Ene a lombolola athu mu nzumbi, a tumine kubuika o mbanza ia Jeluzaleme, ene a-nda kua tumina ué phala kubuika o mundu uaiibha ua Satanaji mu ita ia Alumajedone. O milongi íii, a i lungulula. Mukonda diahi?

Ande dia muvu ua 607 A.K.K., bhu kaxi ka kisuma, Jihova ua londekesa kua Izekiiele o ima ieji bhita mu Jeluzaleme ande dia ku i buika. Izekiiele ua monene ima iavulu iaiibha ia bhitile mu mbanza. Muéne ua monene samanu dia maiala, ene oso akexile ni ‘mata ma kubuika bhu maku.’ Kua kexile ué diiala ua ‘zuata izuatu ia linhu,’ iú ua kexile ni “tindelu ia musoneki.” (Izekiiele 8:6-12; 9:2, 3) O diiala didi, a mu tumine kubhita mu mbanza ioso ni ku ta “kidimbu bhu mabhômo ma athu oso a mu di tula muenhu ni kukema, mukonda dia isunji ioso iaiibha ialu’ia ni kubhanga athu mu kaxi ka mbonge.” Mu kusuluka, a tendelesa o samanu dia maiala phala kujibha o athu oso kexile ni kidimbu. (Izekiiele 9:4-7) O kisuma kiki, ki tu longa ihi? Nanhi o diiala ni tindelu ia musoneki?

Izekiiele ua monene o ima íii ku muvu ua 612 A.K.K. O kikanenu kiki, kia dianga ku di kumbidila mu kubhita mivu itanu, kioso Jihova kia buika o mbanza ia Jeluzaleme bhu kaxi ka masoladi akuâ Babilonha. Mu kiki, bhu kaxi ka akuâ Babilonha, Jihova ua kaxtikala o mundu uê ua mu bhukumukine. (Jelemiia 25:9, 15-18) Maji ihi i tuamba ia lungu ni Jijudé a belesela, ka xikinine kubhanga o ima iaiibha ia kexile mu bhanga mu mbanza? Jihova ua a bhulula.

 Mu kisuma, Izekiiele ka te kidimbu ku muthu, mba ku kuatekesa kubuika o mbanza. Mu veji dia kiki, o ji anju ene a buika o mbanza ia Jeluzaleme. Mu kiki, o kikanenu kiki, ki tu kuatekesa kuijiia o ima ia bhiti ku diulu. Jihova ua tumina o ji anju jê kubuika o athu aiibha ni kubhulula o athu aiuka. *

O kikanenu kiki, kia-nda dikumbidila ué ku hádia. M’ukulu, tua kexile mu ki tendela kuila, o diiala ni tindelu, u lombolola o Jikidistá a undu ala hanji mu ixi. Tua kexile mu ki tendela ué kuila, o athu akexile mu a ta o kidimbu phala kubhuluka, a lombolola o athu ene mu kuívua ni kuxikina o njimbu iambote i tuene mu boka. Maji tua mono kuila, tua tokala kulungulula o ukexilu uetu ua kujimbulula o kikanenu kiki. Mu divulu dia Matesu 25:31-33, tua di longo kuila, Jezú muéne u fundisa o athu. Muéne ua-nda bhanga kiki ku hádia, mu kithangana kia hadi ia dikota. Mu kithangana kieniókio, o athu a-nda ku a tungula kála jimbudi a-nda bhuluka. Maji o athu a-nda ku a tungula kála jihombo, a-nda ku a buika.

Ihi i tua di longo mu kisuma kia Izekiiele? Tua di longo madisá atanu:

1.  Ande dia kubuika Jeluzaleme, Izekiiele, Jelemiia ni Izaia, a dimuine o mundu ia lungu ni ima ieji bhita mu mbanza. Ene exile kála alangidi. Lelu, Jihova u longa o mundu uê bhu kaxi ka kibuka kiofele kia Jikidistá a undu, ni ku dimuna o athu a mukuá, ande dia kumateka o hadi ia dikota. Mu kidi, o mundu uoso ua Nzambi, mba o dibhata dioso dia Kristu, di bhanga mbandu mu kikalakalu kiki kia ku dimuna o athu.​—Matesu 24:45-47.

2.  Izekiiele, ka te kidimbu ku athu eji bhuluka. Kiene kimoxi ué lelu, o mundu ua Nzambi kene mu ta kidimbu ku athu. Ene a boka ngó ku athu ni kua tangela o ima ia-nda bhita ku hádia. O kikalakalu kiki kia kuboka ku mundu uoso, ene mu ki bhanga ni kikuatekesu kia jianju.​—Dijingunuinu 14:6.

3.  O athu a bhuluka mu izuua ia Izekiiele, ka kexile ni kidimbu bhu mabhômo mâ. O athu a-nda bhuluka ku hádia, ka-nda kala ué ni kidimbu. Ihi ia tokala kubhanga o athu phala kubhuluka mu kithangana kia hadi ia dikota? Kioso kiévua o njimbu, ene a tokala kusota ku kaiela o phangu ia Jezú, ku dibhakula kua Nzambi, kukuatekesa o jiphange ja Kristu, ni kuboka o njimbu iambote. (Matesu 25:35-40) Mu kithangana kia hadi ia dikota o athu enhá, a-nda kua sola phala kubhuluka.

4.  O diiala ni tindelu, u lombolola Jezú. Mu kithangana kia hadi ia dikota, Jezú ua-nda ta kidimbu ku mundu uavulu, kioso kia-nda kua tungula kala jimbudi. Mukonda dia kiki, ene a-nda tambula o mabesá a kukala ni muenhu ua kalelaku mu ixi.​—Matesu 25:34, 46. *

5.  Lelu, o kisamanu kia maiala ni mata a kubuika, a lombolola o kifuxi kia masoladi a diulu kumoxi ni Jezú, o mutuameni uâ. Kua kambe ngó bhofele, ene a-nda buika o ifuxi ioso, ni kuzubha o kuiibha kuoso.​—Izekiiele 10:2, 6, 7; Dijingunuinu 19:11-21.

O madisá u tua di longo mu kisuma kiki, a tu kuatekesa kukala ni kidielelu kia kuila, Jihova ka-nda buika o athu aiuka kumoxi ni athu aiibha. (2 Phetele 2:9; 3:9) O madisá u tua di longo, a tu lembalesa ué kuila, o kikalakalu kia kuboka, kiala ni valolo iavulu lelu. Athu oso a tokala kuívua o njimbu ande dia kuíza o dizubhilu!​—Matesu 24:14.