1. Ihi iala ni valolo mu ubhezelu uetu?

O KUILA saí kizuua ua monene kiá o dijina dia Jihova ku inzo mba ku kima, mu muzeu? Sé phata eie ua sangulukile. Mukonda tu Jimbangi ja Jihova, o dijina dia Jihova diala ni valolo mu ubhezelu uetu! Ku mundu uoso, sé-ku muthu u bhana valolo ku dijina dia Jihova kála ki tu bhanga etu. Maji tuejiia kuila o ujitu ua ku ambata o dijina dia Nzambi, ku lombolola ku bhanga o ima kála kia mesena muéne.

2. O ujitu uetu ua kuambata o dijina dia Nzambi, u lombolola ihi?

² Phala ku tu xikina kua Nzambi, ki tu tokala ngó ku tumbula o dijina diê. Tua tokala ku belesela o itumu iê. Mukonda dia kiki, o Bibidia i tu lembalala kuila, o mundu ua Jihova u ‘lenga o phulu.’ (Jisá. 34:14) O poxolo Phaulu ua tumbula o kitumu kiki kioso kia soneka: ‘Muthu uoso u amba kuila ua tokala kua Jihova, ki bhinga ituxi u i lenga.’ (Tanga 2 Timote 2:19.) O athu ejiia kuma tuene mu tumbula o dijina dia Jihova mukonda tu Jimbangi jê. Maji kiebhi ki tu tena ku lenga o ituxi?

3, 4. Izuelu iebhi ia Bibidia kene mu i tendela ku akua ku di longa o Bibidia, ni mukonda diahi?

³ Xinganeka mu izuelu ia Phaulu mu divulu dia 2 Timote 2:19. O kibatulu kiki, ki tumbula o kizuelu ‘o madisésa a Nzambi,’ mu ku suluka ki zuela kuila, ku madisésa a soneka-ku izuelu iiadi. Tu tena ku mona kuila, o kizuelu kia dianga kiambe “ngana uejiia oso a mu tokala,” kia tundu mu divulu dia Dialuilu 16:5. (Tanga o milongi ia dianga.) O kizuelu kia kaiiadi kiambe, ‘muthu uoso uamba kuila ua tokala kua Jihova, ki bhinga ituxi u i lenga,’ o kizuelu kene mu kitendela ku akua ku di longa o Bibidia. Mukonda diahi?

⁴ O izuelu ia Phaulu ilondekesa kuila muéne ua kexile mu tumbula izuelu ia tokala mu kibatulu kiéngi kia Bibidia. Maji ku moneka kuma ki kuala kibatulu kia mukuá mu Mikanda ia Hebalaiku, ia difu ni izuelu ia tumbula Phaulu. Mu kiki, ihi ia mesenene ku zuela Phaulu kioso kiambe: ‘Muthu uoso uamba kuila, ua tokala kua Jihova, ki bhinga ituxi u i lenga’? Kioso kia zubha ku zuela o izuelu íii, Phaulu ua tumbula o izuelu i tu sanga mu divulu dia Dialuilu 16, ia lungu ni ku bhukumuka kua Kola. O kuila o kizuelu kia kaiiadi kia lungu ué ni ku bhukumuka kua Kola?

5-7. Izulukutu iahi ia bhiti mu izuua ia Mozé ia tumbula Phaulu mu divulu dia 2 Timote 2:19? (Tala o foto ia dianga.)

⁵ O Bibidia i zuela kuila Datane, ni Abilamu an’a Eliiaba, a di bhongolola kumoxi ni Kola mu ku zoka ni Mozé ni Ala. (Dia. 16:1-5) Ene a bhukumukina Mozé, anga a dituna o ungana ua mu bhanene Nzambi. O athu iá, a kexile bhu kaxi ka mundu ua Jihova, mu kiki, exile kiluezu kia dikota phala o abhezi a fiiele. Ande dia ku tungula o abhezi a kidi, Jihova ua bhana itendelesu.

⁶ O Bibidia izuela: “Jihova anga u zuelela Mozé, uixi: Ambela o kiônge kioso kienhiki kuila: mu jimbandu ja jinzu ja Kola, ni Datane ni Abilamu, a tunde-mu. Kieniókio Mozé u balumuka, hé uia kua Datane ni Abilamu; o adiakimi oso a Izalaiele a mu kaiela. Muéne hé uambela o kifuxi, kuila: Nga mi diondo, o ku jibalaka ja athu iá a bhukumuka, sondolokenu-ku, ki mu babate ku kima kiâ kioso kia a tokala mbebhu enu ue ki mu bhituke mu ituxi iâ ioso. Ene oso anga a katuka mu jimbandu ja jinzu ja Kola ni Datane ni Abilamu.” (Dia. 16:23-27) Mu ku suka-ku, Jihova ua buika o athu oso a bhukumukine. Maji o abhezi a fiiele a bhuluka, mukonda a lenge o ituxi mu ku sondoloka kua ió a bhukumukine.

⁷ Jihova uejiia o ima iala ku muxima ua muthu! Muéne u mona o ufiiele ua ió a mu tokala. Maji né kiki, o abhezi a fiiele a lengele ió a bhukumukine. Nange Phaulu ua kexile mu zuela ia lungu ni musoso mu divulu dia Dialuilu 16:5, 23-27, kioso kia soneka: ‘Muthu uoso uamba kuila ua tokala kua Jihova, ki bhinga ituxi u i lenga.’ Mu kiki, tu tena ku zuela kuila o izuelu íii, ia lungu ni izuelu ia soneka Phaulu kioso kiambe “ngana uejiia oso a mu tokala.”—2 Tim. 2:19.

8. O kuila o abhezi a fiiele a tokala ngó ku tumbula o dijina dia Jihova, mba ku tokala mu kilunga?

⁸ Phaulu ua tumbula o ima ia bhitile mu izuua ia Mozé, phala ku lembalesa Timote kuila, muéne ua tokalele ku langa u ukamba uê ni Jihova. O Jikidistá ka tokalele ngó ku kala mu kilunga. Kiki  kiene kia bhangele ué o abhezi a fiiele a Nzambi mu izuua ia Mozé, ene ka kexile mu tumbula ngó o dijina dia Jihova. O abhezi a fiiele a Nzambi, a tokala ku lenga o ituxi. Ihi ia lomboluele o ima íii phala Timote? Disá diahi di tena ku di longa o mundu ua Jihova mu itendelesu ia Phaulu?

9. Mukonda diahi “o kudikuata ni athu jiphata ja usemenhi-phe, ja uôua,” ki kima kiambote phala o Jikidistá mu kilunga?

⁹ O Mak’â Nzambi a bhana itendelesu ia lungu ni ima ia iibha ia tokala ku dituna o Jikidistá. Mu kifika, mu divulu dia 2 Timote 2:19, Phaulu ua tendelesa Timote phala “ka di kuatele maka ma ngoho” ni ku ‘lenga o kubuabuala kua ulalu.’ (Tanga 2 Timote 2:14, 16, 23.) Saí athu mu kilunga a kexile mu longa ima ia makutu. A mukuá akexile mu longa ima ia kexile mu bhangesa o athu ku di kuata. Saí milongi ki iexile ia iibha, maji ia kexile mu bheka maka mu kilunga. Mukonda dia kiki, Phaulu ua tendelesa Timote: “O kudikuata ni athu jiphata ja usemenhi-phe, ja uôua, ditune-ju.”

10. Ihi i tua tokala ku bhanga se tu di sanga ni akua ku lungulula o kidi?

¹⁰ Lelu, ki bhonza ku sanga athu a longa o ima ia makutu mu kilunga. Maji né kiki, tu tena ku sanga milongi ia makutu ki i tokala mu Bibidia. Se tu i sanga kabasa kididi, tua tokala ku dituna-iu. Ki kima kiambote ku zuela ni akua ku lungulula o kidi, ki kale pholo ni pholo, mu internete, mba mu maukexilu a mukuá. Né muene se tua mesena ku kuatekesa o muthu iú, se tu zuela né, tua-nda bhukumukina Nzambi. Muéne u tu tendelesa ku dituna o milongi ia akua ku lungulula o kidi.

11. Ihi i tena ku bhangesa o athu ku ‘di kuata,’ ni kiebhi o tufunga kia tena ku bhana phangu iambote?

¹¹ Ko akua ku lungulula o kidi ngó ene mu bheka o maka mu kilunga, kuene ué ima ia mukuá. Mu kifika, nange kála muthu uala ni ibanzelu iê ia lungu ni itonokenu ia fuama phala o Kidistá. O ku jijidika mukuetu ku bhanga kala ki tu banza, ku tena ku bhangesa “o kudikuata ni athu jiphata ja usemenhi-phe, ja uôua.” Abha se muthu mu kilunga u longesa o athu ku bhanga itonokenu ki i lungu ni itumu ia Bibidia? O tufunga mu kilunga ka tokala kuehela o muthu iú ku bhanga o kima kiki, mukonda ka mesena ku di kuata nê. (Jisá. 11:5; Efe. 5:3-5) Maji né kiki, o tufunga a tokala ku di langa phala ka longe o ibanzelu iâ. Mu veji dia kiki, ene a tokala ku kaiela o kitendelesu kia Bibidia kiambe: “Ingenu o kilunga kia Nzambi ku mual’oko . . . Ki mu kale mu jingana ja kutumina ió ene a mi bhana-nâ ku a enga, maji mu kala mù atuameneni mua bhana phangu ku kilunga.”—1 Phe. 5:2, 3; tanga 2 Kolindu 1:24.

12, 13. (a) Kiebhi o Jimbangi ja Jihova kia sola o itonokenu iambote, ni itumu iebhi ia lungu ni maka enhá? (b) Kiebhi o itumu ia tange bhu kaxi 12 ia lungu ni maka avulu ku muenhu uetu?

¹² O kilunga kietu ki ki tonginina o ji filme, ni ji joko, ni madivulu mba mimbu phala ku sola i tua tokala o ku lenga. Mukonda diahi? Mukonda o Bibidia i tendelesa kala muthu mudietu, ku longa o kilunji kiê “kutungula kioso kiauabha, mu kiki kiaiibha.” (Jihe. 5:14) Tu tena ku sanga milongi mu Bibidia phala ku tu kuatekesa ku sola kiambote o itonokenu ietu. Mu ima ioso i tu sola, tua tokala ku ‘sota ku di longa jinga ioso i uabhela kiambote Nzambi.’ (Efe. 5:10) O Bibidia i longa ué kuila, o atuameni a  miji ala ni kutena, mu kiki, ene a tena ku sola itonokenu ka tokala ku i bhanga mu inzo iâ. *—1 Kol. 11:3; Efe. 6:1-4.

¹³ O milongi ia Bibidia i tua tange kiá, ki i tu kuatekesa ngó ku sola kiambote o itonokenu ietu. Mu kifika, o athu a tena ku di kuata ué mukonda dia izuatu, sauidi, kudia, ni ima ia mukuá dingi. Maji se o ima íii ki i bhangesa ku bhukumukina o itumu ia Bibidia, o mundu ua Jihova ki u tokala ku di kuata, mukonda o “ngunza ia Ngana-phe ka fuama u kuata mvunda. Maji u kala muthu u lendukila athu oso, u ijiia kulonga kiambote, u xididika.”—2 Tim. 2:24.

14. Kifika kiahi kia bhange Phaulu phala ku lombolola kuila ki tua tokala ku bhanga o ukamba ni athu a iibha?

¹⁴ Mu ukexilu uebhi dingi ‘Muthu uoso uamba kuila ua tokala kua Jihova, ki bhinga ituxi u i lenga’? Mu ku lenga ku bhanga o ukamba ni athu a ta o ituxi. Kioso Phaulu kia tumbula o kizuelu ‘madisésa a Nzambi’ muéne ua soneka izuelu ia mukuá. Muéne ua soneka ia lungu ni ‘inzo ia dikota’ ki mu kala ngó “itutu ia ulu ni ia phalata, mu kala ue ni ia mixi ni ia mavu. O íii ia ujitu phala ngó ku i katula bhu ithangana ia tokala, o iamukua-phe iene ia izuua ioso.” (2 Tim. 2:20, 21) Mu ku suluka, muéne ua tendelesa o Jikidistá ku “di zelesa” mba ku sondoloka ku itutu ia “izuua ioso.”

15, 16. Ihi i tu longa o kifika kia ‘inzo ia dikota?’

¹⁵ Ihi i lombolola o kifika kia Phaulu? O kifika kia Phaulu ki sokesa o Kilunga ni ‘inzo ia dikota,’ ki sokesa ué o Jikidistá mu kilunga ni “itutu.” Se o itutu mu inzo ki i zele, i tena ku kala kiluezu kia dikota. Se kiki ki bhita, o mukua dibhata ka tokala ku bunda kumoxi o itutu ia zele ni ioio ki i zele, benge benge o itutu phala ku lamba.

¹⁶  Kiene kimoxi ué ni Jiselevende ja Nzambi. Se tua mesena ku zela mu maukexilu oso ku muenhu, tua tokala ku sondoloka ku athu mu kilunga, a dituna ku belesela o itumu ia Jihova mu ithangana ioso. (Tanga 1 Kolindu 15:33.) Se a tu tendelesa ku sondoloka ku athu a iibha mu kilunga, kiki ki lombolola kuila tua tokala ué ku di langa mu ku bhanga o ukamba ni athu ka tokala mu kilunga. Tu bhanga kiki mukonda, athu avulu ka tokala mu kilunga ‘azodi a kitadi, a xibhaka tata ni mama, a kamba ujitu ua Mak’â Nzambi, akua ku tatela ngó akuâ, a kaka, a di zemba ni ima iambote, a bhanga ufe, azodi a jivondadi jâ, ki azodi a Nzambi, kana!’—2 Tim. 3:1-5.

17. Kiebhi o akua Izalaiele exile jifiiele, kia ditunu o ituxi?

¹⁷ Kioso Jihova kia bhana o kitumu phala ku ‘sondoloka mu jimbandu ja jinzu ja Kola, ni Datane ni Abilamu,’ o akua Izalaiele exile fiiele, ‘a sondoloka mu jimbandu ja jinzu ni lusolo.’ (Dia. 16:24, 27) Ene a tundu ni lusolo, ka kexile mu banza se a tokalele ku tunda mba kana. Ene oso anga a ‘sondoloka mu jimbandu ja jinzu.’ O ió exile fiiele a mesenene ku belesela ni muxima uoso. Ene a londekesa kiambote kuila a kexile ku mbandu ia Jihova ni kuila a zembele o ituxi. Ihi i tu tena o ku di longa mu phangu íii?

18. Ihi ia mesenene ku zuela Phaulu kioso kia tangela Timote phala ‘ku lenga o jihanji ja unzangala’?

¹⁸ O ukamba uetu ni Jihova ujitu ua dikota. Mu kiki, tua tokala ku bhanga ioso phala ku u langa. Kiki kiene kia mesenene ku zuela Phaulu kioso kia tendelesa Timote ‘ku lenga o jihanji ja unzangala.’ (2 Tim. 2:22) Mu kithangana kieniókio, Timote nange ua kexile kiá ni 30 a mivu. Maji né muene o adiakimi, a tena ku kala ni ‘jihanji ja unzangala.’ Kioso kia kexile ni jihanji jiji, Timote ua ji ‘lengele.’ Mu kidi, Timote ua tokalele ku ‘lenga o ituxi.’ Jezú ua zuela ia lungu ni maka enhá kioso kiambe: “Diesu dié, se di ku fudisa, lokola-diu, u ki texi!” (Mat. 18:9) Lelu, o Jikidistá ja mesena ku belesela o itendelesu íii ni ku langa o ukamba uâ ni Nzambi, a tokala ku batula o maka ni lusolo luoso.

19. Ihi iene mu bhanga o jiphange phala ku langa o ukamba uâ ni Jihova?

¹⁹ Saí iá, a kexile mu nua uhôlua uavulu ande dia ku kituka Jimbangi ja Jihova, ehela o ukexilu iú. A mukuá a bhânga ni jihanji ja xitu, a dituna itonokenu ia a bhangesa ku kala ni jihanji ja iibha. (Jisá. 101:3) Mu kifika, saí phange ua uabhele kiavulu kuia mu jifesa mua kexile mu kina mu ukexilu ua iibha. Kioso kia di longo o kidi kia Bibidia, muéne ua ditunu ku kina, né muene mu jifesa ji bhanga o jiphange mu kilunga. Muéne ka mesena dingi ku kala ni ibanzelu, mba jihanji ja iibha. Mu kidi, kiki ki kilombolola kuila o Jikidistá ka tokala kúnua, ku kina, mba ku bhanga ima ia mukuá. Maji etu enioso tua tokala ku langa o ukamba uetu ni Jihova.

20. Sumbala ki bhonza ku lenga o ituxi, ihi i tena ku tu kuatekesa ku suína?

²⁰ Kima kiambote kuambata o dijina dia Jihova, maji kiki kilombolola kuila, tua tokala ku belesela o itumu iê. Tua tokala ku ‘lenga o ituxi’ ni ku ‘lenga o phulu.’ (Jisá. 34:14) Mu kidi, saí ithangana ki bhonza kiavulu ku bhanga kiki. Maji kima kiambote kuijiia kuila, ithangana ioso Jihova u zola “oso a mu tokala,” ni oso a mu belesela.—2 Tim. 2:19; tanga 2 Malunda 16:9a.