1, 2. (a) Mukonda diahi eie u xikina kuila, Jihova ua zolo o mundu uê? (b) O athu a a bhange ni kibhindamu kiahi?

MUKONDA diahi eie u xikina kuila, Jihova ua zolo o mundu uê? Ande dia kutambuijila o kibhudisu kiki, xinganeka mu ifika íii: Ku mivu iavulu, o jiphange a kuatekesa phange ia muhatu a mu ixana Taylene. Ene a mu tangela kuila, ka tokala ku di jijidika kiavulu. Muéne uambe: “Se Jihova ka ngi zolele, muéne keji kolokota mu ku ngi bhana itendelesu bhu kaxi ka jiphange.” Brigitte, ua fundu o diiala, anga u sasa tuana tuiadi ubheka uê, uambe: “Ku bhonza kiavulu kusasa o an’a ku mundu iú ua Satanaji, bhenge bhenge se uala ubheka uê, mba sé kaza diê. Ngejiia kuila Jihova ua ngi zolo, mukonda muéne uene mu ngi kuatekesa mu ithangana ia bhonzo, ni kuila, muéne ka ng’ehela ku di bhana ni ibhidi ia tundu o nguzu iami.” (1 Kolindo 10:13) Sandra, uala ni uhaxi ua kambe o milongo. Saí phange ua londekesa o henda kua Sandra mu kiônge kia dikota. O munumi ua Sandra, uambe: “Sumbala ki tu muijidile, o henda ia londekesa, ia tu bhekela kisangusangu kia dikota. Né muene se  o jiphange ji ngi bhangela ima iofele, o ima ia bhanga i ngi kuatekesa kumona kuila, Jihova ua tu zolo kiavulu.”

² Jihova ua bhange o athu ni kibhindamu kia kuzola akuâ, ni ku divua ué kuila a a zolo. Maji tu tena ku luuala mukonda dia uhaxi, dia kukamba kitadi, mba mukonda dia kukamba kusanga athu a mesena kuívua o kidi kia Bibidia, kioso ki tuia mu ukunji. Se tu mateka ku divua kala Jihova ka tu zolo dingi, tua tokala ku lembalala kuila, muéne u tu bhana valolo iavulu, ni kuila, uala polondo, ua kuata o lukuaku luetu lua kadilu phala ku tu kuatekesa. Se tu kolokota mu ufiiele uetu, muéne ka-nda tu jimba.​—Izaia 41:13; 49:15.

3. Ihi i tena ku tu kuatekesa ku xikina ni kidi kioso kuila, Jihova uene mu tu londekesa o henda?

³ O athu u tua tange ku dima ejidile kuila, Nzambi ua kexile mu ku a kuatekesa mu ithangana ia bhonzo. Etu tu tena ué kudielela kuila, muéne uala ku mbandu ietu. (Jisálamu 118:6, 7) Mu milongi íii, tua-nda di longa maujitu a uana a londekesa kuila, Jihova ua tu zolo: (1) o ibhangelu iê, (2) o Bibidia, (3) o musambu, ni (4) sata ia kukula. O kuxinganeka mu henda iene mu londekesa Jihova, ku tu suínisa ku mu sakidila kiavulu, mukonda dia henda iene mu tu londekesa.—Tanga Jisálamu 77:11, 12.

4. O ibhangelu ia Jihova i tu longa ihi?

⁴ Kioso ki tu tonginina o ibhangelu ia Jihova, tu mona kuila, muéne ua tu zolo kiavulu. (Loma 1:20) Mu kifika, Jihova ka bhange ngó o ixi phala ku tu kuatekesa kukala ku muenhu. Muéne ua tu bhana o ima ioso i tua bhingi phala kusanguluka ku muenhu. Tua bhindamena kudia, maji mu veji dia ku tu bhana ngó kima kimoxi phala kudia, Jihova ua tu bhana kudia kuavulu, phala tu sanguluke kioso ki tu dia! (Ndongixi 9:7) Phange Catherine, ua tungu mu ixi ia Canadá, ua uabhela kumona o ibhangelu ia Jihova, bhenge bhenge mu thembu ia mvula. Muéne uambe: “Mu kithangana kienhiki, o ithulu i sabhuka, o jinjila jendele mu ididi iéngi ji vutuka, saí jinjila jiza katé ku njanela ia inzo iami phala kudia. Se Jihova ka tu zolele, muéne keji bhanga o ima ioso íii, i tu sangulukisa.” Tata ietu ua zolo o ibhangelu iê, mu kiki, muéne ua mesena kuila tu sanguluka ué ni ima íii.—Ikalakalu 14:16, 17.

5. Kiebhi o ukexilu ua bhange o athu, ulondekesa o henda ia Jihova?

⁵ Jihova ua tu bhana o uhete ua kubhanga kikalakalu kiambote, ni kusanguluka ni ima i tu bhanga. (Ndongixi 2:24) Muéne ua tu bhana o kikalakalu kia kuizalesa o ixi ni athu, ku i dima, kulanga o jimbiji, ni jinjila, ni ima ia mukuá iala ni muenhu, i tu sanga mu ixi. (Dimatekenu 1:26-28) Muéne ua tu bhange ué ni ídifua iambote, phala tu tene kukaiela o phangu iê!—Efezo 5:1.

6. Mukonda diahi tua tokala ku xinganeka mu Mak’â Nzambi?

⁶ Jihova ua tu bhana o Bibidia, mukonda ua tu zolo kiavulu. Iene i tu tangela o ima i  tua tokala o kuijiia ia lungu ni Nzambi, ni kiebhi kia mona o athu. Mu kifika, o Bibidia i tu tangela kiebhi kia divu Jihova, kioso o akua Izalaiele akexile mu ku mu bhukumukina. O divulu dia Jisálamu 78:38 di zuela: “Muene-phe mu kulenduka kuê, u a loloka o kubhukumuka kuâ, ka xikina ku a buikisa; u ki bhanga, u tona, kia kusosolola o njinda iê, né ua vunzuka ni kutema kuê, ka zubha.” O ku xinganeka mu velusu íii, kukuatekesa kumona kuila Jihova ua ku zolo, ni kuila, muéne u kulanga. Tu tena ku xikina ni kidi kioso kuila Jihova u tu langa.—Tanga 1 Phetele 5:6, 7.

7. Mukonda diahi tua tokala kubhana valolo ku Bibidia?

⁷ Tua tokala kubhana valolo iavulu ku Bibidia. Mukonda diahi? Mukonda Jihova u zuela n’etu bhu kaxi ka Bibidia. Se tata ni  mona a di zuelesa mu ithangana ioso, ene a di zola dingi, a di dielela ué kiavulu. Jihova Tata ietu ia henda. Sumbala ki tu tena ku mu mona ni mesu mba kuívua o dízui diê, kioso ki tu tanga o Bibidia muéne u zuela n’etu. Tua tokala kukolokota mu ku muivua. (Izaia 30:20, 21) Se tu tanga o Bibidia, tua-nda kuijiia ni ku dielela Jihova, o Nzambi i tuendesa ni ku tu langa.—Tanga Jisálamu 19:7-11; Jisabhu 1:33.

8, 9. Jihova ua mesena kuila, tuijiia ihi? Bhana phangu ia Bibidia.

⁸ Jihova ua mesena kuila, tuijiia kuma muéne ua tu zolo, ni kuila muéne kene mu mona ngó o ídifua ietu ia iibha. Muéne u sota kumona o ídifua iambote i tuala na-iu. (2 Malunda 16:9) Tu mone kiebhi Jihova kia soto kumona o ídifua iambote ia Sobha Jozafate mukua Judá. Jozafate ua bhangele kima kia iibha, mukonda ua solo ku dibunda ni Sobha Akabe, mukua Izalaiele, phala kubhânga ni akua Sídia mu mbanza ia Lamote-Ngiliiadi. Sumbala 400 ja jipolofeta ja makutu, a tangele Akabe kuila muéne ueji tolola o jinguma jê, maji o polofeta ia kidi ia Jihova, a mu ixana Mika, ua tangela Jozafate ni Akabe kuila, se endele mu luua ita, o jinguma jâ jeji ku a tolola. O ima ia bhiti muene kala kia ki tangele. Akabe uafu mu ita, Jozafate ua bhuluka, maji kua kambele ngó phala kufua. Kioso kia bhu o ita, Jihova ua tumikisa Jehú phala kubazela Jozafate, mukonda dia kituxi kia tele. Maji né kiki, Jehú ua mu tangela: “A sange hanji ima ia mbote momué.”—2 Malunda 18:4, 5, 18-22, 33, 34; 19:1-3.

⁹ Mu kubhita mivu, Jozafate ua tumina o jisobha, o Jilevita ni akunji kukunda o jimbanza ja Judá, phala kulonga o Kitumu kia Jihova ku athu. Ene a bhange kiambote o kikalakalu kiki, mukonda dia kiki, o athu akua ifuxi iéngi ejidile ué Jihova. (2 Malunda 17:3-10) Sumbala Jozafate ua bhangele ima ia iibha, Jihova ka jimbile o ima iambote ia bhangele m’ukulu. O phangu íii i tu kuatekesa, mukonda saí ithangana etu ué tu bhanga ima ia iibha. Maji se tu bhanga ioso phala kusidivila Jihova, muéne ua-nda kolokota mu ku tu zola, ka-nda jimba o ima iambote i tua bhangele.

10, 11. (a) Mukonda diahi o musambu, ujitu ua katunda ua tu bhana Jihova? (b) Kiebhi Nzambi kia tambuijila o misambu ietu? (Tala o foto ia dianga.)

¹⁰ O tata ia henda, u sota kithangana phala kuzuela ni an’ê, se a mu bhinga phala kuzuela nê. Muéne u sota kuijiia kiebhi kia mu divua, mukonda ua mesena o mbote iâ. Kiene ki bhanga ué Jihova, o Tata ietu ia henda. Kioso ki tu samba, muéne u tuívua. O kuzuela ni Tat’etu, ujitu ua dikota!

¹¹ Tu tena kusamba kua Jihova mu kithangana kioso kioso. Ithangana ioso, muéne uala polondo phala kuívua o misambu ietu, mukonda muéne Kamba dietu. Taylene, tua mu tange kiá ku dima, uambe: “U tena kuzuela nê o ima ioso i ua mesena.” Kioso ki tu jikula o muxima uetu kua Jihova mu musambu, muéne u tena kutambuijila bhu kaxi ka kibatulu kia Bibidia, milongi mu madivulu metu, mba bhu kaxi ka kikuatekesu kia jiphange jetu ja mala ni ja ahatu. Jihova uivua o misambu ietu, muéne uejiia o ima i tu bhita na-iu, né muene se o athu ka tena ku tendela o maka u tua mu bhita nau. Kioso kia tambuijila o misambu ietu, muéne ulondekesa kuila, o henda iê ko kuetu, i nangenena.

12. Mukonda diahi tua tokala ku di longa o misambu i tu sanga mu Bibidia? Bhana phangu.

 ¹² Tu tena ku di longa madisá ambote mu misambu io soneke mu Bibidia. Saí bhabha, kima kiambote ku di longa o misambu íii mu ubhezelu uetu ku muiji. Se tu xinganeka mu misambu ia bhangele o jiselevende ja Nzambi m’ukulu, tua-nda di longa kubhanga misambu iambote. Mu kifika, di longe o musambu ua Jona, kioso kiexile mu divumu dia mbiji ionene. (Jona 1:17–2:10) Tanga o musambu ua bhangele Solomá, kioso kia bhakuile o tembulu kua Jihova. (1 Jisobha 8:22-53) Xinganeka ué mu musambu ua tu longo Jezú. (Matesu 6:9-13) ‘Endenu ni kubhinga kua Nzambi o ima ioso i mua mesena.’ Se mu bhanga kiki, “o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji.” Tua-nda sakidila dingi Jihova, mukonda dia henda iene mu tu londekesa.​—Filipe 4:6, 7.

13. Ujitu uahi u bhana o sata ia kukula?

¹³ Jihova ua tu bhana o ujitu ua sata ia kukula, ni “tu mone muenhu.” (1 Nzuá 4:9) Ia lungu ni izuelu íii, ilondekesa o henda ia Nzambi, Phaulu uambe: “Ki tua kexile hanji tua lémbua kubhanga kima kioso-kioso, Kristu kia bhixila bhu thembu iê ia solo Nzambi, ua fuila athu abhumu bhu kididi. Né muthu uaiuka, mukuâ ka moneka kindala u xikina ku mu fuila bhu kididi. Maji se kia bhonzo sai-ku ni iú u xikina kufuila o muthu uambote bhu kididi. Maji o Nzambi-phe ua tu idikiza o henda ia muène ia tu kuatela; mukonda kioso ki tua kexile hanji tu akua ituxi, kiene kia tu fuila Kristu bhu kididi.” (Loma 5:6-8) O sata ia kukula iene o phangu ia dikota ia henda ia londekesa Nzambi, mukonda i bhana ku athu, o ujitu ua kukala ni ukamba uambote ni muéne.

14, 15. Ihi ilombolola o sata ia kukula phala (a) o Jikidistá a a undu? (b) ni ió a kingila ku tambula o muenhu ua kalela-ku mu ixi?

¹⁴ Saí kibuka kiofele kia Jikidistá, a a zolo kua Jihova mu ukexilu ua katunda. (Nzuá 1:12, 13; 3:5-7) Nzambi ua a undu ni nzumbi ikola, mukonda dia kiki, lelu, o kibuka kiki, kibuka kia an’ê. (Loma 8:15, 16) Se o athu a mukuá a tokala ku kibuka kiki ala hanji mu ixi, mukonda diahi Phaulu ua zuela kuila, ene a a xikamesa kumoxi ni Jezú Kristu “ku ungana ku ididi ia diulu?” (Efezo 2:6) Kiki ki bhita, mukonda Jihova ua a bhana o kidielelu kia kutambula o muenhu sé dizubhilu ku diulu.​—Efezo 1:13, 14; Kolose 1:5.

¹⁵ O athu a mukuá ki Jikidistá a a undu, a tena kukala ni ukamba uambote ni Nzambi, se a xikina mu sata ia kukula. Ene a tena ué ku kituka a’na a Nzambi ni kutunga mu palaízu mu ixi katé ku hádia ni hádia. O sata ia kukula ilondekesa o henda ia Jihova ku athu oso. (Nzuá 3:16) Kisangusangu kia dikota o kuijiia kuila, se tu sidivila Nzambi ni ufiiele  uoso, muéne ua-nda tu bhana o muenhu ua iuka ku mundu uobhe! Mu kiki, tu sakidile o sata ia kukula, mukonda kiene o kima kia beta kota ki londekesa o henda ia Nzambi ko kuetu.

16. O kuxinganeka mu henda ia Nzambi ko kuetu, kua-nda tu kuatekesa kubhanga ihi?

¹⁶ Ki tu tena ku lembalala o ima ioso ia bhange Jihova, ilondekesa o henda iê ko kuetu. Sobha Davidi uembi: “Ilunji ié, u Nzambi, i ua ngi xinganeka na-iu, kima kia kulalula! se ngedi ngi i kuata konda, ki ngi i tena, kuma iavudilà-ku! Ku i kuata mu kimoxi-kimoxi, kuvula kua kisekele ndenge.” (Jisálamu 139:17, 18) O ku xinganeka mu maukexilu ene mu tu londekesa o henda kuala Jihova, ku tu kuatekesa ku mu zola dingi ni ku mu sidivila ni muxima uoso.

17, 18. Kiebhi ki tu tena kulondekesa o henda ietu kua Nzambi?

¹⁷ Kuene maukexilu avulu a kulondekesa o henda ietu kua Jihova. Mu kifika, tu tena kulondekesa o henda ietu kua Jihova mu kuboka ni ku suína kuoso, phala kutula o njimbu iambote ia Utuminu ku akuetu. (Matesu 24:14; 28:19, 20) Tu tena ué kulondekesa o henda ietu kua Nzambi, mu kukolokota mu ufiiele uetu, né muene kioso ki tu dibhana ni ibhidi i lola o kixikanu kietu. (Tanga Jisálamu 84:11; Tiiaku 1:2-5.) Né muene se tu dibhana ni ibhidi ia dikota, tu tena ku dielela kuila, Jihova ua mu mona o hadi i tua mu tala, ni kuila, muéne ua-nda tu kuatekesa, mukonda etu tuala ni valolo iavulu ku mesu mê.—Jisálamu 56:8.

¹⁸ O henda ietu kua Jihova, i tu kuatekesa ku xinganeka mu ibhangelu iê ioso ia madiuanu. Tu londekesa kuila tua zolo Jihova ni Mak’â mê, mu ku di longa o Bibidia. Ithangana ioso tu samba kua Jihova, mukonda tua mu zolo, ni kuila, tua mesena ku suínisa o ukamba uetu ni muéne. Kioso ki tu xinganeka mu ujitu ua sata ia kukula, o henda ietu kua muéne i dibandekesa dingi. (1 Nzuá 2:1, 2) Sumbala tua tumbula ngó o maukexilu iá, maji kuene dingi maukexilu avulu a kulondekesa kua Jihova kuila, tu sakidila o henda iene mu tu londekesa.