JULIAN u lembalala kiebhi kia divu, kioso kiévu o ngolokela iambe kuila, o mon’ê kexile dingi Mbangi ia Jihova. Muéne uambe: “Nga divu kala o muenhu uami uoso ua diboto. Muéne mon’ami ua phande kumbi, tuexile tu makamba ambote, tua bhangele ima iavulu kumoxi.” Julian u jimbulula kuila, o mon’ê ua kexile mu bhanga ima iambote, maji mu ku bhita thembu, muéne ua mateka kubhanga ima ia iibha. O muhatu ua Julian ua kexile mu dila kiavulu, Julian kejidile dingi ihi ieji bhanga, phala ku mu konda o malamba. Julian uambe: “Ithangana ioso tua kexile mu dibhuidisa, se tua mu longo muene kiambote, mba kana.”

Ihi i zuela o Bibidia ia lungu ni kukaia muthu ua te kituxi mu kilunga? Kuma o kima kiki ki bheka ndolo iavulu, mukonda diahi tuamba kuila, o ku kaia o muthu ua te kituxi mu kilunga, ku londekesa henda?

Se Mbangi ia Jihova a mu batizala, u ta kituxi kia dikota, anga ka diela o kituxi kiê, a mu kaia mu kilunga.

Jihova ka kingila kuila, tu kala tu athu a iuka, maji muéne ua mesena kuila, o jiselevende jê ji belesela o itumu iê, a kolokota ku kala athu a zele. Mu kifika, Jihova u tumina o jiselevende jê kulenga o ituxi kala o undumbu, o ubhezelu ua iteka, kunhana, o ungulungumba, o ujibhangânga, ni uloji.​—1 Kolindo 6:9, 10; Dijingunuinu 21:8.

O ima i kingila Jihova ko kuetu ki i neme, mu veji dia kiki, iene i tu langa. Mu kifika, etu enioso tua mesena ku tunga bhu kaxi ka athu a tululuka, ala ni ukexilu uambote mba athu akua kidi. O ima íii, iene i tuene mu mona bhu kaxi ka jiphange jetu mu nzumbi. Mukonda  diahi ene ala ni ukexilu iú? Mukonda ene a bhakula o mienhu iâ kua Jihova, iá a kanena ku kaiela o itumu ia Bibidia.

Ihi i tuamba, se Mbangi ia Jihova u ta kituxi mukonda dia ukexilu uetu ua xitu? Kiki kia bhitile ni jiselevende ja Jihova m’ukulu, maji Jihova ka ditunu o jiselevende jiji. Mu kifika, sumbala Sobha Davidi ua tele phánda, anga u jibha muthu, polofeta Natane ua tangela Davidi kuila, Jihova ua loloka o ituxi iê.​—2 Samuuele 12:13.

Mukonda diahi Jihova ua loloka Davidi? Mukonda Jihova ua mono kuila, Davidi ua diela o ituxi iê ni muxima uoso. (Jisálamu 32:1-5) Lelu ué kiene, se muthu u diela o ituxi iê ni muxima uoso, anga ueha o ima ia iibha, Jihova u mu loloka ué. (Ikalakalu 3:19; 26:20) Se o tufunga tua mu fundisa a mona kuila, o muthu ka diela o ituxi iê, ene a tokala ku mu kaia mu kilunga.

Se a kaia muthu ku muiji uê mba kamba diê, nange u divua kia iibha, anga u xinganeka ué kuila, o kitumu kia kukaia muthu mu kilunga, ki kitumu kiambote. Maji o Mak’â Nzambi alondekesa kuila, o kitumu kia ku kaia o muthu ua te kituxi, kitumu kia henda.

Jezú uambe kuila, ‘o unjimu a u tongolola bhu kaxi ka ibhangelu.’ (Matesu 11:19) Tua-nda di longa ima itatu ilondekesa kuila, o kitumu kia kukaia o muthu ka diela o ituxi iê, kilondekesa unjimu.

O kukaia o muthu ua te kituxi mu kilunga, ku kuatekesa kuzelesa o dijina dia Jihova. Kuma tuambata o dijina dia Jihova, o ima i tu bhanga i tena kubhana kijingu kua Jihova, mba ku xidisa o dijina diê. (Izaia 43:10) O ukexilu ua mon’a, u tena ku bhana kijingu ku jitata mba ku xidisa o majina mâ. Kiene ué kimoxi, o ukexilu ua jiselevende ja Jihova, u tena kubhana kijingu kua Jihova, mba kuxidisa o dijina diê. Mu izuua ia Izekiiele, o athu akua jixi jengi, ejidile o Jijudé kala mundu uambata o dijina dia Jihova. (Izekiiele 36:19-23) Lelu ué kiene, o athu ejiia kuila, o Jimbangi ja Jihova ambata o dijina dia Jihova. Mu kiki, se tu belesela o itumu ia Jihova, tua-nda mu bhana kijingu.

O poxolo Phetele ua tendelesa o Jikidistá: “Mu kala mu ana mua tumaka Nzambi; ki mu kaiele o funza ia maluimbi menu mokulu mu thembu ia uôua. Kuma-phe o Nzambi ua m’ixana ua zela, enu uenu ki kale mu zela mu uendelu uenu uoso. Mukonda kiene kia soneka mu Mikanda Ikôla, uixi: Ki kale mu zela, kuma Eme nga zela.” (1 Phetele 1:14-16) Mu kifika, se tu bhanga o undumbu, tua-nda xidisa o dijina dia Nzambi. Maji se tu kolokota kukala athu a zele, tua-nda bhana kijingu kua Jihova.

Se Mbangi ia Jihova u bhanga ima ia iibha, o athu a mu ijiia nange a-nda mona o ima ia mu bhanga. Mu kiki, kioso kia-nda kuívua kuila, o muthu iú ki Mbangi ia Jihova dingi, ene a-nda mona kuila, o mundu ua Jihova u kaiela o itumu ia Bibidia, ni kuila, ene a zelesa o kilunga. Mu kifika, saí diiala mu ixi ia Suíça uai mu kiônge, anga ua zuela kuila, muéne ua mesenene ku bhanga mbandu ia kilunga. Phang’iê ia muhatu a mu kaiele mu kilunga mukonda dia ku bhanga o undumbu, mu kiki, muéne ua mesenene ku di bunda kumoxi ni kibuka, “ki dituna ku di bunda ni athu a bhanga ima ia iibha.”

O kukaia o muthu ua te kituxi, ku kuatekesa ku zelesa o kilunga. O poxolo Phaulu ua dimuna o akua Kolindo ku kiluezu kia kueha mu kilunga o muthu ka diela o ituxi iê. Muéne ua sokesa o muthu u ta kituxi ni felemendu i bhangesa o fuba ioso ku futunuka. Phaulu uambe: “Kakifulu-fulu kofele ka sambuka dikende dioso.” Muéne ua a tendelesa: “Muthu ió ua bhukumuka mu tubhudienu mudienu.”​—1 Kolindo 5:6, 11-13.

 O “Muthu ió ua bhukumuka,” ua bhangele o undumbu, ka diela o kituxi kiê. Saí iá mu kilunga a matekene ku mu lungisa. (1 Kolindo 5:1, 2) Kiki kiexile kiluezu kia dikota, mukonda o Jikidistá ja mukuá eji ku a funhisa ku bhanga o undumbu ua kexile mu bhanga akua Kolindo. Kiene kimoxi ué lelu, se o muthu ua te kituxi ka mu kaie mu kilunga, amoxi nange ka-nda bhana dingi valolo ku itumu ia Jihova. (Ndongixi 8:11) Kála o ‘matadi koxi dia menha,’ a tena ku bhangesa o baluku ku boba mu menha, o muthu ka diela o ituxi iê, u tena ku buika o kixikanu kia akuâ mu kilunga.​—Juda 4, 12.

O kukaia o muthu ua te kituxi mu kilunga, ku kuatekesa o muthu iú ku mona kuila, ua tondala. Jezú ua te kifika kia munzangala ua xisa o dibhata dia tat’ê, anga u zanga o kitadi kioso mu undumbu. Mu ku bhita thembu, o munzangala iú ua mono kuila, o kukala dikanga dia jitata, kua mu katula o kuzediua kuoso. Mu kiki, muéne ua diela, iú ua vutuka ku muiji uê. Tat’ê ua sanguluka kiavulu kioso kia mono kuila, mon’ê ua lungulula o ukexilu uê, anga u mu tambulula ni ngalasa ioso. (Luka 15:11-24) O kifika kiki, ki tu kuatekesa ku tendela kiambote kiebhi ki divua Jihova, kioso o muthu kia diela o ituxi iê. Muéne u zuela: “Eme ki ngène mu kuuabhela kalunga ka mukua phulu, maji ki ngi uabhela o mukua phulu ku diela o njila iê ia ibha n’a kole muenhu.”​—Izekiiele 33:11.

O muiji uetu mu nzumbi, o kilunga kia Kidistá. Kioso kia kaia muthu mu kilunga, muéne ka bhange dingi mbandu ku muiji iú. Kioso kia-nda dibhana ni ibhidi ia lungu ni kituxi kiê, nange muéne u mona kuila ua tondala, anga u lembalala o kisangusangu kia kexile na-kiu, kioso kia kexile ni ukamba uambote ni Jihova, ni kilunga kiê. Nange kiki, kia-nda mu kuatekesa ku vutuka ku muiji uê mu nzumbi.

Phala ku kuatekesa o muthu a mu kaie, ku vutuka mu kilunga, tua tokala ku mu londekesa o henda, mu ku kaiela o kitumu kia lungu ni athu a a kaie mu kilunga. Mu kifika, xinganeka kuila, kiiadi kia athu a mu kuenda mu thembu ia mbambi, a mu kingila kikuatekesu mukonda ala mu iluezu. Kuma o mbambi iavulu, umoxi mudiâ ua bhuila kiavulu, mu kiki, u mesena ku zeka. Maji se u zeka bhoxi, muéne ua-nda fuá ni mbambi. Phala ku mu kuatekesa ku tona, kamba diê u mu bhana huxi ku ditama. Sumbala o huxi i mu kata, maji i tena ku bhulula o muenhu uê. Davidi ua londekesa o kidi kiki, kioso kiambe: “Uoso ua iuk’ó, kia ngi beta, ng’ila kuma ua ngi bhange mbote.” (Jisálamu 141:5) Davidi uejidile kuila, sumbala o kibazelu kieji mu bhangesa ku divua kia iibha, maji kieji mu kuatekesa.

Kála o huxi ia bhana ku muthu, o ku kaia o muthu ua te kituxi mu kilunga, kiene o kima ki bhindamena o muthu iú, phala ku vutuka kua Jihova. O mon’a Julian a mu tange ku dimatekenu dia milongi íii, ua lungulula o ukexilu uê ua muenhu, iú ua vutuka kua Jihova mu ku bhita kuinhi dia mivu, kioso kia mu kaiele mu kilunga. Lelu, muéne kafunga. Muéne u zuela: “O ku ngi kaia mu kilunga, kua ngi bhangesa ku di bhana ni ibhidi ia moneka mukonda dia ima ia iibha i nga bhangele. Kiki kiene o kima ki nga bhingile.”​—Jihebeleu 12:7-11.

Kioso kia kaia muthu mu kilunga, tu divua kia iibha. Maji kiki, ki kilombolola kuila, o muthu ka-nda vutuka dingi kua Jihova. Etu enioso tua tokala ku kumbidila o kitumu kia lungu ni muthu a mu kaie mu kilunga. Kiebhi ki tu tena ku bhanga kiki?

O tufunga a bhanga ioso phala ku kaiela o henda ia Jihova, benge benge kioso kia tangela muthu kuila, muéne ki Mbangi ia Jihova dingi. Ni henda ioso, ene a jimbuluila kiambote o muthu iú, o ima ia tokala ku bhanga, phala ku  vutuka dingi kua Jihova, ni ku bhanga dingi mbandu mu kilunga. Se o muthu a mu kaie mu kilunga, ulondekesa kuila, ua mesena ku vutuka, o tufunga a tokala ku mu kunda mu ithangana ni ithangana, phala ku mu lembalesa o ima ia tokala ku bhanga phala ku vutuka kua Jihova. *​—Tala ku luiji.

O athu ku muiji a londekesa o henda iâ ku kilunga ni ku muthu a mu kaie, mu ku xila o ukexilu ua tufunga ua ku batula o maka. Julian u jimbulula: “Muéne uexile hanji mon’ami, maji o ukexilu ua iibha ua muenhu uê ua fidisile o ukamba uetu.”

O athu oso mu kilunga a londekesa o henda iâ ku muthu a mu kaie, mu ku xila o kibazelu kia mu bhana Jihova bhu kaxi ka tufunga. Kiki kilombolola kuila, ene ka tokala ku kala nê kumoxi, mba ku zuela nê. (1 Kolindo 5:11; 2 Nzuá 10, 11) O athu mu kilunga a tokala ué ku bandekesa o kikuatekesu ni henda iâ, ku muiji ua muthu a mu kaie mu kilunga. Mu kithangana kiki, o muiji u luuala kiavulu. Mu kiki, ki tu tokala ku a bhangesa ku divua kala, ene uâ a a kaie mu kilunga.​—Loma 12:13, 15.

Julian uambe: “O kitumu kia ku kaia o muthu ua te kituxi mu kilunga, kitumu kiambote phala etu, mukonda ki tu kuatekesa ku kaiela o itumu ia Jihova ku muenhu uetu. Sumbala ki tu bhekela ndolo, maji mu ku bhita thembu, ki tu kuatekesa. Se nga xikinine o ukexilu ua iibha ua mon’ami, muéne keji vutuka mu kilunga.”