Mu mivu iavulu, o madivulu metu akexile mu jimbulula kuila, o dijina Ngongo dia Mangongo, d’io bhane kua Satanaji kioso kia mu kaie ku diulu. Mukonda diahi? Mukonda o divulu dia Dijingunuinu di londekesa kuila, Satanaji muéne o mutuameni ua ió a zukutisa o mundu ua Nzambi. (Dijingunuinu 12:1-17) Tua kexile mu tendela kuila, Ngongo, dijina dia mukuá dia Satanaji.

Maji, saí maka a lungu ni milongi íii. Xinganeka mu ima íii: Kioso Jihova kia zuela ia lungu ni kibuikilu kia Ngongo, muéne uambe kuila, Ngongo ueji “kituka huta ia jinjila ji dia xitu, ni ji jinjila joso ja mabhabha, ni iama ia mukáu.” (Izekiiele 39:4) Mu ku suluka, Jihova uambe: ‘Mu kizuua kienhókio, Ngôngo nga kà mu bhana mbila mu Izalaiele.’ (Izekiiele 39:11) Mu kuijiia kuila, Satanaji muthu mu nzumbi, o kuila a tena ku mu dia ku jinjila ni iama ia mixitu? Kiebhi kieji mu funda? O Bibidia ilondekesa kuila, Satanaji a-nda mu takula mu dikungu ki di moneka hole, mua-nda bhita 1.000 ia mivu. Muéne ka-nda mu dia, né ku mu funda.​—Dijingunuinu 20:1, 2.

O Bibidia ilondekesa kuila, kioso kia-nda bhita o 1.000 ia mivu, Satanaji a-nda mu jituna, mu kiki, muéne ua-nda “tunda mu kubhomba akua jixi, a di muangena mu ngongo ioso, ene Ngongo ni Mangongo. Enhá Satana ua-nda ku a bhongolola phala kuiza ku ita.” (Dijingunuinu 20:8) Maji se Satanaji muéne uexile o Ngongo, kiki kieji lombolola kuila, Satanaji ueji di nganala mudiê. Mu kiki, o “Ngongo” a mu tumbula mu divulu dia Izekiiele, ni mu divulu dia Dijingunuinu, ki Satanaji kana.

Mu kiki, nanhi Ngongo dia Mangongo? Phala ku tambuijila o kibhuidisu kiki, tua tokala ku tokuesa o Bibidia phala kuijiia, se nanhi ua-nda zukutisa o mundu ua Nzambi. O Bibidia i zuela ia lungu ni kizukutisu kia ‘Ngongo dia Mangongo,’ o kizukutisu kia ‘sobha ia thunda,’ ni kizukutisu kia ‘jisobha ja ixi.’ (Izekiiele 38:2, 10-13; Daniiele 11:40, 44, 45; Dijingunuinu 17:14; 19:19) O kuila o izukutisu íii, iene imoxi? Iene imoxi. O Bibidia i tumbula majina avulu, phala ku lombolola kizukutisu kimoxi. Mukonda diahi tua mu zuela kiki? Mukonda o Bibidia i zuela kuila, o ifuxi ioso ia ixi, a ka di bunda kumoxi mu kizukutisu kiki, kia-nda bhita ande dia ku mateka o ita ia Alumajedone.​—Dijingunuinu 16:14, 16.

Kioso ki tu sokesa o milongi ia Bibidia ia lungu ni kizukutisu kia sukina kia-nda bhita ni mundu ua  Nzambi, tu tena ku tendela kuila, Ngongo dia Mangongo, ki Satanaji. Mu veji dia kiki, Ngongo dia Mangongo, kibuka kia ifuxi. O kuila o ‘sobha ia thunda,’ muéne ua-nda kala ku pholo dia kibuka kiki? Ki tuejiia. Maji o milongi íii, ia lungu ni ima i zuela Jihova kua Ngongo: “Eie-phe ua kà tunda bhu kididi kié ku jimbandu ja kusuku, hé ua k’èza n’eie ni ifuxi ia vulu kumoxi, enoso a sambela ku jikabalu, kiònge kia dikota, kifuxi ki bhonza o ku ki tanga.”​—Izekiiele 38:6, 15.

Ia lungu ni sobha ia thunda, o polofeta Daniiele ua tungile mu izuua ia Izekiiele, uambe ué: “Maji-phe, mu kuívua kíbulukutu kia jinjimbu ji tunda ku thunda, ni ku suku, ua kà juuala; anga ua kà tunda phala kuia ni ngânji iavulu mu kujibha ni kujimisa mundu uavulu. Ua ka phapha jibalaka ja kilômbo kia mbanza iê bhu kaxi ka musanza ua kalunga ka dikota ni Mulundu ua u lamba; maji hádia o dizubhilu diê ki d’iza u mu banda ka moneka.” (Daniiele 11:44, 45) Kiki kia difu ni ima ia-nda bhanga Ngongo, kala kilondekesa o milongi mu divulu dia Izekiiele.​—Izekiiele 38:8-12, 16.

Ihi ia-nda bhita mu kizukutisu kia sukina? Daniiele u tu tangela: “Mu thembu munhá Mingedi [Jezú Kristu], kilôlo kiadikota, ua kà balumuka [mu ita ia Alumajedone], ni kuimanena [tundé ku muvu ua 1914] ku bhângela an’a kifuxi kié, bhua kà kala-phe thembu ia phaxi [o hadi ia dikota], tunde kia bhanga o muiji ua athu, kiluua i kala-ku katé kiki; maji mu thembu ienhoio, o kifuxi kié kia kà bhuluka, uoso a mu sanga dijina mu Divulu.” (Daniiele 12:1) Kiki kia difu ni milongi i tu sanga mu divulu dia Dijingunuinu 19:11-21, ia lungu ni ima ia-nda bhanga Jezú.

Maji, nanhi “Ngongo ni Mangongo,” a mu tumbula mu divulu dia Dijingunuinu 20:8? O dijina didi, dia lungu ni athu oso a-nda bhukumukina Jihova ni ku zukutisa o mundu uê, mu polova ia sukina, ku disukilu dia 1.000 ia mivu. Ene a-nda londekesa o ukexilu ua iibha ua difu ni ua Ngongo dia Mangongo, o kibuka kia ifuxi, ki zukutisa o mundu ua Nzambi, ku disukilu dia hadi ia dikota. Kála kia-nda buika o ifuxi ioso mu Alumajedone, Ngongo ni Mangongo a-nda mu buika ué. (Dijingunuinu 19:20, 21; 20:9) Mu kiki, o athu oso a-nda bhukumukina Nzambi ku disukilu dia 1.000 ia mivu, tu tena ku a exana mu dijina dia “Ngongo ni Mangongo.”

Kuma tuene mu tokuesa o Bibidia ni ku suína kuoso, etu tuala ni hanji iavulu ia kuijiia ku hádia, se nanhi o ‘sobha ia thunda.’ Sumbala ki tuejiia se nanhi ua-nda kala ku pholo mu ku zukutisa o mundu ua Nzambi, maji tuejiia ima iiadi: (1) Ngongo dia Mangongo ni kifuxi kiê a-nda ku a tolola ni ku a buika. (2) O Sobha ietu, Jezú Kristu, ua-nda bhulula o mundu ua Nzambi, ni ku a bhangesa ku bokona ku mundu uobhe, mua-nda kala o kutululuka ni ku kondama kua kidi.​—Dijingunuinu 7:14-17.