Phetele ua didi kiavulu kioso kia ditunu kuila kejidile Jezú. Sumbala o poxolo Phetele ua kexile mu divua kia iibha, ni ku di suínisa phala ku dibhana ni maka enhá, Jezú ua mesenene kuila, muéne u kuatekesa akuâ. Mu kiki, Jezú ua mu ambela: ‘Eie-phe, ki u vutuka, kolokotesa o jiphange jê.’ (Luka 22:32, 54-62) Phetele ua kituka philadi ia kilunga kia Jikidistá ku hama ia dianga. (Nga. 2:9) Lelu, o phange ua sidivile kiá kala kafunga m’ukulu, u tena ku sanguluka mu ku bhanga dingi o sidivisu íii, ni ku suínisa o jiphange jê mu nzumbi.

Saí iâ, a sidivile kiâ kala tufunga, ia a a katula o ujitu iú, mukonda dia kiki, nange ene a divua kia iibha. Julio, * ua sidivile kala kafunga ku América do Sul mu 20 a mivu uambe: “O ku iudika o madiskursu, ni ku kunda o jiphange, ni ku suínisa o jiphange mu kilunga, kiexile kikalakalu kia dikota ku muenhu uami! Maji o kikalakalu kioso kiki, kia texika mu ola imoxi ngó, kiki kia ngi bhangesa ku divua kia iibha ku muenhu uami. Kia bhonzele kiavulu.” Lelu, Julio ua mu sidivila dingi kala kafunga.

O dixibulu Tiiaku uambe: ‘Enu jiphange jami mu sanguluka kioso ki mu bhita ni jitendasá javulu o matelu.’ (Tiia. 1:2) Tiiaku ua kexile mu zuela o jitendasá jijila mukonda dia ku kamba o ku iuka. Muéne ua zuela o jihanji jetu ja luímbi, katungu ka muthu, ni ima ia mukua dingi. (Tiia. 1:14; 2:1; 4:1, 2, 11) Kioso Jihova kia tu bazela, sumbala tu divua kia iibha. (Jihe. 12:11) Maji o jitendasá ki ji tokala ku katula o kisangusangu kietu.

Né muene a tu katula o ujitu uetu mu kilunga, tuala hanji ni kithangana kia ku tonginina o ukexilu ua kixikanu kietu ni ku londekesa o henda ietu kua Jihova. Tu tena ué ku xinganeka se mukonda diahi tua kexile ni ujitu iu ua ku sidivila. O kuila  tua kexile ni ujitu iu phala mbote ietu, anga mukonda dia henda ietu kua Nzambi, mu kuijiia kuila o kilunga kia tokala kua muene, ni kuila etu tua tokala ku ki langa? (Ika. 20:28-30) O jiphange a kexile kiá tufunga, maji ia a sidivila hanji ni ku sanguluka, ene a mu londekesa ku athu enioso, ni kua Satanaji kuila o henda iâ kua Jihova ia kidi.

Kioso o Sobha Davidi kia mu bazela mukonda dia ituxi ia makota ia tele, muene ua xikina kioso kia mu bazela, ia a mu loloka. Davidi uembi: “Ua zediua uoso kikuma kiê kióloloke kituxi kiê kiabhu, a ki làmbe. Ua zediua uoso kala dingi ni mulonga kua Ngana, ku muxima ki ku mu xala makutu. (Jisá. 32:1, 2) O dibazu dia tambula Davidi, dia mu kuatekesa phala ku kala kafunga kambote phala o mundu ua Nzambi.

Mu ithangana ioso, o jiphange a vutuka dingi mu ku kala tufunga, a kala tufunga tua mbote, mu ukulu ndenge. Sai kafunga uambe: “Lelu nga mu tendela dingi kiambote, kiebhi ki ngi langa oso a tá o kituxi.” O kafunga ka mukua uambe: “Mu lelu ngi bhana dingi valolo ia ujitu uami ua ku sidivila o jiphange.”

O mukua Jisalamu ua soneka: “[Jihova] ka jijila ku bazela.” (Jisá. 103:9) Mu kiki, ki tu tokala ku banza kuila, Nzambi nuka ua-nda dielela muthu ua tele kituxi kia dikota. Ricardo ua texile o ujitu ué kala kafunga kioso kia sidivila mu mivu iavulu, muéne uambe: “Nga luualele kiavulu mukonda dia kituxi ki nga tele. Ku mivu iavulu, o ukexilu ua ku divua kala ki ngala dingi ni valolo, ua ngi fidisile o ku vutuka mu ku kala dingi kafunga. Eme nga divuile kuila, o jiphange keji tena dingi ku ngi dielela. Maji kuma eme nga uabhela o ku kuatekesa o akuetu, nga kexile mu longa maxibulu a Bibidia ni ku suínisa o jiphange ni ku kalakala nau mu sidivisu ia ku boka. O ku bhanga kiki, kua ngi kuatekesa o ku divua kiambote, kua ngi kuatekesa ué o ku vutuka dingi mu ku sidivila kala kafunga.”

O ku bhaka phonzo ia muthu, ku fidisa o phange o ku sidivila kala kafunga. Mu kiki, kima kiambote o ku kala kála o selevende ia Jihova Davidi, ua lenge mukonda dia luímbi lua Sobha Saulu! Davidi ua ditunu o ku vutuila phonzo kua Sobha Saulu, né muene ua kexile ni kithangana kia ku  bhanga kiki. (1 Sam. 24:4-7; 26:8-12) Kioso Saulu kia fú mu ita, Davidi ua didi kiavulu o kufua kué, iú uambe kuila muene ni mon’ê Jonata, exile athu a ‘uabha a zolo.’ (2 Sam. 1:21-23) Davidi ka bhakele phonzo ia muthu.

Se ua mono kuila a ku bhange kia iibha, mba kima kia ku bhundu, kana kuehela o muxima ué ku bhaka phonzo. Mu kifika, kioso William kia texi o ujitu ué kala kafunga, kioso kia sidivila mu 30 a mivu ku ixi ia Grã-Bretanha, muéne ua bhakele phonzo ku muxima ku tufunga tua mukuá. Ihi ia kuatekesa William phala ku xá o ukexilu iú? Muéne uambe: “O ku tanga o divulu dia Jobe, kua ngi suínisa kiavulu. Se Jihova ua kuatekesa Jobe o ku di bhana dingi kiambote ni kitatu kia makamba-mê, muéne ué ua-nda ngi kuatekesa o ku di bhana kiambote ni tufunga tua Jikidistá!”—Jobe 42:7-9.

Se eie u sola o kueha o kuinga o jimbudi ja Nzambi, ua tokala u xinganeka mukonda diahi ua bhange kiki. O kuila ua kexile ni maka mu diê muene? O kuila o ima ia mukua, ia beta-kota ku muenhu uê? O kuila o ukexilu ua ku kamba o ku iuka ku mbandu ia akuenu, uene ua ku bhangesa o ku zoza? Ki kale kioso kioso, di lembalale kuila eie ua kexile ni kithangana kia ku kuatekesa akuenu mu maukexilu avulu, kioso ki ua kexile u kafunga. O madiskursu mê a kolokotesa, o phangu iê, ia a suínisa, o kua kunda, ku a kuatekesa mu ku kolokota mu jipolova. O kikalakalu kiê kala kafunga ka fiiele, kia sangulukisa o muxima ua Jihova, kia sangulukisa ué o muxima ué.—Jisa. 27:11.

Jihova uene mu kuatekesa maiala mu ku kala dingi ni kisangusangu kia ku kala ku pholo dia kilunga. Se eie a ku katula o kikalakalu kia ku sidivila kala kafunga, mba ua texi o ujitu iú, eie u tena dingi ku suína phala ku ‘kala dingi u kafunga.’ (1 Tim. 3:1) Phaulu ua “kuata kusamba kua Nzambi sé kufula.” Muene uexile mu samba phala o akua Kolose a kale ni kuijiia kua ku tongolola o vondadi ia Nzambi ‘phala a kale mù kuenda kioso kiandala Ngana, ni kubhanga jinga ioso ia mu uabhela kiambote muène.’ (Kol. 1:9, 10) Se ua tambula dingi o ujitu ua ku sidivila kala kafunga, bhinga kua Jihova phala ku ku bhana nguzu, ni muanhu, ni ku sanguluka. O mundu ua Nzambi ua bhingi o kikuatekesu kia tufunga mu izuua íii i sukidila-ku. O kuila ua mesena ku suínisa o jiphange jê?