MU kiônge kia katunda kia bhiti mu mbanza ia Nagoya, mu ixi ia Japão, mu kizuua kia 28 kia Kasamanu ka 2013, Anthony Morris ua tokala ku Kibuka kia Utuminu, ua bhange ngolokela ia sangulukisa kiavulu o athu: a bhange divulu dia ubhe mu dízui dia japonês, diala ni diambu: A Bíblia​—O Evangelho Segundo Mateus. 210.000 a athu ndenge, evu o milongi ia kiônge kiki. Kioso kiévu o ngolokela, o jingivuidi a londekesa o kisangusangu kiâ mu ku beta o maku mu ithangana iavulu.

O divulu didi, dia lungu ni milongi iala mu divulu dia Matesu, ia tundu mu Tradução do Novo Mundu. Maji o divulu didi, diala ni 128 dia jimbandu dia di tungula dingi. O phange Anthony Morris, ua jimbulula kuila, o divulu didi, a di bhange benge-benge phala o ixi ia Japão. Mukonda diahi o divulu didi dia di tungula? Mukonda diahi kua bhingile ku di bhanga? ni Kiebhi o athu kia divu?

Athu avulu a diuana ni ukexilu ua divulu didi dia ubhe dia Matesu. O mixinda ia akua Japão, a tena ku i soneka ki kale mu ukexilu uemana mba mu ukexilu ua zendalala. Madivulu avulu, katé muene ni madivulu metu, o soneke mu ukexilu zendalala. Maji, o milongi mu divulu didi a i soneka mu ukexilu uemana, kala o ji jurnale ni madivulu engi ia akua Japão. O athu ku Japão a uabhela dingi ku tanga o madivulu ala mu ukexilu iú. Mu divulu didi, a te-mu ué o madiambu ene mu kuíza ku dimatekenu dia jimbandu mu Bibidia, mu ukexilu uéngi, phala ku kuatekesa o atangi ku mona o ji pondo ja beta-kota kioso kiaia ni ku di tanga.

O jiphange ku Japão, a mateka ku tanga ni lusolo luoso, o divulu dia Matesu kioso kia di tambula. Saí, phange ia muhatu uala ni 80 a mivu uambe: “Eme nga tangele kiá o divulu dia Matesu mu veji javulu, maji o ukexilu ua soneka o divulu didi, ni ma diambu, ua ngi bhangesa ku tendela kiambote o Diskursu dia bhangele Jezú ku Mulundu.” Saí ué phange ia muhatu, muzangala hanji, ua soneka: “Nga tange o divulu dia Matesu mu kithangana kimoxi. Eme ngene mu tanga dingi o madivulu mu ukexilu ua zendalala, maji athu avulu mu ixi ia Japão a zolo dingi o ukexilu uemana.”

Mukonda diahi o divulu dia Matesu dia tokala phala akua Japão? Sumbala athu avulu ku Japão kejiia kiambote o Bibidia, né kiki, ene a mesena kiavulu ku tanga o divulu didi. Athu avulu ka monene hanji o Bibidia, a-nda kala ni kithangana kia ku i tambula ni ku i tanga.

Mukonda diahi a solo o divulu dia Matesu? Athu avulu ku Japão a xinganeka kua Jezú Kristu, kioso kiévua o kizuelu “Bibidia.” Mu kiki, a solo o divulu dia Matesu mukonda, diene di zuela ia lungu ni muiji ua Jezú, o uvualukilu ué, o Diskursu dia bhangele ku Mulundu, ni kikanenu kia dikota kia lungu ni izuua isukidila-ku. O milongi ioso íii, iene ia uabhela o akua Japão.

 O aboki ku Japão, a mateka ku bhana o divulu didi dia ubhe ni nguzu ioso nzo ni inzo ni ku kunda o athu. Saí phange ia muhatu ua soneka : “Kindala, ngala dingi ni ithangana ia ku bhana o Bibidia ku athu mu mbambe ietu. Mu kidi, mu kizuua kia kiônge kia katunda, nga tenene kia ku bhana kopia imoxi ia divulu dia ubhe dia Matesu!”

Kiebhi o aboki kiene mu bhana o divulu didi dia ubhe? Athu avulu ku Japão ejiia o izuelu kala, “dibhitu dia tolo,” “jiphelula jenu kana ku ji texila jingulu,” ni “kizuua kia mungu, kana ku ki kuatela hele.” (Matesu 6:34; 7:6, 13) Ene a diuana kioso kia di longa kuila, o izuelu íii ia tokala kua Jezú Kristu. Kioso ene kia mona o izuelu íii mu divulu dia Matesu, avulu a zuela kuila: “Eme nga mesenene kiavulu ku tanga, né muene mu veji imoxi ngó o Bibidia.”

Kioso o aboki kia vutuka ku kunda o athu, a xikine o divulu dia ubhe dia Matesu, o athu a zuela kuila, a di tange dioso mba bhofele. Saí diiala uala ni 60 a mivu, ua zuela ku muboki umoxi: “Eme nga tange o divulu didi mu veji javulu, diene dia ngi kuatekesa kiavulu. Nga ku dióndo, ngi longe dingi ia lungu ni Bibidia.”

O divulu dia Matesu, a dibhana ué ku athu mu ikoka. Kioso kia kexile mu boka, saí mbangi ia Jihova ua bhana o kijimbuete kiê kia internete ku muhatu umoxi ua xikinine o divulu. Mu ku bhita ola imoxi, o muhatu ua tumikisa njimbu, mu ku zuela kuila, ua tangele kiá mbandu ia divulu, iú ua mesenene kuijiia dingi. Mu ku bhita semana imoxi, ua mateka ku di longa o Bibidia ni kuia mu iônge.

Ku ixi ia Japão, a tumikisa 1.600.000 a jikopia ndenge, ja divulu dia Matesu ku ilunga. Mbeji joso, o Jimbangi ja Jihova, ene mu bhana midi ni jimidi a jikopia ja divulu didi. Mu mbandu ia dianga ia divulu didi, o alunguludi a zuela: “Mu kidi, tua mesena kuila, o divulu didi di ku kuatekesa dingi ku bhana valolo ku Bibidia.”