1. (a) Mukonda diahi tua tokala ku bhânga ni Satanaji lelu? (b) Kiebhi ki tuejiia kuila, tu tena ku bhânga ni Satanaji ni ku mu tolola?

SATANAJI ua mu bhânga ni Jikidistá a a undu ala hanji mu ixi, ni “jimbudi jamukuá.” (Nzuá 10:16) Kuma Diabhu uejiia kuila, kua mu kambe ngó kathangana, muéne ua mesena kubuika o kixikanu kia jiselevende ja Jihova. (Tanga Dijingunuinu 12:9, 12.) Maji tu tena kubhânga ni Satanaji ni ku mu tolola. O Bibidia iamba: “Zokenu-phe ni Diabhu, muène u mi lenga.”​—Tiiaku 4:7.

2, 3. (a) Mukonda diahi Satanaji ua mesena kuila, o athu a xikina kuma muéne kene-ku? (b) Kiebhi ki uejiia kuila kuene Satanaji?

² Avulu ka xikina kuila, kuene Satanaji. Ene a banza kuila Satanaji ni madimonho, ifika ngó iene mu tanga mu madivulu, ni mu jifilme ja ujibhangânga, ni mu jijoko. O athu iâ a banza kuila, se u njimu, ku tokala ku xikina kuila kuene Satanaji ni madimonho. O kuila Satanaji u divuua kia iibha mu kuijiia kuila, o athu ka xikina kuila, muéne ni madimonho  athu a kidi? Kana. Mukonda Satanaji u tena ku nganala kiambote o athu ala ni phata kuila, muéne muthu ua kidi. (2 Kolindo 4:4) Mu kidi, Satanaji u bhangesa o athu ku banza kiki, phala ku a nganala kiambote.

³ Kuma tu jiselevende ja Jihova, ka tena ku tu nganala. Tuejiia kuila, kuene Diabhu. Kiebhi ki tuejiia o kidi kiki? O Bibidia i tu tangela kuila, Satanaji ua zuela ni Eva bhu kaxi ka nhoka. (Dimatekenu 3:1-5) Muéne ua zuela ni Jihova mu ku mu tangela kuila, Jobe u mu sidivila mukonda dia mabesá a mu bhana. (Jobe 1:9-12) Satanaji ua tendala Jezú. (Matesu 4:1-10) Kioso Jezú kia kituka Sobha ku muvu ua 1914, Satanaji ua mateka “kùlua ita” ni Jikidistá a a undu a kexile mu ixi. (Dijingunuinu 12:17) O ita íii ki i bhu luua, mukonda Diabhu ua mu bhanga ioso phala ku buika o kixikanu kia Jikidistá a a undu ni jimbudi ja mukuá. Phala ku tolola o ita íii, tua tokala kubhânga ni Satanaji ni ku kolesa o kixikanu kietu. O milongi íii, ia-nda zuela ia lungu ni maukexilu atatu a ku bhanga kiki.

4. Mukonda diahi Satanaji muene ua beta kota kukala ni luímbi?

⁴ Satanaji uala ni luímbi luavulu. O anju íii ia iibha, ia bhukumukina o utuminu ua Nzambi, anga i suínisa akuâ ku mu bheza, mu veji dia kubheza Jihova. Satanaji muene o muthu ua beta kota mu ku kala ni luímbi. Mu kiki, tu tena kubhânga ni Satanaji, mu ku dituna o luímbi, ni kulondekesa o kulenduka. (Tanga 1 Phetele 5:5.) Maji o luímbi ihi? O kuila kima kia iibha kusanguluka ni kikalakalu kietu mba kia akuetu?

5, 6. (a) O kuila kima kia iibha kusanguluka ni ima ietu? Jimbulula. (b) Phangu iebhi ia Bibidia ilondekesa kuila o ku di zangeleka kima kia iibha?

⁵ Ki kima kia iibha ku divua kiambote, ku di xila, mba kusanguluka mukonda dia kima ki tua bhange mba mukonda dia kima kia bhange ndandu mba dikamba dietu dia kazola. O poxolo Phaulu ua tangela o jiphange mu Tesalonika: ‘Etu tua mi tela thathe mu ilunga ia Nzambi mukonda dia kukolokota kuenu, ni kuxikana mu’axaxe ka izukutisu ni jihadi joso ji mua bhiti na-ju.’ (2 Tesalonika 1:4) Mu kiki, kima kiambote kusanguluka ni kikalakalu ki tu bhanga mba ki bhanga akuetu. Ki tu tokala ku divua kia iibha mukonda dia muiji uetu, o ijila ietu, mba kididi mu tua kudila.​—Ikalakalu 21:39.

⁶ Maji o ukexilu ua ku dizangeleka u tena ku zanga o ukamba ni athu, benge benge o ukamba uetu ni Jihova. O ukumbu u tena ku tu bhangesa ku kala ni njinda kioso kia tu bazela. U tena ué, ku tu bhangesa ku dituna o kikuatekesu, mu veji dia ku xikina ni kulenduka kuoso. (Jisálamu 141:5) Kala kia tange o divulu, o ukexilu iú ua lungu ni ku di banza kiavulu, mba “ku londekesa o ukexilu ua ku dizangeleka u londekesa o athu a banza kuila, ene a beta kota o akuâ ndenge.” Jihova ua zembe o ukexilu iú ua ku dizangeleka. (Izekiiele 33:28; Amoji 6:8) Maji Satanaji u sanguluka ni athu a kaiela o ukexilu uê ua ku di zangeleka. Xinganeka o ku sanguluka kua Satanaji kioso kia mono Nimilodi, ni Falaó, ni Abisalone, ku dizangeleka mu ukexilu uâ ua ku zuela! (Dimatekenu 10:8, 9; Makatukilu 5:1, 2; 2 Samuuele 15:4-6) O ukexilu iú ua bhangesa ué  Kaini ku texi o ukamba uê ni Nzambi. Jihova ua dimuna Kaini, maji o ukexilu uê ua ku dizangeleka ua mu fidisa kuívua. Muéne ka bhana mátui ku itendelesu ia Nzambi, ka kexile ué ni uôma ua ku ta o kituxi kua Jihova.​—Dimatekenu 4:6-8.

7, 8. (a) O kathombo ihi, ni kiebhi ka lungu ni ku dizangeleka? (b) Jimbulula kiebhi o ku dizangeleka ku tena kukatula o kutululuka mu kilunga.

⁷ Lelu, o athu a dizangeleka mu maukexilu avulu. Saí bhabha, a kala ni kathombo. Saí divulu diambe kuila, o kathombo ki kima kiambote phala o athu a tokala ku miji iéngi. O kathombo ka lungu ni “kixikanu kia kuila, o athu a tokala ku miji iéngi ka sokela mu ídifua ni uhete, ni kuila saí ikonda ia beta kota ia mukuá ndenge.” O kathombo kene mu bhangesa o athu kubhânga mudiâ, ni kuluua ita mba ku di jibha.

⁸ Mu kidi, o ima íii ki i tokala kubhita mu kilunga kia Nzambi. Maji né kiki, o kuzoka ni jiphange mu kilunga ku tena kumateka mukonda dia ku dizangeleka, mu ku suka-ku a tena kubhanga ima ka i banzele. Kiki kia bhitile ni Jikidistá ku hama ia dianga, mukonda dia kiki Tiiaku ua a ebhula: “Kuebhi ku tunda o ita ni jimvunda mudienu?” (Tiiaku 4:1) Se tu zemba akuetu, mba tu banza kuma tua beta kota, akuetu ndenge, nange tua-nda zuela ni ku bhanga ima ia iibha. (Jisabhu 12:18) Sé phata, o ku dizangeleka ku tena kukatula o kutululuka mu kilunga.

9. Kiebhi o Bibidia i tu kuatekesa kubhânga ni kathombo ni ukexilu ua ku dizangeleka? (Tala o foto ia dianga.)

⁹ Se tu divua kuma tua beta kota, akuetu ndenge, tua tokala kudi lembalala kuila, Jihova ua zembe ‘o muthu uoso u dizangeleka ku muxima.’ (Jisabhu 16:5) Tua tokala uê kutonginina o muxima uetu mu ku dibhuidisa: ‘O kuila ngi divua kuma nga beta kota, o athu a tokala ku jixi jengi ndenge?’ Se tu divua kiki, tua di jimbi kuila, Nzambi ‘ua bhange o athu oso ku mbutu ia muthu umoxi.’ (Ikalakalu 17:26) Mu kiki, etu enioso tu mbutu imoxi ngó, mukonda o athu oso a tundu ku muiji ua Adá. O kuxikina kuila, saí ikonda ia bhange Nzambi ia beta kota o ia mukuá ndenge, uôua. Se tu banza kiki, tua mu kuehela Satanaji kuzanga o ukamba uetu ni jiphange, ni ku tu muanga. (Nzuá 13:35) Phala kubhânga ni Satanaji ni ku mu tolola, tua tokala ku dituna o ukexilu ua ku dizangeleka.​—Jisabhu 16:18.

10, 11. (a) Mukonda diahi nange ki ki bhonza kuzola o mundu? (b) Ihi ia bhiti ni Demase mukonda dia kuzola o mundu?

¹⁰ Satanaji muene “o sobha ia mundu iú,” mu kiki, o mundu uoso uala bhu maku mê. (Nzuá 12:31; 1 Nzuá 5:19) O mundu iú u suínisa ima iavulu ki i lungu ni itumu ia Bibidia. Mu kidi, saí ima ku mundu iú, ki ia iibha. Maji tuejiia kuma, bhu kaxi ka mundu uê, Satanaji ua-nda katula mbote mu jihanji jetu, mu ku tu bhangesa ku ta kituxi. Kia mukuá, muéne ua-nda tu tendala mu ku tu bhangesa kuzola o mundu iú, ni kukamba kubhana valolo ku ubhezelu uetu kua Jihova.​—Tanga 1 Nzuá 2:15, 16.

¹¹ Saí Jikidistá ku hama ia dianga, a  zolele o mundu. Mu kifika, Phaulu ua soneka: “Demase ua ngi xi, iú uaii ku Tesalonika, mukonda dia kuzola mundu uenhú.” (2 Timote 4:10) O Bibidia ki i jimbulula o ima ia mundu ia zolele Demase, ia mu bhangesa kuxisa Phaulu. Nange Demase ua mateka kuzola kiavulu o jimbongo, o sidivisu ia Jihova ndenge. Se kiki kidi, Demase ua texi o ujitu uê ua ku sidivila Nzambi. O kuila muéne ua bhange kima kiambote? Kana. Demase ueji suluka mu kukuatekesa Phaulu. O mundu ki ueji mu bhana o ima iambote ieji mu bhana Jihova!​—Jisabhu 10:22.

12. Kiebhi Satanaji kia tena kukatula mbote mu jihanji jetu ja xitu ni “kusênduka kua jimbongo?”

¹² O ima íii i tena kubhita ué ni etu lelu. Kuma tu Jikidistá, ki kima kia iibha kumesena ku langa o ibhindamu ietu ni ia muiji uetu. (1 Timote 5:8) Jihova ua mesena kuila tu zediua ku muenhu. Tuejiia o kidi kiki, mukonda muéne ua bhana kua Adá ni Eva, o palaízu ia iuka phala ku tunga-mu. (Dimatekenu 2:9) Maji Satanaji u tena kukatula mbote mu jihanji jetu ja xitu ni “kusênduka kua jimbongo.” (Matesu 13:22) Athu avulu a banza kuila, o jimbongo ja-nda ku a bhangesa kuzediua. Se tu banza kiki, tu tena ku texi o kima kia beta kota phala etu, o ukamba uetu ni Jihova. Jezú uambe: “Kana muthu u tena kubhikila ngana jiiadi. Mukonda bhu kala ni iú u mu zemba, o iú u mu zola; mba iú a di tuma, o iú a di bhonza. Enu ue ki mu tena kubhikila Nzambi ni Mamunu (kilundu kia jimbongo).” (Matesu 6:24) Se tua mu kalakala ngó phala kukala ni jimbongo, kiki kilombolola kuila, tua texi o ujitu uetu ua kusidivila Jihova. Kiki kiene o kima kia mesena Satanaji. Ki tu tokala kuehela o kitadi, mba o ima i tena kusumba o kitadi, kuzanga o ukamba uetu ni Jihova. Phala kubhânga ni Satanaji ni ku mu tolola, tua tokala ku mona o jimbongo mu ukexilu uambote.​—Tanga 1 Timote 6:6-10.

13. Kiebhi o mundu iú u bhangesa o athu kubanza kia iibha ia lungu ni ukaza ni kuzeka kumoxi?

¹³ O kibhetu kia mukuá kia Satanaji, o undumbu. Athu avulu a banza kuila, o kulondekesa o ufiiele ku diiala ni muhatu, mba mu ukaza, ki kuala dingi ni valolo lelu, ni kuila, o ufiiele u katula o ufôlo ua dikaza. Mu kifika, saí muhatu ua zuela kuila, sé-ku muthu u tena ku londekesa o ufiiele kua kaza diê. Muéne uambe dingi: “Ki ngejiia muthu ua fiiele, mba muthu ua mesena kulondekesa o ufiiele.” Saí diiala ué, diambe: “Ki ngejiia se a tu bhange muene phala kukala ni muthu umoxi, katé ku hádia ni hádia.” Satanaji u sanguluka kiavulu kioso o athu a kala ni phata ia ujitu ua ukaza, ua tu bhana Nzambi. Diabhu ua zembe o ujitu ua ukaza, mukonda dia kiki, ka mesena kuila, o athu a zediua mu ukaza. Mu kiki, phala kubhânga ni Satanaji ni ku mu tolola, tua tokala kumona o ukaza, kala ki mona Nzambi.

14, 15. Ihi i u tena kubhanga se u kala ni hanji ia kubhanga o undumbu?

 ¹⁴ Ki kale tu makaza mba tu akudi, tua tokala kubhânga ni nguzu ioso phala kudituna o undumbu. O kuila ki bhonza? Ki bhonza. Mu kifika, se u munzangala, nange uivua o jikoleka jê ku dizangeleka mukonda dia kuzeka ni muthu uoso uoso ua mesena. Nange ene a dizangeleka ué mukonda dia ku di tumikisa jinjimbu ja ufusa mu mitelembe ia kafuetele. Mu kidi, mu jixi ja mukuá, a mona o jinjimbu jiji kála jinjimbu ja lungu ni ufusa u bhanga o an’a ndenge. O Bibidia i zuela: “Muthu uoso-phe u ta phanda, mukutu uê muène ua u te kituxi.” (1 Kolindo 6:18) O undumbu uene mu bheka hadi iavulu ku athu ni kufuá. O minzangala ia bhangele o undumbu ande dia kukazala ambe kuila, a diela o kima kia bhangele. O mundu ua mesena ku tu bhangesa ku xikina kuila, se tu kamba kuxila o itumu ia Nzambi, ki tua-nda tala hadi. Se tu xikina mu makutu iá, a tena ku tu bhomba “kuala o ituxi.”​—Jihebeleu 3:13.

¹⁵ Ihi i u tena kubhanga, se u kala ni hanji ia kubhanga o undumbu? Lembalala kuila, iá maka u uala nau. (Loma 7:22, 23) Samba kua Jihova, mu kubhinga nguzu. (Filipe 4:6, 7, 13) Lenga o ima i tena ku ku suínisa kubhanga o undumbu. (Jisabhu 22:3) Kioso ki kumoneka tendasá, ditune ni lusolo.​—Dimatekenu 39:12.

16. Ihi ia zuela Jezú kioso kia mu tendala kua Satanaji, ni ihi i tu tena ku di longa mu phangu íii?

 ¹⁶ Jezú ua tu xisa phangu iambote. Ka mu nganala ku ikanenu ia Satanaji. Muéne ka xikina né ngó kubanza mu ikanenu íii. Mu veji dia kiki, muéne ua tangela Satanaji ni lusolo luoso: “Kiòsoneke.” (Tanga Matesu 4:4-10.) Kuma Jezú uejidile kiambote o Mak’â Nzambi, muéne ua tumbula o ibatulu ni lusolo luoso, kioso kia mu tendala kua Satanaji. Phala kubhânga ni Satanaji ni ku mu tolola, ki tu tokala ku mu ehela ku tu tendala kubhanga o undumbu.​—1 Kolindo 6:9, 10.

17, 18. (a) Ibhetu iebhi i ta Satanaji, ni mukonda diahi tu tena ku kingila o ima íii? (b) Ihi ia-nda bhita ni Satanaji, ni kiebhi o ima ia-nda bhita ni muéne i tu kuatekesa kukolokota?

¹⁷ O ku dizangeleka, ni jimbongo, ni undumbu, ibhetu itatu ngó ia Satanaji. Kuene dingi ibhetu ia mukuá. Mu kifika, saí Jikidistá ene mu a zukutisa ku miji iâ, mba ku a xonguena ku jikoleka jâ. A mukuá a tungu mu jixi muala o jinguvulu ji bhanga ioso phala ku a fidisa kuboka. Etu ué tu kingila ku di bhana ni maka enhá. Jezú ua tu dimuna: ‘Enu a ka mi zemba kuala athu oso mukonda dia dijina diami. Uoso-phe u kolokota katé bhu dizubhilu, muene ua ka bhuluka.’​—Matesu 10:22.

¹⁸ Kiebhi ki tu tena kubhânga ni Satanaji ni ku mu tolola? Jezú uambe: “Mu kolokota kuenu, muene mu mua-ndu muena o mienhu ienu.” (Luka 21:19) Sé-ku kima ki tena kubhanga muthu, phala ku tu kuama katé ku hádia ni hádia. Sé-ku muthu u tena kuzanga o ukamba uetu ni Jihova, ki kale ngó mu vondadi ietu. (Loma 8:38, 39) Né muéne se selevende javulu ja Jihova ji fua, ki kilombolola kuila Satanaji ua a tolola. Jihova ua-nda ku a fukununa. (Nzuá 5:28, 29) Maji Satanaji kala ni kidielelu. Kioso kia-nda buika o mundu iú ua iibha, a-nda mu takula mu dikungu ki di moneka hole, mua-nda bhita 1.000 ia mivu. (Dijingunuinu 20:1-3) Ku disukilu dia utuminu ua Kristu ua midi ia mivu, a-nda ‘jituna hanji Satanaji mu kathangana.’ Muéne ua-nda tendala dingi o athu a iuka mu veji ia sukina. Ku disukilu, a-nda mu buika. (Dijingunuinu 20:7-10) Sumbala Diabhu kala ni kidielelu, eie uala ni kidielelu! Kolokota kubhânga ni Satanaji, ni kukolesa o kixikanu kiê. U tena kubhânga ni Satanaji ni ku mu tolola!