1, 2. (a) Kifika kiahi kia te Jezú phala o makamba mê? (Tala o foto ia dianga.) (b) Ihi i tua tokala kuijiia ia lungu ni kifika kia jimbudi ni jihombo?

JEZÚ ua kexile mu zuela ni makamba mê a kazola, ia lungu ni kima kia dikota! O makamba iâ exile Phetele, Mandele, Tiiaku, ni Nzuá. Kioso kia zubha kua tela o ifika ia lungu ni kimbadi kia fiiele, ni kuinhi dia ilumba, ni jitalendu, Jezú ua te kifika kia mukuá. Mu kifika kiki, muéne ua zuela ia lungu ni kithangana kia-nda kuíza o “Mon’a Muthu,” phala ku fundisa “akua jixi joso.” Muéne ua zuela kuila, o “Mon’a Muthu” ua-nda uanuna o athu mu ibuka iiadi, kibuka kimoxi kia jimbudi, o kia mukuá kia jihombo. Muéne ua tumbula ué kibuka kia katatu, o kibuka kia “jiphange” ja Sobha.​—Tanga Matesu 25:31-46.

² Kála kia bhangele o jipoxolo, o jiselevende ja Jihova lelu, a bhana ué valolo ku kifika kiki, mukonda ki tena  ku lombolola muenhu mba kufua phala o athu. Jezú ua zuela kuila, saí athu a-nda tambula o muenhu ua kalela-ku, maji a mukuá a-nda ku a buika. Mukonda dia kiki, kima kiambote kuijiia ihi ilombolola o kifika kiki, ni kuijiia ihi i tua tokala ku bhanga phala ku tambula o muenhu ua kalela-ku. Mu milongi íii, tua-nda tambuijila o ibhuidisu íii: Kiebhi Jihova kia tu kuatekesa ku tendela kiambote o kifika? Kiebhi ki tu tena kuijiia kuila, o kifika ki zuela ia lungu ni sidivisu ia ku boka? Nanhi ua tokala o ku boka? Mukonda diahi o athu a tokala kulondekesa o ufiiele uâ ‘kua Sobha’ ni “jiphange” jê?

3, 4. (a) Ihi i tua tokala kuijiia phala ku tendela o kifika kiki? (b) Kiebhi O Mulangidi ua jimbulula o kifika kiki ku muvu ua 1881?

³ Phala kuijiia ihi ilombolola o kifika kia lungu ni jimbudi ni jihombo, tua tokala kuijiia (1) nanhi o “Mon’a Muthu,” mba o ‘Sobha,’ a nanhi o jimbudi ni jihombo, a nanhi o “jiphange” ja Sobha? (2) thembu kuxi kia-nda kuíza o “Mon’a Muthu,”phala ku tungula o jimbudi mu jihombo? ni (3) mukonda diahi saí iâ a exana jimbudi, a mukuá a exana jihombo?

⁴ Ku muvu ua 1881, O Mulangidi ua zuela kuila, o “Mon’a Muthu,” mba o ‘Sobha,’ Jezú. O milongi ia jimbulula ué kuila, o “jiphange” ja Sobha, ki ió ngó a-nda tumina kumoxi ni Jezú ku diulu, maji katé muene ni athu a iuka a-nda tunga mu ixi. O Mulangidi ua zuela dingi kuila, o athu eji ku a tungula mu kithangana kia Utuminu ua Kristu ua Midi ia Mivu, ni ku kaiela o phangu ia henda ia Nzambi mu ukexilu uoso, ene eji ku a exana jimbudi.

5. Tundé ku muvu ua 1923, kiebhi o mundu ua Nzambi uene mu tendela o kifika kia jimbudi ni jihombo?

⁵ Mu ku bhita kithangana, Jihova ua kuatekesa o mundu ué ku tendela kiambote o kifika kiki. A Sentinela de 15 de outubro de 1923 (em inglês), ua zuela kuila, o “Mon’a Muthu,” Jezú. Maji mu ku suluka, ua jimbulula bhu kaxi ka jivelusu ja Bibidia kuila, mu kifika kiki, o athu a-nda tumina kumoxi ni Jezú ku diulu, ene ngó o “jiphange” jê, ni kuila, ene eji kala ku diulu mu Utuminu ua Midi ia Mivu. O milongi ia jimbulula ué kuila, o jimbudi, o athu a-nda tunga mu ixi, kioso kia-nda tumina Jezú ni jiphange jê. Mukonda o kifika ki zuela kuila o athu iá a-nda kuatekesa o jiphange ja Sobha, kioso kia-nda tungula o athu, o jiphange ja Jezú a a undu a-nda kala hanji mu ixi, ni kuila, o ku tungula kuku, a-nda ku u bhanga ande dia ku mateka o Utuminu ua Midi ia Mivu. O milongi ia jimbulula dingi kuila, o jimbudi, o athu a xikina kua Jezú, a xikina ué kuila, o Utuminu ua Nzambi ua-nda bheka o muenhu ua iuka.

6. Kiebhi ki tua tendela o kifika kia jimbudi ni jihombo, ku muvu ua 1995?

⁶ Ku mivu iavulu tua kexile mu banza kuila, o athu a a tungula bhu kaxi ka sidivisu ia ku boka, mu izuua íii i sukidila-ku. Se a xikina o njimbu i tu a tudila, a londekesa kuila jimbudi, maji se a dituna o njimbu, a londekesa kuila jihombo. Maji ku muvu ua 1995, tua tendela o kifika kiki mu ukexilu uéngi. O Mulangidi ua sokesa o divulu dia Matesu 24:29-31 (tanga), ni divulu dia Matesu 25:31, 32 (tanga), anga ua  jimbulula kuila, Jezú ua-nda tungula o athu mu kithangana kia hadi ia dikota, kioso kia-nda kuíza o Mon’a muthu “ni ungana uê.” *​—Tala ku luiji.

7. Ihi ilombolola o kifika kiki?

⁷ Lelu, tua mu tendela kiambote o kifika kia jimbudi ni jihombo. Tuejiia kuila, o “Mon’a Muthu,” mba o ‘Sobha,’ Jezú. O “jiphange” ja Sobha, o athu a a undu ni nzumbi ikola a-nda tumina kumoxi ni Jezú ku diulu. (Loma 8:16, 17) O “jimbudi” ni “jihombo,” o athu akua jixi joso. A-nda ku a tungula ku disukilu dia hadi ia dikota, kua kambe ngó bhofele phala ku mateka. Tuejiia kuila , phala ku tungula o athu, Jezú ua-nda tonginina kiebhi o athu kia talatala o Jikidistá a a undu, a-nda kala hanji mu ixi mu kithangana kieniókio. Tu sakidila kiavulu Jihova, mu ku tu kuatekesa ku tendela kiambote o kifika kiki, ni ifika ia mukuá mu divulu dia Matesu mu kibatulu 24 ni 25, mu mivu ioso íii!

8, 9. Mukonda diahi Jezú ua zuela kuila, o athu a a tungula kala jimbudi, athu a ‘iuka?’

⁸ Jezú ka tumbula o izuelu “ku boka” ni “sidivisu ia ku boka,” mu kifika kia jimbudi ni jihombo.” Kiebhi ki tuejiia kuila, o kifika ki tu longa kuila, o sidivisu ia ku boka iala ni valolo ia dikota?

⁹ Phala kuijiia o kitambuijilu, tua tokala ku lembalala kuila, Jezú ua kexile mu longa disá bhu kaxi ka kifika. Muéne ka kexile mu zuela ia lungu ni jimbudi ni jihombo ja kidi. Mu kiki, muéne ka kexile mu zuela kuila, kala muthu a mu tungula kala mbudi, ua tokala ku bhana kúdia ni izuatu ku Jikidistá a a undu, ku a tambula konda kioso kia kata, mba kuia mu a kunda mu kaleia. Jezú ua lombolola o jimbudi kála athu a ‘iuka,’ mukonda ene a mona o Jikidistá a a undu kála jiphange ja Jezú, ni kuila ene a londekesa o ufiiele uâ ku Jikidistá a a undu mu izuua íii isukidila-ku, ia bhonzo.​—Matesu 10:40-42; 25:40, 46; 2 Timote 3:1-5.

10. Kiebhi o jimbudi kia tena ku kuatekesa o jiphange ja Kristu?

¹⁰ Kioso Jezú kia te o kifika kia jimbudi ni jihombo, muéne ua kexile kia mu zuela ia lungu ni ima ieji bhita mu izuua isukidila-ku. (Matesu 24:3) Mu kifika, muéne ua zuela: “O Njimbu íii Iambote ia Utuminu ua Nzambi, ia bhingi ku i tula mu ngongo ioso.” (Matesu 24:14) Mu ku suluka, ande dia ku ta o kifika kia jimbudi ni jihombo, muéne ua te o kifika kia jitalendu. Jezú ua te o kifika kiki, phala ku longa o Jikidistá a a undu kuila, a tokala ku kalakala  ni ku suína kuoso. Maji o Jikidistá a a undu a xala mu ixi a tolo, o kikalakalu kiavulu! O Jikidistá a a undu a a tumina ku boka ku “akua jixi joso,” ande dia kuíza o dizubhilu. Kala ki tua di longo mu kifika kia jimbudi ni jihombo, o “jimbudi” a kuatekesa o jiphange ja Jezú. O ukexilu ua beta kota ua ku bhanga kiki, o ku kuatekesa o jiphange ja Jezú mu sidivisu ia ku boka. Maji o kuila ene a tokala ngó ku a kuatekesa ni kitadi mba ku a suínisa ku bhanga o kikalakalu kia ku boka?

11. Nange ihi ibhula o athu a mukuá ni mukonda diahi?

¹¹ Lelu, kuene dinake dia mazunda a maxibulu a Jezú, avulu mudiâ ki Jikidistá a a undu. Jezú ka a bhana o jitalendu. Muéne ua bhana o jitalendu ku jiphange jê a a undu. (Matesu 25:14-18) Mu kiki, nange saí athu ebhula: ‘Se Jezú ka a bhana o jitalendu, o kuila ene a tokala muene ku boka?’ A tokala. Tu mone se mukonda diahi ene a tokala ku boka.

12. Ihi i tu di longa mu izuelu ia Jezú i tu sanga mu divulu dia Matesu 28:19, 20?

¹² Jezú ua tumina o maxibulu mê oso ku boka. Kioso Jezú kia mu fukununa, muéne ua tumina o maxibulu mê ku bhanga “jixibulu” ni ku a longa o “ima ioso” ia a tumine. Mu kiki, o maxibulu iá, a tokalele ku belesela o kitumu kia Jezú kia ku boka. (Tanga Matesu 28:19, 20.) Sé phata, etu enioso tua tokala ku boka, ki kale se tua kingila kuia ku diulu, mba ku tunga mu ixi.​—Ikalakalu 10:42.

13. Ihi i tu di longa mu kisuma kia mono Nzuá?

¹³ O divulu dia Dijingunuinu di longa kuila, o sidivisu ia ku boka eji ku i bhanga ku Jikidistá a a undu, ni athu a mukuá. Jezú ua londekesa kua poxolo Nzuá, kisuma kia lungu ni “dibhanga” uixana o athu, phala kúnua o menha a muenhu. O dibhanga, di lombolola o 144.000 a Jikidistá a a undu, a-nda tumina kumoxi ni Jezú ku diulu. (Dijingunuinu 14:1, 3; 22:17) O menha, a lombolola o sata ia kukula kua Jezú, ia-nda bhulula o athu ku kituxi ni kalunga. (Matesu 20:28; Nzuá 3:16; 1 Nzuá 4:9, 10) O Jikidistá a a undu, a bokela o athu ni ku suína kuoso, ia lungu ni kiebhi kia tena ku katula mbote mu sata ia kukula kua Jezú. (1 Kolindo 1:23) Maji o kisuma ki zuela ué ia lungu ni kibuka kia athu, ki Jikidistá a a undu, ala ni kidielelu kia ku tunga mu ixi. Ene a a tumina ué kuixana o athu mu kuzuela: “Izá!” Ene a belesela o kitumu kiki, mu ku longa o njimbu iambote ku akuâ. Mu kiki, o kisuma kiki kilondekesa kuila, o athu oso a xikina o njimbu iambote, a tokala ku i tudila ué akuâ.

14. Kiebhi ki tu tena ku belesela “o Kitumu kia Kristu?”

¹⁴ Oso a belesela “o Kitumu kia Kristu,” a tokala ku boka. (Ngalásia 6:2) Jihova u kingila kuila, oso a mu bheza, a belesela o itumu íii. M’ukulu, Jihova ua mesenene kuila, o akua Izalaiele ni asonhi a tungile bhu kaxi kâ, a belesela o itumu iê. (Makatukilu 12:49; Ijila 24:22) Mu kidi, lelu ki tu  bhingi ku belesela o itumu ioso ia bhanene ku akua Izalaiele. Maji, ki kale se a tu undu mba kana, tua tokala ku belesela “o Kitumu kia Kristu.” O kima kia beta-o-kota kia tu longo Jezú, o ku zola. (Nzuá 13:35; Tiiaku 2:8) Tua tokala ku zola Jihova, ni Jezú, ni athu oso. O ukexilu ua beta-o-kota ua ku londekesa o henda íii, o ku tula o njimbu iambote ia Utuminu ku athu.​—Nzuá 15:10; Ikalakalu 1:8.

15. Mukonda diahi tu tena ku zuela kuila, Jezú ua tumina o maxibulu mê oso ku boka?

¹⁵ O ima ia zuela Jezú ku maxibulu exile kumoxi ni muéne, saí ithangana, ia tokala ué ku maxibulu mê oso. Mu kifika, Jezú ua bhange kikutu ni 11 a maxibulu mê, iú ua a kanena ku tumina kumoxi ni muéne mu Utuminu uê. Maji o athu a-nda tumina kumoxi ni muéne, a tenesa 144.000. (Luka 22:29, 30; Dijingunuinu 5:10; 7:4-8) Kioso Jezú kia mu fukununa, maxibulu ofele ngó, evu o kitumu kiê kia ku boka. (Ikalakalu 10:40-42; 1 Kolindo 15:6) Maji o maxibulu oso a Jezú ku hama ia dianga, a belesela o kitumu kiki. (Ikalakalu 8:4; 1 Phetele 1:8) Lelu, tuejiia ué kuila, tua tokala ku boka, sumbala ki tuevu Jezú ku tumina ku bhanga o kikalakalu kiki. Mu kidi, kua kambe ngó bhofele phala ku tenesa dinake dia mazunda a athu a mu bhanga o kikalakalu kiki. Tuejiia kuila, kioso ki tu bhanga o sidivisu ia ku boka, tua mu londekesa o kixikanu kietu kua Jezú. —Tiiaku 2:18.

16-18. Kiebhi ki tu tena ku kuatekesa o jiphange ja Kristu ni ufiiele uoso, ni mukonda diahi tua tokala ku londekesa o ufiiele uetu kindala?

¹⁶ Satanaji ua bandekesa dingi o nguzu iê mu ku bhânga ni jiphange ja Kristu a a undu, ala hanji mu ixi, mukonda muéne uejiia kuila, “o thembu iê ia butu kia.” (Dijingunuinu 12:9, 12, 17) Sumbala ni izukutisu ia Satanaji, o Jikidistá a a undu a mu kuendesa o kikalakalu kia ku boka. Athu avulu a mu kuívua o njimbu iambote, m’ukulu ndenge. Sé phata, Jezú uala kumoxi ni Jikidistá a a undu, ua mu a endesa.​—Matesu 28:20.

¹⁷ Tu mona kuila, ujitu ua dikota ku kuatekesa o jiphange ja Kristu mu sidivisu ia ku boka. Tu a kuatekesa ué mu ku bhana kitadi mu vondadi ietu, phala ku kuatekesa o kikalakalu, ni ku kalakala ni ku suína kuoso mu ku tunga Ididi ia Ubhezelu, Ididi Phala o Iônge ia Makota, ni ji filiiale. Kioso ki tu belesela o tufunga, ni jiphange ja mukuá a a solo ku ‘kimbadi kia fiiele,’ tu londekesa kuila, tua mesena ku kuatekesa o jiphange ja Kristu.​—Matesu 24:45-47; Jihebeleu 13:17.

¹⁸ Kua kambe ngó, o Jikidistá a a undu a xala hanji mu ixi, a-nda tambula o kidimbu kia suku-ko. Mu ku suluka, o ji-anju ja-nda kueha o “itembu iuana ia’ixi,” mu kiki, o hadi ia dikota ia-nda mateka. (Dijingunuinu 7:1-3) Ande dia ku mateka o Alumajedone, Jezú ua-nda kuambata o Jikidistá a a undu ku diulu. (Matesu 13:41-43) Mu kiki, se tua mesena ku tu sola kala jimbudi, kioso kia-nda kuíza Jezú, kiki kiene o kithangana kia ku londekesa o ufiiele uetu ku jiphange ja Kristu.