1, 2. Mukonda diahi Phaulu ua kexile ni henda ia jiphange a zozele?

SAÍ ithangana, etu enioso tuene mu zoza. Saí izuua ki tu divu kiambote, tu mona kuila kua tu kambe ngunzu, ki tu bhonza ku bhanga o ima i tua mesena. Xinganeka se u divuua kiki mu mbeji javulu. Ihi i tueji mesena i tu bhanga o a kuetu? Sé phata tueji mesena kuila ene a tu kuatela muanhu.

² O poxolo Phaulu uejidile kiebhi o muthu kia zoza mukonda dia kijijidiku kijila ku athu ka bheza Nzambi mba mu kilunga. Saí kithangana muéne ua mono kuila keji tena dingi. (2 Kol. 1:8; 7:5) Mu ku xinganeka mu ibhidi ia bhiti mu ukidistá, Phaulu uambe: “Ki bhu kala muthu ua bhuila, eme uami ki ngi bhuidisa?” (2 Kol. 11:29) Kioso kia sokesa o jiphange mu kilunga ni idiandu ia mukutu, Phaulu uambe kuila: O ió ‘edi kála a kambe nguzu tua a bhindamena.’ (1 Kol. 12:22) Ihi ia mesenene ku kuzuela Phaulu? Mukonda diahi tua tokala ku mona o athu a zoza kála ki a mona Jihova? Mbote iahi i tu katula?

3. Mukonda diahi tu tena ku mateka ku kala ni ibanzelu ia iibha ia jiphange jetu?

³ Ku mundu ua lelu, o athu a bhita ku pholo dia akuâ a zoza, phala ku tena ku kala ni ima ia mesena. Mukonda a xikina kuila, phala o muthu ku di tunda kiambote ua tokala u kala munzangala, uala ni nguzu iavulu. Nange o ukexilu iu u tena ku tu kuata ué. Nange tu mateka ku kala ni ibanzelu ia iibha ia jiphange a bhindamena kikuatekesu. Kiebhi ki tu tena ku kala ni ukexilu ua Jihova ua ku mona o jiphange mu kilunga?

4, 5. (a) Kiebhi o kifika kia bhange Phaulu mu divulu dia 1 Kolindo 12:21-23, ki tu kuatekesa kuijiia kiebhi Jihova kia mona o athu a zoza? (b) Mbote iahi i tu katula kioso ki tu kuatekesa o jiphange a zoza?

⁴ O kifika kia bhange Phaulu mu divulu dia Kolindo, ki tena ku tu kuatekesa ku mona kiebhi ki mona Jihova o jiphange ja zoza. Mu kibatulu kia 12, Phaulu u tu lembalesa kuila kate muene ni kidiandu kio fele fele kia mukutu, a ki bhindamena. (Tanga 1 Kolindu 12:12, 18, 21-23.) Saí athu a xikina kuila o athu a moneka ngó, a zuela kuila saí idiandu ia mukutu ka i bhindamena. * Mu kifika, saí athu ambele kuila, o kamulembu kófele ka kinama, ka ka bhindamena. Maji lelu, o jingijiie a di longo kuila o ka mulembu ka kuatekesa o mukutu uetu kioso ki tu imana.

⁵ O kifika kia Phaulu kia lungu ni mukutu, kia londekesa kuila o idiandu ioso ia mukutu iala ni valolo. Satanaji ua mesena tu banza kuila, ki tuala ni valolo. Maji Jihova u ‘bhana valolo,’ ku jiselevende jê joso, né muene ió a zoza. (Jobe 4:18, 19) Kiki kilombolola kuila, tu tena ku divua kiambote mu kilunga kietu ni mu kilunga kia Nzambi ku mundu uoso, mukonda tuala ni valolo. Mu kifika, xinganeka o kizuua ki ua kuatekesa muadiakimi mu kilunga. Muéne ua katula mbote, o kuila eie ua katula ué mbote? Kioso ki tu kuatekesa akuetu, tu sanguluka kiavulu, tu kala ni muanhu, tu beta-kota mu ku zola o jiphange jetu, tu kala tu Jikidistá jambote. (Efe. 4:15, 16) Tata ietu Jihova ua mesena tu bhana valolo ku jiphange jetu, né muene ió a zoza. Se tu bhanga kiki, tua-nda xikina o ukexilu ua jiphange jetu, mu kiki o henda mu kilunga ia-nda di bandekesa.

6. Kiebhi kia jimbulula Phaulu o kizuelu ku ‘zoza’ ni kizuelu ‘nguzu?’

⁶ Phaulu ua tumbula o kizuelu ku ‘zoza’ ni kizuelu ‘ku bhuila,’ kioso kia zuela ia lungu ni jiphange mu kilunga. Muéne ua tumbula o izuelu íii, mukonda saí athu a kexile mu mona o Jikidistá mu ukexilu iú. Maji Phaulu ka kexile mu zuela kuila kuexile Jikidistá a betele-o-kota, akuâ ndenge. Muéne uambe ué kuila muéne ua zozele. (1 Kolindu 1:26, 27; 2:3) Kioso kia tumbula o kizuelu “nguzu,” ia lungu ni jiphange, muéne ka kexile mu zuela kuila ene a betele-o-kota, akuâ ndenge. (Loma 15:1) Muéne ua kexile mu zuela ngó kuila, oso a kulu mu nzumbi, a tokalele ku londekesa muanhu kua ió ka kulu luua mu nzumbi.

7. Ihi i tena ku tu fidisa ku kuatekesa o jiphange a bhindamena kikuatekesu?

⁷ Jihova u kuatekesa o jiphange a zoza, muéne u sanguluka kioso ki tu kuatekesa ué o jiphange. (Jisá. 41:1; Efe. 5:1) Maji saí ithangana, ki bhonza ku bhanga kiki. Mukonda diahi? Nange tu banza kuila o jiphange jetu, ene a tokala o ku batula o  maka a mu bhita nau. Mba ku lenga mu kuzuela nau, mukonda ki tuejiia ihi i tua-nda zuela. Xinganeka o phangu ia phange a mu ixana Cynthia. * Muéne ua bhindamene kikuatekesu kioso kia mu xisa muadi’uê. Muéne uambe: “Se o jiphange ka mesena ku ku zukama, mba ka bhange kála kiene mu bhanga o makamba a kazola, u kala ni ndolo. Kioso ki u di bhana ni ibhidi, eie u bhindamena kikuatekesu kia athu.” Sobha Davidi ua luualele kiavulu, kioso kia mu landuka ku makamba mê.—Jisá. 31:12.

8. Ihi ia-nda tu kuatekesa ku kala ni henda ia jiphange jetu?

⁸ Ihi ia-nda tu kuatekesa ku kala ni muanhu ua jiphange a bhindamena kikuatekesu? Lembalala kuila, saí jiphange a mu tala hadi mukonda dia kukata mba a tungu ni jindandu ki Jikidistá. Se tua kexile ni maka enhá, tueji mesena kuila o jiphange a tu kuatela henda. Xinganeka akua Izalaiele, ene a talele hadi iavulu ku Ijitu, maji né kiki, kioso kia bokona mu ixi ia Kanana, Nzambi ua a tendelesa kuila ene ka tokalele ku “kola muxima.” Jihova ua mesenene kuila o akua Izalaiele, a kuatekesa o jiphange jâ exile jingadiama, a zozele.—Mate. 15:7, 11; Iji. 25:35-38.

9. Se phang’etu u zoza, ihi ia bhindamena? Bhana phangu.

⁹ Ki tu tokala ku tatela o jiphange, kia kala ni maka, mba ku banza kuila etu tua beta-o-kota ene ndenge. Tua mesena ku kuatekesa o jiphange jetu, kioso kia zoza. (Jobe 33:6, 7; Mat. 7:1) Mu kifika, xinganeka muthu ua di kuama mu kiluezu kia dinhunhu, anga a mu ambata ni lusolo mu inzo ia ku saka. Kioso kia bhixila, o kuila o ji dotolo ni akuatekexi iâ, eji zanga o kithangana mu kuijiia se nanhi ua bhekesa o kiluezu? Kana, ene eji mu saka ni lusolo. Kiene ué ki tua tokala o ku bhanga. Se phange ua zoza, u bhindamena o kikuatekesu kietu mu nzumbi, etu tua tokala ku mu kuatekesa ni lusolo.—Tanga 1 Tesalonika 5:14.

10. Kiebhi o jiphange jetu “jimvuama mu kuxikana,” sumbala a moneka kála a zoza?

¹⁰ Saí jiphange, nange a moneka kala a zoza. Maji se tu xinganeka mu ukexilu uâ, tua-nda mona kuila ene ka zoza. Xinganeka phange uala ni diiala ki kidistá. Xinganeka ué phange kala ni diiala, ua mu sasa o an’a ubheka ué, maji ka fongo kizuua mu kiônge. Mba xinganeka o minzangala ene mu di bhana izuua ioso ni kijijidiku bhu xikola, phala ku tunda mu kilunga. O jiphange jiji, a zolo Jihova ene a mesena ku mu kala fiiele. O ku xinganeka mu ima ioso ia mu bhanga o jiphange jetu phala ku sidivila Jihova, kia-nda tu kuatekesa ku a mona kala “jimvuama mu kuxikana,” né muene se mu ibanzelu ietu tua mona kuila a zoza.—Tiiaku 2:5.

11, 12. (a) Ihi ia-nda tu kuatekesa ku banza kala Jihova, se o jiphange jetu a ta kituxi? (b) Ihi i tu di longa mu ukexilu ua Jihova ua ku di bhana ni Alá?

¹¹ Tua tokala ku mona o jiphange jetu, kála kia a mona Jihova né muene kia lueza. O phangu i tu sanga mu Bibidia, i tu kuatekesa kuijiia kiebhi Jihova kia mona o jiselevende jê. (Tanga Jisálamu 130:3.) Mu kifika, se ua kexile ni Mozé kioso kia kexile mu kuívua Alá ua kexile mu zuela se mukonda diahi ua bhangele o ka ngombe ka ulu. Kiebhi ki ueji mona Alá? (Mak. 32:21-24) Kiebhi ki ueji divua kioso Alá kia kexile ku mbandu ia Midiiana mu ku tatela Mozé mukonda dia ku kazala ni muhatu mukua ixi iéngi? (Dia. 12:1, 2) Kiebhi ki ueji divua se ua kexile-bhu, kioso Mozé ni Alá ka ximana Jihova,  kioso kia tundisa o menha ku ditadi dionene?—Dia. 20:10-13.

¹² Jihova ueji kaxtikala Alá mukonda dia kituxi kiki. Maji Jihova uejidile kuila, né muene se saí ithangana, Alá ua kexile mu zoza, muéne ua kijidile kuila, kexile muthu ua iibha. Muéne ua luezele mukonda ua kexile mu ithangana ia bhonzele, iu ua kexile mu kuívua o ilongesu ia athu a iibha. Maji Alá ua xikinine kuila ua luezele iu ua xikinine ku mu bazela kua Jihova. (Mak. 32:26; Dia. 12:11; 20:23-27) Alá ua zolele Jihova iu ua dielele o ima ia bhangele. Mukonda dia kiki, Jihova ua mu loloka. Mu kiki, né muene mu ku bhita mivu iavulu, Alá ni muiji uê a a lembalala hanji kuma jiselevende ja Jihova.—Jisá. 115:10-12; 135:19, 20.

13. Kiebhi ki tu tena o ku lungulula o ukexilu uetu ua ku mona o jiphange jetu? Bhana phangu.

¹³ Kála kia bhitile ni Alá, o jiphange jetu nange a ta kituxi. Se kiki ki bhita, kiebhi ki ua-nda mona o phang’ê? O kuila kua-nda bhinga ku lungulula o kibanzelu kiê? (1 Sam. 16:7) Mu kifika xinganeka munzangala, u moneka kala kála ni ukexilu uambote. Nange muéne ka mu sola kiambote o itonokenu iê. Kana ku banza ni lusolo kuila muéne muthu ua iibha. Mu veji dia kiki, xinganeka kiebhi ki u tena ku mu kuatekesa. Sota kithangana phala ku mu longa kiebhi kia tokala ku sola ni unjimu. Se u kuatekesa o jiphange jê mu ukexilu iú, o henda iê ia-nda di bandekesa.

14, 15. (a) Kiebhi kia divu Jihova mu ku mona kuila Elija ua kexile ni uôma? (b) Ihi i tu di longa mu ukexilu ua Jihova ua ku kuatekesa Elija?

¹⁴ Kiebhi Jihova kiene mu mona o athu ala ni mixima ia toloka? Xinganeka kiebhi kia kuatekesa selevende iê ua kexile mu divua kiki. Elija uexile polofeta ia Jihova ua xonguene o 450 a jipolofeta ja  Bahale. Maji Elija uevu kuila o sobha Jezabele ua mesenene ku mu jibha. O uôma ua mu kuatele iu ua lenge 150 a ji kilómetulu katé ku Beleseba, iu uai dingi katé mu kikangalakata. Mukonda dia njila ia lebha, muéne ua bhuile, ua tolokele o muxima, “anga u bhinga kúfua.”—1 Jis. 18:19; 19:1-4.

¹⁵ Ihi ia bhange Jihova kioso kia mono kuila Elija ua kexile ni uôma uavulu ni kuila o muxima ua mu tolokele kiavulu? O kuila muéne ka mu suu dingi mukonda ua tolokele o muxima? Kana! Jihova ua tumikisa anju phala ku mu kuatekesa. Mu veji jiiadi, o anju ia bhana kudia kua Elija, phala muéne ku kala dingi ni nguzu ia kuenda o njila iê. (Tanga 1 Jisobha 19:5-8.) Né kioso Jihova kia kexile mu tendelesa Elija, muéne ua muívu iu ua mu kuatekesa.

16, 17. Kiebhi ki tu tena ku kuatekesa o jiphange jetu kála ki bhanga Jihova?

¹⁶ Kiebhi ki tu tena ku kuatekesa phang’etu kala kia kuatekesa Jihova o selevende iê Elija? Kana ku zuelela ni lusolo kua phang’ê o kima ki u banza kia tokala muéne o ku bhanga. (Jisa. 18:13) Se muéne ua toloka o muxima, mba ua mu di mona kuila kala ni valolo, muéne u mesena kuila, u dianga o ku muivua, ni ku mu londekesa kuila ua mu zolo. (1 Kol. 12:23) Se u bhanga kiki, ua-nda kuijiia se ihi ia bhindamena, kiene ngó ki ua-nda tena ku mu kuatekesa.

¹⁷ Xinganeka mu kifika ki tua tange, kia phange Cynthia. Kioso kia mu xisa muadi uê, muéne ni tuana tu iiadi a divuile ubheka uâ. Kiebhi kia a kuatekesa o jiphange mu kilunga? Cynthia u jimbulula: “Kua bhitile ngó 45 kia ithangana o jiphange a bhixila ku bhata. O jiphange ja didi. Ene a kexile n’etu izuua iiadi mba itatu. Mukonda ki tu kexile mu divua kiambote, ki tu tenene kudia, o jiphange a tuambata ku mabhata mâ phala ku kala nau.” O musoso iú, u tu lembalesa izuela o Bibidia mu divulu dia Tiiaku: “Mukonda se bhu kala phange ienu ia diiala mba ia muhatu, uala ni tuxi, mba ua kambe kúdia kuê kua lelu, enu-phe bhu kala muthu, u a ambela uixi: Suluke-nu ni paze, Nzambi a mi kuatekese, mu di fute, mu ikute, maji o ima-phe ia bhindamena ku mikutu iâ, ki mua a bhana-iu! Kienhokio, ki sidivila-hi? Kiene ue kimoxi: O kuxikan’oko, kua bhingi ki ku moneka ima iê ia kubhanga, kua di fuila.” (Tiia. 2:15-17) O kikuatekesu kia bhana o jiphange kua Cynthia ni an’ê, kiene o kikuatekesu kia bhindamene. Mu ku bhita mbeji jisamanu, Cynthia ni an’ê, akexile kiá ni nguzu ia ku kalakala kala aboki a ithangana ni ithangana.—2 Kol. 12:10.

18, 19. (a) Kiebhi ki tu tena ku kuatekesa o jiphange a zoza? (b) Nanhi u katula mbote kioso ki tu kuatekesa o jiphange a zoza?

¹⁸ Kioso ki tu kata kiavulu, ku bhita ué kithangana kiavulu phala ku disanza kiambote. Se phange u ta kituxi mba u kala mu ibhidi, nange ku bhinga ué kithangana kiavulu phala muéne ku disanza mu nzumbi. Muéne ua tokala ku di longa o Mak’â Nzambi, ku samba kua Jihova, ni kuia mu iônge phala ku kala dingi ni nguzu. Maji muéne u bhindamena ué o kikuatekesu kietu. O kioso kia mu di suínisa phala ku disanza, tua tokala ku mu kuatela muanhu. Tua tokala ku mu londekesa kuila tua mu zolo, ni kuila muene uala ni valolo mu kilunga.—2 Kol. 8:8.

¹⁹ O ku kuatekesa akuetu, ku tu bhana kisangusangu. Etu ué tu di longa ku kala ni henda ni muanhu. Maji k’etu ngó tu katula mbote. O kilunga kioso kia-nda londekesa henda. O kia beta-o-kota, kioso ki tu kuatekesa ‘a zoza,’ tu londekesa kuila, tua mesena ku kala kála Jihova. O tata ietu ia henda u bhana valolo ku athu oso.—Ika. 20:35.