1. Mukonda diahi tu sakidila Jihova?

JIHOVA u tu bhana ‘o ujitu uambote, ni uhete ua uabha.’ (Tiiaku 1:17) Muéne mubhidi uetu ua henda, ni henda ioso muéne u dikila o ibhindamu ietu ioso. (Jisálamu 23:1-3) Tua tokala ku sakidila Jihova mu ima ioso iene mu tu bhana. Muéne “dilengelu dietu, nguzu ietu,” benge-benge mu ithangana ia bhonzo. (Jisálamu 46:1) Etu tu divua kála kia divu o mukua jisalamu, ua soneka: “Sakidilenu Jihova; kuma muene mukua kubhanga mbote; mukonda o jihenda jê ki jene kúbhua.”​—Jisálamu 106:1.

2, 3. (a) Iebhi o iluezu ia ku kala muthu ua kambe o kisakidilu? (b) Ibhuidisu iebhi i tua-nda di longa mu milongi íii?

² Mukonda diahi tua tokala ku sakidila Jihova? Kala kia ki kanene kiá, o athu mu izuua íii isukidila-ku, a kambe kisakidilu. (2 Timote 3:2) Athu avulu lelu, ka bhana valolo ku ima iambote iene mu bhanga Jihova phala ene. Tua tungu ku mundu u  suínisa o athu ku sumba kiavulu, katé muéne ni ima ka i bhindamena. Mukonda dia kiki, o athu ka sanguluka ni ima iala na-iu kiá. Kála o akua Izalaiele io ukulu, tu tena ku kituka athu a kambe kisakidilu, ni ku kamba ku bhana valolo ku mabesá u tuene mu tambula ni ku ukamba uetu ni Jihova.​—Jisálamu 106:7, 11-13.

³ Xinganeka ué mu ima i tena o ku bhita, kioso ki tu kolokota mu ku di bhana ni ibhidi iavulu. O ibhidi i tu bhita na-iu, i tena ku tu thandanganhesa kiavulu. ni ku tu bhangesa ku kamba ku bhana valolo, ku mabesá u tuene mu tambula. (Jisálamu 116:3) Kiebhi ki tu tena kulondekesa o kisakidilu kietu? Kiebhi ki tu tena ku kala ni ukexilu uambote, né muene se tua mu bhita mu ibhidi iavulu? Tua-nda di longa o maka enhá.

4. Kiebhi ki tu tena ku kolokota mu ku londekesa o kisakidilu kietu kua Jihova?

⁴ Ku bhinga ku suína phala ku kolokota ku londekesa o kisakidilu kietu kua Jihova. Kia dianga, tua tokala ku xinganeka mu maukexilu avulu u tuene mu tambula o mabesá a Jihova. Mu ku suluka, tua tokala ku xinganeka, se kiebhi o mabesá enhá a londekesa o henda ia Nzambi ko kuetu. Kioso o mukua jisalamu kia bhange kiki, muéne ua sasumuka, mu ku mona o ima ia madiuanu ia bhangele Jihova phala o mbote iê.​—Tanga Jisálamu 40:5; 107:43.

5. Ihi i tu tena ku di longa ku phangu ia poxolo Phaulu, ia lungu ni ku sakidila?

⁵ Tu tena kuijiia se kiebhi ki tu londekesa o kisakidilu kietu kua Jihova, mu ku di longa o phangu ia poxolo Phaulu. Etu tuejiia kuila, muéne ua kexile mu xinganeka ku mabesá a tambuile, ni kuila, muéne ua kexile mu sakidila Nzambi mu ku samba. Phaulu uejidile kuila, m’ukulu, muéne uexile ‘mu zuela kia iibha, ni ku zukutisa, ni ku xonguena’ o Jikidistá. Muéne ua sakidila, mukonda sumbala, ua bhangele ima ia iibha m’ukulu, maji Nzambi ni Kristu, a londekesa o henda iâ kua muéne, mu ku mu bhana o ujitu ua ku boka o njimbu iambote ku akuâ. (Tanga 1 Timote 1:12-14.) Phaulu ua kexile ué mu sakidila o jiphange jê Jikidistá, ni ku sakidila Jihova mukonda dia ídifua iâ iambote, ni  sidivisu ia fiiele. (Filipe 1:3-5, 7; 1 Tesalonika 1:2, 3) Phaulu ua kexile mu sakidila Jihova ni lusolo, mukonda dia ima ioso ia bhangele o jiphange jê, kioso muéne kia bhiti ni izukutisu. (Ikalakalu 28:15; 2 Kolindo 7:5-7) Mukonda dia kiki, Phaulu ua suínisa o Jikidistá: “Muila ue ni kusakidila . . . mu kala mu ku di longa mudienu, ni ku di bhana phangu ni unjimu uoso. Muimba jinga mu jisalamu, ni mikumbi, ni mimbu ioso ia nzumbi. Muimbila jinga Nzambi ni muxima uezala kisakidilu.”​—Kolose 3:15-17.

6. Mukonda diahi eie u sakidila Jihova?

⁶ Kiebhi ki tu tena ku kaiela o phangu ia Phaulu? Tu tena ku bhanga kiki, mu ku xinganeka mu ima iene mu bhanga Jihova phala o mbote ietu. (Jisálamu 116:12) Se muthu u ku ibhula: “Ebhi o mabesá a Jihova u ua beta-o-kota ku bhana valolo?” Kiebhi ki ueji tambuijila? O kuila ueji tumbula o ukamba uê uambote ni Jihova? Mba o muloloki ua ituxi iê, mukonda dia sata ia kukula kua Kristu? Ueji tumbula o jiphange jê, ja maiala ni ja ahatu a Jikidistá, a ku kuatekesa mu ithangana ia bhonzo? Ueji zuela ia lungu ni ku sanguluka kuê, mukonda dia kazola kê mba an’ê? Sota kithangana phala ku xinganeka mu maukexilu avulu ene mu ku besoala kua Nzambi. O ku bhanga kiki, kua-nda ku suínisa ku mu sakidila izuua ioso.​—Tanga Jisálamu 92:1, 2.

7. (a) Mukonda diahi tua tokala ku sakidila Jihova mu misambu ietu? (b) Kiebhi ki u tena ku katula mbote mu ku sakidila Jihova mu misambu iê?

⁷ Se tu xinganeka mu mabesá oso u tuene mu tambula, tua-nda kala ni vondadi ia ku sakidila Jihova bhu kaxi ka musambu. (Jisálamu 95:2; 100:4, 5) Saí athu a samba ngó kua Nzambi, phala ku bhinga o ima ia mesena. Maji Jihova u sanguluka, kioso mu ku samba tu mu sakidila mukonda dia ima i tua tambula kiá. Mu Bibidia tu sanga-mu phangu javulu ja jiselevende ja Nzambi, kala Ana ni Ezekiia, a sakidila Jihova mu misambu iâ. (1 Samuuele 2:1-10; Izaia 38:9-20) Mu kiki, kaiela o phangu iambote ia athu iâ, ni ku sakidila Jihova mukonda dia ima ioso iene mu bhanga phala o mbote iê. (1 Tesalonika 5:17, 18) Se u bhanga kiki, ua-nda divua kiambote, o henda iê kua Nzambi, ia-nda di bandekesa, mu kiki, ua-nda kolokota mu ku kala kamba diê.​—Tiiaku 4:8.

8. Ihi i tena ku tu bhangesa ku kamba kisakidilu?

⁸ Se ki tu di lange, tu tena ku kamba ku bhana valolo ku mabesá ene mu tu bhana Jihova. Mukonda diahi? Mukonda tu akua ituxi, ni kuila ,tua lundula o ukexilu ua ku kamba kisakidilu ku jitata jetu ja dianga. Jihova ua bhanene kua Adá ni Eva dibhata diambote, o palaízu, ni ku a bhana o ima ioso ia bhindamene. Ene eji kala ni muenhu ua kalelaku ni kutululuka. (Dimatekenu 1:28) Maji ene ka bhana valolo ku mabesá mâ. Ene exile ni luímbi, mukonda dia kiki, a  mesenene dingi ima iéngi. Mu ku suka-ku, ene a texi o ima ioso. (Dimatekenu 3:6, 7, 17-19) Etu tua tungu ku mundu uezala ni athu a kambe kisakidilu, mukonda dia kiki, tu tena ué ku kala ni ukexilu ua ku kamba ku sakidila Jihova mu ima ioso iene mu tu bhana. Tu tena ku kamba ku bhana valolo ku ukamba uetu ni Nzambi, ni ku ujitu u tuala nau ua ku bhanga mbandu ku ukamba uetu ni jiphange joso ku mundu. O ima ia mundu iú, i tena ku tu landukisa. (1 Nzuá 2:15-17) Phala ku di langa ku mubhetu iú, tua tokala ku xinganeka mu mabesá avulu u tuene mu tambula, ni ku sakidila Nzambi ku ujitu u tuala nau ua ku bhanga mbandu ku mundu uê.​—Tanga Jisálamu 27:4.

9. Kioso ki tu di bhana ni ibhidi, mukonda diahi tua tokala ku xinganeka mu mabesá u tuene mu tambula?

⁹ O ku kala ni ukexilu ua ku sakidila, kua-nda tu kuatekesa ku kolokota mu ku di bhana ni ibhidi. Tu tena ku thandanganha kiavulu, mukonda dia ibhidi i lungulula o muenhu uetu ni lusolo, kala o ku kamba ufiiele kua kaza dietu, uhaxi ua bhonzo, o kufua kua muthu u tua zolo kiavulu, mba mavuua. O ku xinganeka mu mabesá ene mu tu bhana Jihova, kua-nda tu bhangesa ku divua kiambote, ni ku tu bhana nguzu phala ku kolokota. Tu di longe o misoso ia ji phange jetu.

10. Kiebhi Irina kia katula mbote mu ku xinganeka mu mabesá mê?

¹⁰ Irina, muboki ua thembu ioso ku América do Norte, ua kazale ni kafunga, maji muadi uê ua tele phánda anga ua xisa Irina ni an’ê. * (Tala ku luiji.) Ihi ia kuatekesa Irina ku kolokota ku sidivila Jihova ni ufiiele uoso? Muéne uambe: “Ngi sakidila Jihova mu ku ngi langa kiambote. Mukonda dia ku zuela ni Jihova o mabesá u ngi tambula izuua ioso, ngi tena ku bhana dingi valolo ku ujitu u ngala nau ua ku ngijiia ni ku ngi zola kua mulangidi, ni Tata ietu ia diulu. Eme ngejiia kuila, muéne nuka ua-nda ngi xisa.” Né muene Irina ua di bhana ni ibhidi iavulu ku muenhu, maji o ku sanguluka kuê, kua mu kuatekesa ku di tunda kiambote ni ku suínisa akuâ.

11. Ihi ia kuatekesa Kyung-sook, ku di bhana ni uhaxi ua di kota?

¹¹ Kyung-sook, ua tungu ku Ásia, ua sidivila kala muboki ua Thembu ioso ni muadi uê mu 20 a mivu. Mu ku bhita thembu, muéne ua kuata uhaxi ua câncer, mu kiki, a mu tangela kuila, mu ku bhita mbeji jitatu mba ji samanu, muéne ueji fua. Sumbala m’ukulu muéne ni muadi uê, a bhitile ni ibhidi iavulu, maji ene akexile ni sauidi iambote. Muéne uambe: “O uhaxi iú, ua ngi bhangesa ku divua kia iibha, ki ngi kexile dingi ni kidielelu, nga kexile ni uôma uavulu.” Ihi ia kuatekesa Kyung-sook, ku di bhana  ni maka enhá? Muéne uambe: “Mausuku oso, ande dia ku zeka, nga kexile mu banda ku ditala dia inzo ietu, phala ku samba ni dízui dia suína, ni ku sakidila Nzambi, mu ima itanu ia bhiti n’eme mu kizuua kieniókio. Mu ku bhanga kiki, nga kexile dingi ni nguzu phala ku londekesa o henda iami kua Jihova.” Kiebhi Kyung-sook kia katula mbote ku misambu ia kexile mu bhanga mu usuku? Muéne uambe: “Nga mono kuila, Jihova u tu langa kioso ki tu bhita mu ibhidi, ni kuila, ku muenhu uetu, o mabesá avulu dingi, o ibhidi ndenge.”

12. Ihi ia suínisa Jason kioso kiafu o muhatu uê?

¹² Jason, ua mu sidivila ku filiiale mu África, uene kiá mu kikalakalu kiki kia thembu ioso mu 30 a mivu. Muéne uambe: “Kua bhiti kia sambuadi dia mivu tundé ki nga fundu muhatu uami, maji né kiki, ngala hanji ni ndolo iavulu. O ku xinganeka mu kithangana kioso kia bhiti ni uhaxi, ki ngi luualesa kiavulu.” Ihi ia kuatekesa Jason ku divua kiambote? Muéne uambe: “Saí kithangana, nga xinganeka mu ima i nga kexile mu bhanga kumoxi ni muhatu uami, eme nga sakidila Jihova mu musambu, mukonda dia ku ngi lembalesa o ima íii. Nga divu kiambote, mu kiki, nga mateka ku sakidila Jihova ithangana ioso, mukonda dia ku ngi lembalesa o ithangana íii iambote i tua bhitile kumoxi. O ukexilu ua ku sakidila, ua ngi kuatekesa kiavulu. Ngala hanji ni ndolo, mukonda dia ku funda muhatu uami, maji o ku sakidila Jihova mukonda dia ukaza uambote u nga kexile nau, ni ujitu ua ku sidivila ni muthu ua zolele Jihova ni muxima uoso, ku ngi kuatekesa kiavulu.”

13. Ihi ia kuatekesa Sheryl ku di bhana ni kalunga ka muiji uê?

¹³ Kioso kia bhiti o kitembu kia dikota ku ixi ia Filipinas ku muvu ua 2013, Sheryl, kilumba kiexile ni 13 kia mivu mu kithangana kieniókio, ua xala ubheka uê, sé kima. Muéne uambe: “O inzo iami ia buika, athu avulu ku muiji uami afu.” Tat’ê, ni manh’a, ni kitatu kia jiphange jê, oso a a kungulula  ku menha. Ihi ia kuatekesa Shery ku dibhana ni kibhidi kiki, sé ku kala ni mukôndo uavulu? Né muene ni ibhidi ioso íii, Sheryl u sakidila Jihova, mukonda muéne u xinganeka ku mabesá oso ala nau. Muéne uambe: “Nga mono o ima ioso ia bhange o jiphange, phala ku bheka o ima ni ku suínisa ió a bhindamene kikuatekesu. Ngejidile kuila, o jiphange ku mundu uoso, a kexile mu bhanga misambu phala eme.” Muéne uambe dingi: “Ngi sakidila kiavulu, mu ku kala ni Nzambi kala Jihova. Ithangana ioso, muéne u tu bhana o ima i tua bhindamena.” Mu kidi, kioso ki tu londekesa kisakidilu mukonda dia mabesá u tuene mu tambula, ki tu luuala kiavulu. O kisakidilu, ki tu kuatekesa ku dibhana ni ibhidi.​—Efezo 5:20; tanga Filipe 4:6, 7.

14. Ihi i tu kingila ni kisangusangu kioso? (Tala o foto ia dianga.)

¹⁴ Tundé ukulu, o mundu ua Jihova uene mu sakidila o mabesá a tambula. Kioso kia a bhulula bhu maku a Falaó, ni jinguma ja mukuá mu Kalunga ka Kusuka, akua Izalaiele embi ni ku sanguluka kuoso, mu ku ximana ni ku sakidila Jihova. (Makatukilu 15:1-21) Lelu, o dibesá dietu dia beta-o-kota, o kuijiia kuila, kua kambe ngó, ki kua-nda kala dingi ndolo. (Jisálamu 37:9-11; Izaia 25:8; 33:24) Xinganeka kiebhi ki tua-nda divua, kioso Jihova kia-nda buika o jinguma jetu joso, ni ku tu bhekela o mundu uobhe, mua-nda kala o ku tululuka ni kuiuka. Kiki, kia-nda kala kizuua kia ku sakidila Jihova!​—Dijingunuinu 20:1-3; 21:3, 4.

15. Ihi i ua mesena ku bhanga ku muvu ua 2015?

¹⁵ Ku muvu ua 2015, tua kingila ku tambula mabesá avulu kua Jihova. Mu kidi, nange tu dibhana ni ibhidi. Maji né muene se tu dibhana ni ibhidi, tuejiia kuma Jihova nuka ua-nda tu xisa. (Matendelelu 31:8; Jisálamu 9:9, 10) Muéne ua-nda suluka mu ku tu bhana ioso i tua bhindamena, phala ku mu sidivila ni ufiiele uoso. Tu kaiele o phangu ia polofeta Habakuke, uambe: “Kuma né-mbe hanji o mufiku ki u tulula, mba ku kala ibundu ku muvide; o ibundu ia mudiva i kala makutu; o mábhia ue a kamba ku bhana idima; o jimbudi joso ja kilunga a j’ambata, anga mu i bhanga ioso mu xal’é ngó sé jingombe; ne kienhókio, eme hanji nga kà sangulukila mua Jihova; nga kà tumbujuka ni ngalasa mua Nzambi ia ubhulukilu uami.” (Habakuke 3:17, 18) Ku muvu ua-nda kuíza, tu kolokote ku xinganeka mu mabesá oso u tu tambula, ni ku di suínisa ku kaiela o kitendelesu kia kibatulu kietu kia muvu ua 2015: “Sakidilenu Jihova kuma muene mukua kubhanga mbote.”​—Jisálamu 106:1.