Isuma ia Athu a Tungu mu Nzumbi

TALA kiambote ku diulu, ki ua-nda mona-ku muthu mu nzumbi. Maji ki ua-nda kuívua dízui dimoxi ngó. Ejiia-nakiu kuila kuene muene athu mu nzumbi. O athu iá, jinjimu javulu, ala ni kutena. Saí iá a mesena o mbote ietu; a mukuá a mesena ku tu bhanga kia iibha. Ene oso a tu mesena.

O Nzambi ia kidi, nzumbi. (Nzuá 4:24) Muéne uala ni dijina ki dia difu ni majina a jinzambi ja makutu, o dijina Diê, Jihova. (Jisálamu 83:18) O mukua jisalamu ua soneka: ‘Maji Jihova munéne ua tokala ku mu ximana kiavulu; Muéne a mu kuatela uôma, jinzambi jengi kana. Mukonda o jinzambi ja ifuxi ioio, iteka ngó; Jihova-phe muéne ua bhange o diulu. Ni ujitu ni ungana a mu kala bhu pholo iê; ni nguzu ni ku uabha kuala mu kidi kiê kia ngene.’—Jisálamu 96:4-6.

Kisuma Kia Nzambi ia Kidi

O Bibidia izuela: “Kiluua kukala muthu u mona Nzambi.” (Nzuá 1:18) O kidifua kiê, ni kutena kuê, ki tu tena ku ku tendela, kála o muthu a mu vuala kifofo, ka tena ku mona o jikolo. Maji kála o mulongexi u longa o maxibulu mê o maka a bhonzo, mu ukexilu ua ku a lomboluela phala ene a tena kua tendela, Nzambi mu kaxi ka Bibidia, u tu tangela ima ki tu tena ku i mona mu kaxi ka ima i tu tena o ku i mona. Mu kisuma kia bhana ku selevende iê, Jihova u tu kuatekesa kuijiia ia lungu ni athu mu nzumbi ene ku diulu.

Mu kisuma kia bhana ku polofeta Izekiiele, o ku bhenha kua unéne uê kuene kála o túbhia, kima ki bhenha, kála ditadi dia safídia, ni hongolo. Mu kisuma kia mukuá, o poxolo Nzuá, ua mono Jihova ku kiandu kiê, iu uambe kuma Nzambi, ‘uedi kala ditadi dia jàxipe ni dia salado mu ku bhenha,’ uambe uê, “Anga kukala hongolo ia kondoloka o kiandu, kidifua kiê mukuâ ni ditadi dia zemelada.” O ukexilu iú, u tu londekesa kuila Jihova uala mu kaxi ka kuiuka ki kuene mbambe, ni ku tululuka.—Dijingunuinu 4:2, 3; Izekiiele 1:26-28.

O polofeta Daniiele, mu kisuma kiê kia lungu ni Jihova, muéne ua mono “jimidi ja jimidi ja [ji-anju] a kuata ku mu xibhidila [Jihova].” (Daniiele 7:10) O kisuma kieniókio kiexile kidiuanu! O ku mona anju mu kisuma, kieji kala kidiuanu, xinganeka eie ku mona jimidi ja jimidi ja ji-anju!

O Bibidia i tumbula o ji-anju 300 ja veji ndenge, kuila ene ala mu ibuka ni ibuka,  kuala o jiselafí, ni jixelube. Mu izuelu ia Ngeleku, ni mu Hebalaiku, a kisoneka “anju,” mu Bibidia o ibuka iiadi íii, ilombolola “akunji.” O ji-anju a tena kuzuela ni ji-anju ja mukuá, m’ukulu ene akexile mu zuela ni athu. O ji-anju, ki athu a tungile kiâ mu ixi, kana. Jihova ua bhange o ji-anju ukulu, ande dia ku bhanga o athu.—Jobe 38:4-7.

Mu kisuma kia Daniiele, o kifuxi kia ji-anju a di bhongolola phala ku kala jimbangi ia kizulukutu kia bhitile. Daniiele ua mono “Mon’a muthu” ua mu kuiza, iú ua bhixila kua Mukula-ua-Ndamba [Jihova] anga u mu bhixidisa bhu pholo iê. Anga u mu bhana o “kutumina, ni kijingu, ni ungana, phala miji ioso, ni ifuxi, ni madimi moso ende ni ku mu bhikila muene.” (Daniiele 7:13, 14) O “Mon’a muthu” uala ni kididi kia dikota bhu kaxi ka athu a nzumbi ku diulu, Jezú Kristu a mu fukununa, muéne a mu bhana o ku tumina o ixi ioso. Mu utuminu uê, muéne ua-nda bhingana o mautuminu oso, ua-nda zubha o nzala, o mauhaxi oso, ni kalunga mu ixi.—Daniiele 2:44.

O sobha Jezú ua bheka kisangusangu kiavulu ku ji-anju a mesena o mbote ia athu mu ngongo. Maji, ko ji-anju joso ja sangulukile.

Jinguma ja Nzambi ni ja Athu

Kioso Nzambi kia bhange athu mu ixi, saí anju ua mesenene ué o ubhezelu, iu ua bhukumukina Jihova, iu ua di bhange Satanaji, kilombolola, “Ku bhukumuka.” O nguma ia dikota, Satanaji ua kituka nguma ia Jihova, o Nzambi ia henda. O ji-anju ja mukuá a di bande kua Satanaji mu ku bhukumuka.  O Bibidia iamba kuma, ene o madimonho. Mu ku kaiela Satanaji, o ji-anju jiji, ja di bhange jinguma ja dikota ja athu mu ngongo. O jiphaxi joso mu ixi, kála o uhaxi, o uadiama, o ita, ni ima ia mukuá dingi, ene a i bheka.

O jingeleja ja Kidistándade ene mu zuela ia lungu ni Satanaji, kála kia kexile mu bhanga m’ukulu, o divulu dia Jobe, di tu tangela o ukexilu uê, ni ihi ia bhangesa o anju íii ku bhukumuka. Muéne uambe: “Kueza kizuua kimoxi, an’a [Nzambi] eza mu ku di bhakula bhu pholo ia Jihova, [Satanaji] ueza ue mu kaxi-kâ.” Satanaji ua tatela Jobe, kuma muéne ua kexile ngó mu sidivila Nzambi, mukonda dia ima iambote ia kexile ku mu bhana. Phala kulondekesa kuila ua mu zuela kidi, Satanaji ua bheka jiphaxi kua Jobe, ua mu jibhila o ibhaku iê ioso, ni dikuinhi dia an’ê. Mu kusuka-ku, muéne ua bhekela kua Jobe ijimbu, ia iibha tundé bhu kanda dia inama katé bhu tala dia mutué. Mu ioso ia bhange Satanaji kua Jobe, ka tena ku mu bhangesa kueha ku bheza Jihova.—Jobe 1:6-19; 2:7.

Saí kima kia bhangesa Jihova kuehela Satanaji o thembu ioso íii, maji ka-nda mu ehela katé ku hádia. Kua kambe ngó, Diabhu a-nda mu buika. A mateka kiá ku mu bhanga kima, o kizulukutu kiki, ki tu tena ku ki mona, maji a tu tangela-kiu mu divulu dia Dijingunuinu. Diambe: “Kienhókio, mu diulu anga mu kala ita. Mingedi [Jezú Kristu a mu fukununa] ni ji-anju jê a lua ita ni mudikixi [Satanaji], o mudikixi anga u lua ue kumoxi ni ji-anju jê. Enhá-phe a tokoka-ku! Ni muène ni ji-anju jê, mu diulu ka mono-mo dingi kididi. Kimudikixi kia dikota anga a mu takuila ku kanga! A mu kaia, na Kinhoka kiokulu, a mu ila Diabhu, a mu ila [Satanaji], mukua kunganala o mundu uoso. A mu lundumuina mu ngongo, ni ji-anju jê a ji lundumuina-nê kumoxi.”—Dijingunuinu 12:7-9.

Tuejiia kuila, Satanaji ua mu “nganala athu oso mu ngongo.” Muéne u nganala athu mu ku tanga makutu mu kaxi ka jingeleja, phala ku a bhangesa ku kamba kuijiia Jihova, ni kuívua o Maka mê. O makutu ene mu tanga, o kuamba kuila, athu oso kiafuá aia ku mundu ua jinzumbi. Kuene milongi iavulu ia lungu ni maka enhá. Mu kifika, saí ixi ia Africa, ni ixi ia Asia, athu avulu a xikina kuila, o muthu kioso kiafuá uia ku mundu ua jinzumbi, kuene o akuku’etu a fuá kiá ukulu. O milongi ia túbhia tua mu zukuta, ijila ué mu ibanzelu íii, ia kuila o muthu kiafuá, u kala dingi ku muenhu bhu kididi kiéngi.

Kioso o Muthu Kiafuá —u Kala ni Muenhu ku Diulu?

Mukonda diahi jimidi ni jimidi ia athu mu ngongo, a xikina kuila athu oso ambote aia ku diulu? Mu kidi saí athu ambote ene múia ku diulu, maji kibuka kófele ngó, ki kia sokela ni nzungule ia athu ene mufuá. O Bibidia iamba kuma o kibuka kiki, ia 144.000 ia athu a “a sumbu mu ixi” a-nda sidivila kála ‘akunji’ ni ‘jisobha mu ku tumina mu ngongo.’ (Dijingunuinu 5:9, 10; 14:1, 3) Kumoxi ni Mon’a Muthu, Jezú Kristu, a-nda tumina ku diulu mu Utuminu ua Nzambi. O utuminu iú, ua-nda buika Satanaji ni madimonho mê, ua-nda bhanga o ixi palaízu. O athu afú kiá, ku hádia a-nda vutuka ku muenhu phala ku kala mu Palaízu mu ixi.—Luka 23:43.

Kiki-phe tua mono kuila, kuene athu avulu mu nzumbi. O Suke-ku mu kaxi kâ, Jihova Nzambi, o Mubhangi ua ima ioso. Ni ji-anju javulu ji mu sidivila. Saí ué ji-anju ja mukuá a kaiela Satanaji, a bhukumukina Jihova, ene mu kalakala phala ku nganala athu. Saí dingi athu a a “sumbu” mu ixi phala ku kala ku diulu, a tambula kikalakalu kia dikota. Mu kiki, tua-nda di longa, se tu tena kuzuela naju mu nzumbi, ni kiebhi ki tu tena ku bhanga kiki.