O kuila ua tange kiambote O Milangidi ia suku-ko? Tala se u tena ku tambuijila o ibhuidisu íii:

O kambudi ka Phasu eji ka jibha ola kuxi mu kizuua kia 14 ka Nizá?

O ji Bibidia ja mukua jamba kuila, o kambudi a tokalele ku ka jibha “mu kumbi dia ngoloxi” mu ku vunda—kioso kifuá o dikumbi, maji kua zele hanji. (Mak. 12:6)—15/12, mu jimbandu 18-19.

Itumu iebhi ia Bibidia, i tena o ku kaiela o munzangala phala ku sola ni unjimu?

O itumu itatu, ienii (1) Diangenu-phe kusota o Utuminu ua Nzambi ni uiukilu uê. (Mat. 6:19-34) (2) Sota o ku zediua mu ku sidivila akuenu. (Ika. 20:35) (3) Sanguluka mu ku sidivila Jihova mu unzangala uê. (Ndo. 12:1)—15/1, mu jimbandu 19-20.

Jebhi o jikabalu jiuana ja mu kaba-kaba kiá tundé ku muvu ua 1914?

Jezú, muéne ua sambela ku kabalu ka zele, ua bhângela, kioso kia kaie ku diulu Satanaji ni madimonho mê. O kabalu ka kusuka, o ua sambela-ko a mu bhana o kutena kua ku bheka mu ixi, ita iene mu bheka o malamba avulu ku athu. O kabalu ka xikatele ni ió ua sambela-ko, ka lombolola nzala. O kabalu ka mukete, o ua sambela-ko u bheka kalunga, ni mabhebhu, ku mazunda ni mazunda a athu. (Dij. 6:2-8)—1/2, mu jimbandu ja 6-7.

Thembu kuxi kia-nda bhita “o ukaza ua Kambudi”? (Dij. 19:7)

“O ukaza ua Kambudi” ua-nda bhita kioso o Sobha Jezú Kristu, kia-nda tenesa o kikoué kiê mu ku buika o Babilonha ia Dikota, ni kioso kia-nda bhita o ita ia Alumajedone.—15/2, mu jimbandu ja 10.

Mukonda diahi o Jijudé mu izuua ia Jezú, a kexile mu ku ‘kingila’ Mexiia?’ (Luka 3:15)

Ki tu tena ku zuela kuila, o ji Judé ku hama ia dianga a tendela kiambote o kikanenu kia Daniiele kia lungu ni Mexiia, kála ki tuene mu ki tendela etu lelu. (Dan. 9:24-27) Maji né muene kiki, ene sumbala evuile o ngolokela ia ji anju ku abhidi mba kiambe o polofeta Ana kioso kia mono o kamona Jezú mu tembulu. O jingijiie ué ejile mu sota o ‘sobha ia ji Judé a mu vuala.’ (Mat. 2:1, 2) Mu ku bhita ithangana, o Nzuá dia batizu uambe kuila Kristu ua-nda tukuluka.—15/2, mu jimbandu ja 26-27.

Kiebhi ki tu tena kueha kuila o kizuelu kietu kia kuila kiene mungu kiki kale kana? (2 Kol. 1:18)

Mu kidi, saí ithangana mba ima i tena ku tu bhangesa ku kamba ku kumbidila o kima ki tua kanena o ku bhanga. Maji se tua kanena ku bhanga kima, tua tokala ku bhanga ioso phala ku kumbidila o kizuelu kietu.—15/3, mbandu 32.

Kiebhi ki tu tena o ku di bhana ni tendasá ia ku tala o ufusa?

Ima itatu i tua tokala o ku bhanga phala ku lenga o ufusa. (1) O ku katula o mesu metu, se ku moneka kima kia ufusa ni lusolo. (2) Ku langa o ibanzelu mu ku xinganeka mu ima iambote ni ku samba kua Nzambi. (3) Ku langa o uendelu mu ku kamba o ku tala o jifilme ni ijimbuete ia internete muala o ima ia ufusa.—1/4, mu ji mbandu 10-12.

Ihi i tena o ku bhita se o Kidistá u xisa o muiji ué phala kuia mu ixi iéngi mu nganhala kitadi?

Kioso o jitata kia sola o ku kala dikanga dia muiji, o tuana tu tala hadi mu maukexilu avulu. Ene a divua kia iibha ni tat’a mba ni mam’a ia a xisa. O diiala mba muhatu u kala dikanga dia kaza diê, u di bhana ni tendasá ia ku tá phánda.—15/4, mu ji mbandu 19-20.

Mukonda diahi o inama ia ifumbe a phaphele ku taka a i bukujule?

O akua Loma a jibha ifumbe iavulu ku taka mu kua bukujula o imana. O ji Judé a bhingile phala o ifumbe a a phaphele ku taka kumoxi ni Jezú, kua bukujula o inama. Kiki kieji bhangesa kuila ene a fua ni lusolo. Mu kiki, ka bhingile ku kala usuku uoso ku taka. (Mate. 21:22, 23)—1/5, mu mbandu 11.

Ima iahi i uana i tua tokala o ku kala na-iu, kioso ki tu zuela ni athu mu ukunji uetu?

Nga mu zuela ni nanhi? Kuebhi ku ngiia mu zuela ni athu? Kithangana kiebhi ki ngi zuela ni athu? Kiebhi ki nga tokala kuzuela ni athu?—15/5, mu ji mbandu 12-15.

Kikuxi kiá kiafu mukonda dia ku buakula?

Ku hama imoxi ia mivu ia bhiti, kuafu kiá 100.000.000 a athu mukonda dia ku buakula. Lelu 6.000.000 ndenge a athu ku muvu umoxi ene mu fua mukonda dia ku buakula.—1/6, mu mbandu 3.