1-3. Mukonda diahi kia bhonzele phala o maxibulu a Jezú ku boka o njimbu iambote “ku akua jixi joso?”

JEZÚ KRISTU ua bhana kikalakalu kia dikota ku maxibulu mê. Muéne ua a tumina ku longa “jixibulu ku akua jixi joso.” Ene a tokalele ku boka o ‘njimbu iambote ia Utuminu ua Nzambi’ “mu ngongo ioso, mu kubhana umbangi ku akua jixi joso.”​—Matesu 24:14; 28:19.

² O maxibulu a zolele kiavulu Jezú, a zolele ué kiavulu o njimbu iambote. Maji nange a dibhuidisa: ‘Kiebhi ki tu tena ku boka o njimbu iambote ia tu tumina Jezú?’ Kia dianga, ene a tolele. Ene a kexile ué mu longa kuila, Jezú uexile Mona Nzambi, maji o athu ejidile kuila Jezú a mu jibhile. O athu a kijidile ué kuila, o maxibulu ‘ka di longele kiavulu.’ (Ikalakalu 4:13) O atuameni a Jijudé a di longele mu ji xikola ja jingeleja, maji o maxibulu kana. O njimbu ia kexile mu boka, ki i lungile ni ijila ia Jijudé ia kexile mu longa o atuameni a Jijudé mu hama ia mivu ku dima. Kuma ka kexile mu  xila o maxibulu mu Izalaiele, nange ene a dibhuidisa se kueji moneka muthu ueji ku a evua mu jixi joso ja tokalele ku Utuminu ua Loma.

³ Jezú ua dimuine o maxibulu mê kuila, eji kua zemba ni ku a zukutisa, ni kuila, saí iá mudiâ eji ku a jibha. (Luka 21:16, 17) O jindandu jâ ni makamba mâ eji ku a sumbisa. Saí athu eji moneka kuma maxibulu a Kristu, eji longa milongi ia makutu. O maxibulu eji longa mu ididi iezala ni ujibhangânga ni usuéia. (Matesu 24:10-12) Mu kiki, kiebhi kieji boka “katé ni ku maxokololo ma jixi?” (Ikalakalu 1:8) Nange o maxibulu a dibhuidisa kiebhi kieji bhanga o kikalakalu kiki ni ibhidi ioso íii.

4. Mbote iahi ia bheka o kikalakalu kia bhangele o maxibulu a Jezú?

⁴ Sumbala o maxibulu ejidile kuila, o kikalakalu kiki kia bhonzele, maji ene a belesela o kitumu kia Jezú kia ku boka mu Jeluzaleme, ni mu Samádia, ni mu jixi ja mukuá. Mu ku bhita 30 a mivu, ene endele mu ididi iavulu mu ku boka o njimbu iambote, mukonda dia kiki, poxolo Phaulu ua zuela kuila, o njimbu iambote a “i kola mu ngongo ioso.” Mukonda dia kikalakalu kiki, athu avulu a tokalele ku jixi jengi a kituka maxibulu. (Kolose 1:6, 23) Mu kifika, kioso Phaulu kia boko o njimbu iambote mu ixi ia Xipele, o nguvulu ia Loma ua kituka ué dixibulu, mukonda ‘ua diuana o ulongelu ua Jihova.’​—Tanga Ikalakalu 13:6-12.

5. (a) Ihi ia kanene Jezú ku maxibulu mê? (b) Ihi i zuela o divulu dia misoso, ia lungu ni hama ia dianga?

⁵ O maxibulu ejidile kuila, keji tena ku boka o njimbu iambote ku jixi joso mu nguzu iâ. Maji ene ejidile ué kuila, Jezú ua kanene ku kala ni ene, ni kuila, o nzumbi ikola ieji ku a kuatekesa. (Matesu 28:20) Nange o ima ia mukuá ia bhitile mu kithangana kieniókio, ia kuatekesa ué o maxibulu. Mu kidi, saí divulu dia jimbulula kuila, nange ku hama ia dianga ki ku bhonzele ku boka, mu kiki, kiexile o kithangana kia fuamene phala o Jikidistá ku mateka o kikalakalu kia ku boka. Mu ku bhita kithangana, o Jikidistá a mono kuila Nzambi ua iudikile o ima phala ene ku boka.

6. (a) Ihi i tua-nda di longa mu milongi íii? (b)Ihi i tua-nda di longa mu milongi ia-nda kaiela?

⁶ O kuila Jihova ua lungulula o ima ku hama ia dianga, phala o Jikidistá ku bhanga o kikalakalu kia ku boka? O Bibidia ki i zuela. Maji tuejiia kuila, Jihova ua mesenene kuila o mundu uê u boka o njimbu iambote. Muéne ka mesenene kuila, Satanaji u a fidisa ku boka. Mu milongi íii, tua-nda di longa ima ia bhitile ku hama ia dianga ia kuatekesa o maxibulu ku boka. Mu milongi ia-nda kaiela, tua-nda di longa ima iene mu bhita lelu, i tu kuatekesa ku boka o njimbu iambote ku mundu uoso.

7. O Kutululuka kua Loma ihi, ni mukonda diahi o kutululuka kuku kua di tungula?

⁷ O kutululuka ku Utuminu ua Loma, kua kuatekesa o maxibulu ku boka. O kithangana kiki, a kexile mu kiexana Kutululuka kua Loma mba Pax Romana mu dimi dia Latini. Mu kithangana kieniókio, o nguvulu ia Loma ka kexile mu kuehela kibuka kioso-kioso ku bhanga jinvunda. Mu kidi, saí bhabha kua bhitile ita, kala kia kanene Jezú. (Matesu 24:6) Akua Loma a buika Jeluzaleme ku muvu ua 70, ene akexile mu bhanga ué ita ku jimbambe ja jixi joso ja tokalele ku utuminu ua Loma. Maji o jixi joso ja tokalele ku utuminu ua Loma, ja kexile ni kutululuka, mu kiki, o maxibulu a tenene kuia mu ididi iavulu phala ku boka. Kuexile o kutululuka mu 200 ja mivu. O divulu dia zuela ué kuila, o kutululuka mu mivu ioso íii, kua di tungula, ni kuila, kua kuatekesa athu avulu.

8. Kiebhi o Kutululuka Kua Loma kua kuatekesa o maxibulu?

⁸ Mu ku bhita 250 ja mivu kioso kiafu Kristu, saí ngijiie a mu ixana Origen, ua soneka ia lungu ni kutululuka kuku. Muéne ua zuela kuila, mukonda o ixi ia Loma ia kexile mu tumina jixi javulu, kiki kia kuatekesa o maxibulu ku boka mu jixi joso ja tokalele ku utuminu iú. O athu ka kexile mu bhânga mukonda dia jixi jâ, ene a tungile mu jisanzala jâ ni ku tululuka kuoso. Mu kiki, Origen ua mono kuila, mukonda dia kutululuka kuku, athu avulu evu o njimbu iambote ia a tudile o maxibulu, ia lungu ni henda ni kutululuka. Sumbala o maxibulu a a zukutisile, maji ene a bhange ioso phala ku boka o njimbu iambote mu ididi ioso, mu kithangana kieniókio kia kutululuka.​—Tanga Loma 12:18-21.

9, 10. Ihi ia kuatekesa o maxibulu kuia mu ididi iavulu?

⁹ O akua Loma a tungile 80.000 a ji kilómetulu ja ikoka, ja kexile múia ku jixi joso ja tokalele ku utuminu ua Loma. O jinjila jiji, ja kuatekesa o masoladi akua Loma kuia mu ididi ioso se ku laleka, phala ku langa o athu ni jimbambe jâ. O Jikidistá a bhitile ué mu ikoka íii, ni mu mixitu, ni mu kikangalakata ni mu milundu, phala ku boka o njimbu iambote mu ididi iavulu.

¹⁰ O akua Loma a kexile ué mu kuenda mu jibaluku. Mu ku bhanga o njila, ene akexile mu zaúka jingiji, ni jihonga ni kalunga, ki kuia mu jixi joso ja tokalele ku utuminu ua Loma. Mu kidi, o akua Loma a kexile ni 900 ia jinjila ndenge phala o jibaluku. Mu kiki, o Jikidistá a kexile ué  múia mu ididi iavulu ni jibaluku. Ene ka bhingile kuambata madukumendu phala ku bokona mu jixi ja mukuá. Ki kuexile ué mii iavulu mu jinjila, mukonda o mii ejidile kuila, o akua Loma a kexile mu bhana kaxtiku ka dikota ku mii. Mukonda o masoladi a Loma a kexile mu kuenda ni jibaluku ithangana ioso, o athu a mukua a kexile ué mu kuenda njila, ka kexile ni uôma ua jibandi. Sumbala o Bibidia i zuela kuila saí bhabha Phaulu ua bhiti mu iluezu ku musanza ua kalunga, maji iene ki i zuela kuila a mu zukutisile ku jibandi. Mu kiki, o kuenda o njila mu ikoka mba mu jibaluku, ki kiexile kiluezu.​—2 Kolindo 11:25, 26.

11. Mukonda diahi o maxibulu a boko mu dimi dia Ngeleku?

¹¹ O nguvulu ia akua Ngeleku, Xandele ia Dikota, ua tambuile jixi javulu ja kexile mu tumina akua Loma mivu ku dima. O athu mu ididi íii, a kexile mu zuela o dimi dia Ngeleku mu ukexilu uéngi a uixana Grego Coiné. Kiki kia kuatekesa o maxibulu ku a tudila o njimbu iambote mu dimi didi. Ene a kexile mu tumbula ibatulu mu Mikanda ia Hebalaiku, mukonda a i lunguluile mu dimi dia Ngeleku. Athu avulu ejidile o Bibidia íii ia lunguluile o Jijudé a tungile ku Ijitu, a ixanene Septuaginta. O asoneki a Bibidia, a zubha ué ku soneka o Bibidia mu dimi dia Ngeleku. O dimi dia Ngeleku dia kexile ni izuelu iavulu, mu kiki, o dimi didi dia fuamene phala ku jimbulula kiambote o kidi kia Bibidia. O dimi dia Ngeleku dia kuatekesa o athu mu ilunga ku di zuelesa kiambote ni ku di zukama dingi.

12. (a) O Códice ihi, ni mukonda diahi o ku kalakala ni divulu didi kua betele-o-kota, o mikanda ndenge? (b) Thembu kuxi o Jikidistá a mateka ku kalakala ni madivulu?

¹² O Jikidistá ku hama ia dianga, a boko o njimbu iambote ni ihi? Ku dimatekenu, ene a boko ni mikanda. Maji kia bhonzele kiavulu kuambata ni ku boka ni mikanda. Phala ku tanga kibatulu mu mikanda, kua bhingile ku a futumuna, ku disukilu kua bhingile ku a nhinga dingi. Mu mikanda, o milongi io sonekene ngó mu mbandu imoxi. O divulu dia Matesu dio sonekene ngó mu mukanda umoxi. Mu ku bhita thembu, o athu a mateka ku kalakala ni divulu a di exana Códice, o divulu didi, dia lungile  ni madivulu a dianga o ku bhanga. Ki ki bhonzele ku sanga o ibatulu mu divulu didi. O akua misoso a zuela kuila, sé ku laleka, o Jikidistá a mateka ku kalakala ni madivulu, ni kuila, mu ku bhita 100 ia mivu, avulu mudiâ a kexile kiá mu kalakala ni madivulu.

13, 14. (a) Mbote iahi ia katula Phaulu, mukonda dia ku tokala mu ixi ia Loma? (b) Mbote iahi ia katula o Jikidistá mu kitumu kia akua Loma?

¹³ O Jikidistá ku hama ia dianga, a katula mbote mu kitumu kia akua Loma. Mu kifika, Phaulu ua tokalele ku ixi ia Loma, mu kiki, kioso kia kexile mu kuenda njila, muéne ua kexile mu katula mbote mu kitumu. Saí kizuua, o masoladi a Loma a kutu Phaulu mu Jeluzaleme, ene a mesenene ku mu beta, maji Phaulu ua a tangela kuila, muéne uexile mukua Loma. Muéne ua lembalesa kabhitangu kuila, ka tokalele ku beta muthu mukua Loma sé ku mu fundisa. Mukonda dia kiki, o “athu andekele ku mu tokuesa a muangana, a mu xa. Ni muene Komanande u kala ni uôma, kia k’ijiia kuila mukua Roma, mukonda ua tumu ku mu kutisa.”​—Ikalakalu 22:25-29.

¹⁴ Mukonda Phaulu uexile mukua Loma, a mu talatala kiambote mu mbanza ia Felipo. (Ikalakalu 16:35-40) Saí kizuua, kibuka kia athu kia mesenene ku kuama o Jikidistá mu Efezo. Saí mukalakadi ku mbonge ua tululukisa o athu mu ku a lembalesa kuila, o ima ia kexile mu bhanga, mu kitumu kia akua Loma, iexile kituxi. (Ikalakalu 19:35-41) Mu ku bhita kithangana, Phaulu uendele mu Sezaleia, kuenhoko, muéne ua bhingi phala ku mu ambata ku nguvulu ia Loma. O kia bhixila ku mbonge, muéne ua zokela o njimbu iambote. (Ikalakalu 25:8-12) Mu kiki, o Jikidistá a katula mbote mu kitumu kia akua Loma, mu ku ‘zokela o ujitu’ uâ ua ku boka.​—Filipe 1:7.

15. Kuebhi kua tungile o Jijudé javulu ku hama ia dianga?

¹⁵ Nange saí kima dingi kia kuatekesa o Jikidistá ku hama ia dianga ku boka ku jixi joso. Mu kithangana kieniókio, o Jijudé ka tungile ngó mu Izalaiele, ene a tungile ku jixi javulu. Mukonda diahi? Mivu iavulu ku dima, o Jijudé a a ambatele ku ixi ia Asídia, mu ku bhita dingi mivu, a mukuá a a ambata ku Babilonha. Mu ku bhita thembu, kioso o akua Pélesa akexile mu tumina o ixi ia Babilonha, o Jijudé a muangana mu jixi joso ja tokalele ku Utuminu ua Pélesa. (Estere 9:30) Ku hama ia dianga, kioso Jezú kia kiexile hanji mu ixi, o Jijudé a kexile mu tunga mu jixi joso ja tokalele ku Utuminu ua Loma, kala Ijitu, ni jixi ja mukuá ku thunda dia África, ni Ngeléxia, ni Ásia Menor (Turquia), ni Mezopotamiia (Iraque). Ku 60 a mazunda a athu a tungile mu jixi joso ja tokalele ku Utuminu ua Loma, mazunda a 4 exile Jijudé. Sumbala o Jijudé a muangene mu jixi javulu, ene ka xisa o ubhezelu uâ.​—Matesu 23:15.

16, 17. (a) Kuma o Jijudé a tungile mu jixi javulu, mbote iahi ia katula o athu kexile Jijudé? (b) Kiebhi o Jikidistá a kaiela o phangu ia Jijudé?

¹⁶ Kuma o Jijudé a tungile mu jixi javulu, athu avulu kexile Jijudé, ejidile ia lungu ni Mikanda ia Hebalaiku ni ubhezelu ua  Jijudé. Mu kifika, ene a di longo kuila, kuene ngó Nzambi imoxi ia kidi, a di longo ué kuila, o athu a sidivila Nzambi a tokala ku belesela o itumu iê. Ene a di longo ué kuma o Mikanda ia Hebalaiku, ia tokalele kua Nzambi, ni kuila, ia kexile ni ikanenu iavulu ia lungu ni Mexiia. (Luka 24:44) Mu kiki, kioso o Jikidistá a boko o njimbu iambote, o Jijudé ni ió kexile Jijudé, ejidile kiá ima iavulu ia kexile mu boka o Jikidistá. Phaulu ua kexile mu sota o athu a mesenene kuívua o njimbu iambote. Mu kiki, muéne ua kexile múia mu ji tembulu mua kexile mu bheza o Jijudé, ni ku a jimbuluila o milongi mu Mikanda Ikola.​—Tanga Ikalakalu 17:1, 2.

¹⁷ O Jijudé a kexile mu diongeka mu ithangana ioso, ki kale mu ji tembulu mba bhu kanga. Ene a kexile mu kuimba, ni ku samba, ni ku di longa o Mikanda Ikola. O Jikidistá ku hama ia dianga a kaiela o phangu iâ, etu ué tuene mu kaiela o phangu iâ mu ilunga ietu.

18, 19. (a) O izulukutu ia bhitile ku hama ia dianga, ia kuatekesa o Jikidistá ku bhanga ihi? (b) Mu ku di longa o milongi íii, kiebhi ki u divua ia lungu ni Jihova?

¹⁸ O izulukutu ia bhiti ku hama ia dianga, ia di tungula ku izulukutu ioso iene mu bhita. O jixi joso ja tokalele ku Utuminu ua Loma ja kexile ni kutululuka, athu avulu a kexile mu zuela dimi dimoxi, o kitumu kia kexile mu langa o athu. Ki ku bhonzele kuenda njila, o athu mu jixi javulu ejidile ia lungu ni Jijudé ni Mikanda Ikola. O ima ioso íii, ia kuatekesa o Jikidistá ku kolokota ku bhanga o kikalakalu kia a bhanene Nzambi.

¹⁹ Mu 400 ja mivu, ande dia Jezú kuíza mu ixi, o ngijiie Plato mukua Ngélexia ua soneka kuila, kia bhonzo kiavulu phala o athu kuijiia o Mubhangi ua ima ioso mu ngongo. Mukonda dia kiki, ene ka tena ku tangela o athu oso ku mundu, o njimbu iambote ia lungu ni Nzambi. Maji Jezú ua zuela: “Ima athu a i tokoka, kua Nzambi-phe i xikina.” (Luka 18:27) Mu kiki, tu tena ku mona kuila o athu ene mu bhanga o kikalakalu kia ku boka, mukonda Jihova uene mu a kuatekesa. Muéne ua mesena kuila, o athu “akua jixi joso,” evua o njimbu iambote phala n’a muijiie. (Matesu 28:19) O milongi ia-nda kaiela, ia-nda jimbulula kiebhi kia mu boka o njimbu iambote ku mundu uoso lelu.