O KIKALAKALU kia ku boka o njimbu iambote, kiene o kikalakalu kia beta kota kia mu bhanga mu ixi lelu. Ujitu ua dikota ku bhanga o kikalakalu kiki kia ku boka, kia tu tumina Jihova. Maji saí ithangana, ki bhonza phala o aboki a thembu ioso, ni aboki a mukuá ku kolokota mu ukunji uâ. Mukonda diahi?

Saí aboki a mona kuila, ki bhonza ku zuela ni athu kioso kia boka nzo ni inzo, mukonda kene mu sanga athu avulu ku bhata. Kioso kia a sanga ku mabhata mâ, ene ka mesena kuívua o njimbu ia Utuminu, saí bhabha a kala ni njinda. Mu jimbambe ja mukuá, o athu a xikina ku zuela nau, maji o aboki ala ni hele mukonda a banza kuila, ka-nda tena ku tula o njimbu ku athu oso a tungu mu jimbambe jiji. Aboki a mukuá ene mu boka kiá mu mivu iavulu, maji a luuala mukonda o dizubhilu kiluua di bhixila.

Tua-nda di bhana ni ibhidi, ia-nda tu bhangesa ku zoza mu ukunji uetu. Tua tungu ku mundu ua mu tumina “Kadiaphemba” mba Satanaji, o Diabhu. Mukonda dia kiki, tuejiia kuma saí ithangana, kua-nda bhonza ku boka o njimbu iambote.​—1 Nzuá 5:19.

Ejiia kuila, né muene se u di bhana ni ibhidi ioso ioso mu ukunji uê, Jihova ua-nda ku kuatekesa ku di bhana na-iu. Maji ihi i u tena ku bhanga phala ku kolokota mu ukunji uê? Tu di longe o ima i ua tokala ku bhanga.

Mivu ioso, ene mu batizala mazunda ni mazunda a Jimbangi ja Jihova. Se a ku batizala kindala, u tena ku di longa ima iavulu ni jiphange ene mu boka kiá mu mivu iavulu. Se uene kia mu boka mu mivu iavulu, o kuila u tena ku kuatekesa o aboki a ubhe? Se u bhanga kiki, ua-nda sanguluka kiavulu.

Jezú uejidile kuila, o maxibulu mê a bhingile ku a longa phala n’a kituke jimesene jambote. Mu  kiki, muéne ua a longo o ku boka. (Luka 8:1) Kiene ué lelu, kua bhingi ku longa o aboki a ubhe n’a kituke ué jimesene jambote.

Ki tu tokala ku banza kuila, o muboki ua ubhe uia mu sidivisu ia ku boka uejiia kiá ku longa kiambote. Muéne ua bhingi ku mu longa ku muboki uala ni henda. O muboki uala ni uhete, ua tokala ku mu longa kiebhi kia tokala (1) ku di iudika ni ku bhitulula o milongi ia-nda bokela o athu, (2) ku zuela ni athu, (3) ku bhana o madivulu a Bibidia, (4) ku di iudika phala ku kunda dingi o athu a mesena kuívua o Mak’â Nzambi, ni (5) ku mateka ku longa maxibulu a Bibidia. O muboki ua ubhe u tena ku kituka mesene iambote, se u tonginina kiambote o ukexilu u boka o muboki uala ni uhete, ni ku kaiela o phangu iê. (Luka 6:40) O muboki ua ubhe ua-nda divua kiambote mu kuijiia kuila, saí muthu uala polondo phala ku mu kuatekesa kioso kia-nda bhindama. O ku ximana ni ku bhana ndunge, ku tena ku kuatekesa ué o muboki ua ubhe.​—Ndongixi 4:9, 10.

Né muéne se u di suínisa phala ku zuela ni athu mu ukunji, saí izuua, phangi’ê muene ngó o muthu u ua-nda zuela nê kiambote mu sidivisu ia kuboka. Lembalala kuila Jezú ua tumikisa o maxibulu mê “kiiadi-kiiadi,” phala ku boka. (Luka 10:1) Kioso kia kexile mu boka, ene a kexile mu di suínisa. Etu ué tu tena ku ‘di suínisa,’ kioso ki tu kalakala ni jiphange jetu.​—Loma 1:12.

Ihi i mu tena ku zuela? O kuila saí kima kia bhiti mudienu ki tena ku suínisa mukuenu? O kuila saí kima ki ua di longo ku ubhezelu uê ku muiji mba kioso ki ua kexile mu di longa ubheka uê? O kuila saí kima ki uevu mu kiônge kia ku suínisa? Saí bhabha, u kalakala ni phange ku muijiia kiambote. U tena ku mu ibhula kiebhi kia di longo o kidi. Ihi ia mu bhangesa ku xikina kuila, kiki kiene o kilunga kia Jihova? Maujitu ahi a tambula? Nange u tena ku mu tangela o ima iene mu bhita n’eie. Ki kale o athu mu mbambe iê a xikina o kuívua o njimbu iambote mba kana, kioso ki u kalakala ni phange mu ukunji, kithangana kiambote phala “kudikuatekesa” mudienu.​—1 Tesalonika 5:11.

Phala ku kolokota mu ukunji uetu, tua tokala ku di longa kiambote. ‘O kimbadi kia fiiele,’ ki tu bhana milongi iavulu i tu tena ku di longa. (Matesu 24:45) Tu di longe diambu dimoxi dia fuama phala ku di longa: Mukonda diahi o kikalakalu kia  ku boka kiala ni valolo ia dikota? O kaxa “ Mukonda Diahi ua Tokala ku Kolokota mu Ukunji?” i jimbulula o maka enhá.

O ku xinganeka mu maka a tange mu kaxa íii, ku tena ku ku kuatekesa ku kolokota ku boka ni ku suína kuoso. Sota milongi ia mukuá ia Bibidia, i tena ku ku kuatekesa ku kolokota mu sidivisu ia ku boka. Mu ku suluka, xinganeka mu ima íii. Se u bhanga kiki, ua-nda kolokota mu sidivisu ia ku boka.

Ithangana ioso, o kilunga kia Jihova ki tu bhana milongi i tu kuatekesa ku bhanga kiambote o ukunji uetu. Mu kifika, mu veji dia ku boka ngó nzo ni inzo, tu tena ué ku boka ni mikanda, ni mitelembe ia kafuetele, mu ikoka mba mu ididi mu bhongoloka o athu, ku boka kioso ki ku moneka kithangana mba mu matenda mu kalakala o athu. Nange tu tena ué ku di sokejeka phala ku boka mu ididi mua kambe aboki.

O kuila ua mesena ku boka mu maukexilu a mukuá? Avulu a fikisa o maukexilu iâ, a di tundu kiambote. Tu di longe phangu jitatu.

Saí phange ia muhatu a mu ixana April, ua solo ku kaiela ndunge mu Kikalakalu Kietu Kia Utuminu, ia lungu ni kiebhi ki tu tena ku mateka ku longa maxibulu a Bibidia. Muéne ua zuela ni kitatu kia jikoleka jê phala ku a longa o Bibidia. April ua tukumuka kioso o kitatu kia jikoleka jê a xikina ku di longa o Bibidia, anga a mateka ué kuia mu iônge.

A tu suínisa ué ku sota o athu a fuama phala o milongi iene mu kuíza mu madivulu metu a Bibidia. Saí kafunga ka ilunga mu ixi ia Estados  Unidos, ua solo milongi ia lungu ni malola mu Despertai!, phala ku zuela ngó ni atuameni oso a matenda a malola mu mbanza imoxi. Muéne ni muhatu’ê a bhana ué o milongi ni diambu “Os Desafios de Ser Médico” ku 100 a jinzu ja ku saka. Muéne uambe kuila, o ku kunda o ididi íii kua kuatekesa o athu kuijiia o kikalakalu kietu kia ku boka ni madivulu metu a Bibidia. O kuijiia kiambote o athu mu mbambe iâ, kua kuatekesa o kafunga ka ilunga ni muhatu’ê ku kunda dingi o athu a mukuá.

O phange ia mukuá ia muhatu a mu ixana Judy, ua tumikisa mukanda ku mbonge ietu, phala ku sakidila o jiphange mukonda dia milongi ia lungu ni ku boka bhu kaxi ka mitelembe ia kafuetele. Muéne ua zuela kuila, mam’ê ua kexile ni 86 a mivu, ua kexile mu kata kiavulu, ua kexile mu boka bhu kaxi ka mutelembe ua kafuetele. Mu kiki, muéne ua mateka ku longa o Bibidia ku muhatu ua kexile ni 92 a mivu!

O jindunge mu madivulu metu a Bibidia, jene mu kuatekesa muene. Fikisa o jindunge jiji! Jene ji tena ku ku kuatekesa ku kolokota mu ku bhanga o ukunji uê ni kisangusangu kioso.

Ihi i tena ku tu kuatekesa ku di tunda kiambote mu ukunji uetu? Nange tu bhana madivulu avulu, tu longa maxibulu avulu a Bibidia, tu kuatekesa athu avulu ku kituka Jimbangi ja Jihova, maji o ima íii ki iene ngó i tu bhangesa ku di tunda kiambote mu ukunji uetu. Xinganeka mu phangu ia Noué. Se ku kondala o muiji uê, athu a kuxi Noué ua a kuatekesa ku kituka abhezi a Jihova? Sumbala muéne ka kuatekesa dingi muthu, maji muéne ua di tundu kiambote mu ukunji uê. O kima kia beta kota, o ku sidivila Jihova ni ufiiele uoso.​—1 Kolindo 4:2.

Aboki avulu a mono kuila, phala ku sanguluka mu sidivisu ia ku boka, ene a tokala ku suua jimbambe jambote. Jimbambe jebhi ja tena ku suua? Saí jimbambe, jo jimbulule mu kaxa, “ Suua Jimbambe Jambote.”

Bhinga kua Jihova phala ku ku kuatekesa ku di tunda kiambote mu ukunji uê. Se u kumbidila o jimbambe ji ua suu, ua-nda sanguluka mu kuijiia kuila, ua mu bhanga ioso phala ku boka o njimbu iambote.

Mu kidi, saí ithangana ki bhonza ku boka o njimbu iambote. Maji saí ima i u tena ku bhanga phala ku kolokota mu ukunji uê. Kioso ki mua mu boka, zuele-nu ima i suínisa, di longe ubheka uê ithangana ioso, kaiela o milongi ia kimbadi kia fiiele, mu ku suka-ku suua jimbambe jambote. Kana ku jimba kuila, Jihova Nzambi ua ku bhana ujitu ua dikota ua ku boka o njimbu iambote ni ku kala mbangi iê. (Izaia 43:10) Sé phata, ua-nda sanguluka kiavulu mu ku kolokota mu ukunji uê!