KU MUVU ua 1923, o Dixilu dia kulondekesa Mautonokenu mu mbanza ia São Paulo, iezalele ni athu! O kuila u tena kuívua o dízui dia Phange George Young? O izuelu iê a mu i lungulula mu Phutu, kizuelu mu kizuelu. O 585 kia athu akexile mu dixilu a mu kuívua. O ibatulu ia Bibidia mu phutu, a mu ilondekesa mu filme. Tumikanda tuavulu a tu ixana “Milhões Que Agora Vivem Jamais Morrerão,” a tu uana mu madimi a Phutu, a Kingileji, Alemão ni dimi dia Italianu. O athu a uabhela kiavulu o diskursu! O njimbu ia di muange. Mu ku bhita izuua iiadi, o dixilu diezalele dingi, phala o athu kuívua o diskursu dia mukuá. Maji ihi ia bhekele o izulukutu ienioió?

Ku muvu ua 1867, Sarah Bellona Ferguson, ua tundile ku Estados Unidos iu uendele mu tunga ku ixi ia Brasil. Ku muvu ua 1899, Sarah uejidile kuila ua sangele o kidi, kioso kia tange o madivulu a Bibidia, a mu bhekele phang’ê ku Brasile, a tundile nau ku Estados Unidos. Mukonda muéne ua uabhele kiavulu o ku tanga, ua soneka o dijina diê, phala ku tambula O Mulangidi mu dimi dia Kingileji ku mbeji joso. Muéne ua sangulukile kiavulu ni njimbu iambote ia Bibidia, mukonda dia kiki, ua sonekena Phange C. T. Russell, mu ku mu tangela kuila muéne uexile o ‘phangu ilondekesa kuila se-ku muthu uala dikanga diavulu a kamba ku mu sanga ni njimbu iambote.’

Sarah Ferguson, ua bhange ioso ia tenene phala kubokela akuâ, o njimbu iambote ia Bibidia, maji ua kexile mu di bhuidisa se nanhi ueji mu kuatekesa ni muiji uê, ni athu a mukuá ku Brasil. Ku muvu ua 1912, o Betel ia Brooklyn ia tu tangela kuila, saí muthu ua kexile mu kuíza mu mbanza ia São Paulo, ua kexile mu bheka tumikanda tuavulu tua kexile ni diambu mu phutu, Onde Estão os Mortos? Ku muvu ua 1915, muéne uambe kuila ua sasumukine, mu ku mona o Adilongi a Bibidia avulu, akexile mu kingila kuia ku diulu mu kithangana kieniókio. Muéne ua soneka ia kexile mu banza: “Abha o athu ku Brasil ni ku América do Sul? . . . Kioso ki u xinganeka o athu oso a tungu ku ixi ia América do Sul, u tena ku  mona kuila kua bhingi hanji ku bhanga kikalakalu kiavulu kia ku bhongolola.” Sé phata, kuala kikalakalu kiavulu kia ku bhongolola!

Ku muvu ua 1920, nake dia minzangala ku Brasil, exile endexi a ji naviiu, endele mu iônge mu ilunga mu Mbanza ia Nova Yorque, kioso kia kexile mu kingila ku iudika o naviiu iâ ia Ita. Mu ku vutuka ku mbanza ia Rio de Janeiro, ene a tangela akuâ o njimbu iambote ia di longo mu Bibidia. Mu ku bhita kithangana, ku mbeji ia Katanu, ku muvu ua 1923, George Young, uexile kafunga ka ilunga, ua tula ku mbanza ia Rio de Janeiro, kua sange athu a mesenene ku di longa o Bibidia. Muéne ua bhange ioso phala ku lungulula madivulu avulu mu dimi dia Phutu. Mu ku bhita kithangana o Phange Young uai katé mu mbanza ia São Paulo, kua tungile 600.000 ia athu. Kuenhoko muéne ua bhange madiskursu avulu, ni ku uana Mazunda a madivulu kála ki tua tange kiá ku dimatekenu. Muéne ua tange: “Mukonda dia ku kala ubheka uami, nga bhingile kikuatekesu kia ji jurnale, phala kuboka.” Muéne uambe ué kuila iá exile “o madiskursu a dianga o ku bhanga ni kikuatekesu I.B.S.A. ku Brasil.” *

Mu ku jimbulula ia lungu ni ixi ia Brasil, O Mulangidi ua 15 ua Kaiiadi ua muvu ua 1923, uambe: “Kioso ki tu xinganeka kuila o kikalakalu kia mateka ku mbeji ia Kanake mu kizuua kia 1, ki ku kexile madivulu, tu diuana mu ku mona kiebhi Ngana kia besoala o kikalakalu.” O musoso u suluka mu ku jimbulula kuila, Phange Young ua bhange, 21 a madiskursu tundé ku kizuua kia 1 kia mbeji ia Kanake, ndu ku kizuua kia 30 ku mbeji ia Katutu, 3.600 athu evu o madiskursu enhá, 2 ua a bhange mu mbanza ia São Paulo. Mu mbanza ia Rio de Janeiro, o njimbu iambote ia Utuminu, ia kexile múia ni ku di muanga. Ki ku bhitile ji mbeji javulu, a bhanene kiá 7.000 a madivulu mu dimi dia Phutu! O Mulangidi ua Phutu, a mateka ku u bhanga ku mbeji ia Kamoxi ni Kaiiadi ku muvu ua 1923.

George Young uai mu kunda Sarah Ferguson, O Mulangidi u jimbulula: “O phange ua mu sange mu dixilu dia ku tambula o ajitu, muéne ua bhiti kithangana se kuzuela kima. Muéne ua kuatele o lukuaku lua Phange Young, mu kusuka-ku muéne ua zuela: ‘Eie u kafunga ka ilunga ka kidi muene?’” Ki ku bhiti kithangana kiavulu muéne ni an’ê a a batizala. Mu kidi, muéne ua kingila 25 a mivu phala ku mu batizala! O Mulangidi ua 1 ua mbeji ia Kakuinhi ua muvu ua 1924, ua tange kuila 50 a athu a a batizele ku ixi ia Brasil, a betele-o-kota mu mbanza ia Rio de Janeiro.

Mu ku bhita 90 a mivu ki ku bhingi kuibhula dingi: “Abha o athu ku Brasil ni ku América do Sul?” Lelu 760.000 a Jimbangi ja Jihova ndenge a mu boka o njimbu iambote ku ixi ia Brasil. Ku ixi ioso ia América do Sul, o njimbu iambote ia Utuminu a mu i boka mu dimi dia Phutu, ni dia Espanhol, ni mu madimi avulu a uvualukilu. Ku muvu ua 1915, Sarah Ferguson, ua zuelele kidi, ‘kua bhingile hanji ku bhanga kikalakalu kiavulu kia ku bhongolola.’—Ima ietu io bhakele ku Brasil.