Mu muimbu uê ua lungu ni ku ximana o Mubhangi, o Sobha Davidi uexile mukua Izalaiele uimbi: ‘Nga sanguluka mu kubhanga ki ua mesena eie u Nzambi iami, o ngonge ié ia ngi kala moxi dia muxima.’ (Jisá. 40:8) Sumbala ni ibhidi mba izukutisu ia bhiti na-iu ku muenhu, Davidi ua sangulukile mu ku bhanga o vondadi ia Nzambi. Mu kidi, Davidi ki muéne ngó uexile mubhezi ua Jihova ua sidivila o Nzambi ia kidi ni kisangusangu.

O poxolo Phaulu ua tumbula o izuelu ia Jisálamu 40:8, kua Mexiia, mba Kristu. Phaulu ua soneka: “Eie ku indi jisata, ni maujitu ma ibhaku, maji ua ngi bhangela o mukutu. O jixitu ja kuoha bhu kalatodio, ni ilumbu ia ituxi, ki ia ku kala mu vondadi. Né mbé o jisata ja kukatula ituxi. Ngixi-phe, kiua—Eme ngeza kiabhu’ó, eie u Nzambi, mu kubhanga o vondadi ié, kala kia ngi soneka-kiu mu Divulu dia Kitumu.”—Jihe. 10:5-7.

Kioso kiexile mu ixi, Jezú ua sangulukile mu ku mona o ima ia bhange Nzambi mu ngongo, o ku kala ni makamba mê, ni kudia kumoxi ni athu. (Mat. 6:26-29; Nzuá 2:1, 2; 12:1, 2) Maji o kima kia betele-o-kota kia mu bhangele ku sanguluka, o ku bhanga o vondadi ia Tat’ê ia diulu. Mu kidi, Jezú uambe: “Kúdia kuami, o kubhanga vondadi ia ió ua ngi tumu, ni kuzubha o kikalakalu kiê kia ngi bhana o kubhanga.” (Nzuá 4:34; 6:38) O maxibulu a Jezú, a di longo ni Mesene iâ, ihi i bheka o ku sanguluka kua kidi. Ni kisangusangu kioso, ene a boko o njimbu iambote ia Utuminu mu vondadi iâ.—Luka 10:1, 8, 9, 17.

Jezú ua tumina o maxibulu mê: “Ndenu, mua ka longe jixibulu ku akua jixi joso, ni ku a batizala mu dijina dia Tata, ni dia Mona, ni dia Nzumbi Ikôla; ni ku a longa kualuka ima ioso kiá i nga mi  tumu eme. Talenu, eme-muène ngà kala ni enu izuua ioso, katé ku dizubhilu dia mundu.” (Mat. 28:19, 20) O ku bhanga o kikalakalu kiki, kua lungu ni ku bokela o athu kabasa kididi, ku kunda ió a mesena kuijiia o kidi, ni ku a longa o Bibidia. O ku bhanga o kikalakalu kiki, ku bheka kisangusangu kia dikota.

O ukexilu uetu uambote ua ku mona o ima, ki kale o athu a mesena kuívua o njimbu mba kana, ku tu kuatekesa ku sanguluka mu ukunji. Mukonda diahi tu kolokota ku boka o njimbu iambote, sumbala saí athu ka mesena ku tuívua? Mukonda tuijiia kuma kioso ki tu boka o njimbu iambote ia Utuminu ni ku bhanga maxibulu, tu londekesa o henda ietu kua Nzambi ni ku athu. Sé phata, ki kale o mienhu ietu mba o mienhu ia athu, iala mu iluezu. (Ize. 3:17-21; 1 Tim. 4:16) Tu di longe ima ia kuatekesa o jiphange jetu o ku kolokota mu ukunji uâ, mu madiembu mua tungu o athu ka mesena kuívua njimbu.

O ku bhanga ibhuidisu iambote mu ukunji uetu, ku bhangesa o athu ku tuívua. Saí kizuua mu kamene, Amalia ua mono diiala dia kexile mu tanga jurnale mu parke. Muéne ua mu zukama, anga u mu ibhula se ua tangele-mu njimbu iambote. Muéne ua tambuijila kana, Amalia uambe: “Nga ku bhekela njimbu iambote ia lungu ni Utuminu ua Nzambi.” O diiala dia uabhela o njimbu íii, iu ua xikina ku di longa o Bibidia. Mu kidi, Amalia ua mateka ku longa o Bibidia ku kitatu kia athu bhu kididi kieniókio.

Janice ua kexile mu boka ku sidivisu iê. Mu ku mona kuila o mulangidi ni koleka iê, a uabhele o milongi ia kexile mu Mulangidi, Janice ua a kanena ku a bhekela O Mulangidi mbeji joso. Kiene kia bhange ué ni koleka iê ia mukuá ua uabhele kiavulu o milongi ia Mulangidi ni ia Despertai! Kiki kia bhangesa o koleka ia mukuá ku bhinga uê o Mulangidi. Janice uambe: “Didi dibesá dia dikota dia tundu kua Jihova!” Mu kidi, muéne ua kexile mu bhana O Mulangidi ku 11 dia athu.

Saí kafunga ka ilunga ua tendelesa kuila, mu ku boka inzo ni inzo, o aboki ka tokala ku di xalesa ni muthu mu kuzuela ngó kuila, a-nda vutuka kizuua kiéngi. Mu veji dia kiki, ene a tena kuibhula o muthu: “O kuila ua mesena ngi kulondekesa kiebhi ki tu longa o Bibidia?” mba, “Kizuua kuxi ki ua mesena ngi vutuka phala ku suluka ni maka metu?” O kafunga ka ilunga ua zuela kuila, mu ku bhanga kiki, o jiphange mu kilunga kua kexile mu sidivila, a mateka ku longa o Bibidia ku 44 kia athu, mu semana imoxi ngó.

O ku kunda dingi o athu u tua zuela nau, sé ku bhita izuua iavulu, ku tena ku bhangesa o athu ku xikina ku di longa o Bibidia. Mukonda diahi? Mukonda mu ku bhanga kiki, tu londekesa kuila tua  mesena muene ku kuatekesa o athu, ku xikina o kuijiia ihi i longa o Bibidia. Saí muhatu, o kia mu ibhuidisa se mukonda diahi ua xikina ku di longa o Bibidia ni Jimbangi ja Jihova, muéne ua tambuijila: “Nga mateka ku di longa o Bibidia, mukonda ene a londekesa kuila, a ngi zolo muene.”

Mu ku bhita kathangana kioso kia di longo mu Xikola ia Aboki a Thembu Ioso, Madaí, ua kexile mu longa o Bibidia ku 15 kia athu, anga u bhinga ku jiphange phala ku longa o 5 kia athu a mukuá. Avulu akexile múia mu iônge ithangana ioso. Ihi ia kuatekesa Madaí ku kala ni maxibulu avulu? O xikola ia mu longo o valolo ia ku kolokota mu ku kunda dingi o athu a zuela nau kiá, katé kia sanga ió a mesena muene ku di longa o Bibidia. O phang’etu ia mukuá ua kuatekesa ué athu avulu kuijiia o kidi kia Bibidia uambe: “Nga di longo kuma o ku kolokota mu ku kunda dingi o athu u tua zuela nau kiá, iene o ndunge phala ku kuatekesa o athu a mesena kuijiia Jihova.”

Phala ku kunda dingi o athu u tua zuela nau kiá, ni ku longa o Bibidia, ku bhinga ku suína. Maji o mabesá u tu tambula ka sokela ni nguzu i tu bhanga. Se tu boka o njimbu iambote ia Utuminu, tua-nda kuatekesa akuetu “kuijiia o kidi,” phala n’a bhuluke. (1 Tim. 2:3, 4) Kiki, ki tu bhekela kisangusangu kia dikota.