KIOSO o mundu ua Nzambi kia xisa Babilonha ku muvu ua 537 A.K.K., Jihova ua solo o njila ia kuia mu Jeluzaleme. Muéne uambe: “Iudikenu njila phala o mundu. Sokelesenu, sokelesenu o kikoka, nonenu-mu o matadi.” (Iza. 62:10) Xinganeka kiebhi o Jijudé kieji bhanga kiki. Sumbala o a diangele, a iudika o njila, mu ku xita o makungu. Kiki kieji kuatekesa o jiphange jâ a xalele ku dima, a kexile mu kaiela phala ku vutuka ku ixi iâ.

Tu tena ku bhangesa o kifika kiki, kála njila iambata o muthu phala ku kula mu nzumbi. Jihova ua-ndala kuma o ji selevende jê joso ende mu njila íii, sé kima kioso-kioso kua fidisa. O Maka mê a tu tendelesa: ‘Xinganeka o kima ki ua mesena o ku bhanga, o jinjila jé joso ji ku kale ja uhete.’ (Jisa. 4:26) Ki kale u munzangala mba kana, eie u tena ku katula mbote ku mulongi iú ua Nzambi.

Sumbala uevu kia athu kuzuela ima kala íii ku minzangala ala mu kitala kia kikumbi: ‘Muene uala ni ima iavulu phala ku bhanga ku pholo,’ mba ‘muene ua mu kunda ididi iavulu.’ O minzangala ioso iala ni sauidi iambote, a banza ni lusolo, ala uâ ni hanji ia ku kala ni ima iambote ku muenhu. O Bibidia izuela: “Makembu a minzangala, o kuvula nguzu.” (Jisa. 20:29) O munzangala u bhakula o uhete ué ni nguzu iê mu sidivisu ia Jihova, u tena ku suua jimbambe javulu, ni ku sanguluka ku muenhu.

Kála ki ua kijiia kiá, lelu, o mundu u bhana valolo iavulu ku uhete ua minzangala ietu. Se munzangala Mbangi ia Jihova u di tunda kiambote bhu xikola, o mesene iê, mba koleka iê u mu suínisa ku di longa mu xikola ia katunda, phala ku di tunda kiambote ku mundu iú. Mba phang’etu ia kilumba, mba munzangala, ala ni uhete ua ku bhanga malunda a fiti, nange a mu sola phala ku kaiela o ufunu iú. O kuila ua mu di bhana ni maka enhá, mba uejiia muthu ua mu di bhana ni maka enhá? Ihi ia-nda kuatekesa o Kidistá o ku sola ni unjimu?

 O milongi ia Bibidia, i tena ku kuatekesa o muthu ku di pelepalala kiambote phala kuenda mu njila ia muenhu. O divulu dia Ndongixi 12:1 diambe: ‘Mu izuua ia unzangala ué, lembalala Ió uoso ua ku bhange.’ Kiebhi eie u munzangala ki u tena o ku ‘lembalala Ió uoso ua ku bhange?’

Xinganeka ia bhitile ni Eric * ku Africa ia Oeste. Muéne ua uabhele o ku di tá mu malunda a fiti. Kioso muéne kia tenesa 15 dia mivu, a mu solo phala ku jokala mu kibuka kia ixi. Kiki ki londekesa kuila, muene ueji tambula milongi ia ku jokala mu jixi ja Europa, sumbala phala muéne ku kala mujokadi ua katunda. Kiebhi o milongi ia ku ‘lembalala Ió uoso ua ku Bhange,’ ieji mu kuatekesa? Disá diahi eie u munzangala mba kamba diê, di mu tena o ku di longa?

Kioso kia kexile mu xikola, Eric ua mateka o ku di longa o Bibidia ni Jimbangi ja Jihova. Muéne ua kijidile kuila o mubhangi ué ua-nda zubha o maka oso a athu ku hádia. Eric ua mono kuila kima kiambote o ku bhana o kithangana ni nguzu iê mu ku bhanga o vondadi ia Nzambi. Mukonda dia kiki, Eric ka solo dingi o malunda a fiti kala kikalakalu kia katunda phala muéne. Mu kiki, muéne a mu batizala, iu ua kuata mu ku suua jimbambe mu nzumbi. Kioso kia bhiti ithangana, muéne ua kituka múkuatekexi ua tufunga, ia a mu ixana mu ku bhanga o Xikola ia Bibidia phala o Makudi.

Se muéne ua solele o malunda a fiti, sumbala Eric ueji nganhala fuma ni kitadi kiavulu. Maji muéne uejidile o kidi kia milongi íii ia Bibidia: “Mukua itadi, jimbongo jê u ji kita mbonge ia ku mu fikidila; phala muene, kifua kimbaka kia lebha kitala.” (Jisa. 18:11) Mu kidi, o muthu u dielela mu ku kondama kua unvuama, izala ngó. O athu a bhindamena kukala jimvuama, “a di toma mu mavuua mavulu mukuâ ni jisongo.”—1 Tim. 6:9, 10.

Maji minzangala iavulu, a sange o ku sanguluka ni ku kondama kuavulu mu sidivisu ia thembu ioso. Eric uambe: “Eme nga di bundu mu ‘kibuka’ kia dikota kia jiselevende ja Jihova ala mu sidivisu ia thembu ioso.” Kiki, kiene o kibuka kiambote mu ngala mu bhanga mbandu, mu kiki eme ngi sakidila Jihova mu ku ngi londekesa o njila ia kidi, i bhekela o ku sanguluka ni muenhu ua kidi.”

Eie ué? Mu veji dia ku bhindamena o ima ia mundu iú, mukonda diahi ku sole “njila” ia Jihova, ia ku kala muboki ua thembu ioso?—Tala o kaxa “ Mbote javulu ji u tambula, ku tena ku ji sanga mu Xikola ia katunda.”

Saí dikaza, mu ku kunda o filiiale ia Estados Unidos, a mono o ku sanguluka kua Jibetelita a mu sidivila Jihova mu kididi kieniókio. O phange ia muhatu ua soneka: “Etu tua divuile kiambote mu uendelu uetu ku muenhu.” O dikaza dia solo ku sota kithangana ni nguzu phala ku suua jimbambe mu sidivisu ia Ngana.

Saí kithangana, o ima ia mesenene o ku lungulula, ia londekesele kala ima ia bhonzele. Maji saí kizuua ene a xinganeka mu kibatulu kia kizuua kia Mikanda Ikôla. Kiexile o divulu dia Nzuá 8:31, mu tu sanga o izuelu ia Jezú iambe: ‘Se mu xalela mu milongi iami, mu kala mu kidi mu jixibulu jami.’ Ni milongi íii mu kilunji kiâ ene a xinganeka: “Kima kioso kioso ki tu bhanga phala ku sosolola o ima ku muenhu uetu, ki bhekela mabesá.” Ene a sumbisa o inzo iâ ia dikota, ia a katula o ibhindamu ia mukua ku thandu diâ, iâ ai mu tunga kididi kiéngi kuala o kilunga kia bhingile kikuatekesu. Lelu, ene aboki a thembu ioso, maji ene mu kuatekesa ué mu ku tunga o Ididi ia Ubhezelu, ni ku di bhakula mu ku kalakala mu iônge ia makota. Kiebhi kiene mu divua? Ene ambe: “Tua sanguluka, mukonda ki tu bhindamena ima iavulu ku muenhu uetu, maji tu bhanga ngó i tu suínisa o Kilunga kia Jihova.”

Salomá ua soneka: “Mesu-mé a tale muene ku pholo, o ibhebhetelu ié lungisa-iu muene kiambote mu njila.” (Jisa. 4:25) Kála xofelu, u tá o mesu-mê ku pholo mu kikoka, etu ki tu tokala ué ku landuka mu kuehela kima ki tu fidisa o ku suua jimbambe.

Mbambe jahi ji u tena o ku suua, ni ku ji bhanga? O ku kala mu sidivisu ia thembu ioso, mbambe iambote. O mbambe ia mukuá, o ku sidivila  mu kilunga kia dikota mua bhingi aboki ala ni uhete, phala ku kuatekesa o ku boka mbambe ia dikota ia kilunga. Mba kilunga muala aboki avulu, maji ki muala tufunga, mba akuatekexi a tu funga a soko. O kuila eie u tena ku kuatekesa mu maukexilu iá? Mukonda diahi ku zuela ni kafunga ka ilunga phala ku ku kuatekesa? Se ua mesena kuia dikanga ku ixi iéngi, u tena kuibhula kuebhi kuala o ilunga ia bhingi kikuatekesu. *

Tu vutuke ku ima ia zuela Izaia 62:10. Saí Jijudé, sumbala a kalakalele kiavulu, phala ku iudika ni ku xita o makungu a njila iia ku ixi iá, phala o mundu ua Nzambi u bhixile kiambote ku ixi iâ. Se eie ua mu di suínisa phala ku suua jimbambe mu nzumbi, kana ku bhuila. Ni kikuatekesu kia Nzambi, eie u tena ué ku bhixila ku jimbambe jiji. Kolokota mu ku bhinga unjimu kua Jihova, kioso ki uia ni ku suína mu ku katula o ibhidi mu njila iê. Mu kithangana kia tokala, eie ua-nda mona kiebhi muéne kia-nda ku kuatekesa o ku ‘xinganeka o kima ki ua mesena o ku bhanga.’—Jisa. 4:26.