1, 2. Ihi iene mu kingila o jiselevende ja Jihova?

O JISELEVENDE ja Jihova ene mu kingila ni muanhu uoso, o kikumbidilu kia ikanenu ioso. Mu kifika, Jelemiia ua kexile mu kingila o akua Babilonha kubuika o mbanza ia Juda, kiene muene kia bhiti ku muvu ua 607 A.K.K. (Jelemiia 25:8-11) Izaia ua kanene kuila, Jihova ueji bhulula o akua Judá ku ubhika, ni ku a bheka dingi ku ixi iâ, muéne uambe: “A zediua oso a kinga kua Muene.” (Izaia 30:18) Mikeia uexile mu kingila Jihova ku kumbidila o ikanenu iê, muéne uambe: “Eme-phe o Jihova muene-muène nga kà mu kinga.” (Mikeia 7:7) Ku hama ni hama ja mivu, o jiselevende ja Nzambi a dielele kuila, o Mexiia, mba Kristu a mu kanene, ueji kuíza.—Luka 3:15; 1 Phetele 1:10-12. * (Tala ku luiji.)

² Lelu, tua mu kingila ué o kikumbidilu kia ikanenu ia lungu ni Utuminu ua Jihova. Kua kambe ngó bhofele, Jezú, o Sobha  ia Utuminu, ua-nda bhulula o jiselevende joso ja Nzambi ku mundu iú ua iibha. Muéne ua-nda buika o athu oso a iibha ni kuzubha o hadi ioso. (1 Nzuá 5:19) Mu kiki, tua tokala kukolokota mu kukingila o kizuua kia Jihova, ni kubhanga ioso phala kukala polondo kioso kia-nda kuíza o kizuua kiki.

3. Se tuala kiá thembu iavulu mu kukingila o dizubhilu, kibhuidisu kiebhi ki tu tena o kubhanga?

³ Tua mu kingila o kithangana kioso o vondadi ia Nzambi, kia-nda ku i bhanga mu ixi. (Matesu 6:10) Maji se tuala kiá mivu iavulu mu kukingila o dizubhilu, nange tu tena ku dibhuidisa: ‘Mukonda diahi tua tokala ku kolokota mu kukingila o dizubhilu?’

4. Mukonda diahi tua tokala kukolokota mu ‘ku di langa?’

⁴ Jezú ua tumina o akaiedi iê ‘ku di langa’ ni ku ‘aluka.’ Mukonda dia kiki, kima kiambote kukolokota mu kukingila o dizubhilu. (Matesu 24:42; Luka 21:34-36) O kilunga kia Jihova, kiene mu tu bhana milongi i tu kuatekesa ku “kinga o Kizuua kia Nzambi kiandù tukuluka kindala,” ni ku kolokota mu ku xinganeka mu kikanenu kia Jihova kia lungu ni mundu uobhe.—Tanga 2 Phetele 3:11-13.

5. Ima iahi i tu bhangesa kukolokota mu kukingila o kizuua kia Jihova?

⁵ Ku hama ia dianga, o akaiedi a Jezú exile mu kingila o kizuua kia Jihova, lelu, etu tua tokala ué kukolokota mu kukingila o kizuua kiki. Mukonda diahi? Mukonda o kijimbuete kia bhanene Jezú, kilondekesa kuila, muéne ua mu tumina kala Sobha ia Utuminu ua Nzambi tundé ku muvu ua 1914, ni kuila, tuala mu izuua i sukidila-ku, mba “dizubhilu dia mundu.” Mu kifika, kala kia kanene Jezú, o ibhidi ku mundu ia mu dibandekesa dingi, o njimbu iambote ia Utuminu a mu i boka mu jixi joso. (Matesu 24:3, 7-14) Jezú ka zuela o thembu ieji bhua o izuua ia sukidila-ku, mu kiki, tua tokala kukala polondo, mukonda o dizubhilu di tena kuíza mu kithangana kioso-kioso.

6. Kiebhi ki tuejiia kuila, o kuiibha ku mundu kua-nda di bandekesa kioso o dizubhilu ki diia ni kuzukama?

⁶ O kuila o “dizubhilu dia mundu,” dia lungu ni kithangana ku hádia, kioso o kuiibha kua-nda di bandekesa dingi mu ixi? O Bibidia i zuela kuila, mu “izuua isukidila-ku,” o athu a-nda kolokota mu kubhanga ima ia iibha. (2 Timote 3:1, 13; Matesu 24:21; Dijingunuinu 12:12) Mu kiki, sumbala lelu o kuiibha kuavulu, tuejiia kuila, o ima ia iibha ia-nda di bandekesa dingi.

7. Ihi i tu longa o divulu dia Matesu 24:37-39, ia lungu ni izulukutu i bhita mu izuua isukidila-ku?

⁷ Saí athu nange a banza kuila, ande dia ku mateka o “hadi ia dikota,” kua-nda bhita ita mu jixi joso, ni kuila, athu avulu a-nda kata, mba kua-nda kala nzala iavulu. (Dijingunuinu 7:14) Maji se kiki ki bhita, o athu oso a-nda tena kumona o kikumbidilu kia kikanenu kia Bibidia. Katé muene ni athu kene mu di longa o Bibidia, a-nda tena kuijiia o kidi kiki. Maji Jezú uambe kuma, saí athu keji ‘kuijiia kima.’ Ene eji suluka ni kubhanga o ima iâ ia muenhu, mu kiki, kioso kieji kuíza o kizuua kia Jihova, ene eji tukumuka. (Tanga Matesu 24:37-39.) Mu kidi, ki tu tokala kukingila kuila, o kuiibha ku dibandekesa dingi kiavulu, ande dia kuíza o “hadi ia dikota,” phala o athu kumona kuila, o dizubhilu dia zukama.​—Luka 17:20; 2 Phetele 3:3, 4.

8. Mukonda dia kuijiia kiambote o ijimbuete iambe Jezú, ihi i tu xikina?

 ⁸ Jezú ua bhanene o kijimbuete ku maxibulu mê, phala ku a dimuna mu izuua ienioió. O akaiedi a Jezú ene mu di langa. (Matesu 24:27, 42) Tundé ku muvu ua 1914, izulukutu iavulu ia lungu ni kijimbuete kia bhanene Jezú kia mateka ku dikumbidila. Etu tu xikina ni kidi kioso kuila, tuala ku disukilu dia “izuua i sukidila-ku.” Jihova uejiia kiambote o kizuua kia-nda buika o mundu iú ua iibha ua Satanaji.

9. Mukonda diahi tua tokala kukolokota mu kukingila o dizubhilu dia mundu iú?

⁹ Mukonda diahi tua tokala kukolokota mu kukingila o dizubhilu dia mundu? Mukonda tuene mu belesela Jezú Kristu. Mu kidi, tu tena kumona o ijimbuete ia zuelele Jezú ia lungu ni izuua isukidila-ku. Etu ki tu xikina kuila o dizubhilu dia zukama, mukonda dia ima i tuívua, maji tu xikina mukonda tuejiia kuila, o kikanenu kia Bibidia kia mu di kumbidila. Tua tokala ku di langa ni kukala polondo, mukonda o dizubhilu dia zukama.

10, 11. (a) Mukonda diahi Jezú ua dimuna o maxibulu mê phala ‘ku di langa?’ (b) Itendelesu iebhi ia bhanene Jezú ku maxibulu mê, se a monene kuila o dizubhilu ki dia tula mu kithangana kia ki fikile? (Tala o foto ia dianga.)

¹⁰ Athu avulu mudietu ene mu sidivila Jihova ni ufiiele uoso, ni kukingila o kizuua kiê mu mivu iavulu. Ki kale se tuene mu kingila kiá o kizuua kiê mu mivu iavulu mba kana, tua tokala kukolokota mu kukingila o kizuua kiki, mukonda kua kambe ngó bhofele, o kizuua kiki kia-nda kuíza. Etu tua tokala kukala polondo, phala o kizuua kia-nda kuíza Jezú, ku buika o mundu ua Satanaji. Lembalala o kitendelesu kia bhanene Jezú ku maxibulu mê, kioso kiambe: “Alukenu-phe, mu langidile, mu sambe; kuma o thembu ki mua ijiia. Kià kela mukuâ ni muthu uaii mu uenji, k’oxi iengi, u xa dibhata diê, u lekela akua mbéle, hé u a uanena kala muthu ni kikalakalu kiê, o mukua muelu hé u mu tuma o kulangidila. Langidilenu-phe! Kuma kithangana kioso hinu k’iza ngana ia dibhata, ki mua kijiia, mba ku kièmba, mba mukaxi ka usuku, mba mu makolombolo, mba mu kimene; phala ki ki bhite kuila sumba uiza ku mbulu n’a mi sange muaienu ku kilu! Kioso ki nga mi tangela enu, ene oso nga a tangela-kiu: Di langienu!”—Marku 13:33-37.

¹¹ Kioso o akaiedi a Jezú kia mono kuma Jezú ua matekene o kutumina ku muvu ua 1914, ene a mono kuila, o dizubhilu dieji kuíza mu kithangana kioso-kioso. Mukonda dia kiki, ene a mateka ku di pelepalala kiambote phala o kizuua kiki, mu kuboka ni kusuína kuoso. Jezú uambe kuila, muene ueji kuíza “mu makolombolo, mba mu kimene.” Mukonda dia kiki, ihi ia tokalele o kubhanga o maxibulu mê? Jezú uambe: “Di langienu.” Mu kiki, né muene se tu mona kuila tuala kiá mivu iavulu mu kukinga o dizubhilu, ki kilombolola kuila, o dizubhilu diala hanji dikanga, mba ki dia-nda kuíza mu izuua ietu.

12. Kibhuidisu kiebhi kia bhangele Habakuke kua Jihova, ni kiebhi Nzambi kia mu tambuijila?

 ¹² O polofeta Habakuke ua kingile ni muanhu uoso, kioso kiai ni kuboka o kibuikilu kia Jeluzaleme. O jipolofeta ja mukuá ja tuamene, a bokele ué ia lungu ni njimbu íii mu mivu iavulu. Habakuke ua mono o kuiibha ku dibandekesa mu izuua iê, m’ukulu ndenge. Muéne ua sambe kua Jihova mu kubhinga kikuatekesu, iú uebhula: ‘Ngi dikola katé bhebhi, Jihova, mu kubhinga kikuatekesu?’ Sumbala Jihova ka mu tangele o kithangana kieji kuíza o dizubhilu, muéne ua kanene Habakuke: “Ki kia-nda ku kokoloka, kana.” Jihova uambela Habakuke: “Kinga na-kiu.”​—Tanga Habakuke 1:1-4; 2:3.

13. Nange ihi ieji banza Habakuke, ni mukonda diahi kieji kala kiluezu kia dikota kubanza kiki?

¹³ Xinganeka se Habakuke ua bhuile mu kukinga o dizubhilu, anga u zuela: ‘Ngene mu kingila o kibuikilu kia Jeluzaleme mu mivu iavulu. O dizubhilu ki dia-nda kuíza kindala. Ki ngi bhingi kusuluka ni kuboka o njimbu íii. Athu a mukuá a tena kubhanga o kikalakalu kiki.’ Ihi ieji bhita se muéne ua banzele kienhiki? Muéne ueji texa o ukamba uê ni Jihova. Se ka di langele, mu kithangana kiéza o dizubhilu, muéne ueji fuá.

14. Mukonda diahi tua-nda sakidila Jihova, mukonda dia ku tu dimuna phala kukolokota kukinga o dizubhilu?

¹⁴ Dixinganeke ku mundu uobhe. O izulukutu ioso io kanene mu Bibidia, ia lungu ni izuua isukidila-ku, ia bhiti muene kala kia zuelele Jihova. O kidielelu kiê kua Jihova kia-nda dibandekesa dingi, ua-nda dielela kuila, Jihova ua-nda kumbidila o ikanenu ia mukuá ia bhange. (Tanga Josuué 23:14.) Eie u sakidila kiavulu Jihova, mukonda dia kukumbidila o kikanenu kiê kia lungu ni dizubhilu mu kithangana kia tokala, ni ku dimuna o mundu uê phala kukolokota mu kukinga o dizubhilu.​—Ikalakalu 1:7; 1 Phetele 4:7.

15, 16. Mukonda diahi tua tokala kubhanga ioso mu sidivisu ia kuboka, mu izuua íii isukidila-ku?

¹⁵ O kilunga kia Jihova kia-nda suluka ni ku tu dimuna, phala ku tu kuatekesa kukolokota kusidivila Jihova. O itendelesu íii, i tu kuatekesa kukolokota mu sidivisu ia Nzambi, i tu suínisa ué kuboka o njimbu íii ni lusolo luoso. Etu tu xikina ni kidi kioso kuila, o kijimbuete kia londekesa Jezú, kia  mu di kumbidila lelu, ni kuila, o dizubhilu dia zukama. Mu kiki, tu bhanga ioso phala ku ta Jihova ku pholo, ni kukolokota mu kuboka o njimbu iambote ia lungu ni Utuminu.​—Matesu 6:33; Marku 13:10.

¹⁶ Kioso ki tu boka o njimbu iambote ku akuetu, tu a kuatekesa kubhuluka ku kibuikilu kia mundu iú ua Satanaji, kia zukama. Ku muvu ua 1945, o baluku Wilhelm Gustloff ia boba mu menha a kalunga, kiki kiene o kizulukutu kia dikota kia bhiti mu menha a kalunga, ku mundu uoso. Midi ni jimidi ja athu afu. Saí phange ni munumi’ê, a bhuluka. Muéne ua zuela kuila, kioso o baluku kia kexile mu boba, saí muhatu ua kexile mu dikola: “O imbamba iami! O imbamba iami! O misanga iami ia ulu! O misanga iami ioso ia ulu, ia xala mu dixilu dia baluku. O ima iami ioso ia diboto!” Maji o athu a mukuá ejidile o kima kia betele kota, mu kiki, a bhange ioso phala kubhulula o athu. Athu avulu lelu, ala mu kiluezu. Etu tua mesena kukaiela o phangu ia athu a kuatekesa akuâ, ni ku bhanga ioso phala kubhanga o kikalakalu kietu kia kuboka, mukonda kua bhingi ku ki bhanga ni lusolo. Tua tokala kubhanga ioso, phala kukuatekesa o athu kubhuluka ku dizubhilu dia mundu iú.

17. Mukonda diahi tua tokala ku dielela kuila, o dizubhilu di tena kuíza mu kithangana kioso-kioso?

¹⁷ Tu tena kumona kuila, o ikanenu ia Bibidia ia mu dikumbidila, ni  kuila, o dizubhilu dia mundu iú ua iibha, dia zukama kiá. Tua mu kinga kioso o “kuinhi dia lumbinga,” ni “kiama” kia muxitu, kia-nda buika o jingeleja ja makutu, mba o Babilonha ia Dikota. (Dijingunuinu 17:16) Ki tu tokala kubanza kuila, kua bhingi kubhita thembu iavulu phala kubhita o kizulukutu kiki. Kana ku di jimba kuila, Nzambi ‘ua-nda ta ku mixima iâ,’ o hanji ia kubuika o jingeleja ja makutu, ni kuila, kiki ki tena kubhita mu kithangana kioso-kioso! (Dijingunuinu 17:17) O dizubhilu dia mundu ua Satanaji dia zukama. Mukonda dia kiki, tua tokala kubelesela o kitendelesu kia Jezú, kiambe: ‘Alukenu-phe, ki mu di jimbe! Mixima ienu ni i biluke ia neme ni kúdia jifesa, ni kunua uhôlua, ni makubhindama ma muenhu iú, kizuua kiókio ni ki mi tukumukise kala mubhetu.’ (Luka 21:34, 35; Dijingunuinu 16:15) Tua tokala kukolokota mu ku dilanga ni kubhanga o sidivisu ia Jihova mu ku dielela kuila, muéne ua-nda bhulula “uoso u kinga kua muene.”—Izaia 64:4.

18. Kibhuidisu kiebhi ki tua-nda tambuijila mu milongi ia-nda kaiela?

¹⁸ Kioso ki tuia ni kukingila o dizubhilu dia mundu iú ua iibha, tua tokala kukaiela o kitendelesu kia bhanene o dixibulu Juda, kioso kiambe: “Enu-phe, akuetu, nga mi zola, suinenu ni kuia dingi ku pholo mu kuxikana kuenu ku muala na-ku, kuma kiene o kixikanu kikôla ki mua kuata. Muila ni kusamba jinga mu ngunzu ia nzumbi ikôla. Phala mu suíne ni ku dibhaka mu henda ia Nzambi, ni kukinga o kulenduka kua Ngana ietu Jezú Kristu katé kia mi bhana o muenhu ki uábhua.” (Juda 20, 21) Maji kiebhi ki tu tena kulondekesa kuila, tua mu kingila o mundu uobhe ua Nzambi, ni kuila, tua mesena kutunga ku mundu iú? Tua-nda di longa ia lungu ni maka enhá mu milongi ia-nda kaiela.