1. Kilunga kiebhi kia bhingana o mundu ua Izalaiele, mu ku sidivila Jihova? (Tala o foto ia dianga.)

LELU o mundu ua Jihova mu ixi u mu bheza mu ukexilu ua uabhela muéne. M’ukulu o akua Izalaiele exile mundu ua solele Nzambi. Maji ene a lungulula o kidi. Mukonda dia kiki, Jihova ua solo kifuxi kiéngi kia akaiedi a Kristu. Ene a kituka kilunga kia Jihova. Sumbala Jeluzaleme a i buika ku muvu ua 70 K.K., maji o kilunga kiê kia bhuluka. (Luka 21:20, 21) Mu izuua ietu, saí kifuxi kiongeka kia tokala kua Jihova. O kilunga kia Nzambi ka-nda ki buika, kioso kia-nda buika o mundu ua Satanaji. (2 Tim. 3:1) Mukonda diahi tu tena kuzuela kiki?

2. Ihi iambe Jezú ia lungu ni “hadi ia dikota,” ni kiebhi ki ia-nda mateka?

² Jezú ua kanene o izulukutu ieji bhita mu izuua isukidila-ku: “ Thembu ioio o phaxi iê, kiluua ngó i kala-ku, tunde ku dimatekenu dia’xi katé ni kiki; o ku hádia ue ki ia kà kala-ku dingi.” (Mat. 24:3, 21) O hadi íii, ia-nda mateka kioso Jihova kia-nda buika ‘Babilonha ia dikota,’ o kisangela kia jingeleja ja makutu, bhu kaxi ka jinguvulu ja mundu. (Dij. 17:3-5, 16) Ihi ia-nda bhita kioso kia-nda i buika?

3. Kioso kia-nda bhita o kibuika kia jingeleja ja makutu, ihi ia-nda bhita ni mundu ua Jihova?

³ Kioso kia-nda buika o jingeleja ja makutu, Satanaji ni mundu ué a-nda bhilukila o mundu ua Jihova. Mu kifika, ia lungu ni “Ngôngo, o ixi ia Mangongo,” o Mikanda Ikôla i kanena: “Kienhokio-phe, ua kà banda, hé ua k’èza kala kibhungu, anga ua kà di bhanga kala dituta phala kubhungina o ngongo, ni eie ni masoladi’é oso, ni ifuxi ia vulu ia ku bande.” Mukonda o Jimbangi ja Jihova kala ni masoladi, ene akua paze, a-nda moneka kála ki kia-nda bhonza ku a zukutisa. Maji o athu a-nda banza ku bhanga kiki, a-nda di nganala!—Ize. 38:1, 2, 9-12.

4, 5. Ihi ia-nda bhanga Jihova kioso Satanaji kia-nda fikisa ku kuata ku jiselevende jê?

⁴ Ihi ia-nda bhanga Nzambi kioso kia-nda zukutisa o mundu uê kua Satanaji? Jihova ua-nda bhângela o mundu uê, mu kiki, ua-nda londekesa kuila muéne o Suke-ku mu Ngongo Ioso. Kioso kia zukutisa o mundu uê, Jihova u divua kala ala ku mu zukutisa muéne. (Tanga Zakadiia 2:8) Mu kiki, o Tata ietu ia diulu, ua-nda bhanga ioso ni lusolo, phala ku tu bhulula. Kioso kia-nda zubha o ku tu bhulula, muéne ua-nda buika o mundu ua Satanaji ku Alumajedone, o “ita ia kizuua kia Dikota kia Nzambi, Muteni-a-Ioso.”—Dij. 16:14, 16.

⁵ Ia lungu ni Alumajedone, o Bibidia i zuela: “Jihova ua kuata mvunda ni akua jixi, xitu ioso ua kà funda na-iu; athu a ibha ua kà a bhakula ku xibhata, kiene kiambe Jihova. Jihova dia Ilombo Ieta iú uambe kiki: Tala, kuxixima kua-nda kutunda mu ixi ni ku bokona mu ixi ia mukuá, anga ku a kà fundumuka dilamba dia dikota ku maxokololo ma jixi. Oso a ka bhakula ku kalunga kuala Jihova kizuu’okio, a kà dizala muene tundé ku’andekela ixi katé ku ia suku; ka-nda ku a tela nzôngo ia kudila, mba ku a bhongolola, mba ku a funda; maji a kà di bhanga kala ditobe ku thandu’a mavu mu ngongo.” (Jel. 25:31-33) O Alumajedone ia-nda buika o mundu iú ua iibha ua Satanaji. Maji o kilunga kia Jihova kia-nda nangenena katé ku hádia ni hádia.

6, 7. (a) Kuebhi ku tunda o “mundu uavulu?” (b) Ihi i londekesa kuila o kilunga kia Nzambi kia mu dibandekesa kiavulu?

⁶ O kilunga kia Nzambi mu ixi kia mu kolokota ku kula, mukonda kiezala ni athu a a xikina kua muéne. O Bibidia izuela: “Mesu ma Ngana ma lungu kua iá aiuka, ki a dikola, u ta-ku matui ku misambu iâ.” (1 Phe. 3:12) Mu athu enhá a iuka, tu sanga-mu o “mundu uavulu,” a “tundu mu hadi ia dikota.” (Dij. 7:9, 14) O athu enhá a-nda bhuluka ki “mundu” uofele. Maji “mundu uavulu,” kilombolola nzungule dia athu. O kuila eie u di xinganeka bhu kaxi ka athu enhá a-nda bhuluka ku “hadi ia dikota?”

⁷ Kuebhi ku tunda o mundu uavulu? Ene a tunda mu ngongo ioso kala kia kanena Jezú. Muéne uambe: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.” (Mat. 24:14) Kiki kiene o kikalakalu kia beta-o-kota kia mu bhanga o jiselevende ja Nzambi mu izuua íii isukidila-ku. Mukonda dia Jimbangi ja Jihova kuboka  o njimbu iambote, athu avulu a di longo ku bheza Nzambi “mu nzumbi ni mu kidi.” (Nzuá 4:23, 24) Mu kifika, tundé ku muvu ua 2003 katé ku muvu ua 2012, 2.707.000 ndenge, a di batizala phala ku di bhakula kua Nzambi. Lelu kuene 7.900.000 ndenge, a Jimbangi ja Jihova, mivu joso jimidi aia mu Fesa ia Lembalasa. Etu ki tu di ximana, mukonda “o ua i kudisa-phe Nzambi.” (1 Kol. 3:5-7) Ki tuala ni phata kuila o mundu uavulu ua mu di bandekesa kiavulu mivu joso.

8. Mukonda diahi o kilunga kia Jihova kia múia ni ku di bandekesa?

⁸ O jiselevende ja Nzambi a mu dibandekesa kiavulu, mukonda Jihova uene mu ku a kuatekesa. (Tanga Izaia 43:10-12.) Izaia ua kanene o kizulukutu kiki mu izuua isukidila-ku: “Kamona kandenge, ua kà di-bhanga midi; o ua beta kutola u biluka kifuxi kionéne: Eme, ngi Jihova, bhu kumbi diê nga ka ki bhanga sé kufula.” (Iza. 60:22) Saí kithangana, o Jikidistá a a undu exile “kamona kandenge,” maji ene a dibandekesa kioso kiéza o Jikidistá ja mukuá a a undu mu kilunga kia Nzambi. (Nga. 6:16) Mukonda dia mabesá a Jihova, mu ku bhita mivu, o mundu uavulu ua múia ni ku dibandekesa.

9. Ihi i tua tokala ku bhanga phala ku katula mbote mu ikanenu ia Mak’â Nzambi?

⁹ Nzambi ua tu kanena mu Maka mê kuila, tua-nda kala ni muenhu uambote ku hádia, ki kale se tu Jikidistá a tu undu, mba tua tokala ku mundu uavulu. Phala ku kala ni muenhu iú, tua tokala ku belesela o itumu ia Jihova. (Iza. 48:17, 18) Xinganeka akua Izalaiele akexile mu Kitumu kia Mozé. O Kitumu kiexile phala ku langa o mundu ua Izalaiele, ni ku a longa kiebhi kieji tena ku kala ni muiji ua sanguluka, ku kala ni maka ambote, ku bhanga uenji ni kidi kioso, ni kiebhi kieji londekesa henda ku akuâ. (Mak. 20:14; Iji. 19:18, 35-37; Mate. 6:6-9) Lelu, tu katula ué mbote mu ku belesela o itumu ia Nzambi, iene ki i bhonzo. (Tanga 1 Nzu. 5:3.) Kioso ki tu belesela, tu beta-kota mu ku sanguluka, tu ‘disanza mu kuxikana.’—Titu 1:13.

10. Mukonda diahi tua tokala ku di longa o Bibidia izuua ioso, ni ku bhanga o Ubhezelu ku Muiji?

¹⁰ O kilunga kia Jihova mu ixi, kia mu kuenda mu maukexilu avulu. Kiene mu tu kuatekesa ku tendela kiambote o Bibidia kizuua ni kizuua. O kidi kiki, kiene kia tu kanena o Bibidia: “O njila ia athu a iuka-phe i di bhanga mukua ni mukengeji ua kimene, uia ni ku di bandekeza mu kuzela katé kuma ki ku zubha o kúkia.” (Jisa. 4:18) Maji tua tokala ku di ibhuidisa: ‘O kuila ngejiia o itendelesu iene mu lungulula mu kilunga, ia lungu ni milongi ia Bibidia ia múia ni ku zelesa o kilunga?’ O kuila ngene mu tanga o Bibidia izuua ioso? O kuila ngi kingila ni vondadi ioso o ku tanga o madivulu metu a ubhe? O kuila ngala ni Ubhezelu ku Muiji semana joso? O ima íii ki i bhonzo ku i bhanga, maji tua tokala ku sota kithangana. Kima kiambote ku kolokota ku di longa o Mikanda Ikôla, ku belesela ioso i tu di longa ni kuenda ni kilunga kia Nzambi. Tua tokala ku belesela o itendelesu ia ku bhanga o ima íii, mukonda o kizuua kia hadi ia dikota kia zukama!

11. Mukonda diahi o mundu ua Jihova uene mu diongeka mu kilunga, ni mu iônge ia ilunga ni ia makota?

¹¹ O kilunga kia Jihova kia mesena o  mbote ietu, mu kiki, ki tu tendelesa ku belesela o itendelesu ia poxolo Phaulu: “Tu di xinganekienu mudietu, tu di suinise mu ku dizola, ni kubhanga o mbote. Kana kufula ku di bhongolola jinga, uila amoxi ki ene kufula, maji tu di longesa mudietu. Uila kiki, tu di suinisienu mudietu, kota-kota dingi kioso ki mu mona o Kizuua kia Ngana kí zukama.” (Jihe. 10:24, 25) O jifesa ja kexile mu bhanga mivu joso o akua Izalaiele, ni iônge, ia kexile mu ku a suínisa mu nzumbi. O Jifesa ja Jibalaka mu izuua ia Nehemiia, iexile ithangana ia ku sanguluka. (Mak. 23:15, 16; Neh. 8:9-18) Tuene ué mu katula mbote mu iônge ietu ia ilunga, ni ia makota. Tu katule mbote mu iônge íii, phala ku kula mu nzumbi, ni ku sanguluka.—Titu 2:2.

12. Kiebhi ki tua tokala o ku divua ia lungu ni ujitu ua ku boka o njimbu iambote ia Utuminu?

¹² Mukonda tua tokala mu kilunga kia Nzambi, tua sanguluka mu “kutula o Njimbu Iambote ia Nzambi.” (Loma 15:16) O “kutula o Njimbu Iambote ia Nzambi,” ku tu bhangesa ku kala “tu jingunza” ja Jihova, ‘Ió ua Zela.’ (1 Kol. 3:9; 1 Phe. 1:15) O kikalakalu kia ku boka o njimbu iambote ki bhangesa ku zelesa o dijina dikôla dia Jihova. Ujitu ua dikota ku tu dielela ku “tula—o Njimbu Iambote ia tundu kua Nzambi Ukôla, mukua fuma.”—1 Tim. 1:11.

13. O sauidi ietu mu nzumbi ni muenhu uetu uijila mu ku bhanga ihi?

¹³ Jihova ua mesena o mbote ietu, mukonda dia kiki muéne ua mesena tu mu zukama, ni ku kala mu kilunga kiê. Mozé uambela akua Izalaiele: “Ni diulu ni oxi a ngi kale jimbangi, kuma nga ku tudila lelu o muenhu ni kúfua; nga ku tudila ué o kuzediua, ni kuxixima, sola-phe muenhu, nda u laie, n’eie ni mbutu ié. Kale-phe u zola Jihova Nzambi ié, u bhana mátui ku dízui diê, uenda ni ku mu naminina ngó Muene; Mukonda kuala o kulaia kué; kuene kuala o divula dia izuua ié; nda u tene kutunga ni kuxalela m’oxi ia lokela Jihova ku i bhana jitata jé Mbalahamu, ni Izake, ni Jakobo.” (Mate. 30:19, 20) O muenhu uetu uijila ngó mu ku bhanga o vondadi ia Jihova ni ku mu zola, ni kuívua o dízui diê ni ku mu naminina.

14. Kiebhi kia divu phang’etu ia lungu ni kilunga kia Nzambi?

¹⁴ O phang’etu Pryce Hughes ua kuatenena kua Nzambi, ni mu kilunga Kiê, ua soneka: ‘Nga sanguluka kiavulu mukonda nga belesela o milongi ia Jihova ni ikanenu iê ioso ande dia muvu ua 1914 . . . ku kuatenena mu kilunga kia Jihova mu kithangana kieniókio, kiexile o kima kia betele-kota ki nga bhangele. O ima ia bhitile ku muenhu uami ia ngi londekesa kuila, ki kima kiambote ku dielela ku athu akua ituxi. Kioso ki nga mono o kidi kiki, nga solo ku kuatenena mu kilunga kia Jihova. O kuila kuala ukexilu ua mukuá ua ku tambula o mabesá ma Jihova?’

15. Bhana phangu ilondekesa ihi i tua tokala ku bhanga, se o kilunga kia Jihova ki lungulula kima mu milongi ia Bibidia?

¹⁵ Se tua mesena kuila Jihova u tu besoala, tua tokala tu kala ku mbandu ia kilunga kiê, ni ku xikina o milongi ia Mikanda Ikôla, ia múia ni ku zela dingi mu ku bhita o ithangana. Xinganeka: Kioso kiafu Jezú, kua kexile Jijudé javulu Jikidistá, a suínine mu Kitumu, kia a bhonzele ku xisa o kitumu. (Ika. 21:17-20) Ni kikuatekesu kia mukanda ua Phaulu ua sonekena akua Jihebeleu,  ene a xikina kuila ka a zelesele bhu kaxi ka ‘jisata joso ja bhangele kala kia tumine o Kitumu,’ maji “mukonda dia kilumbu kia mukutu ua Jezú Kristu, kia bhana lumoxi ngó kuabhu.” (Jihe. 10:5-10) Sé phata, o mbutu ioso ia Jijudé exile Jikidistá, a lunguluile o ibanzelu iâ. Etu ué tua tokala ku di longa ithangana ioso o Bibidia, ni madivulu metu, se o kilunga kia Jihova ki lungulula milongi, tua tokala ku belesela ni kulenduka kuoso.

16. (a) Ikanenu iebhi ia-nda sangulukisa o mienhu ku mundu uobhe? (b) Ihi i ua kingila ku mona ku mundu uobhe?

¹⁶ Oso a kuatenena ku kilunga kia Jihova ni ufiiele, a-nda tambula mabesá. O Jikidistá a a undu, a-nda tumina ku diulu kumoxi ni Kristu. (Loma 8:16, 17) Oso a dielela ku kala mu ixi, a-nda tunga mu Palaízu. O kilunga kia Jihova ku mundu uoso, kiala ni ujitu ua dikota ua ku tangela akuâ o kikanenu kiki. (2 Phe. 3:13) O divulu dia Jisálamu 37:11 di zuela: “Oso-phe alenduka, ene a lundula o ixi; a kala ku ngalasa ni kutululuka kuavulu.” O athu “a kà tunga jinzo, anga a kala-mu,” ene a ka kemba “ni ikalakalu ia maku mâ.” (Iza. 65:21, 22) Ki kua ka kala dingi uadiama kizukutisu mba nzala. (Jisá. 72:13-16) O Babilonha ia Dikota, ki ia-nda tena dingi ku nganala o athu, mukonda ki ia-nda kala-ku dingi. (Dij. 18:8, 21) O athu a fu kiá, a-nda tambula ué o muenhu ua kalelaku. (Iza. 25:8; Ika. 24:15) Kiki ki kidielelu kia ku sanguluka kiala na-kiu o athu a di bhakula kua Jihova? Se tu suínisa o ukamba uetu ni Nzambi, ni ku kolokota kuenda ni kilunga kiê, tua-nda mona o ikanenu íii ku di kumbidila ko kuetu.

17. Kiebhi ki tua tokala ku mona o ubhezelu ua Jihova, ni kilunga kiê?

¹⁷ Kua kambe ngó, o mundu ua Satanaji ua-nda jimuka. Se tua mesena ku bhuluka, tua tokala ku suínisa o kixikanu kietu, ni ku kolokota ku bheza Nzambi kumoxi ni kilunga kiê. Etu tu divua kála Davidi uimbi: “Kima kimoxi ki nga bhingi kua Ngana, kiene ki ngi bhindamena jinga: o kutunga m’onzo ia Jihova izuua ioso ia muenhu uami, mbé kutala o kuuabha kua Ngana, ni ku dilonga jinga maka mu Tembulu iê.” (Jisá. 27:4) Muthu ni muthu ua tokala ku kuatenena kua Jihova, ni ku kolokota kuenda ni kilunga kia Jihova.