1, 2. (a) Kiebhi o ufiiele uetu kua Jihova ua lungu ni kukamba ku di ta mu maka a jinguvulu? (Tala o foto ia dianga.) (b) Ihi i zokela o athu, ni ihi i bhita mukonda dia kuzokela o ima íii?

O JISELEVENDE ja Jihova ki ji di ta mu maka a jinguvulu, mba maka a uanuna o athu, kala o maka a lungu ni kuzokela o ixi ia uvualukilu, o kikonda, mba ijila ia ixi. Mukonda diahi? Mukonda tua zolo Jihova, tu mu londekesa o ufiiele uetu ni ku mu belesela. (1 Nzuá 5:3) Né muene se a tu vualela mu ixi iéngi, anga tu tunga bhu kidi kiéngi, tu kaiela o itumu ia Nzambi. O ufiiele uetu kua Jihova ni Utuminu uê, ua beta kota, o ima ioso ndenge. (Matesu 6:33) Mu kiki, tu tena kuzuela kuila, ‘ki tu bhange mbandu ia mundu.’​—Tanga Nzuá 17:11, 15, 16; Izaia 2:4.

² Lelu, athu avulu ku mundu a zokela o ixi iâ, o diembu diâ, o ijila iâ ni kibuka kiâ kia malunda a fiti. Mukonda dia kiki, athu avulu a bhânga, a di zemba ni ku di jibha. Sumbala ki tu di te mu maka enhá, tu tena kutala hadi mukonda dia ima íii. Kuma Nzambi ua tu bhange ni kutena kua kutongolola o ima  iambote mu ima ia iibha, se ki tu dilange, tu tena ku di ta mu maka a jinguvulu, se tu mona kuila, ene ka batula kiambote o maka. (Dimatekenu 1:27; Matendelelu 32:4) Kiebhi ki u divua kioso o jinguvulu kia batula o maka mu ukexilu ua iibha? U kolokota mu ufiiele uê, mba u di ta mu maka?

3, 4. (a) Mukonda diahi ki tu di te mu maka a jinguvulu? (b) Ihi i tua-nda di longa mu milongi íii?

³ Athu avulu a di ta mu maka a jinguvulu, mukonda o jinguvulu ja a longa ku a zokela. Maji etu tua tokala kukaiela Jezú. Mukonda dia kiki, ki tuene mu di ta mu maka a jinguvulu mba ku luua ita. (Matesu 26:52) O Jikidistá ja kidi ejiia kuila, o mundu ua Satanaji ua iibha mu maukexilu oso, sé-ku mbandu iambote. (2 Kolindo 2:11) Ki tu mesena ku di ta mu maka a mundu iú.​—Tanga Nzuá 15:18, 19.

⁴ Kuma tu akua ituxi, nange tu banza ima ia iibha ia lungu ni athu a mukuá. (Jelemiia 17:9; Efezo 4:22-24) Mu milongi íii, tua-nda di longa itumu, ia-nda tu kuatekesa ku dibhana ni ibanzelu íii i uanuna o athu. Tua-nda mona ué kiebhi ki tu tena kulondekesa o ufiiele uetu ku Utuminu ua Nzambi, mu ku di longa kubanza kála ki banza Jihova ni Jezú.

5, 6. Kioso Jezú kiexile mu ixi, kiebhi kia kexile mu mona o athu ni mukonda diahi?

⁵ Se kia mu ku bhonza kukamba ku di ta mu maka a jinguvulu, ua tokala ku dibhuidisa: ‘Ihi ieji bhanga Jezú?’ Kioso Jezú kiexile mu ixi, o athu akua Judá, ni Ngalileia, ni Samádia, kexile mu dibhana kiambote. Mu kifika, o akua Judá ka kexile mu zuela ni akua Samádia. (Nzuá 4:9) O Jifalizeu ni Jisaduseu, ka kexile ni ibanzelu imoxi. (Ikalakalu 23:6-9) O Jijudé a di longele o Kitumu, akexile mu banza kuila, ene a betele kota, akuâ ndenge. (Nzuá 7:49) Athu avulu a zembele o akua kutambula lubhaku ni akua Loma. (Matesu 9:11) Maji Jezú ka di te mu maka enhá. Sumbala muéne ua kexile mu zokela o kidi kia lungu ni Jihova, uejidile ué kuila o kifuxi kia Izalaiele kia tokalele kua Nzambi, muéne ka tangela o maxibulu mê kuila, ene a betele kota o akua ndenge. (Nzuá 4:22) Mu veji dia kiki, muéne ua a longo kuzola o athu oso.​—Luka 10:27.

⁶ Mukonda diahi Jezú ka zangeleka kibuka kia athu? Mukonda muéne ni Tat’ê, a zolo o athu oso. Jihova ua bhange o athu phala ku izalesa o ixi ni athu a ikonda ioso. (Dimatekenu 1:27, 28) Mukonda dia kiki, Jihova ni Jezú a mona o ikonda, ni jixi joso, ni madimi oso mu ukexilu umoxi. (Ikalakalu 10:34, 35; Dijingunuinu 7:9, 13, 14) Tua tokala kukaiela o phangu iâ ia iuka.​—Matesu 5:43-48.

7, 8. (a) Utuminu uebhi u tu zokela ni mukonda diahi? (b) Ihi i tua tokala ku lembalala ia lungu ni kubatula o maka oso ene mu bhita nau o athu?

 ⁷ Mukonda diahi ki tu zokela o jinguvulu? Mukonda tu zokela o Utuminu ua Jihova. Muéne o Nguvulu ietu. Mu Jaludim ia Edene, Satanaji ua zuelele kuila, Jihova kejiia kutumina o athu. Satanaji ua mesenene kuila, o athu a xikina kuila, o ukexilu uê ua kubhanga o ima ua beta kota, ua Nzambi ndenge. Jihova u tuehela kusola o nguvulu ietu. Abha eie? O kuila u belesela Jihova mukonda u xikina kuila, o ukexilu ua Nzambi ua kubhanga o ima ua beta kota, o uê ndenge? O kuila u xikina kuila o Utuminu uê uene ngó u tena kubatula o maka oso u tuene mu bhita nau? Mba u banza kuila, o athu a tena ku di tumina mudiâ, sé ku a endesa kua Nzambi?​—Dimatekenu 3:4, 5.

⁸ Mu kifika, se muthu u ku ibhula o ima i u banza ia lungu ni kibuka kia jinguvulu, kiebhi ki ueji tambuijila? Saí ibuka ia jinguvulu, a mesena muene ku kuatekesa o athu. Maji tuejiia kuila, o Utuminu ua Jihova uene ngó u tena kubatula o maka oso ene mu bhita nau o athu. Tu kaiela ué o itendelesu ia Jihova mu kilunga, mu veji dia kubhanga o ima i tua mesena. Mukonda dia kiki, o athu mu kilunga a di zolo.

9. Ihi ia kexile mu bhita ni Jikidistá ku hama ia dianga, ni ihi ia tokalele kubhanga?

⁹ Ku hama ia dianga, saí Jikidistá mu mbanza ia Kolindo akexile mu zoka mudiâ mu kuzuela: “Eme ngi mukua Phaulu; o iú uixi: Eme ngi mukua Apolo; o iú uixi: Eme ngi mukua Phetele; o iú uixi: Eme ngi mukua Kristu.” Kioso Phaulu kiévu o maka iá, ua divu kia iibha. Iá exile maka a dikota, mukonda akexile mu katula o kutululuka mu kilunga. Mu kiki, muéne uebhula o jiphange jê: “Kifua Kristu ua di muangununa ku jimbandu-jimbandu?” Phaulu ua a tendelesa: “Nga mi diondo-phe, jiphange, mu dijina dia Ngana ietu Jezú Kristu, kuila mu d’ivua jinga kiambote mu kuzuela, ki mu kale mu kudiuana-uana ku ibuka-ibuka mudienu. Inda mu kala kumoxi kiambote mudienu, mu kala ni kilunji kimoxi, mu fika kiene kimoxi.” Lelu ué kiene. O athu mu kilunga ka tokala ku di uanuna mu ibuka.​—1 Kolindo 1:10-13; tanga Loma 16:17, 18.

10. Ihi ia lembalesa Phaulu ku Jikidistá, ni ihi i tu di longa mu phangu íii?

¹⁰ Phaulu ua lembalesa o Jikidistá a a undu kuila, ene a tokala ku diulu, ni kuila, ka tokala kubanza mu ‘ima iala bhoxi.’ (Filipe 3:17-20) * (Tala ku luiji.) O Jikidistá a a undu, akunji a Nzambi ni Kristu. Se o mukunji uia mu kalakala ku ixi iéngi, muéne ka di ta mu maka a jinguvulu ja ixi ienioió. Kiene ué kimoxi, o Jikidistá a a undu ka di te mu maka a mundu iú. (2 Kolindo 5:20) O athu a dielela kutambula o muenhu ua  kalela-ku mu ixi, a londekesa ué o ufiiele uâ ku Utuminu ua Nzambi, mu kiki, ene kene mu di ta mu maka a jinguvulu.

11, 12. (a) Ihi i tua tokala kubhanga se tua mesena kukolokota mu ufiiele uetu ku Utuminu ua Nzambi? (b) Kiebhi kia kexile mu divua o phange ia muhatu ia lungu ni athu a tokala ku ixi ia Sérvia, ni ihi ia mu kuatekesa?

¹¹ Mu jixi javulu ku mundu, o athu a divua kiambote kioso kia disanga ni akua ixi iâ, ala ni ijila imoxi kala ene, mba a zuela o dimi dimoxi. Ene a dizangeleka mukonda dia ixi iâ. Maji etu ki tu tokala kukaiela o ukexilu iú. Mu veji dia kiki, tua tokala kulonga o kitongoluelu kietu phala ki tu di te ué mu maka enhá. Kiebhi ki tu tena kubhanga kiki?

¹² Mu kifika, Mirjeta * (tala ku luiji) a mu vualela mu ixi ia Iugoslávia. Bhu kididi bhua kudila, o athu a zembele akua Sérvia. Kioso kia di longo o kidi kia lungu ni Jihova, muéne ua mono kuila, Nzambi ka zangeleka kikonda, ni kuila, Satanaji ua mesena kuila, o athu a di zemba. Muéne ua bhange ioso phala kuehela o ibanzelu ia iibha. Maji kioso kia mateka o nvunda bhu kaxi ka jixi ja mu kondolokele, Mirjeta ua mateka dingi ku zemba o akua Sérvia. Muéne ka mesenene dingi ku a bokela o njimbu iambote. Muéne uejidile kuila, kima kia iibha, mukonda dia kiki, muéne ua sambe kua Jihova phala ku mu kuatekesa kukatula o ibanzelu íii ku muxima. Muéne ua bhingi ué phala ku mu kuatekesa ku mateka o sidivisu ia thembu ioso. Mirjeta uambe: “Nga mono kuila, o ku di bhakula mu sidivisu ia kuboka ku kuatekesa kiavulu. Ki ngia mu boka ngi di suínisa kukaiela o phangu ia henda ia Jihova, mu kiki, bhofele bhofele, o ixinganeku ia iibha ia bhu.”

13. (a) Ihi ia bhiti ni Zoila, ni ihi ia bhange? (b) Ihi i tu tena ku di longa mu phangu ia Zoila?

¹³ Phange Zoila, ua tokala ku ixi ia México, maji ua tungu ku Europa. Mu kilunga kiê muala jiphange ja tokala ué ku América Latina. Zoila uambe kuila, amoxi mudiâ akexile mu xonguena o ixi iê, o ijila ni mimbu ia ixi iê. Muéne uexile mu kala ni njinda iavulu, mu kiki, ua bhingi kikuatekesu kua Jihova, phala ka divue dingi kia iibha. Ihi i tueji bhanga se tua kexile mu bhita ni maka iá? Saí jiphange a bhânga hanji phala ka divue kia iibha kioso o athu kia zuela ima ia iibha ia lungu ni ixi iâ. Mu kiki, ki tu mesena kuzuela mba kubhanga kima kilondekesa kuila, tua mu zangeleka kibuka kia athu. Ki tu mesena ué kubhangesa o kilunga mba o athu a tu kondoloka, ku di uanuna mu ibuka ibuka.​—Loma 14:19; 2 Kolindo 6:3.

14. Ihi i tena ku u kuatekesa ku banza kála Jihova?

¹⁴ Etu enioso tuejiia kuila o jiselevende ja Jihova a di zolo, ala kala mundu umoxi ngó, mu kiki, ki tu tokala ku divua kala o ixi imoxi mba diembu, dia beta kota o dia mukuá ndenge. Maji nange o muiji uê mba o athu bhu kididi bhu ua kulu, a ku longo kuzola o diembu diê. Mu kiki, nange saí ithangana u banza hanji ima ia iibha ia lungu ni jixi, ijila, madimi ni ikonda ia athu engi. Ihi i tena ku u kuatekesa ku lungulula o ibanzelu iê? Xinganeka kiebhi ki divua Jihova ia lungu ni athu a dizangeleka mukonda dia ixi iâ,  mba a banza kuila ene a beta kota, o akua ndenge. Tokuesa o maka enhá kioso ki u di longa ubheka uê, mba ki u bhanga o ubhezelu uê ku muiji. Mu ku suluka, bhinga kua Jihova phala ku u kuatekesa kubanza kála muéne.​—Tanga Loma 12:2.

15, 16. (a) Ihi ia-nda bhanga o athu kioso kia-nda mona kuila, ki tua mu bhanga o ima ia mesena? (b) Kiebhi o jitata ji tena kukuatekesa o tuana tuâ ku kolokota mu ufiiele uâ kua Jihova?

¹⁵ Tua mesena ku sidivila Jihova ni kitongoluelu kia zele, mukonda dia kiki, saí ithangana ki tua-nda xikina kubhanga o ima ia mesena o jikoleka jetu ja salu ni ja xikola, o jivizinhu jetu, mba jindandu jetu. (1 Phetele 2:19) Jezú ua tu tangela kuila, saí athu, a-nda tu zemba mukonda dia kukamba kubhanga o ima ia mesena. Lembalala kuila o athu a tu zukutisa, kejiia o kidi kia lungu ni Nzambi ni Utuminu uê. Mu kiki, ene kejiia o valolo ia kulondekesa o ufiiele uetu ku Utuminu ua Nzambi, mu veji dia ku dielela o jinguvulu mu ixi.

¹⁶ Phala kulondekesa o ufiiele uetu kua Jihova, tua tokala ku mu belesela, né muene se o athu a tu zuela mba a tu bhanga ima ia iibha. (Daniiele 3:16-18) Nange ki bhonza phala o minzangala kudituna kubhanga o ima i bhanga akuâ. Enu mu jitata, kuatekese-nu o tuana tuenu kulondekesa o kusuína bhu xikola. O tuana nange a kala ni uôma ua kudituna ku fukamena o dibandela,  mba kubhanga o ima ia mukuá ia lungu ni jifesa ia jinguvulu. Ku ubhezelu uenu ku muiji, mu tena ku di longa kiebhi Jihova kia mona o ima íii. Longenu o tuana tuenu ku jimbulula kiambote o ima ia lungu ni kixikanu kiâ, ni ku xila kuoso. (Loma 1:16) Se ki bhinga, kuatekese-nu ué o tuana tuenu, mu kuzuela ni jimesene jâ, phala ku a jimbulula o ima ia lungu ni kixikanu kietu.

17. Ukexilu uebhi ua kubanza u tua tokala ku xisa?

¹⁷ Etu tua uabhela o kudia, o dimi, o ima ni ijila ia ixi mu tua kudila. Maji o kuila tu divua kuma o ima i tua uabhela ia beta kota, o ima ia uabhela akuetu ndenge? Jihova ua mesena kuila, tu katula mbote mu ima ioso ia bhange. (Jisálamu 104:24; Dijingunuinu 4:11) Mu kiki, mukonda diahi tua mu kolokota mu kubanza kuila, o kima kiki kia beta kota, o kia mukuá kana?

18. Mukonda diahi kima kiambote kumona akuetu kála kia mona Jihova?

¹⁸ Jihova ua mesena kuila o athu oso a di longa o kidi kia lungu ni muéne, a mu bheza ni kutambula o muenhu ua kalela-ku. (Nzuá 3:16; 1 Timote 2:3, 4) Se o ima ia mu zuela o jiphange ia lungu ni vondadi ia Jihova, tua tokala kuívua, né muene se ki i difu ni ima i tu banza. Se tu bhanga kiki, tua-nda sanguluka ku muenhu, tua-nda kolokota kukala kumoxi ni jiphange jetu. Kala ki tua di longo kiá, ki tuene mu di ta mu maka a jinguvulu, mukonda tua mesena kulondekesa o ufiiele uetu kua Jihova. Tua zembe o ukexilu ua ku di zangeleka ni ua ku di sokesa ni athu a mukuá, u tuene mu mona ku mundu ua Satanaji. Tu sakidila Jihova, mukonda muéne ua tu longo kuzola o kutululuka ni kukala tu athu a lenduka! Tu divua kála o mukua Jisálamu ua zuela: “Kidi bá! kima kia fuama, kia di uabhela kiambote, ki u sanga jiphange a takana mu muxima umoxi!”​—Jisálamu 133:1.