MUSOSO UA KIDI
Lelu Ngala ni Ukamba Uambote ni Nzambi ni Mam’etu
MAM’ETU ua ngi ibhuidisa: “Mukonda diahi kuene mu bheza dingi o jikuku jê? Ku kijiia kuila, eie uala ku muenhu mukonda dia ene? Eie kua mu londekesa kisakidilu ku jikuku jê. Kiebhi ki u tena kuxisa o ukexilu uokulu ua jikuku jê? O kudituna kubheza o jikuku jê, kilondekesa kuila, eie kua mu bhana valolo ku ubhezelu uetu.” Kioso kia zubha kuzuela, Mama ua mateka o kudila.
Mu kubhita jimbeji ande dia maka iá, o Jimbangi ja Jihova a mu bhanene umbangi. Muéne ka mesenene ku di longa o Bibidia, maji mukonda dia kulondekesa kuila, uexile muthu uambote ua bakana ni ji phange phala kuenda ni ku ngi longa o Bibidia. Kioso ki ngai ni ku ngi longa ngó eme, muéne ua dizangala n’eme, maji nga diuana, mukonda mu ithangana ioso nga kexile mu mu belesela. Eme nga mesenene kusangulukisa Jihova, mukonda dia kiki, ki ngi tokalele ku mu belesela. Kia bhonzele kiavulu, maji Jihova ua ngi kuatekesa.
KU DI LONGA O KIDI KIA LUNGU NI JHOVA
O muiji uami exile ji Budista, kála o athu a mukua ku Japão. Maji mu kubhita mbeji jiiadi ni ku di longa ni Jimbangi ja Jihova, nga mono kuila, o milongi ia Bibidia ia kidi. Kioso ki nga di longo kuila, ngala ni Tata iami ku diulu, nga mesenene kuijiia dingi ia lungu ni Tata íii. Ku dimatekenu, eme ni Mama tua kexile mu zuela ia lungu ni ima i nga kexile mu di longa. Eme nga mateka kuia mu iônge mu ma Lumingu. Kioso ki nga kexile mu kuijiia kiá o kidi, nga tangela Mama kuila, ki ngeji ia dingi mu jimisa ja akua Budista mu samba. Mu kienhiki, o ibanzelu iê ia lunguluka. Muéne uambe: “Kukala ni muthu ku bhata, ka mu bheza o jikuku jetu, ji sonhi ja dikota.” Mam’etu ua ngi jijidika phala ku lémbua ku di longa o Bibidia, ni kuia mu iônge. Eme nuka nga banzele kuila, mama ueji ngi fidisa kubhanga kiki! Muéne ua kituka muthu uéngi.
O Papa ua xikina mu ioso ia zuela Mama. Mu divulu dia Efezo mu kibatulu kia 6, nga di longo kuila, Jihova ua mesena kuila, ngi belesela o jitata jami. Eme nga mesenene kuila, o muiji uetu u kala ni kutululuka, nga banze kuila, se nga evuile, nange ene eji ng’ivua ué. Mu kithangana kieniókio, nga kexile mu di pelepalala phala kubhanga o jipolova bhu xikola, mu kienhiki, eme nga belesela o jitata jami mu mbeji jitatu. Nga sambe kua Jihova kuila, ngeji vutuka ku mu bheza kioso o jimbeji jitatu jeji bhita.
O ima i nga banzele ki iexile ia kidi, mu maukexilu aiiadi. Kia dianga, eme nga banzele kuila, kioso kieji bhita o jimbeji jitatu, ngeji kala hanji ni
vondadi ia kusidivila Jihova. Mu veji dia kiki, o ukamba uami ni muene ua zoza. Kia kaiiadi, Mama ni Papa a bhange ioso phala ku ngi fidisa kubheza Jihova.KIKUATEKESU NI IZUKUTISU
Bhu Kididi Kia Ubhezelu, nga sangele Jimbangi javulu ja Jihova, akexile ué mu a zukutisa ku miji iâ. Ene a ngi tangela kuila, Jihova ueji ngi kuatekesa. (Matesu 10:34-37) Ene a ngi suínisine ué kuila, se nga kolokotele kukala fiiele kua Jihova, ngeji bhana umbangi ku muiji uami. Eme nga mesenene ku dielela kua Jihova, mu kienhiki, nga dióndo mu kusamba.
O muiji uami ua ngi zukutisa mu maukexilu oso. Mama ua ngi diondela kiavulu phala kueha o ku di longa o Bibidia, iú ua sange ndunge phala kuzuela n’eme. Mu ithangana ia mukua, eme nga kexile mu dixibha. Mu kithangana kia kuzuela, tua kexile mu zoka kiavulu phala kumona se nanhi ua lungu. Lelu, eme ngi di lembalala kuila, se nga xile o ibanzelu ia Mama ia lungu ni ubhezelu uê, ni ima ia kexile mu banza muéne, ki kueji kala maka avulu. O jitata jami ja ngi bhana dingi ikalakalu iavulu, phala kukala ku bhata. Saí ithangana, akexile mu ngi jikila bhu kanga, sai bhabha ka kexile mu ngi xila kudia.
Mama ua bhingi ku athu a mukuá, phala kuzuela n’eme, phala kuxisa o ubhezelu uami. Muéne ua zuela ni mesene iami ia xikola, maji ka tena. Mama ua zuela ué kua xefe iê ia salu, phala ku ngi lungulula o ibanzelu mu kuzuela kuila, o jingeleja joso ki jala ni valolo. Muéne ua xindi ku jindandu jetu ni kudila, phala kubhinga kikuatekesu. Kiki kia ngi bhangesa ku divua kia iibha. Mu iônge, o tufunga a ngi kuatekesa kuila, kioso Mama kia kexile mu zuela o maka iá ku athu, mu kidi muéne ua kexile mu kuatekesa o athu kuijiia o kidi.
O jitata jami a mesenene kuila, eme ngi di longa mu xikola ia katunda, phala kukala ni salu iambote. Kuma etu enioso tua kexile ni njinda, ki tueji zuela mu ukexilu ua tululuka. Mu kiki, nga soneka mikanda iavulu phala kua tangela o ima i nga mesenene. Papa ua thathamene kiavulu, mu kiki, muéne uambe: “Se ua mu banza kuila, ua-nda sota salu, ndé mungu u i sote mba u tunda mu inzo iami.” Nga sambe kua Jihova, phala ku ngi kuatekesa. Mu kizuua kia mukua, kioso ki nga kexile mu boka, phange jiiadi ja ahatu a ngi bhana o kikalakalu kia ku longa o tuana tuâ. Papa ka sangulukile, mukonda dia kiki, ka kexile mu zuela n’eme, muéne ua kexile mu ngi xonguena. Mama ua zuela kuila, sembele se nga kexile ngi muii, mu veji dia kukala ngi Mbangi ia Jihova.
Jihova ua ngi kuatekesa kulungulula o ibanzelu iami, ni kuijiia ihi i ngeji bhanga
Mu ithangana ia mukua, ki ngi dielele kuila, Jihova ueji ngi kuatekesa ku di bhana ni maka enhá. Mu kienhiki, nga sambe kua Jihova, ni kuxinganeka mu ioso i zuela o Bibidia ia lungu ni henda iê. Kiki kia ngi kuatekesa kudielela kuila, o jitata jami, sumbala akexile mu ngi zukutisa, maji ene a ngi zolele, a mesenene o mbote iami. Jihova ua ngi kuatekesa kulungulula o ibanzelu iami, ni kuijiia ihi i ngeji bhanga. Kioso ki nga kexile mu boka, nga sangulukile kiavulu. Mu kidi, eme nga mesenene kukala ngi muboki ua thembu ioso.
KUSIDIVILA KALA MUBOKI UA THEMBU IOSO
Kioso o jiphange ja ahatu kiévu kuila, eme nga mesenene kukala ngi muboki ua thembu ioso, ene a ngi tangela kuila, nga tokalele ku kinga katé o jitata jami kieji tululuka. Nga sambe mu kubhinga unjimu, nga tokuesa mu madivulu metu, ni kubanza se mukonda diahi nga mesenene kukala ngi muboki ua thembu ioso, ni kubhinga kikuatekesu ku jiphange jamukuá ia lungu ni maka iâ. Eme nga mesenene ku sangulukisa Jihova. Nga mono kuila, né muene se nga kingile kiavulu phala kukala muboki ua thembu ioso, o jitata jami eji ngi fidisa.
Nga bokona mu sidivisu ia thembu ioso, kioso ki nga kexile mu zubha o ku di longa bhu xikola. Kioso ki nga kalakala kala ngi muboki ua thembu ioso, mu ithangana iofele nga mesenene kuia mu boka mu ididi mua bhindamene o aboki. Maji, Papa ni Mama ka mesenene kuila, eme ngi tunda ku bhata. Mu kiki, nga kingila katé ki nga tenesa 20 a mivu. Mu kiki, nga soneka mukanda ku filiiale ia Japão, phala ku ngi tumikisa ku kididi kia zukama, phala Mama ka thandanganhe mu ku ngi banza eme.
Kioso ki nga kexile mu bhanga o kikalakalu kiki, nga sangulukile kiavulu mu kumona o maxibulu ami a Bibidia kua batizala. Nga mateka ku di longa o dízui dia Kingileji, mukonda nga mesenene kubhanga dingi mu kikalakalu kiami kia kuboka. Kioso ki nga mono o kikalakalu kia kexile mu bhanga o jiphange jiiadi ja mala mu kilunga, exile aboki a katunda, mu kukuatekesa athu avulu kuijiia o kidi, nga banze kukaiela o phangu ia jiphange jiji. Mu kithangana kiki, Mama ua kate mu veji jiiadi, mu kiki, nga vutuka ku bhata phala ku mu kuatekesa. Mu kumona kiki, Mama ua sangulukile kiavulu, kiki kia mu bhangesa kukala dingi muthu ua henda.
JIHOVA UA NGI BESOALA KIAVULU
Mu kubhita sambuadi dia mivu, Atsushi, muboki ua katunda nga mu tange kia kudima, ua ngi tumikisa mukanda. Muéne ua kexile mu sota phange phala ku kazala, iú ua ng’ibhuidisa, se ihi i nga kexile mu banza ia lungu ni muéne. Eme ki ngi banzele kuila, muéne ueji zuela maka alungu ni ukaza. Mu kubhita mbeji, nga mu tangela kuila, eme nga kexile polondo phala ku muijiia kiambote. Tua mono kuila, o jimbambe ji tua kexile mu suua jene ji moxi. Tua mesenene kukolokota mu sidivisu ia thembu ioso, tua kexile polondo mu kuxikina kikalakalu kioso kioso kia tu bhana. Mu kusukáku, tua kazala. Eme nga sangulukile kiavulu mu
kumona o Jitata jami ni jindandu jetu, mu kizuua kia ukaza uetu.Nepal
Kioso ki tua kexile mu kalakala kala tu aboki a thembu ioso, Atsushi a mu solo phala kukuatekesa o kafunga ka ilunga. Mu ku bhita thembu, a tu solo phala kukalakala kala aboki a katunda, mu kusuluka, a tu tumina ku kunda o ilunga. Kioso ki tua zubha o kukunda o ilunga ioso, o jiphange ku filiiale a tu xindi. Ene a tu ibhuidisa se tua kexile polondo, phala kuia ku ixi ia Nepal, ni ku suluka ni kikalakalu kia kukunda o ilunga mu ixi ienioió.
Nga di longo ima iavulu ia lungu ni Jihova, mu kusidivila mu jixi javulu
Eme nga thandanganhele kiavulu, se kiebhi kieji divua o jitata jami ia lungu ni kuia ku ixi ia dikanga. Kioso ki nga xindi, Papa ua ngi tangela: “Eie ua múia ixi iambote.” Mu kubhita semana ande dia ku mu xinda, Papa a mu bhele divulu dia kexile mu zuela ia lungu ni ixi ia Nepal.
Tua sangulukile kiavulu, mu kukala bhu kaxi ka athu ambote ku ixi ia Nepal. Mu kusuluka, a tu tangela kuila, tueji kunda ué o ixi ia Bangladesh. O ixi ia Bangladesh, ia zukama ni ixi ia Nepal, maji ki i difu. O athu akua ixi íii ka difu ni akua Nepal, o sidivisu ia kuboka tua kexile mu i bhanga mu maukexilu avulu. Mu kubhita kitanu kia mivu, a tu solo phala kuvutuka ku ixi ia Japão, kuene ku tua suluka ni kikalakalu kietu kia kukunda o ilunga.
Nga di longo ima iavulu ia lungu ni Jihova mu jixi ja Japão, Nepal ni Bangladesh. O athu akua jixi jiji, ka difu mu maukexilu ni ijila. Kala muthu ka difu ni mukuá. Ngene mu mona kiebhi Jihova kiene mu kuatekesa o athu, mu kua xikina phala ku mu bheza, muéne u a besoala kiavulu.
Eme ngala ni ima iavulu phala kusakidila Jihova. Muéne ua ngi bhana kithangana kia ku mu bheza, ni kubhanga o kikalakalu kiê, ua ngi bhana ué dikaza diambote dia Kidistá. Nzambi ua ngi kuatekesa kusola ima iambote, lelu ngala ni ukamba uambote ni muéne ni muiji uami. Ngi sakidila Jihova, mukonda Eme ni Mama, tuala dingi ni ukamba uambote. Nga sakidila kiavulu, mukonda nga sange kutululuka ni Nzambi ni Mama.
Nga di longo ima iavulu ia lungu ni Jihova, mu kusidivila mu jixi javulu