1. (a) Ihi ia bhiti ni Phetele, mu kalunga ka Ngalileia, kioso kiexile mu bhanga kitembu kiavulu? (Tala o foto ia dianga.) (b) Mukonda diahi Phetele ua kexile mu boba mu menha?

SAÍ kizuua, poxolo Phetele ni maxibulu a mukuá a bhangele njila katé mu Kalunga ka Ngalileia, ene akexile kuenda mu usuku, kua kexile kitembu kia dikota mu musanza ua kalunga. O kia sasumuka, a mono Jezú kuendela ku thandu a menha. Phetele uexana Jezú ni ku mu ibhula se ueji tena kubhixila kua muéne. Kioso Jezú ka mu bhingi phala kuzukama ko kuê, Phetele ua tundu mu baluku, anga ua mateka kuenda ku thandu a menha. Maji ka nange kithangana kiavulu, Phetele ua mateka kuboba mu menha. Mukonda diahi? Mukonda muéne ua kexile mu mona o kitembu kia nguzu, ni mabhuku. Phetele ua dikola kua Jezú mu kubhinga o kikuatekesu, Jezú anga u mu kuata ni lusolo, iú ua zuela: “Eie ua tolo o kuxikana, phata ia ku kuatela-hi?”—Matesu 14:24-32.

2. Ihi i tua-nda di longa?

² Tua-nda di longa ima itatu ia lungu ni kixikanu, i tu tena ku di longa mu musoso ua Phetele: (1) kiebhi Phetele kia londekesa kuila, Jihova ueji ku mu kuatekesa, (2) mukonda diahi o kixikanu  kia Phetele kia kexile mu zoza, ni (3) ihi ia kuatekesa Phetele ku suínisa o kixikanu kiê. O ku di longa o milongi íii, ku tena ku tu kuatekesa kumona kiebhi ki tu tena ‘ku difikidila mu kuxikana.’​—1 Kolindo 16:13.

3. Mukonda diahi Phetele ua tundu mu baluku, ni mu ukexilu uebhi etu tua bhange ué kiki?

³ Phetele uexile ni kixikanu kia kolo. Mukonda diahi tu tena kuzuela kiki? Kioso Jezú kia mu ixana, Phetele ua tundu mu baluku anga ua mateka kuenda mu menha. Muéne ua dielele kuila, o kutena kua Nzambi kueji mu bhana o uhete ua kubhanga kiki, kala kia bhangele ni Jezú. Kiene kimoxi ué, kioso Jezú kia tu ixana phala ku mu kaiela, etu tua di bhakula kua Jihova, anga a tu batizala. Mukonda diahi? Mukonda dia kixikanu kietu kua Jihova ni Jezú, ni mukonda dia kudielela kuila, ene eji tu kuatekesa.​—Nzuá 14:1; tanga 1 Phetele 2:21.

4, 5. Mukonda diahi o kixikanu kiala ni valolo ia dikota?

⁴ O Kixikanu kiala ni valolo ia dikota. O kixikanu kia Phetele kia mu bhana o kutena kua kuendela mu menha, kiki kiexile kisunji kia dikota phala o athu. O kixikanu ki tena ku tu kuatekesa kubhanga ima ia madiuanu. (Matesu 21:21, 22) Athu avulu mudietu, a lungulula o ukexilu uâ ua muenhu, ni ídifua iâ, mukonda dia kiki, o athu a mukuá a diuana kiavulu mu ku tu mona. Etu tua lungulula o ukexilu uetu mukonda tua zolo Jihova, ni mukonda dia kuila, muéne ua tu kuatekesa kulungulula o ukexilu uetu. (Tanga Kolose 3:5-10.) O kixikanu kia tu suínisa ku di bhakula kua Jihova ni ku kituka makamba mê, kiki, ki kieji bhita se muéne ka tu kuatekesele.​—Efezo 2:8.

⁵ O kixikanu kietu ki tu suínisa. Mu kifika, kiene ki tu kuatekesa kubhânga ni izukutisu ia Diabhu, o nguma ietu ia dikota. (Efezo 6:16) Kuma tua dielela kua Jihova, ki tu bhingi kuthandanganha kiavulu kioso ki tu dibhana ni ibhidi. Jihova ua tu kanena ku tu bhana ioso i tua bhindamena, se tu kala ni kixikanu kua muéne ni ku Utuminu uê. (Matesu 6:30-34) Mukonda dia kixikanu kietu, Jihova ua-nda tu bhana o ujitu ua dikota ua kutambula o muenhu ua kalelaku.​—Nzuá 3:16.

6, 7. (a) O kitembu ni mabhuku a bhangesa Phetele kukala ni uôma, tu tena ku i sokesa ni ihi? (b) Mukonda diahi tua tokala kuijiia kuila, o kixikanu kietu ki tena kuzoza?

⁶ Kioso Phetele kia mateka kuenda mu menha a Kalunga ka Ngalileia, uôma ua mu kuata. Mukonda diahi? Mukonda dia kitembu ni mabhuku. O ima íii, tu tena ku i sokesa ni izukutisu mba jitendasá, jene mu dibhana naju o Jikidistá ja lelu. Né muene se o ibhidi íii i bhonza kiavulu, tu tena kukolokota ni kikuatekesu kia Jihova. Maji lembalala o kima kia bhitile ni Phetele. Muéne ka boba mu menha mukonda dia kitembu ni mabhuku. Mu veji dia kiki, o Bibidia i zuela: “Kia mono o kitembu kia nguzu-phe, uôma ua mu kuata.” (Matesu  14:30) Mu veji dia kutala kua Jezú, Phetele ua mateka kumona o nguzu ia kitembu. Mukonda dia kiki, o kixikanu kiê kia mateka o kuzoza. Kiene kimoxi ué, se tu thandanganha kiavulu ni ibhidi ietu, tu tena ku mateka kukala ni phata, se Jihova ua-nda tu kuatekesa mba kana.

⁷ Tua tokala kuijiia kuila, o kixikanu kietu ki tena kuzoza. Mukonda diahi? Mukonda o Bibidia i zuela kuila, o kukamba o kixikanu kiene o ‘kituxi kia tu naminina.’ (Jihebeleu 12:1) Kála kia bhitile ni Phetele, se tu xinganeka kiavulu mu ibhidi ietu, o kixikanu kietu ki tena kuzoza. Mu kiki, kiebhi ki tu tena kuijiia se o kixikanu kietu kiala mu iluezu? O ibhuidisu ia kaiela ia-nda tu kuatekesa ku di tonginina kiambote.

8. Kiebhi ki tu tena kukamba kubhana valolo mu ikanenu ia Nzambi, i tuexile mu bhana valolo iavulu m’ukulu?

⁸ O kuila o kidielelu kiami mu ikanenu ia Nzambi kia kolo hanji kála m’ukulu? Mu kifika, Nzambi ua kanena kubuika o mundu ua Satanaji. Maji, o kuila tuene mu landuka hanji ni itonokenu iavulu ilondekesa o mundu uê? Sé kiki ki bhita, tu tena kumateka kukala ni phata ia kuila, o dizubhilu dia zukama. (Habakuke 2:3) Xinganeka mu phangu ia mukuá. Jihova ua tu bhana o ujitu ua sata ia kukula, iú ua tu kanena kuloloka o ituxi ietu ioso. Maji se tu xinganeka kiavulu mu ituxi i tua tele m’ukulu, tu tena kumateka kubanza kuila, Jihova ka tu loloka o ituxi. (Ikalakalu 3:19) Kiki ki tena ku tu bhangesa kukamba kusanguluka mu sidivisu ia Nzambi, ni kuxisa o kikalakalu kia kuboka o njimbu iambote.

9. Ihi i tena kubhita se tu xinganeka ngó mu ibhindamu ietu ia muenhu?

⁹ O kuila ngene mu sidivila hanji Jihova ni kusuína kuoso? O kukalakala ni kusuína kuoso mu sidivisu ia Jihova, ku tu kuatekesa kuxinganeka mu kidielelu kietu ku hádia. Maji, ihi ieji bhita se tu mateka kuxinganeka ngó mu ima ietu? Mu kifika, nange tu xikina salu i futa kitadi kiavulu, maji i tu fidisa kusidivila kiambote Jihova. Kiki, ki tena kuzozesa o kixikanu kietu ni ku tu bhangesa kukala ni “usudi,” mu kukalakala ngó bhofele, mu veji dia kukalakala mu sidivisu ia Jihova, ni kusuína kuoso.—Jihebeleu 6:10-12.

10. Kiebhi ki tu londekesa kuila tuala ni kixikanu kua Jihova, kioso ki tu loloka akuetu?

¹⁰ O kuila ki ngala ni ukexilu ua kuloloka akuetu? Kioso akuetu kia tu bhanga ima ia iibha mba a tu xinga, o kuila tu luuala kiavulu, mba ki tu zuela dingi nau? Se kiene, nange tua mu xinganeka kiavulu mu ukexilu u tu divua ku muxima. Etu tu londekesa o kixikanu kietu kua Jihova, kioso ki tu loloka akuetu. Kiebhi ki bhita kiki? Kioso o muthu kia tu bhanga kima kia iibha, muéne ua mu tu ta dikongo. Kioso ki tu ta kituxi kua Jihova, tua mu ta  dikongo kua muéne. (Luka 11:4) Mu kiki, kioso ki tu loloka akuetu, tua mu dielela kua Jihova. Tu dielela kuila, muéne ua-nda besoala o ukexilu uetu ua kuloloka, mu kiki, o dibesá diê dia beta kota, o kubhangesa muthu kufuta o kituxi kia tu te, ndenge. O maxibulu a Jezú, ejidile kuila, kua bhingile kukala ni kixikanu phala kuloloka akuâ. Kioso Jezú kia a tangela phala kuloloka o athu akexile mu a zukutisa mu veji javulu, o maxibulu mê a mu diondela: “Tu vudise dingi o kuxikana kuetu.”​—Luka 17:1-5.

11. Mukonda diahi tu tena kukamba kukatula mbote ku milongi ia tu bhana?

¹¹ Kioso kia ngi bhana itendelesu mba kia ngi bazela, o kuila ngi luuala? Bhanga ioso phala kukatula mbote mu milongi ia kubhana, mu veji dia kumona kuila saí ima ka i zuela kiambote, mba kutatela o muthu ua kubhana o kitendelesu. (Jisabhu 19:20) Bhanga ioso phala kukolokota mu kubanza kála ki banza Jihova.

12. Nange, ihi i bhangesa o muthu kulongolola o athu ala ku pholo?

¹² O kuila ngala ni ukexilu ua kulongolola o athu ala kupholo ia kilunga? Kioso o akua Izalaiele kia bhana mátui ku ngolokela ia kuinhi dia alondi, ene a mateka kulongolola Mozé ni Alá. Mu kusuluka, Jihova uebhuidisa Mozé: ‘Katé bhebi ene a-nda kamba ku ngi xikana?’ (Dialuilu 14:2-4, 11) Mu kidi, Jihova uejidile kuila, o akua Izalaiele ka mu dielele, mukonda ene akexile mu longolola Mozé ni Alá, o athu a tele ku pholo dia kifuxi. Kiene kimoxi ué, se tu kolokota mu kulongolola o athu a a te ku pholo kuala Jihova, phala kuendesa o mundu uê lelu, kiki ki tena kulondekesa kuila, o kixikanu kietu kua Nzambi kia mu zoza.

13. Mukonda diahi ki tu tokala kuluuala se tu mona kuila o kixikanu kietu kia zoza?

 ¹³ Mu ku di longa o ibhuidisu íii, kana kuluuala se u mona kuila, o kixikanu kiê kia zoza. Lembalala kuila, katé muene ni poxolo Phetele uôma ua mu kuatele, anga ua mateka kukala ni phata. Saí ithangana, Jezú ua bhana itendelesu ku jipoxolo jê mukonda dia kutola “o kuxikana.” (Matesu 16:8) Maji né kiki, tu tena ku di longa kima kia dikota mu musoso ua Phetele. Lembalala o kima kia bhangele, kioso kia mateka kukala ni phata ni kuboba mu menha.

14, 15. (a) Ihi ia bhange Phetele kioso kia mateka kuboba mu menha? (b) Kiebhi ki tu tena ‘kukolokota mu kusuua ngó’ Jezú?

¹⁴ Ihi ia bhange Phetele kioso kia mateka kuboba mu menha? Phetele uejidile kuzóua kiambote, mu kiki, muéne ueji zóua phala kuvutuka mu baluku. (Nzuá 21:7) Maji mukonda diahi muéne ka bhange kiki? Mukonda muéne ka dielele mu nguzu iê muene. Muéne ua dielele kua Jezú, mukonda dia kiki, ua xikina o kikuatekesu kiê. Se tu mona kuila o kixikanu kietu kia mu zoza, tua tokala kukaiela o phangu ia Phetele. Kiebhi ki tu tena kubhanga kiki?

¹⁵ Phetele ua soto o kikuatekesu kia Jezú, etu ué tua tokala ‘kukolokota mu kusuua ngó’ Jezú. (Tanga Jihebeleu 12:2, 3.) Maji etu ki tu tena ku mu mona ni mesu, kala kia mu monene Phetele. Mu kiki, kiebhi ki tu tena ‘kukolokota mu kusuua ngó’ Jezú? Tu tena ku di longa o ima ioso ia bhange ni ia longo, ni kubhanga ioso phala kukaiela kiambote o phangu iê. Se tu bhanga kiki, tua-nda tambula o kikuatekesu ki tua bhindamena phala kusuínisa o kixikanu kietu. Tua-nda di longa, maukexilu a tena ku tu kuatekesa kukaiela o phangu ia Jezú.

16. Kiebhi o Bibidia i tena ku tu kuatekesa ku suínisa o kixikanu kietu?

¹⁶ Kolesa o kixikanu kiê mu Bibidia. Jezú uejidile kuila, o Bibidia Mak’â Nzambi, ni kuila, iene i tu bhana itendelesu iambote. (Nzuá 17:17) Phala kukaiela o phangu ia Jezú, tua tokala kutanga o Bibidia izuua ioso, ku di longa ni ku xinganeka mu madisá i tu di longa. Tua tokala ué kutokuesa kiambote o ibhuidisu i tu thandanganhesa. Mu kifika, o kuila eie u xikina ni kidi kioso kuila, tuala mu izuua ia sukidila-ku? Phala kusuínisa o kixikanu kiê mu maka enhá, di longe o ikanenu ia Bibidia ilondekesa kuila, o dizubhilu dia zukama. O kuila eie ua mesena kusuínisa o kixikanu kiê mu ikanenu ia Nzambi ia lungu ni hádia? Di longe o ikanenu ia Bibidia ia di kumbidila kiá. O kuila u xikina kuila, o milongi ia Bibidia ia tokala phala o izuua ietu? U tena ku di longa misoso ia lungu ni jiphange ja maiala ni ja ahatu, a lungulula o ukexilu uâ ua muenhu ni kikuatekesu kia Bibidia. * (Tala ku luiji.)—1 Tesalonika 2:13.

17. Mukonda diahi Jezú ua kolokota mu jitendasá ja makota, ni kiebhi ki u tena kukaiela o phangu iê?

¹⁷ Xinganeka mu mabesá a kanena Jihova. Jezú ua kexile mu xinganeka mu mabesá ieji tambula ku hádia. Kiki kia mu kuatekesa kukolokota mu ji tendasá. (Jihebeleu 12:2) Muéne ka landuka ni ima ia mundu. (Matesu 4:8-10) Kiebhi ki tu tena kukaiela o phangu ia Jezú? Xinganeka mu mabesá a kanena Jihova. Di xinganeke ku mundu uobhe. Soneka o ima i ua mesena kubhanga mu Palaízu. Mba u tena kusoneka o majina a athu a-nda fukunuka, u ua mesena kuzuela nau, ni ima i ua  mesena kuzuela nau. Kála Jezú, ua tokala kumona o ikanenu íii ia Nzambi, kála ima ia ku tokala eie, mu veji dia kumona ngó kala mabesá phala o mundu uoso.

18. Kiebhi o musambu u tena ku ku kuatekesa kusuínisa o kixikanu kiê?

¹⁸ Samba mu kubhinga kixikanu. Jezú ua longo o maxibulu mê kubhinga o nzumbi ikola kua Jihova. (Luka 11:9, 13) Kioso ki u bhinga o nzumbi ikola, samba mu kubhinga kixikanu kia kolo. O kixikanu, ukexilu ua tokala ku kibundu kia nzumbi. Mu kusamba, u tena kutumbula o kibhindamu kiê. Mu kifika, se u mona kuila, kubhonza kuloloka akuenu, samba kua Jihova phala ku kukuatekesa kukala ni kixikanu kia kolo, ni u kale ni ukexilu ua kuloloka.

19. Kiebhi ki tu tena kusola kiambote o makamba?

¹⁹ Sola makamba ala ni kixikanu kia kolo. Jezú ua solo kiambote o makamba mê. O makamba mê exile o jipoxolo, ene exile athu a fiiele, akexile mu mu belesela. (Tanga Nzuá 15:14, 15.) Kaiela o phangu ia Jezú mu kusola kiambote o makamba mê. Ene a tokala kukala ni kixikanu kia kolo, akua kubelesela o itendelesu ia Jezú. O makamba a kidi, a di londekesa o ufiiele, né muene se kubhinga kutambula milongi mba ku di bazela.​—Jisabhu 27:9.

20. Ihi ia-nda bhita se tu kuatekesa akuetu kukala ni kixikanu kia suína?

²⁰ Kuatekesa akuenu kukala ni kixikanu kia kolo. Jezú ua kuatekesa o maxibulu mê kukolesa o kixikanu kiâ, bhu kaxi ka ima ia zuela ni ima ia bhange. (Marku 11:20-24) Etu tua tokala kukaiela o phangu ia Jezú. Se tu bhanga kiki, tua-nda suínisa dingi o kixikanu kietu, ni kixikanu kia akuetu. (Jisabhu 11:25) Kiebhi ki u tena kukuatekesa akuenu mu mbambe iê? Mu ku longa o Bibidia, londekesa ku athu kuma, kuene Nzambi, ni kuila muéne u tu langa, ni ku a londekesa kuila, o Bibidia Mak’â Nzambi. Kiebhi ki u tena kukuatekesa o jiphange jê ja mala ni ja ahatu, kukala ni kixikanu kia kolo? Se u mona kuila, saí muthu ua zuela kia iibha ia lungu ni jiphange ala kupholo, kana kufika kuila ki bhuala maka. Ni uhete uoso, mu kuatekese kukala dingi ni kixikanu kia suína. (Juda 22, 23) Se ua mu di longa hanji bhu xikola, se o mulongexi uê u mateka kuzuela kuila o ima ia moneka ngó, sé-ku muthu ua i bhange, londekesa kusuína, mu kuzokela kuila, saí muthu ua bhange o ima ioso. Nange eie ua-nda diuana, mu kumona o mulongexi uê ni jikoleka jê ku kutambuijila kiambote.

21. Ihi ia tu kanena Jihova?

²¹ Jihova ni Jezú a kuatekesa Phetele kuzubha o jiphata ni uôma. Mu kubhita thembu, Phetele ua bhana phangu iambote phala o athu a mukuá. Kiene kimoxi ué, Jihova u tu kuatekesa kukolokota mu kukala ni kixikanu kia kolo. (Tanga 1 Phetele 5:9, 10.) Kubhinga nguzu iavulu phala kukala ni kixikanu kia suína, maji se tu bhanga kiki, Jihova ua-nda besoala o nguzu ietu.