MU MIKANDA Ikôla tu sanga-mu phangu iavulu ia lungu ni athu a tandujula o izuatu iâ. Lelu o athu a tanga o misoso íii, a mona kuma o ima ia kexile mu bhanga, ia iibha, maji phala o Jijudé, o ima íii ia kexile mu lombolola jiphaxi, jisonhi, njinda mba kalunga.

Mu kifika, Lubene ‘ua tandujula o izuatu iê’ kioso kia mono kuila keji tena ku bhulula phang’iê Zuze, mukonda Zuze a mu sumbisile ku ubhika. O tat’â Jakobo, ‘ua tandujula o izuatu iê’ kioso kia banze kuma Zuze a mu kuata ku kiama kia muxitu. (Dim. 37:18-35) Jobe ‘ua tandujula o izuatu iê’ kioso kia mu tangela kuila o an’ê oso afú. (Jobe 1:18-20) O mukunji, ‘ni izuatu iê ia tandujula,’ uai ku Mukunji ua Dikota Eli, phala ku mu tangela kuila o akua Izalaiele a a toluele, o kiiadi kia an’a a Eli, a a jibhile, ni kuila o álaka ia kikutu a iambatele. (1 Sam. 4:12-17) Kioso Joziia kiévu o maka mu divulu dia Kitumu, anga u mona kuma o mundu ua tele kituxi, muéne-phe “ua tandula izuatu iê.”—2 Jis. 22:8-13.

Mu kithangana kia ku fundisa Jezú, o Mukunji ua Dikota Kaiafa, ‘ua tandujula o izuatu iê’ kioso kiévu o maka, mu ku banza kuê, ua mono kuma ua kexile mu xonguena Nzambi. (Mat. 26:59-66) O kijila kia ji rabiniku kiambele kuila, uoso uivua muthu ua mu xonguena o dijina dia Nzambi, ua tokalele ku tandujula o izuatu iê. O kijila kia mukuá kia ji rabiniku, kia bhanene kioso kia buika o tembulu ia Jeluzaleme, kiambele kuila, “o io uivua o muthu ua mu xonguena o Dijina dia Nzambi ua tokala ku tandujula o izuatu iê, se ka bhange kiki, a tokala ku tandujula o izuatu iê.”

Maji se o muthu u tandujula ngó o izuatu, maji ku muxima uê, muéne ka mu divua kia iibha, o ima ia bhanga ki i kala ni valolo ku pholo ia Nzambi. Mu kiki, Jihova ua zuelela o mundu uê phala ku ‘tandula o mixima iâ, bhu kididi kia ku tandula o izuatu iâ, phala n’a vutuke kua Jihova.’—Joue. 2:13.