KATHERINE ua kudila ku ixi ia Estados Unidos ia América, mu kitala kia 16 ia mivu, a mu batizala kala Mbangi ia Jihova. Muéne ua bhanene valolo ku ukunji uê, maji bhu kididi bhua kexile mu bokela, ki bhu kexile athu a mesenene o kuívua o njimbu ia Utuminu. Muéne uambe: “Eme nga tange misoso ia athu a sambele kua Nzambi phala ku a tumikisa muthu phala kua kuatekesa o kuijiia Nzambi. Eme nga mesenene ku sanga muthu kala iú, maji nuka kia bhitile n’eme.”

Kioso kia boko mivu iavulu mu mbambe ienhíii, Katherine ua banze kuia kididi kiéngi muala o athu a xikina o njimbu ia Utuminu. Muéne ua kexile ni phata se ueji tena o ku bhanga kienhiki. Mukonda muéne ku muenhu ué, lumoxi ngó lua kexile dikanga dia muiji uê, ku semana jiiadi ngó ua kexile ni ngunzu ia muiji uê izuua ioso. Maji né kiki, muéne ua kexile ni hanji ia ku kala ni kisangusangu kia ku sanga athu a mesena ku sota Jihova, mukonda dia hanji ié ionene, muene ua tena o ku bhanga kiki. Kioso kia xinganeka o ididi ioso, iu ua mono se kuebhi kua tokalalele o kuia, muéne ua soneka ku filiiale ia Guam, anga o filiiale ia mu bhana milongi ia mesenene. Ku mbeji ia Kavua ka muvu ua 2007 ni 26 a mivu, Katherine uai ku Saipan ku sambua dia Oceano Pacífico, iala o dikanga dia 10.000 a kilómetulu dia inzo iê. Ihi ia sange mu kuia o kididi kiéngi?

Kioso kia bhixila mu kilunga kia ubhe, Katherine ua disange ni Doris, muhatu ua kexile ni 40 a mivu, ua xikina o ku dilonga o Bibidia. Kioso kia di longo o ibatulu itatu ia dianga mu divulu Bibidia i Longa, Katherine ua thandanganhele. Muéne uambe: “Doris uexile dixibulu diambote dia Bibidia , eme ki ngi mesenene ku zanga o ima. Eme nuka nga longele dixibulu, eme nga mono kuila, o Doris a tokelele ku mu longa ku phange ia muhatu uala ni uhete ua ku longa, uala mu kitala kimoxi ni muene.” Katherine ua bhingi mu musambu kua Jihova phala ku sanga phange ia tokala phala ku mu bhana o dixibulu diê dia Bibidia. Muéne ua tangela Doris kuma ua-nda mu bhitisa ku mulongexi uéngi.

Katherine uambe: “Ande dia ku mu zuelela ia lungu ni maka iá, Doris uambe kuila ua mesenene ku ngi tangela maka. Kioso ki nga muívu ia zuela, eme nga mu tangela kiebhi Jihova kia ngi kuatekesa mu ku di bhana ni maka kala iá. Muéne ua ngi sakidila.” Mu suluka Doris uambela Katherine: “Jihova ua mu ku tumina phala ku ngi kuatekesa. O kizuua kia dianga, kioso ki uéza m’onzo iami, eme nga kexile mu tanga o Bibidia ola javulu. Eme nga kexile mu dila mu ku bhinga kua Nzambi phala ku tumikisa muthu phala  ku ngi longa o Bibidia. Kiene eie ki ua beta ku dibhitu diami. Jihova ua tambuijila o musambu uami!” O masoxi a kexile mu sonoka mu mesu a Katherine, kioso muéne kia kexile mu zubha o ku tanga o musoso. Muéne uambe: “O izuelu ia Doris, iexile o kitambuijilu kia musambu uami. Jihova ua ngi londekesa kuila eme ngala ni uhete ua ku suluka o ku longa o dixibulu.”

Doris a mu batizala ku muvu ua 2010, lelu, muéne ua mu longa maxibulu avulu a Bibidia. Katherine uambe: “Ni kisangusangu, nga sakidila ku hanji iami, ia ku kuatekesa muthu ua kidi ku kala selevende ia Jihova, lelu nga tena!” Lelu Katherine ua mu sidivila kala muboki ua katunda ku Ilha ia Pacífico ku Kosrae.

Hama ia jiphange ja maiala ni ja ahatu ndenge, a kua jixi jengi, ala bhu kaxi ka 19 ni 79 a mivu, a sidivila mu ididi mua bhindamene kikuatekesu ku Micronesia. O ixinganeku ia akalakadi ala ni muanhu, a i lombolola kiambote kua Erica uai ku Guam ku muvu ua 2006 ni 19 dia mivu. Muéne uambe: “Ku kala mu mbambe muala o athu ala ni dinhota dia kuívua o kidi kia Mak’â Nzambi, kima kiambote. Ngi sakidila Jihova mukonda dia ku bhanga o sidivisu íii. Uene o ukexilu ua mbote ua muenhu!” Lelu, Erica ua mu sidivila ni ku sanguluka kuoso, kala muboki ua katunda ku Ebeye ku ilha ia Marshall. Tuejiia kuila o ku sidivila ku ixi iéngi, kuala ué ni ibhidi iê. Tua-nda zuela ibhidi itatu, phala ku mona kiebhi, o athu a mu sidivila ku Micronesia kia mu di bhana ni ibhidi íii.

O ukexilu ua muenhu. Kioso kia bhixila ku kizanga kia Palau ku muvu ua 2007, Simon ni 22 a mivu a kitala, ua tungununa kuila ua-nda nganhala ngó bho fele, o kia kexile mu nganhala ku ixi iê ku Inglaterra kia betele-kota. “Eme nga di longo kuila, ki ngi tokelele ku sumba kima kioso kioso, ki nga mesenene. Lelu ngi sola ni unjimu, o kudia ku nga tokala o ku sumba, ni ku sota kuebhi kuala o ima ki i te kalu. Kioso ki ku zangata kima, eme ngi sota jipesa jokulu ni muthu u tena ku ngi kuatekesa ku ji iudika.” Kiebhi o ku kala ni ukexilu ki u bhindamena ima iavulu, ua mu kuata ué? Simon uambe: “Kiki kia ngi kuatekesa o kuijiia ihi ia tokala ku muenhu, ni ku sanguluka ni ima iofele. O lukuaku lua Jihova lua ngi kuatekesa mu maukexilu avulu a muenhu uami. O sambuadi dia mivu i nga sidivila bhabha, ngene mu kala ni kama ka kudia ni kididi kia ku zeka.” Ki kuala phata kuila, Jihova u kuatekesa o muthu ka bhindamena ima iavulu, mukonda ene a mesena ku dianga ku sota o Utuminu ua Nzambi.—Mat. 6:32, 33.

O ngunzu ia ku xa o dibhata. Erica uambe: “Eme ngi dibhana kiambote ni muiji uami, eme nga thandanganhele kuila o ngunzu ia ku xa o muiji, ia-nda fidisa o ukunji uami.” Ihi ia bhange phala ku di pelepalala? “Ande dia ku tunda, eme nga tange milongi ia Mulangidi ia lungu ni nguzu ia ku xa o dibhata. Kiki kia ngi bhangesa ku pelepalala o muxima uami phala ku di bhana ni kibhidi kiki. Ku mulongi u nga sange, mam’a ua suínisa mon’ê mu ku mu zuelela kiki: ‘Jihova u tena ku ku langa kiambote, eme ndenge.’  O kizuelu kiki kia ngi suínisa.” Hannah ni muadi uê Patrick, a mu sidivila ku Majuro ku kizanga kia Marshall. Hannah ua mu dibhana ni ngunzu ia ku xa o dibhata, mukonda dia ku banza ku jiphange jê ja maiala ni ja ahatu ja kilunga. Muéne uambe: “Eme ngi sakidila Jihova ithangana ioso, mukonda dia ukamba uetu ni jiphange jetu ku mundu mukonda ene uá, muiji uami. Mukonda sé o kikuatekesu kiá kia henda, eme nuka ngeji sidivila bhu kididi bhua bhingi kikuatekesu.”

O kuijidila. Simon uambe: “Kioso eie ki u bhixila ku ixi iéngi, u mona ioso iala kiéngi. Eme mu veji ja mukuá, ngi kala ni ngunzu ia ku bhanga itonokenu ia kuila ene oso a i tendela.” Erica Uambe: “Ku dimatekenu, eme nga kexile mu divua kala ki ngala ni dikamba, maji kiki, kia ngi kuatekesa o kuijiia se mukonda diahi eme ngeza kuku. Eme ki ngeza kuku phala ku bhanga i nga mesena, maji phala ku bhanga dingi mu sidivisu ia jihova.” Muéne uambe dingi: “Mu ku bhita thembu, eme nga bhange ukamba uambote, u nga bhana valolo iavulu.” Simon ua di suínisa o ku di longa o dízui dia Palauan, dia mu kuatekesa ku ‘jikula o muxima uê’ ku jiphange ja maiala ni ja ahatu bhu kididi kieniókio. (2 Kol. 6:13) O ku suína kuê mu ku di longa o dimi, kua mu kuatekesa o ku dibhana ni jiphange. Kioso o jiphange ja ubhe, ni jiphange a tokala o kididi kieniókio kia kalakala kumoxi, a kala ni ukamba uambote mu kilunga. Mabesá ahi a tambula o jiphange a di bhakula koko kua bhingi ki kuatekesu kiavulu?

Poxolo Phaulu uambe: “Uoso u kuua bhu’ofele, u muna ue bhu’ofele; uoso u kuua nzungule, u muna ue kia nzungule.” (2 Kol. 9:6) O kizuelu kia milongi íii kia tokala ku Jikidistá, kia dianga, ió a sanzumuna o ukunji uâ. Ibundu iahi iene mu ‘muna kia nzungule’ ku Micronesia?

Ku Micronesia kuala hanji ithangana iavulu phala ku mateka o ku longa o Bibidia, ni ku mona kiebhi o athu kiene mu kuijiia ni ku kaiela o milongi ia Mak’â Nzambi, ni ku kula mu nzumbi. Patrick ni Hannah ene a boko uâ ku Angaur ku kizanga kiofele kua tungu o 320 a athu. Kioso kia boko kuenhoko mu mbeji iiadi, ene a di sange ni mam’a ia dikudi. Muéne ua xikina o ku di longa o Bibidia ni lusolo luoso, ua di longo o kidi iu ua bhilula o ukexilu ua muenhu uê. Hannah uambe: “Kioso ki tu zubha o ku mu longa, kioso ki tu tunda ku bhata dia muthu iú kala muthu ni bixi iê, tu di tala. Tuamba: ‘Tua ku sakidila Jihova!’” Hannah uambe dingi: “Eme nga kijidile kuila Jihova ua-nda bhangesa o muhatu iú ku xikina mu maukexilu avulu, maji mukonda dia ku sidivila kua bhindamena kikuatekesu, etu tua sange muthu iú ua difuangana kala mbudi, etu tua mu kuatekesa phala kuijiia Jihova. Kiki kifika kia phangu iambote i tua tambula ku muenhu uetu uoso!” Kala kiambe Erica: “Kioso eie ki u kuatekesa muthu phala kuijiia Jihova, eie u kala ni kisangusangu, ku tena ku ki lombolola!”

Jixi javulu kua bhingi kikuatekesu phala aboki a Utuminu. Eie u tena ku kala bhu kaxi ka ió ene múia kua bhindamena kikuatekesu? Bhinga kua Jihova mu musambu phala ku suínisa o hanji iê ia ku sanzumuna o ukunji uê. Zuela ia lungu ni maka iá ku tufunga tua kilunga, mba ku kafunga ka ilunga mba ió a mu sidivila mu ixi mua bhingi kikuatekesu. Kioso ki u mona kuila u tena kiá, u soneka ku filiiale ua mu tambula konda ia mbambe ku ua mesena ku sidivila, phala u bhinge dingi itendelesu. * Sumbala eie ué u tena ku kala kumoxi ni mazunda a jiphange ja maiala ni ja ahatu, minzangala ni adiakimi, a kudi mba makaza, a mu di bhakula, ni u mone o kisangusangu kijila mu ku ‘muna kia nzungule.’