1, 2. Kiebhi Jihova kia di zuelesa ni jiselevende jê?

O MUSOSO ua Bibidia u londekesa kuila, o athu akexile mu tambula itendelesu kua Jihova mu maukexilu avulu. Saí iá, Nzambi ua zuela nau bhu kaxi ka ji anju, a mukuá bhu kaxi ka ji nzoji mba isuma, mu kua tangela o ima ieji bhita ku hádia. Jihova ua a bhanene ué ikalakalu ia tokala. (Dia. 7:89; Ize. 1:1; Dan. 2:19) Saí a mukuá a tambula itendelesu bhu kaxi ka athu a a solele kua Nzambi mu ixi. Sumbala o itendelesu akexile mu ku a bhana-iú, mu maukexilu avulu, maji oso akexile mu belesela ni ku kaiela o itendelesu ia Nzambi, a tambula mabesá.

² Lelu, Jihova uendesa o mundu uê bhu kaxi ka Bibidia, ni ka nzumbi iê ikola ni bhu kaxi ka kilunga. (Ika. 9:31; 15:28; 2 Tim. 3:16, 17) O itendelesu i tu tambula ki i bhonzo ku i tendela, ia difu ni kuívua dízui ku tu zuelela: “Íii iene o njila, endelenu muenhumu.” (Iza. 30:21) Mu kidi, Jihova u tu bhangesa ué kuívua o dízui diê, bhu kaxi ka Jezú. Muéne ua solo Jezú phala ku kala ku pholo dia kilunga, bhu kaxi ka ‘Kimbadi kia fiiele.’ (Mat. 24:45) Etu tua tokala ku kaiela o itendelesu ia tu bhana muéne ni muxima uoso, mukonda o ku belesela kuetu, kuene kua-nda tu bhangesa ku bhuluka ku hádia.—Jihe. 5:9.

3. Ihi i tena ku tu fidisa ku belesela Jihova ni muxima uoso? (Tala o foto ia dianga.)

³ Satanaji uejiia kuila o itendelesu ia Jihova ia-nda bhulula o mienhu ietu, mukonda dia kiki, muéne u mesena ku tu  fidisa o ku tambula o itendelesu íii. ‘O muxima uetu ua ituxi’, u tena ku tu bhangesa o ku kamba ku belesela o itendelesu ia Jihova ni kidi kioso. (Jel. 17:9) Mu milongi íii, tua-nda di longa kiebhi ki tu tena ku tolola o ima íii, i tu fidisa kuívua o dízui dia Nzambi. Tua-nda di longa ué kiebhi o kuívua Jihova ni ku zuela nê bhu kaxi ka musambu, ku tena ku tu kuatekesa ku mu zukama, né muene ni ibhidi.

4. Kiebhi Satanaji kia tena ku lungulula o ibanzelu ia athu?

⁴ Satanaji u lungulula o ibanzelu ia athu bhu kaxi ka milongi ni ima ia makutu. (Tanga 1 Nzuá 5:19.) O ji jurnale, madivulu, mitelembe ia izunzumbia ni Internete, i muanga o milongi ku thandu dia ixi ioso. O mitelembe íii, i bhana milongi iambote, maji mu veji javulu i bhana milongi ia zembe Jihova. (Jel. 2:13) Mu kifika, nange ene amba kuila, ki kima kia iibha o diiala ku kazala ni diiala ni mukuá. Kiki ki bhangesa athu avulu ku banza kuila o milongi ia Bibidia ia lungu ni maka enhá, ia bhonzo kiavulu.—1 Kol. 6:9, 10.

5. Kiebhi ki tu tena ku di langa phala ka tu nganale ku milongi ia makutu ia Satanaji?

⁵ Mu ukexilu uebhi, o athu a zolo o itumu ia Jihova ka a nganala mu milongi ia makutu ia Satanaji? Kiebhi ene kia tena ku sola o kima kiambote, mu kiki kia iibha? ‘Ua tokala ku di langa kiambote, kala kiambe o Mak’â Nzambi.’ (Jisá. 119:9) O Mak’â Nzambi a tena ku tu kuatekesa kuijiia ku tungula o kima kiambote mu kiki kia iibha. (Jisa. 23:23) Jezú uambe kuila tua bhindamena o “maka moso ma tunda ku dikanu dia Nzambi.” (Mat. 4:4) Bhu kaxi ka Bibidia, Jihova u tu bhana itumu i tua tokala ku di longa ni ku i belesela ku muenhu uetu. Mu kifika, ande dia Mozé ku soneka o kitumu kia lungu ni ku ta phánda, Zuze uejidile kiá kuila, o ku ta phánda ni muhatu ua Potifale, kiexile kituxi kua Nzambi. Muéne nuka ua banzele ku bhukumukina Jihova. (Tanga Dimatekenu 39:7-9.) Sumbala akexile ku mu jijidika mu thembu iavulu kua muhatu ua Potifale, maji né kiki, Zuze ua solo o kuívua o dízui dia Jihova, mu veji dia kuívua o dízui dia muhatu iú. Lelu, etu tua tokala ué kuívua o dízui dia Jihova mu veji dia kuívua o milongi ia makutu ia Satanaji.

6, 7. Ihi i tua tokala o ku bhanga phala ka tu kuate ku milongi ia iibha ia Satanaji?

⁶ O mundu uezala ni milongi iavulu ia makutu ia jingeleja, mu kiki, athu avulu a mona kuila ki bhonza ku sanga o ubhezelu ua kidi. Maji se muthu u kala ni hanji ia kuívua Jihova, muéne u tena ku mu kuatekesa ku sanga o kidi ni lusolo. Etu tua tokala ku sola se nanhi tua-nda muivua. Ki tu tena kuívua mazui aiadi mu veji imoxi. Kála o jimbudi ejiia o dízui dia kafunga kâ, etu ué tua tokala kuijiia o dízui dia Jezú, mukonda muéne a mu solo kuala Jihova phala ku tu inga.—Tanga Nzuá 10:3-5.

⁷  Jezú uambe: “Alukenu, kioso ki muívua.” (Mar. 4:24) O itendelesu ia Jihova ki i bhonzo o ku i tendela, maji etu tua tokala ku kala ni ukexilu uambote ua muxima, phala ku xikina o itendelesu íii. Se ki tu di lange, tua-nda kuívua o milongi ia iibha ia Satanaji, mu veji dia kuívua o itendelesu iambote ia Nzambi. Kana kuehela o mimbu, o ji vidiu, milongi mu Mitelembe ia Izunzumbia, madivulu, makamba, alongexi mba o jinjimu ja mundu iú, ku funhisa o ukexilu uê ua muenhu.—Kol. 2:8.

8. (a) Kiebhi o muxima uetu u tena ku bhangesa Satanaji ku tu nganala? (b) Ihi i tena o ku bhita se tu kamba ku tonginina o ukexilu ua muxima uetu?

⁸ Satanaji uejiia kuila, etu tu akua ituxi. Kioso muéne kia tu bhangesa ku ta kituxi, ki tena ku bhonza ku londekesa o ufiiele uetu kua Jihova. (Nzuá 8:44-47) Mu kifika, nange ki tuene mu samba dingi, ki tuene mu kalakala ni ku suína kuoso mu sidivisu ia ku boka mba tu kuata ku fonga mu iônge. O ima ioso íii, ilondekesu kiebhi kiala o muxima uetu. Mu kiki, kiluezu kia dikota ku kamba ku bhanga kima phala ku batula o maka iá. Se ki tu di lange, bhofele-bhofele tu tena kueha o kuívua o dízui dia Jihova. Mu ku suluka, tua-nda kaiela o jihanji ja xitu mu ku bhanga kima, nuka tua ki banzele. (Loma 7:15) Maji tu tena ku kamba ku bhanga o kima kiki kia iibha, se tu tonginina kiambote o ukexilu ua muxima uetu, ni ku bhanga ioso phala ku batula o maka ni lusolo. Se tuia ni kuívua kiambote o dízui dia Jihova, ki tua-nda kuívua o milongi ia akua ku lungulula o kidi.—Jisa. 11:9.

9. Mukonda diahi kima kiambote kuijiia ni lusolo o ima i tena ku tu bhangesa ku ta kituxi?

⁹ Kioso muthu kia kata uhaxi ua dikota, nange muéne u tena ku talatala o uhaxi, se uijiia ni lusolo o uhaxi uala nau. Kiene kimoxi, se tu mona kuila saí kima ki tena ku tu bhangesa ku ta kituxi, tua tokala ku bhanga ioso phala ka tu ‘kuate kua Satanaji phala ku bhanga o vondadi iê.’ (2 Tim. 2:26) Ihi i tua tokala o ku bhanga se tu mona kuila, o ibanzelu ietu ni jihanji jetu, ki ji difu ni ima ia mesena Jihova ko kuetu? Etu tua tokala ku vutuka kua Jihova, ni ku sota o itendelesu iê, ni ku i belesela ku muenhu uetu. (Iza. 44:22) Mu kidi, o ibhidi i moneka mukonda dia ituxi, i tena ku bheka ndolo iavulu ku muthu, né muene kioso kia vutuka kua Jihova. Mu kiki, o kima kia beta-o kota, o ku di langa phala ki tu sondoloke kua Jihova!

10, 11. (a) Kiebhi kia kala o mukuá ku di zangeleka? (b) Disá diebhi di tu tena o ku di longa ku phangu ia Kola, Datane, ni Abilamu?

¹⁰ Tua tokala kuijiia kuila, o muxima uetu u tena ku tu sondolokesa kua Jihova. Mu kifika, tu tena ku kala ni ukexilu ua ku di zangeleka mba ku kala ni luímbi. O ima íii, i tena ku tu bhangesa ku ta ituxi. O mukuá ku di zangeleka, u banza kuila uala ni valolo iavulu ni kuila u tena ku bhanga ioso ia mesena. Muéne nange u banza kuila, sé ku muthu ua tokala ku mu tangela o kima kia tokala o ku bhanga, ki kale o jiphange mu kilunga, mba o tufunga, mba o kilunga kia Nzambi. Nange Muéne u sondoloka kiavulu kua Jihova, mu kiki, ka tena dingi kuívua kiambote o dízui diê.

¹¹ Jihova ua solo Mozé ni Alá phala ku kala ku pholo dia mundu ua Izalaiele mu kikangalakata. Maji Kola, ni Datane, ni Abilamu a bhukumukine, mukonda exile akua ku di zangeleka, a mesenene ku bheza Jihova mu ukexilu uâ. Ihi ia bhange Jihova? Muéne ua buika o athu oso a bhukumukine. (Dia. 26:8-10) Tu tena ku di longa disá dia dikota mu kifika kiki. O ku bhukumukina Jihova ku bheka mavuua. O Bibidia iamba kuila: “O ku di zangeleka kua muxima, kuene mu diangela, anga ku kaiela kiua o kibhalu.”—Jisa. 16:18; Iza. 13:11.

12, 13. (a) Bhana kifika kilondekesa kiebhi o luímbi lu bheka kiluezu. (b) Jimbulula kiebhi o luímbi lu tena ku di bandekesa ku mixima uetu.

¹² O luímbi lu tena ku kala ué kiluezu kia dikota. O mukuá luímbi u banza kuila o itendelesu ia Jihova ki i mu tokala. Muéne u banza kuila, u tena ku katula kima kioso-kioso ki ki mu tokala muéne. Naamane, o kabhitangu ka masoladi a Sídia, ua kexile ni dibhute. Ilizeu, o polofeta ia Nzambi, ua mu sake. Naamane ua sakidila kiavulu, iú ua bhanene maujitu a kitadi ni izuatu kua Ilizeu, maji muéne ua ditunu. Ilizeu ua kexile ni selevende iê a mu ixanene Jeazí. Muéne ua mesenene ku tambula o maujitu iá phala muéne. Jeazí ua kexile ni luímbi. Sé ku tangela kima kua Ilizeu, muéne ua lengela kua Naamane, iú ua mu tangela makutu phala ku tambula o maujitu. Ihi ia bhitile ni Jeazí? Muéne ua kuata dibhute.—2 Jis. 5:20-27.

¹³ Se ki tu di lange, o luímbi lu tena ku di bandekesa ku muxima uetu ni ku ta o muenhu uetu mu kiluezu. Kiki kiene kia bhitile ni Akane. Muéne uambe: “Kioso ki nga mono ku ma di bongela kapote ka Babilónha kauabha kiavulu ni hama jiiadi ja xikulu ja phalata, ni mutádi ua ulu u pezala 50 a xikulu luimbi lua ngi kuata, eme nga i katula iene ioso.” Akane ua tokalele ku dituna o ji hanji jê ja iibha. Maji mu veji dia kiki, muéne ua nhana o jimbote joso iú ua ji sueka mu balaka iê. Jihova ua bhangesa o athu oso kuijiia o kituxi kia tele Akane, mu kiki, mu kizuua kieniókio o muii ni muiji ué uoso a a jibha. (Josu. 7:11, 21, 24, 25) Muthu uoso mudietu u tena ku kala ni luímbi kala Akane. Mukonda dia kiki, tua tokala ku ‘di langa ku luímbi.’ (Luka 12:15) O undumbu, ukexilu ua luímbi ué. Sumbala saí ithangana tu kala ni ibanzelu ia iibha, kima kiambote ku langa o kitongoluelu kietu, phala o ji hanji jetu ja iibha ki ji tu bhangese ku ta kituxi.—Tanga Tiia. 1:14, 15.

14. Ihi i tua tokala o ku bhanga se tu mona kuma, tua mu mesena ku kala ni ukexilu ua ku di zangeleka ni ua luímbi?

¹⁴ Mu kidi, o ukexilu ua ku di zangeleka ni ua luímbi, u bhekela iluezu. O ku xinganeka mu ibhidi i moneka mukonda dia kituxi, kua-nda tu kuatekesa ku kolokota mu kuívua o dízui dia Jihova. (Mate. 32:29) Bhu kaxi ka Bibidia, Jihova u zuela  o mbote ijila mu ku bhanga o ima iambote ni ihi ijila mu ku bhanga o ima ia iibha. Se tu mesena ku bhanga kima kia iibha mukonda dia luímbi mba phala ku di zangeleka, kima kiambote ku xinganeka mu ima ia-nda bhita n’etu, kiebhi kia-nda divuua o muiji uetu, kiebhi kia-nda kala o ukamba uetu ni Jihova.

15. Ihi i tu tena o ku di longa mu phangu ia Jezú?

¹⁵ Jihova ua mesena o mbote ietu. (Jisá. 1:1-3) Muéne u tu bhana itendelesu ia tokala mu ithangana ia tokala. (Tanga Jihebeleu 4:16.) Sumbala Jezú uexile muthu ua iuka, muéne ua kexile mu katula mbote iavulu mu ku di zuelesa ni Jihova. Jezú ua kexile mu samba ithangana ioso. Jihova ua kuatekesa Jezú, iú ua muendesa mu ukexilu uambote. Muéne ua tumikisa ji anju phala ku mu langa, ua mu bhana o nzumbi iê ikola ni ku mu kuatekesa mu ku sola o 12 a ji poxolo. (Mat. 3:17; 17:5; Mar. 1:12, 13; Luk. 6:12, 13; Nzuá 12:28) Kála kia bhangele Jezú, etu ué tua tokala ku samba ni muxima uoso kua Nzambi. (Jisá. 62:7, 8; Jihe. 5:7) O musambu u tu kuatekesa, ku mu zukama ni ku kala ni ukexilu ua muenhu u bhana kijingu kua Jihova.

16. Kiebhi Jihova kia tu kuatekesa kuívua o dízui diê?

¹⁶ Jihova ka tu jijidika ku belesela o itendelesu iê, maji muéne u tu kuatekesa ku sanga o itendelesu iê, kioso ki tu i bhindamena. Se tu bhinga o nzumbi iê ikola, muéne ua-nda tu bhana mu ngalasa. (Tanga Luka 11:10-13.) O Bibidia i zuela: “Tumenu-phe ku kijiia kioso ki muívua!” (Luka 8:18) Mu kifika, se tu samba kua Jihova mu ku mu bhinga phala ku tu kuatekesa ku di langa mu ima ia lungu ni undumbu, maji tu suluka mu ku tala o ufusa ni ji filme ja ufusa, mu kidi, tua mu londekesa kuila ki tu mesena o kikuatekesu kia Jihova. Phala ku tambula o kikuatekesu kia Jihova, tua tokala kuia mu iônge, mukonda muene mua tena o ku tu kuatekesa bhu kaxi ka nzumbi ikola. Jiselevende javulu ja Jihova, a lenge o ku ta kituxi, mukonda dia kuívua o dízui dia Jihova bhu kaxi ka iônge. Kioso ene kia mono kuila, akexile ni jihanji ja iibha ku muxima, a batula o maka ni lusolo.—Jisá. 73:12-17; 143:10.

17. Mukonda diahi kiluezu kia dikota o ku dielela ku kilunji kietu?

¹⁷ Tu tena ku di longa disá diambote bhu kaxi ka phangu ia Sobha ia Izalaiele Davidi. Kioso muéne kia dielele kua Jihova, muéne ua kexile mu bhanga ima ia madiuanu. Kioso kiexile hanji munzangala, ua jibhile o dizonda Ngoliia. Mu ku bhita kithangana, Davidi ua kituka disoladi ua kituka ué Sobha. O kikalakalu kiê, kiexile kia ku langa ni ku batula kiambote o mak’a mundu ua Izalaiele. Maji kioso muéne kia kuata o ku dielela ku kilunji kiê, o muxima uê ua mu nganala. Muéne ua tele kituxi ni Bate-Seba, iú ua jibha o munumi’ê. Maji kioso Jihova kia mu bazela, Davidi uevu ni kulenduka kuoso, ua xikina kuila ua tele kituxi, anga u bhanga dingi o ukamba ni Jihova.—Jisá. 51:4, 6, 10, 11.

18. Ihi i tena ku tu kuatekesa ku kolokota mu kuívua o dízui dia Jihova?

¹⁸ Mu divulu dia 1 Kolindo 10:12, tua di longo kuila ki tu tokala ku dielela mu dietu. O Bibidia izuela kuila, ki tu tena ku di tumina mudietu ni ku ditunda kiambote, mukonda dia kiki, tuala ni mazui aiadi a tena ku tu tumina: O dízui dia Jihova mba dia Diabhu. (Jel. 10:23) Mu kiki, tua tokala ku samba mu ithangana ioso, ni ku kaiela o itendelesu ia nzumbi ikola, ni kuívua o dízui dia Jihova.