1. Mukonda diahi tua tokala ku suínisa o ukamba uetu ni Jihova?

SE U Mbangi ia Jihova, eie uala ni ujitu ua dikota. Eie uala ni ukamba uambote ni Jihova. Maji o ukamba iú, a mu u zukutisa ku mundu ua Satanaji, o ukexilu uetu ua xitu u tena ué ku zozesa o ukamba iú. Mukonda dia kiki, etu enioso tua tokala ku suínisa o ukamba uetu ni Jihova.

2. (a) O ukamba ihi? (Tala ku luiji.) (b) Kiebhi ki tu tena ku suínisa o ukamba uetu ni Jihova?

² Mudiê, o kuila Jihova muthu ua kidi? O kuila muéne kamba diê? O kuila, ua mesena ku suínisa o ukamba uê ni muéne? O divulu dia Tiiaku 4:8, di ku tangela o kima ki ua tokala o ku bhanga: ‘Zukama kua Nzambi, muéne a ku zukame.’ Ki kale eie mba Jihova, mua tokala ku bhanga kima phala ku suínisa  o ukamba uenu. * (Tala ku luiji.) Se u di suínisa phala ku zukama kua Jihova, muéne ua-nda ku zukama ué. Se uia ni ku di suínisa, ua-nda mona kuila, Jihova muthu ua kidi, o ukamba uê ni muéne ua-nda suína, mu kiki, ua-nda divua kala Jezú uambe: ‘O Muthu ua ngi tumu, muthu ua kidi,’ ni kuila, ‘eme nga muijiia.’ (Nzuá 7:28, 29) Maji ihi i ua tokala ku bhanga phala ku zukama kua Jihova?

3. Kiebhi ki tu tena ku zuela ni Jihova?

³ Se ua mesena ku zukama kua Jihova, ua tokala ku zuela ni Jihova ithangana ioso. Kiebhi ki u tena ku zuela nê ithangana ioso? Xinganeka kiebhi ki u tena ku zuela ni dikamba dia tungu dikanga. Mu tena ku di tumikisa mikanda ithangana ioso, mba ku zuela bhu kaxi ka mutelembe ua kafuetele. U tena ku zuela ni Jihova mu ku samba ithangana ioso. (Tanga Jisálamu 142:2.) Kiebhi ki u tena kuehela Jihova ku zuela n’eie? U tena ku bhanga kiki, mu ku tanga o maka mê, o Bibidia, ni ku xinganeka mu milongi i u tanga. (Tanga Izaia 30:20, 21.) Tu mone kiebhi o ku zuela ni Jihova mu ithangana ioso, ku tena ku suínisa o ukamba uê ni muéne, n’a kituke Dikamba dia kidi phala eie.

4, 5. Kiebhi Jihova kia zuela n’eie kioso ki u di longa o Bibidia? Bhana phangu.

⁴ Tuejiia kuila, o Bibidia, njimbu ia Nzambi phala o athu oso. Maji o kuila, o Bibidia i tena ku ku kuatekesa ku zukama kua Jihova? I tena! Kioso ki u tanga mba u di longa o Bibidia, xinganeka kiebhi ki u divua ia lungu ni ima i u tanga. Xinganeka kiebhi ki u tena ku belesela o milongi i u di longa. Mu ku bhanga kiki, ua mu kuehela Jihova ku zuela n’eie. Muéne u kala Dikamba di tena ku ku kuatekesa, eie ué u mu zukama.​—Jihebeleu 4:12; Tiiaku 1:23-25.

⁵ Mu kifika, kiebhi ki u divua kioso ki u tanga o izuelu ia Jezú iambe: “Kana ku di lundila jimbongo mu ngongo?” Se ua mu di suínisa phala ku ta Jihova ku pholo ku muenhu uê, ua-nda divua kuma Jihova ua  sanguluka n’eie. Maji nange u tanga o izuelu ia Jezú, anga u mona kuila ua tokala ku sosolola o ukexilu ua muenhu uê, phala ku bhanga dingi mu sidivisu ia Nzambi. Se u divua kiki, Jihova ua mu ku kuatekesa ku tendela o kima ki ua tokala ku bhanga phala ku mu zukama dingi.​—Matesu 6:19, 20.

6, 7. (a) Kioso ki tu di longa o Bibidia, ihi i bhita ni henda ietu kua Jihova, mba o henda iê ko kuetu? (b) Ihi i tua tokala kuijiia kioso ki tu di longa o Bibidia?

⁶ Mu kidi, kioso ki tu di longa o Bibidia, tuijiia o ima i tua tokala ku lungulula ku muenhu uetu, phala ku sidivila kiambote Jihova. Maji tuijiia ué o ima iambote ia bhanga, ni ídifua iê iambote i tu bhangesa ku mu zola dingi. Kioso ki tuia ni ku mu zola, o henda iê ko kuetu i di bandekesa ué, mu kiki, o ukamba uetu ni muéne u suína dingi.​—Tanga 1 Kolindo 8:3.

⁷ Se tua mesena ku zukama kua Jihova, kioso ki tu di longa o Bibidia, ki tu tokala ku jimba o kima ki tua mesena. Jezú uambe: “O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie.” (Nzuá 17:3) Kioso ki tu tanga o Bibidia, tu di longa ima iambote ia ubhe, maji tua tokala ku di longa o Bibidia phala kuijiia kiambote Jihova, mba ku mu ijiia kala Muthu ua kidi.​—Tanga Makatukilu 33:13; Jisálamu 25:4.

8. (a) Nange ihi i banza o athu ia lungu ni kima kia bhange Jihova kua Sobha Azadiia? (b) Se uejiia kiambote Jihova, kiebhi ki ua tokala ku divua ia lungu ni ima ia bhanga?

⁸ Se tuejiia kuila Jihova Kamba dietu, ki tua-nda thandanganha, se o Bibidia ki i jimbulula kiambote o kima kia bhangesa Jihova ku batula o maka mu ukexilu uéngi. Mu kifika, kioso Azadiia kiexile sobha ia Judá, o athu a kexile mu bheza jinzambi ja makutu. Azadiia ka di bundu ni ene mu ku bheza o jinzambi ja makutu. ‘Muéne ua bhange jinga o ima ia iuka bhu pholo ia Ngana Nzambi.’ (2 Jisobha 15:1-5) Maji Jihova ua kuama Azadiia ni uhaxi ua dibhute. Mukonda diahi? O musoso ki u jimbulula o ima ioso. Mu kiki, kiebhi ki u divua ia lungu ni kima kia bhange Jihova? O kuila, o kima kiki kia tokala ku ku bhangesa ku thandanganha ni ku divua kuma Jihova ka batula kiambote o maka iá, mukonda dia ku kuama Azadiia ni uhaxi ua dibhute? Kana. Se uejiia kiambote Jihova, uejiia ué kuila, ithangana ioso muéne u batula o maka ni kuiuka kuoso. Muéne u bhana ué kaxtiku kê “mu kizongelu kia fuama.” (Jelemiia 30:11) Mu kiki, né muene kuijiia se mukonda diahi Jihova ua kuama Azadiia, u dielela kuila, Jihova ua bhange o kima kia tokala.

9. Ihi i tu kuatekesa ku tendela o kima kia bhangesa Jihova ku kuama Azadiia ni uhaxi ua dibhute?

⁹ O Bibidia i jimbulula dingi ima ia lungu ni Sobha Azadiia, a mu ijidile ué kala Sobha Uziia. (2 Jisobha 15:7, 32) O musoso mu divulu dia 2 Malunda 26:3-5, 16-21, di zuela kuila, muéne ua bhangele “ima ia iuka ku mesu ma Jihova.” Maji o musoso u zuela ué kuila, “o muxima uê ua di zangeleka katé ki ua zangiua.” O sobha ua mesenene ku bhanga kima, kia tokalele ku bhanga ngó o akunji a makota. Makuinhi a nake ni kimoxi kia akunji a mu tangela kuila, o kima kia kexile mu bhanga kiexile kituxi. Ihi ia bhange? Mukonda dia ukumbu uê, njinda ia mu kuata! O musoso iú, u tu kuatekesa ku tendela se mukonda diahi Jihova ua kuama o sobha ni uhaxi ua dibhute.

10. Mukonda diahi ki tu bhingi kuijiia o ima ioso i bhangesa Jihova ku batula o maka mu ukexilu uéngi? Kiebhi ki tu tena ku dielela kuila, ithangana ioso Jihova u batula o maka ni kuiuka kuoso?

 ¹⁰ Disá diahi di tua di longo? O musoso ua Sobha Azadiia, u tu kuatekesa ku tendela o kima kia bhangesa Jihova ku mu kuama ni uhaxi ua dibhute. Maji ihi i ueji bhanga se o Bibidia ki i jimbuluile o milongi ioso? O kuila, ueji kuibhula se Jihova ua bhange muene o kima kia tokala? Inga ueji divua kuma o ima ia jimbulula o Bibidia ia soko phala ku dielela kuila, ithangana ioso Nzambi u batula o maka ni kuiuka kuoso? (Matendelelu 32:4) Se uijiia kiambote Jihova, anga u mu mona kala Muthu ua kidi, o henda iê kua muéne ia-nda di bandekesa dingi, ua-nda mu dielela dingi. Mu kiki, kua-nda bhindamena kuijiia o ima ioso i mu bhangesa ku batula o maka mu ukexilu uéngi. Kioso ki ua-ndaia ni ku di longa o Bibidia, Jihova ua-nda kituka muthu ua kidi phala eie, mu kiki, ua-nda mu zukama dingi.​—Jisálamu 77:12, 13.

11-13. Kiebhi ki uejiia kuila Jihova uivua o misambu? (Tala o foto ia dianga.)

¹¹ Kioso ki tu samba, tu zukama dingi kua Jihova. Tu mu ximana, tu mu sakidila ni ku mu bhinga kikuatekesu. (Jisálamu 32:8) Maji se ua mesena ku kala ni ukamba uambote ni Jihova, ua tokala kuijiia kuila, muéne uivua o misambu.

¹² Saí athu a zuela kuila, Nzambi kene mu kuívua o misambu, ni kuila, o musambu u bhangesa ngó o muthu ku divua kiambote. Ene a banza kuila, o musambu u kuatekesa ngó o muthu ku xinganeka  kiambote mu ibhidi iê, phala ku i batula. Mu kidi, o musambu u tena ku ku kuatekesa mu ukexilu iú. Maji kioso ki u zuela ni Jihova mu musambu, muéne u kuívua. Kiebhi ki u tena kuijiia o kidi kiki?

¹³ Xinganeka: Ande dia Jezú kuíza mu ixi, muéne ua mono Jihova ku tambuijila o misambu ia jiselevende Jê mu ixi. Kioso kia kexile mu ixi, Jezú ua sambe kua Tat’ê ku diulu, ia lungu ni ima ia kexile mu banza, ni kiebhi kia kexile mu divua. Saí kizuua muéne ua sambe usuku uoso. (Luka 6:12; 22:40-46) O kuila Jezú ueji samba, se uejidile kuila, Jihova ka mu kuívua? Jezú ua longo ué o akaiedi’ê, kiebhi kia tokalele ku samba kua Jihova. O kuila muéne ueji bhanga kiki, se uejidile kuma Jihova kívu o misambu? Sé phata Jezú uejidile kuila, Jihova uivua o misambu. Muéne uambe: “Tata, nga ku sakidila kuma eie ua ng’ivu. Eme nga k’ijiia kuma eie uene mù ng’ivua jinga.” Etu tu tena ku dielela ué kuila, Jihova uene mu kuívua o misambu ietu.​—Nzuá 11:41, 42; Jisálamu 65:2.

14, 15. (a) Mbote iahi i tu katula kioso ki tu tumbula o ima i tua bhindamena mu misambu? (b) Kiebhi o misambu ia Kathy ia mu kuatekesa ku zukama kua Jihova?

¹⁴ Nange eie ku mono kuila, Jihova ua mu tambuijila o misambu iê. Maji, se u tumbula o ibhindamu iê mu misambu, ua-nda mona kuila, Jihova ua mu tambuijila o misambu iê, mu kiki, muéne ua-nda kituka muthu ua kidi phala eie. Se u zuela kua Jihova o ima ioso i ku bhangesa ku thandanganha, muéne ua-nda ku zukama.

¹⁵ Mu kifika, Kathy ua kexile múia mu boka ithangana ioso, maji ka kexile mu uabhela o kikalakalu kiki. * (Tala ku luiji.)  Muéne uambe: “Ki nga uabhele o sidivisu ia ku boka. Mu kidi, ki nga ki uabhele.” Kioso kia zumbuka ku salu, saí kafunga ka mu suínisa ku bokona mu sidivisu ia thembu ioso. Muéne uambe: “Muéne ua ngi bhana mukanda phala ku di soneka. Nga solo ku bokona mu sidivisu ia thembu ioso, maji nga kexile mu samba kua Jihova izuua ioso phala ku ngi kuatekesa ku uabhela o sidivisu ia ku boka.” O kuila Jihova ua tambuijila o misambu iê? Mu ku bhita mivu itatu mu sidivisu ia thembu ioso, muéne uambe: “Mukonda dia ku bhita ithangana iavulu mu sidivisu ia ku boka ni ku di longa ima iavulu ni jiphange, bhofele bhofele, nga bandekesa o uhete uami ua ku boka. Lelu, ki nga uabhela ngó o sidivisu ia ku boka, nga zolo o kikalakalu kiki. O ukamba uami ni Jihova ua suína dingi, m’ukulu ndenge.” O misambu ia Kathy ia mu kuatekesa ku zukama kua Jihova.

16, 17. (a) Ihi i tua tokala ku bhanga phala ku suínisa o ukamba uetu ni Jihova? (b) Ihi i tua-nda zuela mu milongi ia-nda kaiela?

¹⁶ Tu tena ku zukama kua Jihova katé ku hádia ni hádia. Tu kolokote ku mu ívua mu ku tanga o Bibidia ithangana ioso, tu kolokote ué ku zuela ni muéne mu ku samba ithangana ioso. Se tu bhanga kiki, o ukamba uetu ni Jihova ua-nda suína dingi, ni kikuatekesu kiê, tua-nda kolokota mu ku di bhana ni ibhidi.

¹⁷ Maji saí ithangana tu di bhana ni ibhidi, né muene se tu samba kua Jihova ithangana ioso. Mu ithangana íii, tu tena ku zoza mu ku dielela kua Jihova. Nange tu divua kuma Jihova ka mu tambuijila o misambu ietu, mu kiki, nange tu dibhuidisa se muéne kamba dietu. Se u mateka ku divua kiki, ihi i ua tokala ku bhanga? O milongi ia kaiela, ia-nda ku ku kuatekesa.