Saí jiselevende ja Nzambi, akudi, kiene ué kia zuela. Ene ejiia kuila, Jihova ua-ndala kuila o jiselevende jê, a kazala ‘ngó mua Ngana,’ kiki kilombolola ku kazala ngó ni Kidistá ia kidi. (1 Kolindo 7:39) Se kiene, mukonda diahi, saí Jikidistá a zuela kienhiki?

O Jikidistá a zuela o ima íii, nange a mona kuila, kuene dingi ji phange ja ahatu, akudi, o ja maiala ndenge. Kiki kiene mu bhita ku jixi javulu. Mu kifika, ku ixi ia Coreia, 57 a ji pursentu, ji phange ja ahatu akudi, maji kuene ngó 43 a ji pursentu, ja jiphange akudi ja maiala. Ku ixi ia Colômbia ué, 66 a ji pursentu, ji phange ja ahatu akudi, o ja mala 34 a ji pursentu ngó.

Saí jixi, o jitata ki Jimbangi ja Jihova, nange a bhinga kitadi kiavulu mba maujitu a te kalu, kioso kia bhana o an’â ahatu mu ukaza. Mu kiki, saí jiphange akudi a maiala, nange ka tena ku futa o ima íii. Kiki kiene mu bhangesa o jiphange ja ahatu ku thandanganha ni ku di ibhuidisa, se saí kizuua ene a-nda tena muene ku sanga diiala Kidistá. *​—Tala ku luiji.

Se saí kizuua, eie ua banzele kia kienhiki, u tena kuijiia kuila, Jihova u tendela o ibanzelu iê, muéne uejiia kiambote kiebhi ki uene mu divua.​—2 Malunda 6:29, 30.

Né kiki, bhu kaxi ka Bibidia, Jihova u tu tendelesa ku kazala ngó mua Ngana. Mukonda diahi?  Mukonda muéne, uejiia o ima i tua bhindamena, ua mesena ku tu langa. Muéne ka mesena kuila, etu tu sola ima i tu bhekesa ibhidi, i tu fidisa ku sanguluka ku muenhu. Mu izuua ia Nehemiia, Jijudé javulu akexile mu kazala ni ahatu ka kexile mu sidivila Nzambi. Mukonda dia kiki, Nehemiia ua tumbula o phangu ia íibha ia Solomá. Muéne a mu zolele “kuala Nzambi iê, ni mu ku mu bhanga kukala sobha ia Izalaiele . . . ku thandu diê-phe anga ahatu a akua matumbu a mu tesa kituxi.” (Nehemiia 13:23-26) Jihova uejiia kuila, o milongi iê iala ni valolo iavulu phala etu, mukonda dia kiki, muéne u tendelesa o Jikidistá joso ku kazala ngó mua Ngana. (Jisálamu 19:7-10; Izaia 48:17, 18) Tu mu sakidila kiavulu, mukonda dia ku tu bhana milongi ia henda i tu bhangesa ku di tunda kiambote ku muenhu. Kioso ki tu belesela Jihova kala Ngana ietu, tu xikina kuila muéne ngó ua tokala ku tu tumina ku muenhu.​—Jisabhu 1:5.

Mu kidi, eie ku mesena ku di ta mu “kikalakalu kimoxi ni iá a kambe kuxikana,” ki lombolola kuila, muthu ka bheza Jihova. O muthu iú u tena ku u fidisa ku bheza Nzambi. (2 Kolindo 6:14) O itendelesu ia Nzambi, iala ni valolo ia dikota, Jikidistá javulu lelu a solo ni unjimu phala ku belesela Jihova. Maji saí iá, a solo kiéngi.

Saí phang’ietu ia muhatu mu ixi ia Austrália, a mu ixana Maggy, ua mateka ku di tangesa ni muthu kexile Kidistá ia kidi. * (Tala ku luiji.) Muéne uambe: “Nga kexile mu fonga kiavulu mu iônge, phala ku kala ngó ni muéne. Nga zozele kiavulu mu nzumbi.” Kilumba kiéngi ué ku ixi ia Índia a mu ixana Ratana, ua kexile saí ia koleka iê, ua matekene ku di longa o Bibidia. O diiala didi, ua kexile mu di longa ngó o Bibidia mukonda ua mesenene ku kala ni muéne. Mu ku bhita thembu, Ratana ua xisa o kilunga kia Jihova, iú ua bokona mu ngeleja iê, mukonda ua mesenene ku kazala ni muéne.

Ndenguè, ua tungu mu ixi ia Camarões, ua kexile ni 19 a mivu, kioso kia kazala ni diiala ka mu sidivila Jihova. Ande dia ku kazala, muéne ua mu kanene kuila, ueji mu ehela ku kala Mbangi ia Jihova. Maji, mu ku bhita semana jiiadi, muéne ua mu tangela kuila, ka tokalele kuia dingi mu iônge mu kilunga. Muéne uambe: “Nga kexile mu divua ubheka uami ni ku dila kiavulu. Nga mono kuila, ki nga kexile dingi mu kuenda kiambote. Izuua ioso nga kexile mu diela.”

Kidi kuila, saí Jikidistá a kazala ni athu sumbala ka bheza Jihova maji a a zolo a di bhana kiambote ni ene. Maji né muene se kaza diê ka sidivila Jihova ua ku zolo, kiebhi kieji kala o ukamba ué ni Jihova? Kiebhi ki ueji divua mu kuijiia kuila, eie ku kaiela o milongi ia ku bhana muéne phala ku zediua? O kima kia beta dingi kota, kiebhi Jihova kieji divua mukonda dia ima i ua bhange?​—Jisabhu 1:33.

O jiphange ja maiala ni ja ahatu ku mundu uoso, a belesela o kitumu kia Jihova kia ku kazala ‘ngó mua ngana’ kala ni phata, ejiia kuila a solo kiambote ku muenhu. O jiphange ja maiala ni ja ahatu, akudi, a mesena ku sangulukisa Jihova mu ku kazala ngó ni ió a mu bheza. Michiko, phang’ietu ia muhatu ua tungu ku ixi ia Japão, ua mesenene ku belesela Nzambi, sumbala o jindandu jê ja kexile mu mu jijidika ku kazala ni muthu ka zolo Jihova. Kia mu bhonzele ku mona o jiphange jengi ku kazala ni Jikidistá ja kidi, maji muéne kana. Muéne uambe: “Nga kexile mu banza mu diami kuila, se Jihova ‘Nzambi ua sanguluka,’ kiki kilombolola kuila o muthu né muene se ka kazala, u tena ué ku sanguluka. Ngejiia ué kuila, muéne u tu bhana o ima i tua bhindamena. Mu kiki, se ki tu tena hanji ku sanga muthu phala ku kazala nê, kima kiambote ku kala hanji dikudi.” (1 Timote 1:11) Mu ku bhita thembu, Michiko ua kazala ni phange muthu uambote, muéne ua sanguluka kiavulu mukonda ua kaiela o kitendelesu kia Jihova.

Saí ué jiphange jetu ja mala, a kingila ku sanga muthu uambote phala ku kazala. Mu kifika, Bill, ku ixi ia Austrália, u zuela kuila, saí ithangana muéne ua kexile mu uabhela o ahatu kexile Jimbangi ja Jihova. Maji, muéne ka kuata ukamba ua dikota ni ahatu enhá mba ku a tangesa, mukonda ka mesenene ku di ta mu “kikalakalu kimoxi ni iá a kambe kuxikana.” Mu ku bhita thembu, ua mateka ku uabhela jiphange ja ahatu mu kilunga, maji ene ka mesenene kima ni muéne. Bill ua kingila 30 a mivu phala ku sanga muhatu Kidistá, ua kexile mu suua jimbambe kala ja muéne. Muéne uambe: “Ki ngene mu diela. Nga zediua, mukonda tuene mu boka kumoxi, ni ku di longa kumoxi ni ku bheza kumoxi. Nga sanguluka mu  ku di bhana kiambote ni makamba a kaza diami, mukonda ene abhezi a Jihova. Tuene mu kolesa o ukaza uetu bhu kaxi ka milongi ia Bibidia.”

Ihi i u tena ku bhanga, kioso ki uia ni ku dielela mu kitendelesu kia Jihova ni ku kingila ku sanga diiala mba muhatu u sidivila Jihova? Eie nange u tena ku banza se mukonda diahi ku kazala luua. Se ua mu bhanga kiki mukonda ua mesena ku belesela o kitumu kia Jihova, ejiia kuila kiki ki sangulukisa kiavulu Jihova. (1 Samuuele 15:22; Jisabhu 27:11) Samba izuua ioso kua Jihova, ni ku mu tangela kiebhi ki uene mu divua. (Jisálamu 62:8) Se u kolokota mu ku bhanga ioso phala ku di bhana kiambote ni ji tendasá, ni ku bhânga ni jihanji ja iibha, ua-nda kolesa dingi o ukamba ué ni Jihova. U tena kuijiia kuila, Jihova u suua o jihanji jê ni ibhindamu iê, mukonda bhu pholo ia muéne, eie uala ni valolo ia dikota. Muéne ka kanena diala mba muhatu ku muthu uoso uoso. Maji, se eie ua mesena ku kazala, Jihova uejiia o ukexilu uambote ua ku u kuatekesa mu maka enhá.​—Jisálamu 145:16; Matesu 6:32.

Saí bhabha, eie u tena ku divua kala Davidi, uambele: “Endelá-ku, Ngana, mu ku ng’itaia, kuma o nzumbi iami ia botomoka; kana ku ngi suekela o pholo ié.” (Jisálamu 143:5-7, 10) Kana ku bhuila. Bhana kithangana kua Jihova phala ku u londekesa se ihi i ua tokala o ku bhanga. Ivua Jihova, mu ku tanga o Bibidia ni ku xinganeka kiambote mu ima i u tanga. Ku bhanga kiki, kua-nda ku kuatekesa kuijiia ihi ia mesena Jihova phala eie, ni kuijiia kiebhi muene kia kuatekesa o jiselevende jê m’ukulu. Se u muivua, ua-nda mu dielela ni ku mu belesela izuua ioso.

Ihi i u tena dingi ku bhanga phala ku sanguluka ku muenhu, sumbala u dikudi hanji? Eie u tena ku di suínisa dingi phala ku kolesa o ukamba ué ni Jihova, ni ku kala ni ukexilu uambote. U tena ué ku bhanga ioso phala ku kala ni ídifua iambote kala o ku uabhela o ku bhana, ku kala mukalakadi uambote, muthu ka bhonzo ku di bhana nê, ni ku kala fiiele kua Jihova. O ídifua íii, ia bhingi phala muthu ku kala ni ukaza ua zediua. (Dimatekenu 24:16-21; Lute 1:16, 17; 2:6, 7, 11; Jisabhu 31:10-27) Dianga ku sota o Utuminu, mu ku kalakala ni ku suína kuoso mu kikalakalu kia ku boka, ni mu kilunga ki ua tokala. O ima íii, ia-nda ku kuatekesa ku sola ni unjimu. Bill, uexile dikudi ku mivu iavulu uambe: “O mivu íii ia bhiti ni lusolo! Eme nga kexile mu kalakala phala Jihova kala muboki ua thembu ioso.”

O kitumu kia Jihova kia lungu ni ku kazala ‘ngó mua Ngana’ kiala hanji ni valolo ia dikota. Se tu sola ku kazala ngó ni muthu Kidistá ia kidi, tua-nda xila Jihova, tua-nda zediua. O Bibidia i zuela: “Ua lungu o muthu ió uene ni uoma ua Jihova, ua bhindamena kuijiia kiambote o ijila iê. M’onzo iê mu kala kubhanduluka, mu kala jimbongo; o kuiuka kuê kuemana kua di fikidila muene katé ku hádia.” (Jisálamu 112:1, 3) Mu kiki, kolokota ku belesela o kitumu kia Nzambi kia ku kazala ‘ngó mua Ngana.’