O divulu dia Josuué 6:10-15, 20, dizuela kuila, mu samanu dia izuua, o masoladi akua Izalaiele akexile mu kondoloka o mbanza ia Jedikó lumoxi ku kizuua. Mu kizuua kia kasambuadi, ene a kondolokele o mbanza mu sambuadi dia ji veji. Mu kiki, Jihova ua buika o ilumbu ia mbanza ia Jedikó, anga akua Izalaiele a tolola o mbanza. O kuila o jingijiie ene mu kanda o mavu, a sange ima ilondekesa kuila o mbanza ia Jedikó a i tolele mu kithangana kiofele?

M’ukulu, kioso o masoladi kia mesenene kutambula mbanza, ene akexile mu kala bhu muelu ia ilumbu, ni kukala polondo phala kubhânga. Ene akexile mu fidisa o athu kubokona ni kutunda mu mbanza. Mukonda dia kiki, o athu akexile mudia ngó o kúdia kua bhakele mu mbanza. Kioso o jinguma kia bokona mu mbanza, ene akexile mu kuambata o ima ioso ia mesenene, katé muene ni kúdia kua subhukile. Mukonda dia kiki, o jingijiie ene mu kanda o mavu, ka tena kusanga kúdia mu iphulungunzu ia Palestina, a i tolele ué mu ukexilu iú. Maji mu iphulungunzu ia Jedikó ene a sange ima iéngi. Saí divulu dizuela ia lungu ni kusota ima iala koxi a mavu, diambe: “O kima kia sange dingi mu mbanza ioso, o idima mba kúdia.” O divulu di zuela dingi: “Kibhonza kiavulu kusanga idima iavulu mu jimbanza a ji tolole ku jinguma.”

O Bibidia izuela kuila, Jihova ua fidisile akua Izalaiele kukatula kúdia mu mbanza ia Jedikó phala kuambata. (Josuué 6:17, 18) O Bibidia izuela ué kuila, o akua Izalaiele a tolole o mbanza ia Jedikó kioso kia bhitile o kithangana kia kubhongolola. Kiki kilombolola kuila, mu kithangana kieniókio kua kexile idima iavulu mu mbanza ia Jedikó. (Josuué 3:15-17; 5:10) Kioso kia tolola o mbanza ia Jedikó, kua kexile hanji idima iavulu. Kiki ilondekesa kuila, o mbanza a i tolola mu kithangana kiofele, kala ki zuela o Bibidia.