1, 2. Kiebhi Jihova kia tu longo o ukexilu uambote ua ku mu zola?

O TATA u longa dingi kiambote o tuana tuê, bhu kaxi ka phangu iê iambote. Kioso muéne kia londekesa o henda iê ku tuana, muéne u a longa kiebhi kia tokala kuzola akuâ. Sé-ku muthu ua tu zolo, kála kia tu zolo Tata ietu Jihova. Mu kiki, etu tua zolo, “mukonda Nzambi muène ua diangela ku tu zola.”​—1 Nzuá 4:19.

² Mu ukexilu uebhi Jihova ua londekesa kuila, muéne ua “diangela ku tu zola?” O Bibidia izuela: “Kioso ki tua kexile hanji tu akua ituxi, kiene kia tu fuila Kristu bhu kididi.” (Loma 5:8) Jihova, o Tata ietu ia henda, ua tu bhana Mon’ê, phala ku tu kula ku ituxi ni kalunga. O ujitu iú ua dikota, ua tu kuatekesa kuzukama dingi kua Jihova, ni ku mu londekesa o henda ietu. Bhu kaxi ka sata íii, Jihova ua bhana phangu iambote. Muéne ua tu longo kuila, tua tokala kuzola akuetu ni kukala ni ukexilu ua kubhana, mu veji dia kukala ni luímbi.​—1 Nzuá 4:10.

3, 4. Kiebhi ki tu tena kulondekesa kuila, tua zolo Nzambi?

³ O henda iene o kídifua kia dikota kia Jihova. Mu kiki, tu tena kutendela kiambote se mukonda diahi Jezú uambe kuila,  o kitumu kia dikota kiki: “Ngana-phe, Nzambi ié, u mu zola ni muxima ué uoso, ni muenhu ué uoso, ni kilunji kié kioso, ni nguzu ié ioso.” (Marku 12:30) Jihova ua mesena kuila, tu mu zola ni ‘muxima uetu uoso.’ Jihova ueji luuala kiavulu, se tu sota kuzola dingi muthu mba kima kioso-kioso, mu veji dia ku mu zola muéne. Maji ki tu tokala ku mu zola ngó ni muxima uetu. Jihova ua mesena kuila, tu mu zola ué ni ‘kilunji kietu kioso,’ ni ‘nguzu ietu ioso.’ Kiki kilombolola kuila, o henda ietu kua Jihova ia lungu ni ima i tu banza, ni i tu bhanga.—Tanga Mikeia 6:8.

⁴ Mu kiki, etu tua tokala kuzola Jihova ni muenhu uetu uoso, ni ima ioso i tuala na-iu. Tu londekesa o henda ietu kua muéne, mu ku ta o vondadi iê ku pholo ku muenhu uetu. Mu milongi ia dianga, tua di longo kuila, Jihova u londekesa o henda iê ku tuana tuê, mu maukexilu auana. Mu milongi íii, tua-nda di longa kiebhi ki tu tena kukolesa o henda ietu kua Jihova, ni kulondekesa kuila, tua mu zolo.

5. O kuxinganeka mu jimbote joso ja tu bhana Jihova, ku tu suínisa kubhanga ihi?

⁵ Kioso muthu kia kubhana kima, eie u mu londekesa o kisakidilu kiê. Kuma eie ua zolo o ujitu, eie u bhanga ioso phala kukatula mbote mu ujitu iú. Tiiaku uambe: ‘Kuma o ujitu uambote u tu tambula, ni uhete uauabha, u tunda ku diulu. Ima ioso íii i tuluka kua Nzambi, Tata ua bhanga o mikengeji ia diulu. O muène kene ni kualuluka, kuma mua muène ki muene mù kala nè ngó kizenji kia kualuluka.’ (Tiiaku 1:17) Etu tu sakidila kiavulu Jihova mukonda muéne ua tu bhana ioso i tua bhindamena phala kukala ku muenhu, ni kuzediua. Etu tuejiia kuila, muéne ua tu zolo kiavulu, mukonda dia kiki, tu bhanga ioso phala ku mu londekesa o henda ietu. O kuila kiene ki u divua?

6. Ihi ia tokalele kubhanga o akua Izalaiele, se a mesenene kutambula o mabesá a Jihova?

⁶ Jihova ua besoala kiavulu o akua Izalaiele. Ku hama ni hama ia mivu, Jihova ua endesa bhu kaxi ka itumu iê, ni ku a bhana ioso ia bhindamene phala kukala ku muenhu. (Matendelelu 4:7, 8) Akua Izalaiele eji tena kulondekesa o kisakidilu kiâ kua Jihova, mu kubelesela o itumu iê. Mu kifika, mu kubhana o jisata, ene a tokalele kubhana kua Jihova “o ibundu ioso i dianga kúbhia” mu mavu. (Makatukilu 23:19) O akua Izalaiele ejidile kuila, Jihova ueji kolokota mu ku a besoala, se a mu belesele ni ku mu bhana ioso ia tenene.​—Tanga Matendelelu 8:7-11.

7. Kiebhi ki tu tena kulondekesa o henda ietu kua Jihova bhu kaxi ka “ima ioso” i tuala na-iu?

⁷ Etu tu tena ué kulondekesa o henda ietu kua Jihova, mu ku mu sidivila ni “ima ioso” i tuala na-iu. (Jisabhu 3:9) Tu tena kubhanga kiki, mu ku mu ximana ni ima ietu. Mu kifika, tu tena kusangela kitadi phala kukuatekesa o kikalakalu kia Utuminu mu kilunga kietu ni ku mundu uoso. Kikale se tuala ni ima iavulu mba kana, etu enoso tu tena kulondekesa o henda ietu kua Jihova. (2 Kolindo 8:12) Maji tu tena kulondekesa o henda ietu kua Jihova mu maukexilu engi.

8, 9. Mu ukexilu uebhi dingi mu tu tena kulondekesa o henda ietu kua Jihova? Ihi ia bhange Mike ni muiji uê?

⁸ Jezú ua tu tendelesa kukolokota mu kudianga kusota o Utuminu, mu veji dia kuthandanganha  ni ima ia kudia ni ia kuzuata. O Tata ietu u tu kanena ku tu bhana ioso i tua bhindamena. (Matesu 6:31-33) Etu tu dielela kuila, Jihova ua-nda kumbidila o kikanenu kiki. Se tua zolo muthu, tua-nda mu dielela ué. Mu kidi, se tu dielela Jihova ni muxima uoso, tua-nda mu zola kiavulu. (Jisálamu 143:8) Mukonda dia kiki, tua tokala kudibhuidisa: ‘O kuila o ibanzelu iami ia lungu ni hádia, ni ukexilu uami ua ku ngastala o kithangana kiami, ulondekesa kuila nga zolo Jihova? O kuila, ngene mu dielela kuila, Jihova ua-nda suua o ibhindamu iami ioso?’

⁹ Mike ni muiji uê a dielela kua Jihova. Kioso kiexile munzangala, Mike ua mesenene kuboka o njimbu mu jixi jéngi. Kioso Mike ni muiji uê kia tange misoso ia lungu n jiphange ja mala ni ja ahatu a sidivile, mu jixi mua kambele aboki, ene a soto kusosolola o ukexilu ua muenhu uâ. Ene a sumbisa o inzo iâ ia dikota, anga a sumba inzo iofele mu kididi kiéngi. Mike ua sosolola o ditenda diê dia kuxixila, iú ua soto ndunge phala kulanga o ditenda diê bhu kaxi ka internete. Mu kubhanga kiki, Mike ni muiji uê, a tena kuia mu tunga ixi iéngi phala kusanzumuna ni kusanguluka mu ukunji uâ. Mike uambe: “Tua mono ku di kumbidila ku muenhu uetu, o izuelu i tu sanga mu divulu dia Matesu 6:33.”

10. Kála kia bhangele Sobha Davidi, mukonda diahi kima kiambote kuxinganeka mu ima i tu di longa ia lungu ni Jihova?

¹⁰ Sobha Davidi ua soneka: “Maúlu ma tumbula o fuma ia Nzambi; o mu dinga ni dinga mua d’idikiza o ufunu ua maku mê.” Muéne uambe dingi: “Ngonge ia Jihova ia di uabhela, i bhekela muthu muenhu uobhe; umbangi ua Jihova ua kidi, u ijidisa atobho.” Kioso Davidi kiai ni kuxinganeka mu itumu ia unjimu ni mu ibhangelu ia Jihova, muéne ua zukama dingi kua Jihova, kiki kia mu suínisa kulondekesa o henda iê kua muéne. Davidi uambe: “O kuzuela kuami kua dikanu, ni kubanza kuami kua muxima, ku kale kuoso kua ku ku uabhel’eie, u Jihova, u Nguzu iami, u Mukudi uami!”​—Jisálamu 19:1, 7, 14.

11. Kiebhi ki tu tena kulondekesa o henda ietu kua Jihova bhu kaxi ka ima iene mu tu longa? (Tala o foto ia dianga.)

¹¹ Lelu, Jihova uene mu tu longa ima iavulu, ia lungu ni muéne, ni vondadi iê, ni ia lungu ni Maka mê. O mundu iú, u suínisa kiavulu o athu ku di longa, maji o ji xikola ja katunda ji bhangesa o athu kukamba kuzola Nzambi. Maji Jihova ka mesena ngó kuila tu kala ni kuijiia, mu veji dia kiki, muéne u tu kuatekesa kukala ni unjimu. Muéne ua mesena kuila, tu katula mbote mu ima i tu di longa ni kukuatekesa ué akuetu. (Jisabhu 4:5-7) Mu kifika, muéne ua mesena kuila, tu boka ku athu o ‘kuijiia kua kidi,’ n’a tene uá kubhuluka. (1 Timote 2:4) Tu londekesa o henda ietu kua Jihova ni ku athu, mu ku a longa ia lungu ni Utuminu ua Nzambi, ni ku a tangela o mabesá a-nda bheka ku athu.​—Tanga Jisálamu 66:16, 17.

12. Ihi ia zuela o phange ia muhatu ia lungu ni ujitu ua tambula kua Jihova?

 ¹² O minzangala a tena uá kuxinganeka mu ima ioso iene mu a bhana Jihova ni mu ima iene mu a longa. Shannonu u di lembalala, kiebhi kia divu kia kexile mu kiônge kia dikota, kioso kia kexile ni 11 kia mivu, o phang’iê uexile ni 10 dia mivu. Mu Kiônge kiki kia Dikota kiexile ni diambu, “Devoção Piedosa,” o minzangala oso katé muene ni Shannonu ni phang’iê, a a tumu kuxikama bhu kididi kia katunda. Ku dimatekenu muéne ua kexile ni hele iavulu. Maji muéne ua diuana kiavulu kioso kia bhana ku minzangala oso o divulu Os Jovens Perguntam—Respostas Práticas. Kiebhi muéne kia divu mu kutambula o ujitu iú ua dikota ua mu bhana Jihova? Muéne uambe: “Nga mono kuila, Jihova Nzambi ia kidi, ni kuila, muéne ua ngi zolo kiavulu. Etu tua sanguluka kiavulu mukonda, o Nzambi ietu ia dikota Jihova, ua tu bhana mu ki ngoho, o ujitu iú ua dikota ua fuama kiavulu!”

13, 14. Ihi i tua tokala kubhanga kioso kia tu bazela kua Jihova, ni mukonda diahi?

¹³ O Bibidia i tu tendelesa: “Ngana, uoso ua mu zola u mu longa; mukua ni tata kia longa mona uoso’a mu indila kumona mbote.” (Jisabhu 3:12) Se tu xikina ku tu bazela kua Jihova ni kutambula o kikuatekesu kiê, tua-nda kuijiia kubhanga o ima iambote, ni kukala ni kutululuka. Mu kidi, “kioso  kia tu beta, kithangana kienhokio tu ki mona kuiibha, ki ki tu uabhela, kana.” (Jihebeleu 12:11) Maji, ihi i tua tokala o kubhanga kioso Jihova kia tu bazela? Ki tu tokala kuxibhaka o milongi ia Jihova, mba kuluuala kiavulu mukonda ki tu uabhela o kitendelesu kia tu bhana. Etu tua zolo Jihova, mukonda dia kiki, tuene ku mu ivua ni kulungulula o ukexilu uetu.

¹⁴ Mu izuua ia Malakiia, nzungule dia Jijudé a xibhakele Jihova. Ene ka kexile mu bhana valolo ku jisata ja kexile mu bhana, se jene ja kexile mu sangulukisa Jihova, mba kana. Mukonda dia kiki, Jihova ua a bazela ni kusuína kuoso. (Tanga Malakiia 1:12, 13.) Mu kidi, Jihova ua kexile mu a bazela mu veji javulu, maji ene ka kexile mu mu bhana mátui. Mukonda dia kiki, muéne ua a tangela: ‘Nga-nda ku mi tumikisa uíndua, o mabesá menu moso ngi ma bilula kuxixima.’ (Malakiia 2:1, 2) Mu kidi, se tu kolokota mu kuxibhaka o milongi ia Jihova, ni kukamba kubhana valolo, ku itendelesu iê, o ukamba uetu ni muéne ua-nda bhua.

15. Ibanzelu iebhi i tua tokala kulenga?

¹⁵ O mundu ua Satanaji u suínisa o athu ku di zangeleka ni ku di suua ngó ene. Kuene athu avulu ka uabhela ku a bazela, mba kutambula itendelesu. Amukuá a belesela ngó o itendelesu se a a jijidika. Etu ki tua tokala kukala ni ukexilu iú. O Bibidia i tu tangela: “Ki mu kaiele o funza ia mu ngongo.” Mu veji dia kiki, etu tua tokala kuijiia, se ihi ia mesena Jihova, ni kubhanga o ima ia mu uabhela. (Loma 12:2) Bhu kaxi ka kilunga kiê, muéne u tu bhana itendelesu mu ithangana ia tokala. Mu kifika, ene mu tu bhana itendelesu iavulu, ia lungu ni kiebhi o ahatu kia tokala kudibhana ni maiala, ni kiebhi o maiala kia tokala ku di bhana ni ahatu, kiebhi ki tua tokala kusola o makamba metu, ni kiebhi ki tua tokala kusola o itonokenu. Kioso ki tu xikina ku tu bazela kua Jihova, ni kubhanga ioso phala kulungulula o ukexilu uetu, tu londekesa o kisakidilu kietu mu ku  tu endesa, mu kiki, o henda ietu kua muéne i di bandekesa dingi.​—Nzuá 14:31; Loma 6:17.

16, 17. (a) Mukonda diahi tua tokala kusota kuijiia o ibanzelu ia Jihova, ande dia kubatula maka oso-oso? (b) Mu veji dia kudielela kua Jihova, ihi ia bhange o akua Izalaiele?

¹⁶ O an’a ndenge a dielela kuila, o jitata jâ a-nda kua kuatekesa ni ku a langa. Katé muene ni adiakimi, nange a bhinga hanji kikuatekesu ku jitata jâ. Ene ejiia kuila, sumbala a tena kusola kiambote o ima, maji o jitata a tena ku a bhana itendelesu iambote. O Tata ietu Jihova, ua tu bhana o ufolo ua kusola o ima i tua mesena. Maji, kuma tua mu dielela, tua mu zolo, etu tuene mu sota o kikuatekesu kiê, ni kubhanga ioso phala kuijiia o ibanzelu iê, ande dia kubatula maka oso-oso. Se tu dielela kua Jihova, muéne ua-nda tu bhana o nzumbi iê ikola, phala ku tu kuatekesa kubhanga o ima iambote.​—Filipe 2:13.

¹⁷ Mu izuua ia Samuuele, o akua Izalaiele a a tolola ku akua Fidíxia. Mu veji dia ku ibhula kua Jihova, o ima ia tokalele o kubhanga, ene ambe: “Tu takanienu álaka ia kikutu kia Jihova ku Silo, tu i bheke kunu mu’axaxi ketu, phala i tu bhulule bhu maku ma jinguma jetu.” Ihi ia bhiti mukonda dia kima kia bhangele? “Anga bhu bhita kihaxi kia dikota, kuma ku mbandu ia Izalaiele kua dibhale makuinhi atatu a midi ia muthu akua kuenda bhoxi. Alaka ia Nzambi anga a i tambula.” (1 Samuuele 4:2-4, 10, 11) O akua Izalaiele, akexile mu banza kuila, mu kuambata o álaka ia kikutu, Jihova ueji ku a kuatekesa ni ku a langa. Maji ene ka bhingi o kikuatekesu kia Jihova, ka sota kuijiia se ihi ia kexile mu banza muéne. Mu veji dia kiki, ene a bhange o kima kia a uabhele, mukonda dia kiki, a bhiti mu jiphaxi javulu.​—Tanga Jisabhu 14:12.

18. Ihi i ku longa o Bibidia ia lungu ni kudielela kua Jihova?

¹⁸ O mukuá Jisálamu ua zolele kiavulu Jihova, ua soneka: Ngi “dielela kua Nzambi, hinu ngi mu ximana dingi, hinu ngi bhanduluka dingi mu kumona o pholo iê. Eie, Nzambi iami, tata! muxima moxi ua ngi bhuila! k’iene ki ngala ku ku banzela ku makanga.” (Jisálamu 42:5, 6) O kuila kiene ki u divua ia lungu ni Jihova? O kuila eie u di divua kuma ua mu zukama ni ku mu dielela? Eie u tena ku mu dielela dingi. O Bibidia izuela: “Dielela kua Jihova ni muxima ué uoso; kana kudielela ngó o kilunji kié. Mu suue muene ngó mu mauendelu mé moso, muene a iukise o njila jé joso.”​—Jisabhu 3:5, 6.

19. Kiebhi ki u tena kulondekesa o henda iê kua Jihova?

¹⁹ Mu ku diangela ku tu zola, Jihova ua tu longo kiebhi ki tua tokala ku mu zola. Tu kolokote mu kuxinganeka mu ima ioso ia bhange phala etu, ni mu henda iê ko kuetu. Tu kolokote mu ku mu londekesa kuila, tua mu zolo ni muxima uetu uoso, ni muenhu uetu uoso, ni kilunji kietu kioso, ni nguzu ietu ioso.​—Marku 12:30.