1-3. Mukonda diahi Phaulu ua dielele kua Jihova? (Tala o foto ia dianga.)

SE EIE uexile Kidistá mu ixi ia Loma ku hama ia dianga, ueji di bhana ni izukutisu iavulu. O akua Loma akexile mu zukutisa kiavulu o Jikidistá. Akua Loma akexile mu tatela o Jikidistá kuila, ene a matekene ni ita mu ixi ia Loma, ni kuila, ene ka zolele o athu. Saí jiphange javulu ja maiala ni ja ahatu, a a tele mu kaleia. A mukuá a a jibhile ku iama. A mukuá a a phaphele ku mixi ni kua jokota mu usuku, né muene se akexile hanji ku muenhu. Izuua ioso eie ueji kingila o ima íii, ku bhita ué n’eie.

² Mu thembu íii ia bhonzo, poxolo Phaulu a mu tele mu kaleia. Nange muéne ua dibhuidisa, se o jiphange jê Jikidistá eji mu kuatekesa, kioso kia lembalala o ibhidi ia bhitile na-iu sé ku tambula kikuatekesu. Maji Phaulu ua tambuile o kikuatekesu kia Jihova, bhu kaxi ka Ngana Jezú. Muéne uambe: “Ngana ua ng’imanena, ua ngi bhana nguzu.” Jezú ua bhana kua Phaulu, o nguzu ia bhingile muéne. Phaulu uambe  kuma, a mu “kudila mu kanu dia hoji.”​—2 Timote 4:16, 17. * (Tala ku luiji.)

³ Phaulu ua di lembalala kiebhi Jihova kia mu kuatekesele. Mu kiki, muéne uejidile kuila, Jihova ueji mu bhana o nguzu ia bhindamene phala ku kolokota mu izukutisu ia kexile mu bhita na-iu, ni mu izukutisu ieji kuíza ku pholo. Muéne ua dielele ni muxima uoso, mukonda dia kiki, muéne ua soneka: ‘Ngana ua-nda ngi kudila ku phulu ioso iambe ku ngi bhanga.’ (2 Timote 4:18) Phaulu ua di longo kuila, né muene se o jiphange jê ka tena ku mu kuatekesa kioso kia di bhana ni ibhidi, muéne u tena ku dielela mu kikuatekesu kia Jihova ni Jezú, mu ithangana ioso. Muéne kexile ni phata.

4, 5. (a) Nanhi u tena ku ku kuatekesa mu ithangana ioso? (b) Kiebhi ki u tena ku suínisa o ukamba uê ni Jihova?

⁴ O kuila eie ua bhitile kiá ni ibhidi ia ku bhangesa ku divua ubheka uê, sé ku kala muthu phala ku ku kuatekesa? Nange a ku kaie ku salu mba a kexile ku ku zukutisa bhu xikola. Nange eie ua katele mba ua kexile mu di bhana ni ibhidi iavulu. Nange eie ua bhingi kikuatekesu ku athu engi, maji ua divu kia iibha, mukonda ene ka ku bhana o kikuatekesu ki ua bhindamene. Mu kidi, saí ibhidi, o athu ka tena ku i batula. Ihi i ua tokala o ku bhanga? O Bibidia i tu suínisa ku “dielela kua Jihova.” (Jisabhu 3:5, 6) Maji o kuila, eie u tena ku dielela mu kikuatekesu kiê? U tena ku dielela! Tu tena ku di longa phangu javulu mu Bibidia ji londekesa kuila, Jihova u kuatekesa o mundu uê.

⁵ Kana ku luuala, se o athu ka tena ku ku bhana o kikuatekesu ki ua bhindamena. Mu veji dia kiki, kaiela o phangu ia Phaulu, mu ku mona o kizukutisu kala kithangana kia fuama phala ku dielela kua Jihova ni muxima uoso. Kiki kithangana kiambote phala ku mona ni mesu mê, kiebhi muéne kia ku langa. Mu ku bhanga kiki, eie ua-nda dielela dingi kua Jihova, o ukamba uê ni muéne ua-nda suína dingi.

6. Mukonda diahi ki bhonza ku dielela kua Jihova, kioso ki tu di bhana ni ibhidi?

⁶ Eie nange ua mu di bhana ni ibhidi i ku bhangesa ku divua kia iibha. Nange eie ua bhange ioso i ua tokalele o ku bhanga, iú ua sambe kua Jihova mu ku bhinga o kikuatekesu kiê. O kuila u tena ku tululuka dingi mukonda dia ku dielela mu kikuatekesu kia Jihova? Kiene, u tena ku tululuka! (Tanga Jisálamu 62:8; 1 Phetele 5:7.) Se ua mesena ku kala ni ukamba uambote ni Jihova, o kima kia beta kota ki ua tokala o ku bhanga, o ku mu dielela ni muxima uoso. Maji saí ithangana ki bhonza ku bhanga  kiki. Mukonda diahi? Mukonda, nange Jihova ka tambuijila o musambu uê ni lusolo.​—Jisálamu 13:1, 2; 74:10; 89:46; 90:13; Habakuke 1:2.

7. Mukonda diahi saí ithangana Jihova ka tambuijila o misambu ietu ni lusolo?

⁷ Mukonda diahi saí ithangana Jihova ka tambuijila o misambu ietu ni lusolo? O Bibidia i zuela kuila Jihova Tat’etu, ni kuila, etu tu an’ê. (Jisálamu 103:13) O tata ka bhana kua mon’ê o ima ioso ia mu bhinga, muéne ka bhana o ima ioso ni lusolo. O tata uejiia kuila, o mona nange u mesena kima, maji mu ku bhita kithangana ka ki mesena dingi. O tata uejiia ué o ima iambote phala o mona, uejiia kiebhi kia-nda divua akuâ. Muéne uejiia o ima ia bhindamena o mona, ni kithangana kia tokala phala ku mu bhana. Se o tata u bhana ni lusolo o ima ioso i mu bhinga o mona, o tata u kituka mubhika ua mona. Jihova, o Tata ietu ia diulu, ua tu zolo. Mukonda muéne o Mubhangi uetu, muéne uejiia o ima i tua bhindamena, mu kiki muéne u mona o kithangana kia tokala, phala ku tu bhana o kima ki tua bhingi. Kima kiambote ku kingila ni ku mona kiebhi Jihova kia tambuijila o misambu ietu.​—Sokesa ni Izaia 29:16; 45:9.

8. Ihi i tu kanena Jihova mu ku di bhana ni ibhidi?

⁸ Lembalala ué kuila, Jihova uejiia kiambote o ibhidi i tu tena ku tolola ni ibhidi i tena ku tu tolola. (Jisálamu 103:14) Mukonda dia kiki, muéne u tu bhana o nguzu i tu bhindamena. Mu kidi, saí ithangana tu mona kuila, tua-nda bhuila. Maji Jihova u kanena kuila, se o kizukutisu ki tena ku tu bhangesa ku bhuila, muéne ua-nda tu bhana “ditundilu dia kutena kubhita.” (Tanga 1 Kolindo 10:13.) Kima kiambote kuijiia kuila, Jihova uejiia bhuoso bhua suku o nguzu ietu.

9. Ihi i tua tokala o ku bhanga se tu samba kua Jihova, maji muéne ka tu tambuijila ni lusolo?

⁹ Se tua sambe kua Jihova ni ku bhinga o kikuatekesu kiê, anga muéne ka tambuijila ni lusolo, tua tokala ku kala ni muanhu. Lembalala kuila, Jihova ua mesena ku tu kuatekesa, maji muéne u kingila ni muanhu, o kithangana kia tokala, phala ku suua o ibhindamu ietu. O Bibidia i tu tangela: ‘Kiene-phe kia-nda ku kingila Jihova ku mi kuatela henda; kiene kia-nda ku mi zangumuina phala ku mi lendukila, mukonda Jihova muéne Nzambi ia kutetuluka; a zediua oso a kinga kua muéne.’​—Izaia 30:18.

10-12. (a) Ihi i bhonzesa kioso ki tu langa ndandu ua kate? (b) Kioso ki u dielela kua Jihova mu ithangana ia bhonzo, kiebhi ki kala o ukamba uê ni muéne? Bhana phangu.

¹⁰ O ibhidi iê i tena ku bhonza kiavulu kala kia bhitile ni Phaulu, ua divu kuila, a tokalele ku mu bhulula “mu kanu dia hoji.” (2 Timote 4:17) Mu ithangana íii, kima kiambote ku dielela kua Jihova. Mu kifika, nange eie ua mu langa ndandu iê ua kate.  Eie ua sambe kua Jihova, phala ku ku kuatekesa ku sola o ima ni unjimu, ni ku kolokota. * (Tala ku luiji.) Eie u tena ku divuua kiambote, kioso ki u di lembalala kuila, Jihova uejiia o ima i ua mu bhita na-iu. Muéne ua-nda ku bhana nguzu phala ku kolokota ni ku mu kala fiiele.​—Jisálamu 32:8.

¹¹ Saí ithangana, nange u mona kuma Jihova ka mu ku kuatekesa. Nange o ji dotolo ka xikina ku bhanga o ima kala ki ua mesena. Mba nange ua kexile mu kingila kuila o jindandu jê a ku kuatekesa, maji mu veji dia kiki, ene a bandekesa dingi o maka. Dielela kua Jihova phala ku ku suínisa. Kolokota ku zukama kua muéne. (Tanga 1 Samuuele 30:3, 6.) Kioso ki ua-nda mona kiebhi Jihova kia ku kuatekesa, o ukamba ué ni muéne ua-nda suína dingi.

¹² Kiene kia divu Linda. * (Tala ku luiji.) Muéne ua kexile mu langa o jitata jê akexile mu kata. Muéne uambe: “Kioso ki tua kexile ni maka enhá, eme ni muadi uami, ni phang’iami, ki tuejidile ihi i tua tokalele o ku bhanga. Saí ithangana tua kexile mu divua ubheka. Maji kioso ki tua xinganeka mu ima ia bhitile, tua mono kuila, Jihova ua tu kuatekesa. Muéne ua tu suínisa, ni ku tu bhana o ima i tua bhindamene, né muene mu ithangana ia bhonzo.”

13. Kiebhi o ku dielela kua Jihova kua kuatekesa Rhonda ku di bhana ni mavuua?

¹³ O ku dielela kua Jihova ni muxima uoso, ku tu bhangesa ku di bhana kiambote ni mavuua. Kiki kiene kia bhiti ni Rhonda. O munumi’ê kexile Mbangi ia Jihova, ua mu senge. Mu thembu ienioió, phangi’ê ua kuata uhaxi ua bhonzo, a uixana lupus. Mu ku bhita jimbeji, o muhatu ua phangi’ê uafu. Mu ku bhita thembu, kia bhiti o ima íii, Rhonda ua mateka ku kalakala kala muboki ua thembu ioso. Maji mu thembu ienioió, manhi’â uafu. Ihi ia kuatekesa Rhonda ku di bhana ni ibhidi íii? Muéne uambe: “Nga kexile mu zuela ni Jihova izuua ioso, né muéne mu ima iofele. O ku bhanga kiki, kua ngi kuatekesa ku mona Jihova kala muthu ua kidi. Kiki kia ngi longo ku dielela kua muéne, mu veji dia ku dielela mu kilunji kiami, mba ku athu a mukuá. Muéne ua ngi bhana o kikuatekesu kia tokala, ua suu o ibhindamu iami ioso. Mukonda dia kiki, ngi mona kuila, nga kalakala kumoxi ni Jihova.”

14. Kiebhi Jihova kia tena ku ku kuatekesa, se ndandu iê a mu kaia mu kilunga?

¹⁴ Xinganeka mu kibhidi kiéngi. Nange ndandu iê a mu kaie mu kilunga. Eie uejiia o milongi ia Bibidia ia lungu ni kiebhi ki ua tokala ku di bhana ni athu a a kaie mu kilunga. (1 Kolindo 5:11; 2 Nzuá 10) Maji, mukonda dia ku zola kiavulu o muthu a mu kaie, nange u mona kuila, ki bhonza ku belesela o kitumu kia Bibidia. O kuila ua-nda dielela kuila, o Tat’ê ia diulu ua-nda  ku bhana nguzu phala ku belesela o kitumu kiê ni ufiiele uoso? O kuila ua-nda mona o kibhidi kiki, kala kithangana kia ku zukama dingi kua Jihova?

15. Mukonda diahi Adá ua xibhakele Jihova?

¹⁵ Kiebhi ki tu tena ku sokesa o maka enhá ni diiala dia dianga, Adá? O kuila muéne ua xikina kuila, mu ku xibhaka Jihova, ueji kolokota ku muenhu? Kana, Adá “ka mu nganalele.” (1 Timote 2:14) Mu kiki, mukonda diahi muéne ua xibhakele Jihova? Adá uadi o kibundu kia mu bhanene o muhatu’ê, mukonda muéne ua zolele dingi o muhatu’ê, Jihova ndenge. Mu veji dia ku belesela o kitumu kia Jihova, muéne uevu muhatu’ê.​—Dimatekenu 3:6, 17.

16. Nanhi u tua tokala ku mu zola dingi, ni mukonda diahi?

¹⁶ O kima kia solo Adá ki tu longa kuila, tua tokala ku zola dingi Jihova, athu a mukuá ndenge. (Tanga Matesu 22:37, 38.) Se tu zola Jihova ni muxima uoso, tua-nda tena ku kuatekesa o jindandu jetu mu ukexilu uambote, ki kale se a sidivila Jihova mba kana. Mu kiki, bhanga ioso phala ku bandekesa o henda iê kua Jihova, ni ku mu dielela dingi. Se ua thandanganha ni ndandu iê a mu kaie mu kilunga, samba kua Jihova ni ku mu tangela o ima ioso i ku thandanganhesa. * (Tala ku luiji.) (Loma 12:12; Filipe 4:6, 7) Né muene se uala ni ndolo iavulu, xinganeka mu kithangana kiki, kala kithangana kia ku kolesa o ukamba uê ni Jihova. Mu kiki, eie ua-nda tena ku mu dielela ni muxima uoso, ni kuijiia kuila, o ku mu belesela ku bhekela mabesá avulu.

17. Se tu kalakala ni ku suína kuoso, mu sidivisu ia ku boka, kidielelu kiahi ki tua-nda kala na-kiu kua Jihova?

¹⁷ Mukonda diahi Jihova ua bhulula Phaulu “mu kanu dia hoji?” Phaulu uambe: Phala “ngi tene kuzubha kubhana o Ngolokela.” (2 Timote 4:17) Jihova ua tu bhana ué o kikalakalu kia ku boka “o Njimbu Iambote,” muéne u zuela kuila, tu ‘akalakadi kumoxi ni muéne.’ (1 Tesalonika 2:4; 1 Kolindo 3:9) Se tu kalakala ni ku suína kuoso mu kikalakalu kiki, tu tena ku dielela kuila, Jihova ua-nda tu bhana o ima ioso i tua bhindamena. (Matesu 6:33) Mu kiki, ki kia-nda bhonza ku kingila Jihova ku tambuijila o misambu ietu.

18. Kiebhi ki u tena ku dielela kua Jihova ni ku kolesa o ukamba uê ni muéne?

¹⁸ Mu kiki, bhanga nguzu, phala ku kolesa o ukamba uê ni Jihova izuua ioso. Se ku moneka kizukutisu, anga u kala ni hele, xinganeka mu kizukutisu kala kithangana kia ku zukama dingi kua Jihova. Tanga, di longe ni ku xinganeka mu Mak’â Nzambi, o Bibidia. Kolokota mu ku samba kua Jihova ni ku bhanga dingi mu sidivisu iê. Se u bhanga o ima íii, u tena ku dielela ni kidi kioso kuila, Jihova ua-nda ku kuatekesa ku kolokota mu izukutisu ni ibhidi i moneka lelu, ni ia-nda moneka ku hádia.