TUALA mu ithangana ia bhonzo, m’ukulu ndenge. (2 Tim. 3:1-5) Izuua ioso tu di bhana ni jitendasá ji bhonzesa ku londekesa o henda ietu kua Jihova, ni ku belesela o itumu iê. Jezú ua zuela ia lungu ni izulukutu íii, anga ua kanena o akaiedi’ê kuila, ueji ku a kuatekesa o ku kolokota katé ku dizubhilu di mundu iú. (Mat. 24:3, 13; 28:20) Phala ku a kuatekesa, muéne ua solo o kimbadi kia fiiele, phala ku a bhana ‘kúdia mu ola joso ja tokala.’—Mat. 24:45, 46.

Tundé kia solo o kimbadi kia fiiele ku muvu ua 1919, mazunda ni mazunda a akua “dibhata” a madimi oso, a bhongoloka mu kilunga kia Nzambi, iâ a mu ku a bhana kúdia mu nzumbi. (Mat. 24:14; Dij. 22:17) Maji o madivulu metu a Bibidia, ka mu a bhanga luua mu madimi oso. O athu oso ka tena ku tanga o madivulu metu a Bibidia mu Internete, mukonda saí iâ kala ni Internete. Mu kifika, saí iâ kala ni jividiu mba madivulu a Bibidia, u tu sanga ngó mu kijimbuete kietu jw.org. O kuila kiki ki lombolola kuma saí jiphange ka mu tambula o kúdia kua bhingi mu nzumbi? Phala kuijiia o kitambuijilu kia kibhuidisu kiki, tua-nda di longa ibhuidisu iuana ia beta-o-kota.

Kioso Satanaji kia tendala Jezú phala ku bhangesa o matadi ku kituka jimbolo, Jezú ua mu vutuila: “O muthu ki ku mbolo ngó kua muena o muenhu, maji ku maka moso ma tunda ku dikanu dia Nzambi.” (Mat. 4:3, ) O Mak’â Jihova, o soneke mu Bibidia. (2 Phe. 1:20, 21) Mu kiki, o Bibidia iene o kúdia kuetu kua beta-kota mu nzumbi.—2 Tim. 3:16, 17.

O kilunga kia Jihova kia lungulula o Bibidia Tradução do Novo Mundo das Escrituras Sagradas, ia tenena mba mu jimbandu, mu 120 a madimi ndenge. Mivu ioso a mu ku i lungulula dingi mu madimi engi. Maji kuene dingi mazunda ni mazunda a ji Bibidia ja mukuá, ja lungulula mu jimidi ni jimidi ja madimi, ki kale ja tenena mba mu jimbandu. O kikalakalu kiki, kia lungu ni vondadi ia Nzambi ia kuila, o “athu oso a bhuluke, eze mu kuijiia o kidi.” (1 Tim. 2:3, 4) Mu kuijiia kuila “kana-ku kima kio bhange ki kamba ku moneka ku mesu ma Nzambi,” tu tena ku dielela kuila, muéne ua-nda sunga o athu oso ‘ejiia o ibhindamu iâ mu nzumbi’ mu kilunga kiê, ni ku a bhana kúdia mu nzumbi.—Jihe. 4:13; Mat. 5:3, 6; Nzuá 6:44; 10:14.

Phala ku kala ni kixikanu kia kolo, o muthu ka tokala ngó ku tanga o Bibidia. Muéne ua tokala ku tendela o milongi ia tanga, ni ku i belesela. (Tiia. 1:22-25) Kiki kiene kia tokalele o ku bhanga o diiala mukua Etiiopia ku hama ia dianga. Muéne ua kexile mu tanga o Mak’â Nzambi, kioso Filipe kia mu ibhula: ‘Eie ki ua mu tanga kia ku jimbulukila?” O diiala dia tambuijila: ‘Ki nga mu tanga ki ngi jimbulukila kiebhi, sé muthu ku ngi lomboluela-kiu?’ (Ika. 8:26-31) Filipe ua kuatekesa o diiala ku tendelela o milongi ia kexile mu tanga mu Mak’â Nzambi. O diiala dia uabhele kiavulu o milongi ia di longo, mukonda dia kiki, ua xikinine ku mu batizala. (Ika. 8:32-38) O madivulu metu a Bibidia, a tu kuatekesa ku tendela kiambote o kidi kia Mak’â Nzambi. Tua uabhela kiavulu o milongi i tua di longo, mukonda dia kiki, tua solo ku i kumbidila.—Kol. 1:9, 10.

Bhu kaxi ka madivulu a Bibidia, o jiselevende ja Jihova a tambula ima iavulu phala kúdia ni kúnua. (Iza. 65:13) Mu kifika, O Mulangidi a u bhanga mu 210 dia madimi ndenge. U jimbulula o ikanenu ia Bibidia, ni ku tu kuatekesa ku tendela kiambote o kidi kia Bibidia, ni ku kaiela o itumu ia Nzambi. O Despertai! a di bhanga mu 100 ia madimi, di tu kuatekesa kuijiia dingi ia lungu ni ibhangelu ia Jihova, ni ku tu longa kiebhi ki tu tena ku kumbidila o itumu ia Bibidia. (Jisa. 3:21-23; Loma 1:20) O kimbadi kia fiiele ki bhanga madivulu a Bibidia mu 680 a madimi ndenge! O kuila eie uene mu sota kithangana phala ku tanga o Bibidia izuua ioso? O kuila uene mu tanga o madivulu oso a ubhe mu dimi diê dia uvualukilu, mu mivu ioso?

O kilunga kia Jihova ki iudika ué o milongi phala ku bhanga o madiskursu mu iônge, ni mu iônge ia ilunga, ni iônge ia makota. O kuila uene mu uabhela o madiskursu, ni ji drama, ni ifika, ni ibhuidisu iene mu bhanga mu iônge íii? Sé phata, Jihova u tu bhana kúdia kuavulu mu nzumbi!—Iza. 25:6.

Kana. Ki tu tokala ku divua kia iibha, se saí ji selevende ja Jihova a mu tambula kúdia kuavulu mu dimi diâ dia uvualukilu, o akua ndenge. Mukonda diahi? Xinganeka o jipoxolo m’ukulu. Ene a tambula milongi iavulu, o jixibulu ja mukuá ku hama ia dianga ndenge. (Mar. 4:10; 9:35-37) Maji né kiki, o maxibulu a mukuá, a tambuile o kúdia mu nzumbi kua bhindamene.—Efe. 4:20-24; 1 Phe. 1:8.

Kima kiambote ku lembalala ué kuila, ka soneka mu Bibidia o ima ioso ia zuela ni ia bhange Jezú. O poxolo Nzuá ua soneka: ‘Saí dingi ima ia mukuá iavulu ia bhangele Jezú. Se kuila ioso a i sonekene, mu kimoxi-kimoxi, nga fika mu ngongo ki mueji soka madivulu mê eji kusoneka.” (Nzuá 21:25) Sumbala o akaiedi a Jezú a tambuile milongi iavulu ia lungu ni Jezú, maji né kiki, etu ué tuala ni kúdia kua soko mu nzumbi. Jihova ua bhange ioso phala tuijiie kiambote Jezú ni ku kaiela o phangu iê.—1 Phe. 2:21.

Xinganeka ué o mikanda ia tumikisa o jipoxolo mu ilunga ku hama ia dinga. Saí mukanda ua soneka Phaulu, ki uala mu Bibidia. (Kol. 4:16) O kuila ki tuala ni kúdia kua soko, mukonda dia ku kamba o mukanda iú? Kana. Jihova uejiia o ima i tua bhindamena, mu kiki, muéne uene mu tu bhana i tua bhingi phala ku kolokota mu nzumbi.—Mat. 6:8.

Lelu, saí jiselevende ja Jihova ala ni kúdia kuavulu mu nzumbi, o akua ndenge. O kuila ki kuene madivulu avulu mu dimi diê dia uvualukilu? Se kiene, ejiia kuila Jihova ua mesena o mbote iê. Di longe o madivulu u uala nau, ndé mu iônge mu dimi di uejiia. Dielela kuila Jihova ua-nda ku kuatekesa ku kolokota mu nzumbi.—Jisá. 1:2; Jihe. 10:24, 25.

Mu Kijimbuete kietu tu sanga-mu o milangidi ni madivulu a mukuá phala ku di longa o Bibidia. Mu Kijimbuete kiki, tu sanga-mu ué milongi phala o makaza, ni minzangala, ni an’a ndenge. O miji i tena ku katula mbote mu ku di longa o milongi íii mu Ubhezelu uâ ku Muiji. O Kijimbuete kietu ki zuela ué ia lungu ni Xikola ia Ngiliiade, ni kiônge kia dikota ki bhanga o kimbadi kia fiiele ku disukilu dia muvu, ki bhana ué ngolokela ia lungu ni mavuua a bhita ku mundu uoso, ni ima ia mukua dingi ia lungu ni mundu ua Jihova ku mundu uoso, phala o jiphange jetu ku kijiia. (1 Phe. 5:8, 9) O Kijimbuete kietu ki bhana ué umbangi. Ki bhana njimbu iambote mu jixi mua fidisa o kikalakalu kietu kia Utuminu.

Maji né kiki, u tena ku kolokota mu nzumbi, né muene se ku tena ku tanga o madivulu a ubhe mu Kijimbuete kietu. O kimbadi kia bhange madivulu a soko phala o Jikidistá joso ku tambula o kúdia kua bhingi mu nzumbi. Mu kiki, ki ku bhingi ngó ku sumba komputadolo phala ku tanga o madivulu mu kijimbuete jw.org. Saí jiphange, a katula o madivulu a ubhe mu Kijimbuete kietu phala ku bhana akuâ kala ni Internete mba komputadolo. Maji o kilunga, ki ki bhingi ku jiphange phala ku katula o madivulu mu Internete.

Tu sakidila Jezú mu ku kumbidila o kikanenu kiê kia ku tu bhana i tua bhindamena phala ku kolokota mu nzumbi. Tu tena ku dielela kuila, Jihova ua-nda bhana o ‘kúdia mu ola joso ja tokala,’ katé ku dizubhilu dia mundu iú ua iibha.