Kiki kibhuidisu kiambote, benge-benge se o kazola kê uafu kiá. Nange eie ua mesena ku kala dingi kumoxi mu ukaza, ni kazola kê a mu fukununa ku mundu ua ubhe. Saí phange ia diiala uambe: “Eme ni muhatu uami, ki tu bakana ku di xisa mu ukaza uetu. Etu tua mesena ku kala kumoxi mu ubhezelu kala muhatu ni diiala, katé ku hádia ni hádia. Eme ngene mu banza hanji kiki, katé kindala.” O kuila saí kima ki tena ku tu bhangesa ku xikina kuila, o athu a-nda kua fukununa phala ku tunga mu ixi, a-nda kazala? Ki tuejiia.

Mu mivu iavulu o madivulu metu, ene mu londekesa kuila o izuelu ia Jezú ia lungu ni difukunukinu ni ku kazala, nange ia lungu ni difukunukinu dia-nda bhita mu ixi. O madivulu metu a londekesa ué kuila, ku mundu ua ubhe, o athu a-nda kua fukununa nange ka-nda kazala. * (Mat. 22:29, 30; Mar. 12:24, 25; Luka 20:34-36) Maji o kuila o izuelu ia Jezú, ia lungile ni difukunukinu ku diulu? Tu di longe ihi ia zuela Jezú ia lungu ni maka enhá.

Kioso Jezú kia zuela ia lungu ni difukunukinu, muéne ua kexile mu zuela ni nanhi? (Tanga Luka 20:27-33.) Muene ua kexile mu zuela ni ji saduzeu. O kibuka kiki kia ubhezelu, ka xikinine mu milongi ia lungu ni difukunukinu, mu kiki a mesenene ku kuata Jezú mu ku zuela ia lungu ni diiala ku lundula huedi’ê mu ukaza. * Jezú ua ambela uixi: ‘An’a a ukexilu ua ngongo íii, a kazala ni mala ni ahatu. Oso-phe a ká fuama phala ku nganhala o ukexilu ua mukua mu difukunukinu, ka kazala dingi, né mala, né ahatu. Ka tena dingi uê kúfua, a ká kala, kála ji-anju. A kala an’a Nzambi, mukonda an’a difukunukinu.’—Luka 20:34-36.

Mukonda diahi o madivulu metu a londekesa kuila, Jezú nange ua kexile mu zuela ia lungu ni difukunukinu mu ixi? Mukonda dia ima iiadi. Kia dianga, kioso o ji saduzeu kia zuela ni Jezú, nange a kexile mu zuela ia lungu ni difukunukinu mu ixi. Mu kiki, tu tena ku zuela kuila Jezú ua a tangela ia lungu ni difukunukinu mu ixi. Kia kaiadi, mu disukilu dia kitambuijilu kiê, Jezú ua tumbula Mbalahamu, Izake ni Jakobo. O maiala iâ a kixikanu, a-nda ku a fukunuka phala ku tunga mu ixi.—Luka 20:37, 38.

Maji nange Jezú ua kexile mu zuela ia lungu ni difukunukinu phala ku tunga ku diulu. Ihi i tu bhangesa ku zuela kiki? Tu di longe ima iiadi.

‘Oso-phe a ká fuama phala ku nganhala . . . mu difukunukinu ka kazala dingi.’ O jikidistá a a undu a fiiele ene o “athu a fuama mu Utuminu ua Nzambi.” (2 Tes. 1:5, 11) Mukonda dia sata ia kukula kua Jezú, Nzambi u mona o Jikidistá a undu, kala athu a iuka. Kioso ene kia fua, Nzambi ua mona kala athu a kambe o kituxi. (Loma 5:1, 18; 8:1) O jikidistá a a undu a a mona kala athu a iuka, mukonda a bhanga mbandu ku difukunukinu dia dianga. (Dij. 20:5, 6) O athu a-nda kua fukununa phala ku tunga mu ixi, ka tena ku a tumbula kiki, mukonda bhu kaxi kâ, kua-nda fukunuka o “athu abhukumuka.” (Ika. 24:15) O kuila o athu abhukumuka a tena kua mona kala “athu a fuama” phala kua fukununa?

“Ene ka tena dingi ue kúfua.” Jezú kambe kuila: “Ene ka-nda fua dingi.’ Mu veji dia kiki, muéne uambe: “Ene ka tena dingi ué kufua.”  O ji Bibidia ja mukuá a lungulula kiki, “ene ka tena dingi kufua” ni “o kufua ki kuala dingi ki ku tena ku thandu diâ.” O jikidistá a a undu a kolokota mu fiiele, a a fukunuka phala ku kala ni muenhu ku diulu. Ku diulu ene a-nda kala ni muenhu sé kufua. Kiki kilondekesa kuila ki kua-nda kala dingi kima kia a fuisa. (1 Kol. 15:53, 54) O kalunga ki ká kala dingi ni kutena kua ku buika ió a-nda kala ni muenhu ku diulu. *

Ihi i tu zuela ia lungu ni ima ioso i tua zuela ku dima? Tua di longo kuila nange Jezú ua kexile mu zuela ia lungu ni difukunukinu phala o muenhu ku diulu. Se kiene, tua di longo-phe ima itatu ia lungu ni ió a-nda ku a fukununa phala o muenhu ku diulu: (1) Ene ka kazala, (2) ene ka fu, ni kuila (3) saí bhabha ene a difu ni ji anju ku diulu. Maji se Jezú ua kexile mu zuela ia lungu ni difukunukinu phala o muenhu ku diulu, o ibhuidisu ia kaiela ia bhingi itambuijilu.

Kia dianga, nange o ji Saduzeu a kexile mu banza ia lungu ni difukunukinu mu ixi, se kiene, mukonda diahi-phe Jezú ua zuela ia lungu ni difukunukinu phala o muenhu ku diulu? Saí ithangana, Jezú ka kexile mu tambuijila o jinguma jê mu ukexilu uâ ua ku banza. Mu kifika, kioso o Jijudé kia bhingi kua Jezú phala ku bhanga ima ia madiuanu, muéne uambe: “Bulenu o Tembulu iíi, eme ngi i tunga dingi mu izuua itatu!” Nange Jezú uejidile kuila ene a kexile mu banza ia lungu ni tembulu io tunge, maji “muène-phe ua tange o Tembulu ia mukutu uê’muène.” (Nzuá 2:18-21) Nange Jezú ua mono kuila ka tokalele ku tambuijila o ji Saduzeu, mukonda exile abhezi a makutu. Mu kidi, ene ka xikinine mu difukunukinu, ene ka xikinine ué kuila kuene ji anju. (Jisa. 23:9; Mat. 7:6; Ika. 23:8) Mu veji dia kiki, Jezú nange ua mesenene ku bhana milongi ia lungu ni difukunukinu phala o muenhu ku diulu ku maxibulu mê. Ene exile athu a kidi, mu kiki eji kala ni kidielelu kia kuia ku diulu.

Mukonda diahi Jezú ua zuela ia lungu ni Mbalahamu, Izake ni Jakobo ku disukilu dia diskursu diê? O maiala iâ, a-nda ku a fukununa phala o muenhu mu ixi. (Tanga Matesu 22:31, 32.) Ande dia ku tumbula o maiala iá a fiiele, Jezú ua mateka o diskursu diê ni izuelu “o phata ia madifundu kufukunuka.” O izuelu íii i londekesa kuila, nange muéne ueji lungulula o diskursu. Mu veji dia ku kuata ku zuela ia lungu ni difukunukinu phala o muenhu ku diulu, nange muéne ueji zuela ia lungu ni difukunukinu mu ixi. Jezú uejidile kuila o ji Saduzeu a xikinine mu madivulu a sonekene Mozé, mu kiki muéne ua tumbula o izuelu ia Nzambi kua Mozé, ia lungu ni kisasa kia uama túbhia. Jezú ua mesenene ku londekesa ku ji Saduzeu kuila o difukunukinu dia athu mu ixi dia lungile ué ni vondadi ia Nzambi.—Mak. 3:1-6.

Katatu, se o izuelu ia Jezú ia lungu ni difukunukinu phala o muenhu ku diulu, o kuila kiki ki lombolola kuma o athu a-nda ku a fukununa mu ixi a-nda kazala? O Mak’â Nzambi ka tambuijila mu kidi kioso o kibhuidisu kiki. Se Jezú ua kexile mu zuela ia lungu ni difukunukinu phala o muenhu ku diulu, o izuelu iê ki i jimbulula se o athu a-nda ku a fukununa ku mundu uobhe a-nda kazala mba kana.

O Bibidia i zuela kuila kioso o muthu kia fua o ukaza ubhua. Mu kiki, se kaza diê uafu kiá, ku tokala ku divua kia iibha se u sola ku kazala dingi. Eie ua tokala ku sola, se-ku muthu ua tokala ku bhanga kiki bhu kididi kiê. Se-ku muthu ua tokala ku tatela ió ua mu sota muthu phala ku kazala né.—Loma 7:2, 3; 1 Kol. 7:39.

Nange tuala ni ibhuidisu iavulu ia lungu ni kiebhi kia-nda kala o muenhu ku mundu uobhe. Mu veji dia ku fikisa ku tambuijila o ibhuidisu íii kima kiambote ku kingila phala ku mona ku hádia. Maji tu tena ku dielela kuila, o athu a belesela Nzambi a-nda zediua, mukonda Jihova ua-nda langa o ibhindamu iâ mu ukexilu ua iuka.—Jisá. 145:16.