1, 2. Ihi iene mu mona o tufunga tua ilunga mu ilunga iavulu?

O KIÔNGE kia tufunga ni kafunga ka ilunga, kia kexile kiá ku disukilu. O kafunga ka ilunga ua tonginina kiambote o jiphange, henda ia mu kuata, mukonda dia kikalakalu kiavulu kia kexile mu bhanga. Saí iá, a kexile kiá mu kitala kia tat’ê. Maji bhua kexile maka exile mu thandanganhesa kiavulu o kafunga ka ilunga. O kafunga ka ilunga ua a ebhula: “Jiphange, ihi i muene mu bhanga, phala ku longa o jiphange ja maiala n’a kale ni ikalakalu mu kilunga?” O jiphange ejidile kuila, kioso o kafunga ka ilunga kia a kundile mu veji ia sukina, muéne ua a suínisine ku katula ithangana ia ku longa akuâ. Saí kafunga mudiâ, ua tambuijila: “Etu ki tua bhange ioso i tua tokalele o ku bhanga.” O tufunga tuoso a xikina.

² Se eie u kafunga, nange kiene ué ki ueji tambuijila. O  tufunga tua ilunga a mona kuila, o tufunga a tokala ku longa o minzangala ni adiakimi, phala ku kuatekesa o kilunga. Saí bhabha, ki bhonza kiavulu ku bhanga kiki. Mukonda diahi?

3. (a) Kiebhi o Bibidia ilondekesa kuila, kima kiambote ku longa akuetu ni mukonda diahi etu oso tua tokala ku bhana valolo ku kikalakalu kiki? (Tala ku luiji.) (b) Mukonda diahi saí bhabha, ki bhonza phala kafunga ku longa o jiphange?

³ Mukonda u kafunga, eie uejiia kuila, kima kiambote ku katula kithangana phala ku kuatekesa o jiphange ja mala. * (Tala ku luiji.) Eie uejiia ué kuila, kua bhingi dingi jiphange ja mala phala ku kuatekesa ku kolesa o kilunga, ni ku kuatekesa o ilunga ia ubhe ku hádia. (Tanga Izaia 60:22.) O Bibidia i longa kuila, enu mua tokala “kulonga akuâ.” (Tanga 2 Timote 2:2.) Saí bhabha, ki bhonza kiavulu ku kala ni kithangana phala ku bhanga kiki. Eie ua tokala ku kalakala ku salu, ni ku suua o ibhindamu ia muiji uê. Eie ua tokala ué ku langa o ikalakalu iê mu kilunga, ni ku batula o maka a mukuá a moneka. Kuma kuene kikalakalu kiavulu, tua-nda di longa se mukonda diahi kima kiambote ku katula kithangana phala ku longa o jiphange.

4. Mukonda diahi saí bhabha, ki bhonza kiavulu phala o tufunga ku sanga kithangana kia ku longa o jiphange?

⁴ Mukonda diahi ki tena ku bhonza ku sanga kithangana phala ku longa o jiphange ja maiala mu kilunga? Saí athu a xinganeka: ‘Saí maka mu kilunga a tokala ku dianga ku a batula ni lusolo. Né muene se ki Ngi longa akuetu kindala, phala ku tambula ikalakalu, o kilunga ki kia-nda kala ni ibhindamu.’ O kuila o kiki, kidi? Saí maka a mukuá a bhingi muéne ku a suua ni lusolo. Maji se u laleka kiavulu ku longa o jiphange ja maiala, o kilunga kia-nda kala ni ibhindamu iavulu.

5, 6. Ihi i tu tena o ku di longa mu kifika kia muendexi ua dikalu, ni kiebhi muéne kia tena ku bhangesa o dikalu ku nangenena? Kiebhi o maka iá, tu tena ku a sokesa ni ku longa o jiphange mu kilunga?

⁵ Xinganeka mu kifika kiki. Phala o dikalu ku nangenena, o muendexi uejiia kuila, ua tokala ku lungulula o maji mu ithangana ia tokala. Mu kiki, muéne u tena kuijiia se kua bhingi dingi ku ta kazolina mba kana, mukonda se u kamba ku ta kazolina ku dikalu, diene ki dia-nda kuenda. Nange muéne u tena ku banza ku lungulula o maji mu ola iéngi, se uala ni ima iavulu phala ku bhanga, mukonda muéne uejiia kuila, o dikalu dia-nda tena hanji kuenda tu ithangana. Maji kiki, ki tena ku kala kiluezu kia dikota. Se o muendexi u kamba ku lungulula o maji mu kithangana kia tokala, mu kithangana kioso-koso, o dikalu di tena ku zanganha. Mu kiki, muéne ua-nda zanga dingi kithangana ni kitadi kiavulu phala ku iudika o dikalu. O kifika kiki, ki tu longa ihi?

⁶ O tufunga, a tokala ku batula o maka a moneka ni lusolo. Se ka ki bhange, o kilunga kia-nda kala ni maka. Kála o muendexi ua dikalu ua tokala ku ta kazolina mu dikalu mu ola joso, o tufunga a tokala ‘ku sola o ima ia beta-kota.’ (Filipe 1:10) Maji saí tufunga, a tena ku kala ni ikalakalu iavulu ia ku bhanga, mu kiki, kala ni kithangana phala ku longa o jiphange ja mukuá. Kiki kia soko ni ku kamba ku ta maji ku dikalu. Se o tufunga a laleka ku longa o jiphange, mu ku bhita thembu, a-nda mona kuila, mu kilunga ki muala  jiphange ja soko, a tena ku langa kiambote o ikalakalu.

7. Kiebhi ki tua tokala ku mona o tufunga a katula kithangana phala ku longa o jiphange ja maiala?

⁷ Ki mu tokala ku banza kuila, o ku longa o jiphange ja maiala, ki kima kia tokala ku kala ku pholo. O tufunga a mesena o mbote ia kilunga a kala ni kithangana kia ku longa akuâ, jiselevende ja unjimu. Mu kiki, a kala ni valolo iavulu bhu pholo ia jiphange jâ ja maiala ni ja ahatu. (Tanga 1 Phetele 4:10.) Mbote iahi i tena ku katula o kilunga?

8. (a) Mukonda diahi o tufunga a tokala ku longa o jiphange ja maiala? (b) Kikalakalu kiahi kiala na-kiu o tufunga a sidivila mu ilunga muala ibhindamu iavulu? (Tala o kaxa “Kikalakalu Kia Bhingi ku ki Bhanga ni Lusolo.”)

⁸ Katé muéne ni jiphange ala kiá tufunga mu mivu iavulu, a tokala kuijiia ni ku xikina kuila, kioso ene kiaia ni ku kuka, kanda tena dingi ku langa o ikalakalu ia kilunga kala kiene mu langa lelu. (Mikeia 6:8) O tufunga a tokala kuijiia ué kuila, “o ibatu ni jithembu,” ji tena ku a fidisa ku kala ni kithangana kia soko phala ku langa kiambote o ikalakalu iâ. (Ndongixi 9:11, 12; Tiiaku 4:13, 14) Mu kiki, mukonda dia henda iâ ku mundu ua Jihova, o tufunga a bhanga ioso phala ku longa o minzangala mu kilunga, o ima ia di longo ku mivu iavulu.​—Tanga Jisálamu 71:17, 18.

9. Ima iahi ia-nda bhita ku hádia, i bhangesa ku longa o jiphange ja maiala?

⁹ O tufunga a longa akuâ, ala ni valolo iavulu mukonda, o nguzu ia bhanga, i kuatekesa ku suínisa o kilunga. Kioso kia longa, ene a bhangesa kuila, ku kala dingi jiphange javulu ja maiala phala ku kuatekesa o kilunga ku kala kumoxi, ni ku kolokota ku kala fiiele kua Nzambi. Kua bhingi muéne ku bhanga kiki, mu izuua íii isukidila-ku, benge-benge mukonda dia hadi ia dikota ia zukama. (Izekiiele 38:10-12; Mikeia 5:5, 6) Mu kiki, tufunga, tua  mi dióndo, tundé lelu, mateke-nu kiá ku longa o jiphange ja maiala izuua ioso.

10. Phala ku kala ni kithangana kia ku longa o jiphange, nange ihi ia tokala ku bhanga o kafunga?

¹⁰ Etu tuejiia kuila, eie uala ni ikalakalu iavulu ia ku bhanga, mukonda ua mu langa ikalakalu iavulu mu kilunga. Mu kiki, nange kua bhingi ku sota kithangana phala ku bhanga o ikalakalu iê, ni ku katula ué kithangana phala ku longa o jiphange ja maiala. (Ndongixi 3:1) Mu ku bhanga kiki, eie ua mu katula mbote mu kithangana kiê, kiki kia-nda bhangesa o kilunga ku katula mbote ku hádia.

11. (a) Kima kiahi ki tua mono mu jindunge ja bhana o tufunga, sumbala a tungu mu jixi ki ji difu? (b) Kala kilondekesa o divulu dia Jisabhu 15:22, mukonda diahi kima kiambote ku di longa o jindunge ja tufunga tua mukuá?

¹¹ Ku mivu ia bhiti, ebhudisa tufunga ene mu di tunda kiambote mu ku longa o jiphange ja maiala, se ihi iene mu bhanga phala ku di tunda kiambote. * (Tala ku luiji.) Sumbala a tungu mu ididi ki i difu, maji o jindunge ja bhana, jene jimoxi. Kiki kilombolola ihi? O ilongesu íii ia Bibidia, phala o maxibulu a ‘ididi ioso ni ia ilunga ioso.’ (1 Kolindo 4:17) Mu kiki, mu milongi íii ni ia kaiela, tua-nda di longa o jindunge ja bhana o tufunga tutu. (Jisabhu 15:22) O jiphange ala ni kikalakalu kia ku longa, tua-nda ku a exana alongexi, o jiphange a tambula o milongi tua-nda ku a exana maxibulu.

12. Ihi ia tokala o ku bhanga o mulongexi, ande dia ku mateka ku longa ni mukonda diahi?

¹² Kia dianga, o mulongexi ua tokala ku di longa ni ku sokejeka kiambote o ima. Mukonda diahi kima kiambote ku bhanga kiki? Mu kifika, o mukalakadi u kuna o jimbutu, ua tokala ku pelepalala kiambote o mavu, kiene kimoxi ué, o mulongexi ua tokala ku pelepalala kiambote o muxima ua dixibulu ande dia ku mu longa o jindunge ja ubhe. Mu kiki, kiebhi o mulongexi kia tena ku sokejeka kiambote o ima phala ku longa o dixibulu? Muéne u tena ku kaiela o phangu ia polofeta Samuuele, mulongexi uexile ni uhete ua ku longa.

13-15. (a) Ihi ia zuela Jihova kua Samuuele? (b) Kiebhi Samuuele kia pelepalala o muxima ua Saúlu phala ku bhanga o kikalakalu kia ubhe? (Tala o foto ia dianga.) (c) Mukonda diahi o musoso ua Samuuele uala ni valolo phala o tufunga lelu?

¹³ Saí kizuua mu 3.000 ja mivu ku dima, Jihova ua zuela kua polofeta Samuuele: ‘Mungu mu kumbi kala didi, nga-nda ku ku tumikisa muthu, mukua’xi ia Bejamí, eie-phe u mu unda ni maji, phala a kale mutuameni ua mundu uami Izalaiele.’ (1 Samuuele 9:15, 16) Samuuele ua mono kuila, ki muéne dingi ueji kuendesa o kifuxi kia Izalaiele, ni kuila Jihova ua mesenene kuma, muéne u sola muthu uéngi phala kuendesa o mundu. Mu kiki, phala ku pelepalala kiambote o muthu ueji kuendesa o mundu, Samuuele ua soto ndunge phala ku mu kuatekesa.

¹⁴ Mu kizuua kia mukuá, Samuuele ua di sange ni Saúlu, Jihova anga u zuela kua Samuuele “Muthu iú muene.” Tundé mu kithangana kieniókio, Samuuele ua xinganekene o ku bhanga o ndunge ia sotele muéne. Muéne ua soto o kithangana kia tokala phala ku di zuelesa ni Saúlu. Samuuele uexana Saúlu ni jiselevende jê, phala kudia nê kumoxi, iú ua a xikamesa mu ididi ia ukota ni ku a bhana o jimbandu ja beta kota ja xitu. Samuuele uambe: “Tambula-iu u i die, mukonda eie muene a ku bhakela-iu, phala mu kumbi didi di tua xindi.” Kia zubha kudia, Samuuele  uexana Saúlu phala kuia ku bhata diê. Kioso kia kexile mu kuenda, akexile mu di zuelesa ni ku sanguluka kuoso. Kioso kia bhixila mu inzo ia Samuuele, a bande ku thandu dia inzo, anga Samuuele “u di kunda ni Saúlu bhu thandu dia’nzo,” kia zubha ku di kunda ai mu zeka. Mu kizuua kia mukuá, Samuuele ua undu Saúlu, ni ku mu bhana nzobole, ni ku mu bhana dingi itendelesu. Kia zubha ku bhita o ima íii, Saúlu anga uia, muéne ua kexile polondo phala ku di bhana ni ima ieji kuíza ku pholo.​—1 Samuuele 9:17-27; 10:1.

¹⁵ Samuuele ua undu Saúlu phala ku kala mutuameni ua kifuxi. Kiki, ki ki difu ni ku longa phange phala ku kala kafunga mba múkuatekexi ua tufunga mu kilunga. Maji né kiki, o tufunga a tena ku di longa madisá avulu, mu ukexilu ua Samuuele ku pelepalala o muxima ua Saúlu. Tua-nda di longa madisá aiadi.

16. (a) Kiebhi kia divu Samuuele kioso akua Izalaiele a bhingi sobha? (b) Ihi ia bhange Samuuele kioso Jihova kia mu tumu ku unda Saúlu?

¹⁶ Kalenu polondo, ki mu kale ni hele. Kioso Samuuele kiévu kuma, o akua Izalaiele a mesenene ku kala ni sobha, muéne ua divu kia iibha. (1 Samuuele 8:4-8) Mu ithangana itatu, Jihova ua mu tumina kuívua o mundu, mukonda Samuuele ka mesenene ku a bhana sobha. (1 Samuuele 8:7, 9, 22) Sumbala Samuuele ua kexile mu divua kiki, maji muéne ka kexile ni difuba, né njinda ia muthu ueji kituka o mutuameni ua mundu. Kioso Jihova kia mu tumina ku unda Saúlu, Samuuele ka kexile ni hele. Muéne ua belesela ni muxima uoso, ka ki bhange ngó mukonda dia kuila, a mu tumu, maji ua ki bhange mukonda dia henda iê kua Jihova.

17. Kiebhi o tufunga kia kaiela o phangu ia Samuuele ni kisangu-sangu kiahi kia kala nakiu?

¹⁷ Saí tufunga, ene mu kaiela o phangu ia Samuuele mu ku longa o jiphange ni henda ioso. (1 Phetele 5:2) O tufunga tutu tua henda, ala polondo phala ku kuatekesa akuâ, ene kala ni uôma ua ku longa ku maxibulu mu kilunga o ikalakalu iejiia ene, ia bhanga mu kilunga. Mu veji dia kiki, ene a mona o jiphange jiji, kala “akuatekexi a ngalasa,” a-nda ku a kuatekesa ku langa o ibhindamu ia kilunga. (2 Kolindo 1:24; Jihebeleu 13:16) O tufunga  tutu tua henda, a uabhela kiavulu ku mona o maxibulu ku bhakula o uhete uâ, phala ku kuatekesa o mundu ua Jihova.​—Ikalakalu 20:35.

18, 19. Kiebhi o kafunga kia tena ku pelepalala o muxima ua dixibulu phala ku mu longa, ni mukonda diahi kima kiambote ku bhanga kiki?

¹⁸ Sota ku kala dikamba, mu veji dia ku kala ngó mulongexi. Kioso Samuuele kia di sange ni Saúlu mu veji ia dianga, muéne ueji tena ku mu unda kiá ni lusolo, kala sobha mu ku mu lunduluila o maji ku mutué. O sobha ia ubhe eji mu unda mu kithangana kieniókio, maji muéne keji kala polondo phala kuendesa o mundu ua Nzambi. Mu veji dia ku bhanga kiki, Samuuele ua katula kithangana, phala ku pelepalala o muxima ua Saúlu, phala muéne ku ditunda kiambote mu kikalakalu kiki kia ubhe. Ande dia Samuuele ku unda Saúlu, ene adile hanji kumoxi, endele kumoxi ni ku di zuelesa mu kithangana kiavulu, ni ku nhoha. Samuuele ua soto o kithangana kia tokala phala ku unda o sobha ia ubhe.

¹⁹ Kiki kiene kia tokala ku bhita lelu. Ande dia ku mateka ku longa o phange, o kafunga ua tokala ku bhanga ioso phala ku kala ni ukamba uambote ni muéne. O kafunga, ua tokala kuijiia kiambote o ukexilu ua dixibulu ni ijila iê, phala ku mu bhangesa ku divuua kiambote. Mu kiki, kididi kioso-kioso ki ua tungu, se u katula kithangana phala ku kala kumoxi ni dixibulu, muéne ua-nda mona kuma, eie u mu bhana valolo. (Tanga Loma 12:10.) Sé ku phata kuila, o maxibulu a-nda sakidila o henda i uene mu a londekesa.

20, 21. (a) Ihi i u tena ku zuela ia lungu ni mulongexi uambote? (b) Ihi i tua-nda di longa mu milongi ia-nda kaiela?

²⁰ Mu kidi, o mulongexi uambote u uabhela ku longa akuâ. Maji o mulongexi uambote, ua tokala u zola ué o muthu ua mu mu longa. (Sokesa ni Nzuá 5:20.) Mukonda diahi kima kiambote o ku bhanga kiki? Mukonda se o dixibulu u mona kuma, eie u mu bhana valolo, muéne ua-nda kala ni vondadi ia ku di longa n’eie. Mu kiki, o tufunga ka bhange ngó nguzu phala ku longa, maji a di suínisa ué ku kala ni ukamba uambote ni maxibulu.​—Jisabhu 17:17; Nzuá 15:15.

²¹ Kia zubha ku pelepalala o muxima ua dixibulu, o kafunga u tena ku mateka ku mu longa. Kiebhi o kafunga kia tena o ku longa o dixibulu? Tua-nda di longa o maka enhá mu milongi ia kaiela.