua-nda katula mbote se tu tanga o ibatulu ia Bibidia mu kiônge. Kioso ki tuia mu Lembalasa ia Kufuá Kua Jezú, tu londekesa o kisakidilu kietu ku sata ia bhana Jezú, tu londekesa ué kuila tua mu belesela o ijila Iê. ‘Mu bhanga jinga kienhiki mu ku ngi banze-me.’—1 Kol. 11:24.