TAT’ETU a mu vuala ku mbanza ia Graz, mu ixi ia Áustria ku muvu ua 1899, muéne ua kexile hanji munzangala kioso kia bhiti o Ita ia Dianga. Kioso kia mateka o Ita ia Kaiadi ku muvu ua 1939, tat’etu a mu ixana phala ku kala disoladi dia akua Alemanha. Muéne a mu jibha ku muvu ua 1943, kioso kia kexile mu bhânga mu ita ku ixi ia Rússia. Kioso kiafu tat’etu, nga kexile ni mivu iiadi. Nuka ngejidile tat’etu, nga mu mesenene kiavulu, benge-benge kioso ki nga monene kuila kala koleka iami bhu xikola ua kexile ni tat’ê. Kioso kia bhiti ithangana mu unzangala, nga sange kikuatekesu, kioso ki nga di longo ia lungu ni Tat’etu ia diulu, o Tata ia tundu eneoso, ka tena kufua.—Haba. 1:12.

Kioso ki nga kexile ni sambuadi dia mivu, nga bhange mbandu ku kibuka kia alondi a minzangala. O kibuka kiki kia alondi, kisangela kia mundu, a ki bhange ku kabhitangu ka masoladi Robert Stephenson Smyth Baden-Powell, ku muvu ua 1908 ku ixi ia Grã-Bretanha. Ku muvu ua 1916, muéne ua bhange o kibuka iu ua ki xanene an’a imbungu (mba an’a ku londa) phala o minzangala ia kitala kiami.

Eme nga zolele kiavulu o jinjila ji tuexile mu bhanga mu ji mbanza mu masukilu ma semana, kala o ku zeka mu ji balaka, ku ta o izuatu ia kibuka ni kuenda ni ku xika mimbu ni ji batuke. Nga uabhele kiavulu ku kala kumoxi ni akuetu, o alondi.

Tua kexile mu kuimba mimbu bhu mbandu ia túbhia ni ku bhanga ji joko mu iangu. Etu tua di longo ué ia lungu ni ibhangelu, ia ngi bhangesa o ku bhana valolo ku kikalakalu kia Mubhangi uetu.

O alondi akexile mua longa ku bhanga ima iambote izuua ioso. Etu tua kexile mu di menekena mu dietu ni izuelu, “tuala polondo.” Eme nga uabhele kiavulu o ukexilu iú ua ku di menekena. Saí kibuka kia tundu o hama ia minzangala, a mukuá akua ngeleja ia Katolika, a mukua ji Protestante, o mukua Budista.

Tundé ku muvu ua 1920, kioso ki ku bhita mivu o minzangala o Alondi, a kexile mu kala ni iônge ia mundu uoso. Eme ng’endele mu iônge ienioió. O kiônge kia mukuá kia bhitile ku muvu ua 1951, ku mbeji ia Kakuinhi ku mbanza ia Bad Ischl mu ixi ia Áustria, o kia mukua ku muvu ua 1957, ku mbanza ia Birmingham, mu ixi ia Inglaterra, kua kexile 33.000 a alondi a tundu ku 85 a jixi. Tua kexile ué 750.000 ia athu a bhangele mbandu mu kiônge. O mukuá, Elizabeth, o Nvuale ia Inglaterra. Phala eme, o ku kala mulondi, kua difuanganene ni ku bhanga mbandu ia ukamba ku mundu uoso. Eme ki ngi kijidile kuila nga-nda sanga ukamba uambote, ua athu a zolo Nzambi.

Ku muvu ua 1958, nga kexile kia ku disukilu dia ku di longa o ufunu ua ku sidivila mu hotele ia  Dikota ia Wiesler mu mbanza ia Graz mu ixi ia Áustria. O koleka iami Rudolf Tschiggerl ua kexile xefe iami, ua zuela n’eme ia lungu ni Bibidia. Eme ki ngi kijidile kima kia lungu ni kidi kia Bibidia. Muéne ua ngi ambela kuila o milongi ia tilindade, ki i kexile mu Bibidia, ki ia kidi. Eme nga mu ambela kuma milongi ia Bibidia, ni kuila muéne ka mu zuela o kidi. Eme nga mu zolele, nga mesenene ku mu kuatekesa phala ku vutuka dingi mu ngeleja ia Katolika.

Rudolf nga kexile mu mu ixana Rudi, ua mesenene ku ngi bhana Bibidia. Nga mu ambela kuila nga mesena Bibidia ia Katolika. Muéne ua ngi bhana Bibidia, maji kioso ki nga mateka o ku i tanga, nga sange-mu kamukanda ko bhange ku Sociedade Torre de Vigia. Rudi muéne ua tele o kamukanda moxi a Bibidia. Eme ki ngi ki uabhele, mukonda o kamukanda sumbala ka monekene kuila ka kidi, maji o milongi ia kexile-mu ki iexile ia kidi. Maji eme nga xikinine o ku zuela ni muéne, ia lungu ni Bibidia. Rudi ua londekesa unjimu, mu kiki ka ngi bhana dingi madivulu. Mu mbeji jitatu tua suluka mu zuela ia lungu ni Bibidia, katé muene mu usuku.

Kioso ki nga zubha o ku di longa, o mam’etu ua ngi tumikisa mu xikola i longa o athu a kalakala mu hotele. O xikola ia kexile ku Bad Hofgastein, o mbanza ia kexile mu honga ia Alps. Iene ia bhangele mbandu ku Hotele ia Dikota ku Bad Hofgastein, mu veji javulu, nga kexile mu kalakala-ko phala kuijiia dingi.

Rudi ua tumikisine o kijimbuete kiami kia kididi kia ubhe ku nga tungile, ku Betele ia Vienna, phala ku ngi kunda, mu kiki, o Betele ia tumikisa jiphange jiiadi ja ahatu, Ilse Unterdörfer ni Elfriede Löhrphala. * Saí kizuua, o mu tambuludi ua ajitu ku hotele, ua ngi ixana kuila kuala ahatu kiiadi bhu kanga ala mu dikalu, a-ndala ku zuela n’eme. Eme ki ngejidile se a nanhi, maji ngai mu mona se a nanhi. Maji nga mono kuila Ilse ni Elfriede, exile akunji a Jimbangi ja Jihova mu ithangana ia ji Nazi mu Alemanha, kioso o kikalakalu kiâ kia ki fidisile. Ande dia ku mateka o ita ia Kaiiadi ia Mundu uoso, ene a a kutile ku xiku dia ngoji ia Alemanha (Gestapo), a atumikisine ku kibende kia Lichtenburg. Mu kithangana kia ita, ene a tumikisa ku kibende kia Ravensbrück, kia zukamene ku mbanza ia Berlin.

O jiphange jiji ja ahatu, exile mu kitala kia mam’etu, mukonda dia kiki, eme nga kexile mua xila. Eme ki ngi mesenene kuila o kithangana kiâ, ki kala kia ki ngó mu ku zuela nau, mu ku bhita ji semana mba jimbeji, nga a mbela kuila ki nga-ndala. Mu kiki, eme nga ambela se ene a tena ku ngi bhana ibatulu ia Bibidia i zuela ia lungu ni milongi ia Katolika, iamba kuila o papa ia dianga uexile poxolo Phetele, ni kuila o ji papa joso a tambula o kutena bhu kaxi ka muene, mu ku bhingana o ji poxolo. Eme nga a tangela kuila, nga-nda kuambata o ibatulu íii ia Bibidia kua padele phala ku zuela né ia lungu ni milongi íii. Eme nga banze kuila, mu ku bhanga kiki, nga-nda sanga o kidi.

O ngeleja ia Katolika i jimbulula o izuelu ia Jezú i tu sanga mu divulu dia Matesu 16:18, 19, phala ku bhana valolo ku milongi iâ ia lungu ni ku bhingana o ji poxolo. O ngeleja ia Katolika iamba ué kuila o  papa, a muijiia kala o tata Ikôla, ka tange makutu, kioso kia bhana milongi mu ngeleja. Athu avulu akua Katolika, a xikina ku milongi íii. Eme ué nga xikinine ku milongi íii, mukonda nga banzele kuila, se o papa u zuela kuila o kiki kidi, kidi muene. Maji eme nga banzele ué kuila, se o papa u tena ku tá kituxi, mu kiki o milongi ia tilindade i tena ku kala ia mukutu.

Kioso ki nga kundu padele, muéne ka tenene ku tambuijila o ibhuidisu iami. Mu veji dia kiki, muéne ua ngi bhana divulu dia zuela ia lungu ni ku bhingana o jipoxolo. Nga mbata o divulu ku bhata, eme nga di tange. Mu suluka, nga vutuka dingi kua padele ni ibhuidisu ia mukuá. Muéne ka tenene ku i tambuijila, iú uambe: “Eme ki ngi tena ku ku xikinisa ku milongi iami, eie ué ku tena ku ngi xikinisa ku milongi ié . . . Mu kiki ndé kiambote!” Muéne ka mesenene dingi ku zuela n’eme.

Kioso kia bhiti o kithangana, eme nga xikina o ku di longa o Bibidia ni Ilse ni Elfriede. Ene a ngi longo ia lungu ni Tata ia kidi ia diulu, Jihova Nzambi. (Nzuá 17:11) Ki bhu kexile luua kilunga bhu kididi kieniókio, mu kiki o jiphange jiiadi jiji ja ahatu, a kexile mu bhanga o iônge mu inzo ia muiji ua mesenene ué o ku di longa. Ki kua kexile athu avulu a kexile múia mu iônge. Ki ku kexile phange ia diiala a mu batizala, phala ku kala ku pholo ia iônge, mu kiki, o jiphange ja ahatu ene akexile mu kuendesa o iônge mu kilunga. Mu veji ja mukuá, kua kexile mu kuíza phange ja maiala phala ku bhanga o diskursu dia katunda.

Ilse ni Elfriede, a mateka o ku ngi longa o Bibidia ku mbeji ia Kamusasadi ka muvu ua 1958. Eme a ngi batizala kioso kia bhiti mbeji jitatu, ku mbeji ia katatu ka muvu ua 1959. Ande dia ku ngi batizala, nga a bhingi se ngi tena kuia kumoxi ni ene mu sidivisu ia ku boka nzo ni inzo phala ku mona kiebhi kia bhanga o kikalakalu kiki. (Ika. 20:20) Kioso ki ngai ni ene mu veji ia dianga, nga bhingi ku ngi bhana o mbambe iami. Ene a ngi bhana Sanzala, eme nga kexile mu ia-ko ubheka uami mu boka nzo ni inzo ni ku vutuka phala ku kunda o athu a mesena o ku a longa.

Ku muvu ua 1960 kioso ki nga zubha o xikola ia ufunu ua ku sidivila mu hotele, nga vutuka ku mbanza iami phala ku longa o kidi kia Bibidia ku muiji uami. Katé lelu, né muene ki bhuala muthu ua mu di longa o kidi kia Bibidia, maji saí kia a mukuá a mu londekesa kuila a mesena.

Ku muvu ua 1961, o Filiiale ia tumikisa mikanda mu ilunga phala ku suínisa o jiphange, o ku xinganeka ia lungu ni sidivisu ia thembu ioso. Eme nga kexile ngi dikudi ni sauidi, mu kiki nga banze o ku mateka o sidivisu ia muboki ua thembu ioso. Nga mono kuila nga tokelele ku kala ni dikalu, phala ku bhanga o sidivisu íii, eme nge bhuidisa o kafunga ka ilunga Kurt Kuhn, se ihi ia banze se eme nga kalakalele hanji jimbeji phala o ku sumba o dikalu. Muéne ua tambuijila: “O kuila Jezú ni ji poxolo a kexile ni dikalu phala ku bhanga o sidivisu íii?” O kibhuidisu kiê, kia ngi kuatekesa o kuijiia ihi i nga tokalele o ku bhanga. Eme nga bhange ioso phala ku mateka o sidivisu ia muboki ua thembu ioso sé ku laleka. Maji kuma nga kexile mu kalakala 72 a ji ola ku semana mu hotele, kia dianga nga tokalele ku lungulula o ima.

Nga bhingi ku xefe iami, se ngi tena ngó ku kalakala 60 a ji ola mu veji dia ku kalakala 72 a ji ola. Muéne ua xikina, maji ka sosolola ku kitadi. Mu ku bhita kithangana, nga bhingi phala ku kalakala 48 a ji ola ku semana. Muéne ua xikina dingi, sé ku ngi sosolola ku kitadi. Eme nga mu bhingi dingi phala  ku kalakala 36 a ji ola ku semana, mu veji íii ua kixikina dingi. Katè kiki, ki ngi kexile mu ki tendela, se mukonda diahi ka kexile mu ngi sosolola o kitadi ki nga kexile mu tambula! Nga monene kuila o xefe iami ka mesenene kuila ngi xa o salu íii. Ni ithangana íii i nga kexile na-iu, nga mateka o sidivisu ia thembu ioso. Mu ithangana iná, o aboki a thembu ioso a kexile mu bhanga 100 a ji ola ku mbeji.

Mu ku bhita mbeji jiuana, a ngi tumikisa kala muboki ua katunda, a ngi solo ué ku kala ku pholo ia kilunga kio fele ku mbanza ia Carinthia, ku Sanzala ia Spittal an der Drau. Mu ithangana ienioió, o muboki ua katunda, ua kexile mu bhanga 150 ia ji ola ku mbeji. Eme ki ngi kexile ni muthu phala ku tunda né kala muboki kumoxi n’eme, maji nga kexile ni kikuatekesu kia phange ia muhatu Gertrude Lobner ua kexile múkuatekexi mu ku sidivila mu kilunga, muéne ua kexile mu ngi kuatekesa mu sidivisu ia ku boka. *

Ku muvu ua 1963, a ngi ixana phala ku bhanga o sidivisu ia kafunga ka ilunga. Eme nga kexile jinga mu bhanga njila mu komboio phala kuia mu kilunga ni kilunga ni kuambata o ji mala ja neme. O jiphange ka kexile ni makalu, mukonda dia kiki, ka tenene ku ngi kuata mu kididi kia komboio phala ku nga mbata mu kilunga. Eme ki ngi mesenene ku bhangesa o jiphange ku divua kia iibha, se nga kuatele taxi phala kuia bhu kididi bhu nga-nda tudila, mu kiki nga kexile mu kuendela-mi bhoxi.

Ku muvu ua 1965 kioso ki nga kexile hanji ngi di kudi, a ngi xanene phala o ku di longa mu Xikola ia Ngiliiade ia 41 a kibuka. Ndumba ia jikoleka jami, exile uá makudi. O kima kia ngi di uanesa, kioso ki nga zubha o xikola, a ngi tumikisa dingi ku ixi iami ku Áustria ku bhanga o sidivisu ia ku kunda o ilunga. Ande dia ku tunda ku Estados Unidos, a ngi solo phala ku kalakala ni kafunga ka ilunga mu semana jiuana. Nga ki uabhele kiavulu o ku kalakala ni Anthony Conte, muéne uexile phange ia henda, ua zolele kiavulu o sidivisu ia ku boka, iu ua kexile mu bhanga kiambote o sidivisu íii. Etu tua sidivila kumoxi ku Nova York ku mbandu ia Cornwall.

Kioso ki nga bhixila ku Áustria, a ngi solo phala ku kalakala ku mbandu ia ilunga, ku ngejidila phange ia iuka ia muhatu Tove Merete. Muéne a mu sase mu njila ia kidi tundé mu kitanu kia mivu. Kioso o jiphange ki ebhula se kiebhi ki tua dijiia, mu ku tonoka tuamba: “O filiiale ia bhange kima phala etu.” Tua kazala kioso kia bhiti muvu, ku mbeji ia Kasamanu ka muvu ua 1967, a tuehela o ku bhanga o sidivisu ia ku kunda o ilunga.

Ku muvu ua mukua, nga mono kuila bhu kaxi ka mbote ia Jihova ki i tu tokala, a ngi solo bhu kaxi ka nzumbi Ikôla kala mon’a Nzambi. Mu kiki, nga mateka o ukamba ua katunda ni Tat’etu ia diulu, kala ué ni ene oso, kala kiamba o divulu dia Loma 8:15, o “kudikola kua Nzambi: Abha, Tata!”

Eme ni Merete tua suluka mu ku sidivila kala kafunga ka ilunga, ni ku sidivila kala mubhidi ua tufunga tua ilunga, katé ku muvu ua 1976. Mu veji javulu mu thembu ia kixibhu, tua kexile mu zeka mu dixilu, mua talala kiavulu. Saí kizuua, kioso ki tua balumuka, tua mono kuila mbandu ia kubele kuetu, iezalele ni jelu! Mu kiki, tua banze kuambata makina i temesa o dixilu phala ku tu kuatekesa mu usuku  mukonda dia mbambi. Mu ididi ia mukuá, phala ku ia mu inzo ia dixidixilu, kia bhingile kuenda ku thandu a neve. Etu ki tu kexile ni inzo phala etu, mu kiki, mu ji Sekunda tua kexile mu kala mu inzo mua tu tambulula mu semana ia bhiti. Mu ji Tersa mu kamene, tuia mu kilunga kia mukuá.

Nga sanguluka mu ku zuela kuila, ku mivu ioso íii, o muhatu uami uene jinga mu ngi kuatekesa. Muéne ua zolo o sidivisu ia ukunji, eme nuka nga mu suinisine phala kuia mu sidivisu ia kuboka. Muéne ué ua zolo o makamba, u thandanganha ni ibhindamu ia akuâ. Muéne kikuatekesu kia dikota phala eme.

Ku muvu ua 1976, a tu ixana phala ku sidivila ku filiiale ia Áustria, ku mbanza ia Vienna, ia a ngi solo phala ku bhanga mbandu ia Kibuka kia Filiiale. Mu ithangana ienioió, o filiiale ia Áustria, ia kexile ku pholo ia jixi ja Europa do Leste, ja kexile mu kalakala mu ukexilu ua ku tumikisa o madivulu mu jixi jeniojo mu kasuekele. O phange Jürgen Rundel, muéne ua kexile ku pholo ia kikalakalu kiki. Eme nga kexile ni ujitu ua ku kalakala ni muéne, mu ku bhita thembu a ngi bhingi phala ku kala ku pholo dia alunguludi a madivulu phala o dikuinhi dia madimi a jixi ja Europa do Leste. Jürgen ni muhatu’é Gertrude, a suluka mu ufiiele uâ mu ku sidivila kala aboki a katunda ku Alemanha. Ku dimatekenu dia muvu ua 1978, o filiiale ia Áustria, ia bhangele tu madivulu mu madimi a samanu ni ji makina jofele. Etu ué tua kexile mu tumikisa o madivulu phala o jixi ja mukuá a kexile mu tu bhinga. Otto Kuglitsch ua mu sidivila lelu ku filiiale ia Alemanha ni muhatu’é Ingrid, muéne ua kexile ku pholo ia kikalakalu kiki.

O jiphange ku Europa do Leste, a kexile mu bhanga uá madivulu mu ixi iá ni ji makina ja ku kopiala, mba a kexile mu ji bhanga ni ima ia ji filme. Maji né muene kiki, ene a bhingile hanji o kikuatekesu kia jiphange ku jixi jengi. Jihova ua lange o kikalakalu kiâ. Ku filiiale, etu tua zolo o jiphange jiji, ja sidivila ni ufiiele uoso ku mivu ioso íii iavulu ni izukutisu.

Ku muvu ua 1989, nga kexile ni ujitu ua kuia ku Roménia, ni Phange Theodore Jaracz ua tokalele ku Kibuka Kia Utuminu. Tuai kuenhoko, phala ku kuatekesa o jiphange javulu ku vutuka mu kilunga. Tundé ku muvu ua 1949, o jiphange jiji, a di sondolokele ku kilunga, ia a bhangele ilunga iéngi. Né muene kiki, ene a sulukile mu ku boka ni ku  batizala athu a ubhe. Ene katé muene a a tele mu ji kaleia mukonda dia ku dituna o ku bhanga o sidivisu ia usoladi, kala o ji phange a kexile mu kilunga, kiene ué kia bhangele. O kikalakalu kietu kia ku boka mu Roménia, a ki fidisile, mu kiki tua kexile hanji mu diongeka mu kasuekele. Tua kexile mu diongeka mu inzo ia Phange Pamfil Albu, ni tufunga ni a tuameni a Kibuka Kia ixi ia Roménia. Maji tua kexile ué ni Rolf Kellner, ua kexile o mulunguludi ua tundu ku ixi ia Áustria.

Mu usuku ua kiônge kia kaiiadi phala ku batula o maka, o Phange Albu, ua tena ku xikinisa o tufunga tu uana phala ku kala kumoxi mu kilunga. Muéne uambe: “Se ki tu bhange kiki lelu, ki tua-nda ki bhanga dingi.” Mu kiki, 5.000 ia jiphange a vutuka mu kilunga. Kikoué kia dikota phala Jihova, o Satanaji a mu tolola!

Ku disukilu dia 1989, ande dia Comunismo kubua ku Leste ia Europa, o Kibuka kia Utuminu kia tu ixana, eme ni muhatu’ami phala kuia ku Mbonge ia Nova Yorque. Tua sasumuka. Etu tua mateka o ku sidivila ku Betele ia Brooklyn ku mbeji ia Kavua ka muvu ua 1990. Ku muvu ua 1992 a ngi solo phala ku kalakala mu kibuka kia sidivisu kia Kibuka kia Utuminu , tundé ku mbeji ia Kavua ka muvu ua 1994, ngala ni ujitu ua ku bhanga mbandu ia ku sidivila ku Kibuka kia Utuminu.

O izuua i nga sidivila o kudia mu hotele, ima ia bhiti kiá thembu. Mu lelu ngala ni ujitu, ua ku kalakala ni akuetu mu ku pelepalala ni ku sidivila o kudia mu nzumbi phala o jiphange jetu ku mundu uoso. (Mat. 24:45-47) Kioso ki ngi xinganeka ku 50 a mivu ndenge, u nga bhiti mu sidivisu ia thembu ioso, ngi sakidila kiavulu. Ngi sanguluka kiavulu kioso ki ngi mona kuila Jihova ua mu besoala o phange jetu ku mundu uoso. Eme nga uabhela o ku kala mu Iônge ia mundu uoso ua ji Mbangi ja Jihova, ku ngene mu di longa ia lungu ni Tat’etu ia diulu Jihova, ni kidi kia lungu ni Bibidia.

Eme ngene mu samba phala o mazunda ni mazunda a athu a di longe o Bibidia, a xikine o kidi ni ku sidivila Jihova kumoxi ni jiphange jetu ku mundu uoso. (1 Phe. 2:17) Nga mu kingila o kithangana, phala ku mona tundé ku diulu o difukunukinu dia athu mu ixi, ni ku mona tat’etu ua ngi vuala. Nga mu kingila kuila muene ni mam’etu ni jindandu ja mukua ji nga zolo, a xikina o ku bheza Jihova mu Palaízu.