1. Mukonda diahi Jihova muéne o Ngumbi ia dikota?

KU MBEJI ia Kamoxi ka muvu ua 2010, akexile mu sumbisa kitutu kiokulu kia utuma ku ixi ia Inglaterra. O kitutu kia tokalele ku ixi ia China, akexile mu ki sumbisa mu 70 a mazunda a jidolare. Tu diuana kiavulu, kioso ki tu mona o ngumbi kukalakala ni utuma, phala kubhanga kitutu kiaiuka, kiala ni valolo iavulu. Jihova,o Ngumbi ietu, ua beta-o-kota, o athu ndenge. O Bibidia izuela kuila, Jihova ua bhange o diiala ni “mavu ma bhoxi,” mba utuma. (Dimatekenu 2:7) O diiala didi, Adá, uexile ‘mon’â Nzambi,’ a mu bhangele ni uhete ua kukaiela o ídifua ia Nzambi.​—Luka 3:38.

2, 3. Kiebhi ki tu tena kukaiela o phangu ia akua Izalaiele, a diela o ituxi iâ?

² Mukonda dia kubhukumukina o Mubhangi uê, Adá kexile dingi mon’â Nzambi. Maji athu avulu a tokala ku mbutu ia Adá, a solo Jihova kála Ngana iâ. (Jihebeleu 12:1) Mukonda dia kubelesela o Mubhangi uâ, ene a londekesa kuila, a mesena kuma muéne u kala Tata ni Ngumbi iâ, mu veji dia Satanaji. (Nzuá 8:44) O ufiiele uâ kua Nzambi, u tu lembalesa o ima  ia zuelele akua Izalaiele, kioso kia diela o ituxi iâ. Ene a zuelele: “Jihova ei’eie u Tat’etu; etu tu utuma, ei’eie u ngumbi ietu; etu ene-oso tu kibhangelu kia maku mé.”​—Izaia 64:8.

³ O abhezi a kidi a Jihova lelu, a bhanga nguzu iavulu phala kukala athu a lenduka, ni kubelesela. Ene a mona kuila, ujitu ua dikota kuixana Jihova Tata iâ. Ene a mesena kuila, muéne u kala o Ngumbi iâ. O kuila eie ua mesena kukala utuma ua fuama ku u umba kua Nzambi, phala kukala kitutu kia valolo? O kuila tuene mu mona o jiphange jetu kála athu a mu a umba hanji kua Nzambi? Phala ku tu kuatekesa kukala ni ukexilu uambote, tua-nda di longa kiebhi Jihova kia sola o athu a umba, mukonda diahi muéne u a umba, ni kiebhi kia umba o athu.

4. Kiebhi Jihova kia sola o athu a mu zukama? Bhana phangu.

⁴ Jihova ka mona o athu kála ki tuene mu mona etu. Mu veji dia kiki, muéne u mona o muxima, anga u tonginina o ukexilu uetu ua muxima. (Tanga 1 Samuuele 16:7b.) Jihova ua londekesa o ukexilu iú, kioso kia bhange o kilunga kia Jikidistá. Muéne ua bhangesa athu avulu akexile mu a mona kala athu a kambele valolo, ku mu zukama ni kuzukama kua Mon’ê. (Nzuá 6:44) Mu kifika, o Falizeu a mu ixanene Saulu, uexile mu longolola, ni ‘kuzukutisa, ni ku sombola’ o athu. (1 Timote 1:13) Maji Jihova ua tonginina o muxima ua Saulu, iú ua mono kuila, muéne kexile kitutu kia kambele valolo. (Jisabhu 17:3) Mu veji dia kiki, Jihova ua mono kuila, ueji tena k’umba Saulu, phala kukala kitutu kio ‘sole,’ phala kuboka ku “akua jixi jengi, ni ku jisobha, ni ku [an’â] Izalaiele.” (Ikalakalu 9:15) Jihova ua solo ué athu a tena ku a umba, phala kukala itutu ‘ia beta ujitu,’ kala ió exile jihôlua, jindumbu, ni mii. (Loma 9:21; 1 Kolindo 6:9-11) Kioso kia di longo o Mikanda Ikola, ene a kolesa o kixikanu kiâ kua Jihova, ni ku mu ehela ku a umba.

5, 6. O kuxikina Jihova kála Ngumbi ietu, ku tu bhangesa kumona kiebhi (a) o athu a tungu mu mbambe ietu? (b) o jiphange jetu?

⁵ Tuejiia kuila, Jihova u tena kubhangesa o athu ambote ku mu zukama. Mukonda dia kiki, ki tu tokala kufundisa o athu a tungu mu mbambe ietu, mba o jiphange ja kilunga. Mu kifika, tala kiebhi kia divu Michael, kioso kia mu kundu ku Jimbangi ja Jihova. Muéne uambe: “Eme ki ngi kexile ku a bhana mátui, né ku a bhana valolo. Mu kidi, nga kexile mu kua talatala kiaiibha! Mu kubhita thembu, nga di sange ni muiji u nga uabhela kiavulu, mukonda dia ukexilu uâ uambote. Maji saí kizuua, nga divu kiaiibha kioso kia ngi tangela kuila, ene exile Jimbangi ja Jihova! O ukexilu uâ uambote, ua ngi suínisa ku di tonginina, ni kumona se mukonda diahi ki ngi uabhele o Jimbangi ja Jihova. Mu kubhita kithangana, nga mono kuila, nga kexile ni ukexilu iú, mukonda dia ima i ng’evuile ia lungu ni ene.” Michael ua  mesenene kuijiia dingi. Mu kiki, muéne ua xikina kudilonga o Bibidia. Mu kubhita thembu, a mu batizala, iú ua bokona mu sidivisu ia thembu ioso.

⁶ Se tu xikina kuila Jihova muéne o Ngumbi ietu, tua-nda talatala kiambote o jiphange jetu. Tua-nda ku a mona kala athu a mu a umba hanji. Kiene kia mona Jihova. Muéne u mona o mixima iâ, muéne uejiia kuila, o ukexilu uâ ua ituxi, ki ua-nda suluka katé ku hádia ni hádia. Muéne uejiia ué kuila ene a tena kukala athu ambote. (Jisálamu 130:3) Tu tena kukaiela o phangu iambote ia Jihova, mu kumona o jiphange jetu kála kia mona Jihova. Tu tena kukalakala kumoxi ni Ngumbi ietu, phala kukuatekesa o jiphange jetu kulungulula o ukexilu uâ. (1 Tesalonika 5:14, 15) O tufunga mu kilunga, a tokala kubhana phangu iambote mu kubhanga o kikalakalu kiki.​—Efezo 4:8, 11-13.

7. Mukonda diahi u londekesa o kisakidilu, kioso kia kubazela kua Jihova?

⁷ Saí athu nange a zuela: ‘Eme ki ngexile mu bhana valolo kioso o jitata jami kia kexile mu ngi bazela, maji nga mateka kubhana valolo kioso ki nga mateka ku vuala ni ku sasa o tuana tuami.’ Kioso ki tu kula, nange tu mateka kubhana dingi valolo ku ibazelu, mukonda tu mona kuila, o muthu u tu bazela, ua tu zolo. (Tanga Jihebeleu 12:5, 6, 11.) Jihova ua tu zolo kala an’ê. Mukonda dia kiki, muéne u tu bazela, ni ku tu umba ni muanhu uoso. Muéne ua mesena kuila, tu kala tu athu a unjimu, ni tu zediue, ni kuila, tu mu zola kala Tata ietu. (Jisabhu 23:15) Muéne u luuala kiavulu kioso ki tu bhita ni jiphaxi. Muéne ka mesena kuila, tufuá sé kudiela o ituxi ietu.​—Efezo 2:2, 3.

8, 9. Kiebhi Jihova kia tu longa lelu, ni kiebhi o ulongelu iú ua-nda suluka katé ku hádia ni hádia?

⁸ Ande dia kuijiia Jihova, nange tua kexile ni ídifua iavulu iaiibha. Maji bhu kaxi ka ilongesu iê, Jihova ua tu umbu, iú ua tu kuatekesa kulungulula o ukexilu uetu. Mukonda dia kiki, lelu tuala ni ídifua iambote. (Izaia 11:6-8; Kolose 3:9, 10) Tuala kiá mu palaízu mu nzumbi. O palaízu íii, o kutululuka ku tu bhana Jihova mu izuua ietu, phala ku tu kuatekesa kulungulula o ukexilu uetu. Bhu kididi kiki, tu divua kiambote, né muene tua tungu ku mundu iú uaiibha. O athu a sase sé kua londekesa henda, a mona o henda ia kidi ilondekesa o jiphange jâ mu palaízu íii. (Nzuá 13:35) Etu tua di longo kulondekesa o henda ku akuetu. Lelu, kuma tuejiia Jihova, tu mona o henda ia kidi i tu londekesa muéne.​—Tiiaku 4:8.

⁹ Ku mundu uobhe, o palaízu ietu mu nzumbi, ia-nda tu sangulukisa dingi. Tua-nda sanguluka ué mu palaízu ia-nda bheka o Utuminu ua Nzambi. Mu thembu ienioió, Jihova ua-nda suluka mu ku tu umba ni ku tu longa ni kuiuka kuoso. (Izaia 11:9) Jihova ua-nda tu bhangesa kukala ni kitongoluelu, ni mukutu uaiuka. Kiki kia-nda tu  kuatekesa kutendela kiambote o ima, ni kubelesela ni lusolo o itendelesu iê. Mu kiki, tu kolokote mu kuehela ku tu umba kua Jihova, ni ku mu londekesa kuila, tu bhana valolo iavulu ku henda iene mu tu londekesa.​—Jisabhu 3:11, 12.

10. Kiebhi Jezú kia londekesa o muanhu, ni unjimu ua Ngumbi ia Dikota?

¹⁰ Kála o ngumbi ia hete iejiia kiambote o utuma ua mu umba, o Ngumbi ietu, Jihova, ua tuijiia kiambote. Muéne uejiia katé kuebhi kuá sukila o nguzu ietu, ni ima i tua lungulula kiá ku muenhu uetu. Mu kiki, kioso kia tu umba, muéne u xinganeka mu ima ioso íii. (Tanga Jisálamu 103:10-14.) Tu tena ku di longa kiebhi Jihova kia tu mona, mu kuijiia kiebhi Jezú kia kexile mu dibhana ni itondalu ia jipoxolo jê. Saí ithangana, o jipoxolo akexile mu zoka se nanhi uexile o dikota bhu kaxi kâ. Se uexile bhu kaxi kâ, kiebhi ki ueji mona o ukexilu ua jipoxolo? Nange ueji mona kuila, ene kexile kála o utuma uambote, a tena ku u umba. Maji Jezú uejiidile kuila, ene eji ku a umba, se a kumbidile o itendelesu iê ia henda, ni kukaiela o phangu iê ia kulenduka. (Marku 9:33-37; 10:37, 41-45; Luka 22:24-27) Kioso Jezú kia fukunuka, o jipoxolo a tambula o nzumbi ia Nzambi. Mu kiki, kexile mu banza dingi se nanhi ua betele-o-kota bhu kaxi kâ. Mu veji dia kiki, ni kusuína kuoso, ene akexile mu bhanga o kikalakalu kia a tumine Jezú.​—Ikalakalu 5:42.

11. Kiebhi Davidi kia londekesa kuila, muéne uexile utuma uambote phala ku u umba? Ni kiebhi ki tu tena kukaiela o phangu iê?

¹¹ Lelu, Jihova u tu umba bhu kaxi ka Bibidia, ka nzumbi iê ikola, ni kilunga kiê. Kiebhi o Bibidia i tena ku tu umba? Tua tokala ku i tanga, kuxinganeka mu ima i tu tanga ni kubhinga kua Jihova phala ku tu kuatekesa ku kumbidila o milongi i tu di longa. Sobha Davidi ua soneka: “Kioso ki ngi ku ta muxima, bhu hama iami bhu nga zeka ngi kala mu ku ku xinganeka, ki ngi tona mu ithangana ia usuku.” (Jisálamu 63:6) Muéne uambe dingi: “Nga sakidila Jihova ua ngi bhana phangu; katé ni muxima mu usuku ua ngi longo kilunji.” (Jisálamu 16:7) Davidi ua kexile mu xinganeka mu itendelesu ia Jihova, muéne ua kexile mu kuehela o milongi kulungulula o ukexilu uê, né muene se kia bhonzele kuxikina o itendelesu. (2 Samuuele 12:1-13) Davidi ua xisa phangu iambote ia kulenduka ni kubelesela. Mu kiki, dibhuidise: ‘Kioso ki ngi tanga o Bibidia, o kuila ngene mu xinganeka mu milongi i ngi tanga, ni kuehela o itendelesu ia Nzambi ku bokona mu muxima uami? O kuila, ngi tena kubhanga kiki mu veji javulu?’​—Jisálamu 1:2, 3.

12, 13. Kiebhi Jihova kia tu umba bhu kaxi ka nzumbi ikola, ni kilunga kiê?

¹² O nzumbi ikola i tena ku tu umba mu maukexilu avulu. Mu kifika, i tena ku tu kuatekesa kukaiela o ídifua ia Jezú, ni ídifua iavulu ia kibundu kia nzumbi. (Ngalásia 5:22, 23) O kídifua kimoxi kia nzumbi, o henda. Etu tua zolo Nzambi, mu kiki tua mesena ku mu belesela ni ku muehela ku tu umba, mukonda tuejiia kuila, o itumu iê i tu bhekela mbote. O nzumbi ikola i tena ku tu bhana nguzu, phala ki tu kale ni maukexilu aiibha a mundu iú. (Efezo 2:2) Kioso poxolo Phaulu kiexile munzangala, akexile ku mu funhisa kiavulu ku atuameni a Jijudé. Maji o nzumbi ikola ia mu kuatekesa kulungulula  o ukexilu uê. Mu kubhita thembu, muéne ua soneka: “Ima ioso nga soko na-iu mua Kristu ió mukua ku ngi bhana o kutena.” (Filipe 4:13) Etu tua tokala ué kubhinga o nzumbi ikola, ni kukala ni kidielelu kia kuila, Jihova ua-nda tambuijila o misambu ietu.​—Jisálamu 10:17.

¹³ Jihova u tu umba ué bhu kaxi ka kilunga kiê, ni tufunga. Mu kifika, kioso o tufunga kia mona kuila, tua mu zoza mu nzumbi, ene a bhanga ioso phala ku tu kuatekesa. Maji ene ka bhana itendelesu bhu kaxi ka ima ia banza. (Ngalásia 6:1) Mu veji dia kiki, a samba kua Jihova ni kulenduka kuoso, phala kubhinga o unjimu ni kutetuluka. Mu kusuka-ku, ene a tokuesa o Bibidia ni madivulu metu, phala kusanga o milongi i tua bhindamena. Se o tufunga a ku bhana itendelesu ni henda ioso, nange mukonda dia izuatu iê, lembalala kuila, o kikuatekesu kiki, kilondekesa kuila, Nzambi ua ku zolo. Se u kumbidila o itendelesu ia ku bhana, eie ua-nda londekesa kuila, u utuma uambote, ua fuama ku u umba kua Jihova. Mu kiki, eie ua-nda katula mbote iavulu.

14. Sumbala Jihova uala ni kutena kua ku umba o utuma, maji kiebhi muéne kia londekesa kuila, u xila o ufolo uetu?

¹⁴ O kutendela kiambote kiebhi Jihova kia tu umba, ku tena ku tu kuatekesa kukala ni ukamba uambote ni jiphange jetu. Tua-nda talatala kiambote o athu oso mu mbambe ietu, katé muene ni maxibulu etu a Bibidia. M’ukulu, ande dia ngumbi ku umba o utuma, muéne ua tokalele ku u zelesa mu kukatula-mu o ixete ioso. O Ngumbi ia Dikota, Jihova, u kuatekesa o athu a mesena ku a umba. Muéne ka a jijidika kulungulula o ukexilu uâ. Mu veji dia kiki, muéne u a londekesa o ijila iê ia zele. Mu kusuka-ku, ene a sola se a-nda lungulula o ukexilu uâ, mba kana.

15, 16. Kiebhi o maxibulu a Bibidia kia londekesa kuila, a mesena kuila Jihova u a umba? Bhana phangu.

 ¹⁵ Tala ia bhiti ni Tessie, phange ia muhatu ua tungu mu ixi ia Austrália. Muéne ua di longo o milongi ia Bibidia ni lusolo luoso. Maji muéne ka suluka ni kusuínisa o ukamba uê ni Nzambi. Muéne kexile ué múia mu iônge. O phange ua kexile ku mu longa o Bibidia, ua sambe kua Jihova, anga u mona kuila, ka tokalele dingi ku mu longa o Bibidia. Maji saí kima kia dikota kia bhiti. Kioso kia kexile mu di longa, Tessie ua mu jimbuluila se mukonda diahi muéne kexile múia mu iônge. Muéne uambe kuila, ua uabhele kiavulu kubhanga o jijoko ja kitadi. Mukonda dia kiki, ka mesenene kukala ni mixima iiadi, mba mukuâ makutu. Maji mu kithangana kieniókio, muéne ua mesenene kuxisa kiá o jijoko jeniojo.

¹⁶ Sumbala akexile ku mu xonguena ku makamba mê o’ukulu, Tessie ua mateka kuia mu iônge, ni kulondekesa o ídifua iambote. Mu kubhita thembu, Tessie a mu batizala, iú ua mateka kukalakala kala muboki ua thembu ioso, sumbala uexile ni tuana tuofele. Tua mono kuila, kioso o maxibulu a Bibidia kia di suínisa phala kulungulula o ukexilu uâ, Nzambi u a zukama dingi. Muéne u a umba phala kukala itutu ia ujitu.

17. (a) Ihi i ku bhangesa kuxikina Jihova kala Ngumbi iê? (b) Ihi i tua-nda di longa mu milongi ia-nda kaiela?

¹⁷ Mu izuua ietu, kuene hanji athu, ene mu umba itutu iaiuka. Kiene ué kimoxi, Jihova u tu umba ni muanhu uoso, mu ku tu bhana itendelesu, ni ku mona se tua-nda i kumbidila mba kana. (Tanga Jisálamu 32:8.) O kuila u tena kumona kuila, Jihova ua mesena o mbote iê? O kuila uene mu mona kiebhi Jihova kiene mu ku umba ni henda ioso? Se kiene, ídifua iebhi ia-nda kukuatekesa kukala kala utuma uambote, ua fuama k’umba kua Jihova? Ídifua iebhi i ua tokala o kulenga, phala ki u kale kála o utuma ua kolo, ka tena ku u umba? Kiebhi o jitata kia tena kukalakala kumoxi ni Jihova, phala k’umba o tuana tuâ? O milongi ia-nda kaiela, ia-nda tambuijila o ibhuidisu íii.