Kikuatekesu Phala Ku Bhânga Ni Jitendasá Ni Ku Dibhana Ni Ku Luuala

‘Maji enu-phe muandu tambula kutena, kia-nda kuíza Nzumbi Ikôla ku thandu dienu.’—IKA. 1:8.

1, 2. Kikuatekesu kiahi kia kanena Jezú ku maxibulu mê, ni mukonda diahi a bhindamene o kikuatekesu kiki?

JEZÚ uejidile kuila o maxibulu, mu nguzu iâ keji tena ku kumbidila ioso ia a tumina ku bhanga. Mukonda o kikalakalu kiavudile, ni jinguma javudile, ni kuila ene exile akua ituxi, ene eji bhinga o kikuatekesu kia nzumbi ikôla. Kienhiki, kioso kia bande ku diulu, Jezú ua kanena o maxibulu mê, kuila: Enu-phe muandu tambula kutena, kia-nda kuíza Nzumbi Ikôla ku thandu dienu, mua ka ngi kalela jimbangi, ni mu Jeluzaleme, ni mu Judeia ioso, ni mu Samádia katé ni ku maxokololo ma jixi.’—Ikalakalu 1:8.

² O kikanenu kiki, kia mateka o ku di kumbidila ku Pendekoxi, ku muvu ua 33, K.K. kioso o nzumbi ikôla ia kuatekesa o akaiedi a Jezú Kristu kuboka mu Jeluzaleme ioso. Se-ku nguma ia tena ku a fidisa. (Ikalakalu 4:20) “Izuua ioso, katé ku dizubhilu dia mundu,” o akaiedi a Jezú, ni etu ué, eji mesena o kikuatekesu kiki kia bhana Nzambi.—Mat. 28:20.

3. (a) O kuila o nzumbi ikôla, ni kutena, kima kimoxi? Jimbulula. (b) O kutena kua Jihova, ku tu kuatekesa ku bhanga ihi?

³ Jezú ua kanena o maxibulu mê kuma ‘ene eji tambula o kutena, kioso kieji kuíza o nzumbi Ikôla ku thandu diâ.’ O kizuelu “kutena” ni “nzumbi,” ki ima ia difu. O nzumbi ia Nzambi, o nguzu iê ia tenena, ilondekesa o kutena kua bhana ku athu, mba ku ima phala ku bhanga o vondadi ia Nzambi. O kutena, kulondekesa “o uhete ua ku bhanga kima.” Kiki ki tena ku bhana nguzu ku muthu phala ku bhanga kima. Kienhiki o nzumbi ikôla, tu  tena ku i sokesa ni mukengeji uizalesa o bataria, maji o kutena a ku sokesa ni mukengeji u kala ku bataria. O kutena kua bhana Jihova ku jiselevende jê mu kaxi ka nzumbi iê ikôla, ku tu kuatekesa ku kumbidila o Ukunji uetu, ni ku dibhana kiambote ni ibhidi.—Tanga Mikeia 3:8; Kolose 1:29.

4. Ihi i tua-nda di longa ku mbandu íii, ni mukonda diahi?

⁴ Kiebhi ki tu tena kulondekesa kuila tuala ni kikuatekesu kia nzumbi ikôla? Ima iahi i tu tena ku bhanga ni kikuatekesu kia nzumbi ikôla? Mukonda dia ku sola ku sidivila Nzambi, tua-nda dibhana ni ibhidi iavulu iene mu bheka Satanaji ni mundu uê ua iibha, mba mukonda tu ate a ituxi. Kienhiki tua tokala ku dibhana ni ibhidi íii, phala ku kolokota mu Ubhezelu uetu, ni ku boka izuua ioso, ni ku kala ni ukamba ua kidi ni Jihova. Tua-nda di longa, kiebhi o nzumbi ikôla i tu kuatekesa ku bhânga ni jitendasá, ni ku dibhana ni ku bhuila, ni ku luuala.

Kikuatekesu Phala ku Bhânga ni Jitendasá

5. Kiebhi o musambu ki u tena ku tu kuatekesa?

⁵ Jezú ua longo o maxibulu mê o ku samba: ‘Ku tu ehele ku dibhala mu jitendasá, maji tu kudile ku Dimonho.’ (Mat. 6:13) Jihova ka-nda kamba kuívua o jiselevende jê, kioso kia bhanga o musambu iú. Mu kithangana kia mukuá, Jezú uambe kuma, ‘Tat’enu ia diulu, [ua-nda] bhana o Nzumbi Ikôla kua ió oso a mu bhinga.’ (Luka 11:13) O kikanenu kia Jihova kia ku tu kuatekesa, ki tu tululukisa! Maji kiki, ki kilondekesa kuila Jihova ka tu ehela ku tu tendala. (1 Kol. 10:13) Maji kioso ki tu dibhana ni jitendasá, kiene o kithangana kia ku samba kiavulu, ni ku suína kuoso.—Mat. 26:42.

6. Ihi ia kuatekesa Jezú phala ku di tunda kiambote mu jitendasá ja Satanaji?

⁶ Mu ku dibhana ni tendasá ia Diabhu, Jezú ua tumbula o maka a Nzambi. Jezú uejidile kiambote o Maka a Nzambi kioso kia tambuijila: ‘kiosoneke . . . Kiosoneke dingi . . . Tunda bhabha Satanaji! Mukonda kiosoneke, ‘mu kubheza ki kale u bheza Jihova, Nzambi iê, muéne ngó u mu tumaka.’’ O ku zola Jihova, ni Maka mê, kia kuatekesa Jezú ku di tunda kiambote mu jitendasá ja Diabhu. (Mat. 4:1-10) Mukonda dia Jezú ku dituna o jitendasá, Satanaji ua mu eha.

7. Kiebhi ki tu kuatekesa o Bibidia ku dibhana ni jitendasá?

⁷ Se Jezú ua dielele mu Bibidia, phala ku di tunda kiambote ku jitendasá ja Diabhu, etu ki tua tokala ué ku bhanga kiki? Mu kidi, se tua mesena ku di tunda kiambote ku jitendasá ja Diabhu, ni madimonho mê, tua tokala kuijiia kiambote o itumu ia Nzambi, ni ku i belesela. Athu avulu ene mu a suínisa ku kumbidila o itumu ia Bibidia, kioso kiaia ni ku di longa o Bibidia, ni ku i tendela, ni ku bhana valolo ku unjimu ua Nzambi. Mu kidi, “o kizuelu kia Nzambi” kiala ni kutena kia ku “tungula ni jivondadi ni mabanzelu ma mixima ia athu.” (Jihe. 4:12) Kioso o muthu kia tanga kiavulu o Bibidia, ni ku xinganeka mu ima ia di longo, u kituka ‘njimu mu maka a Jihova.’—(Dan. 9:13) Tua tokala ku xinganeka mu milongi ia Bibidia ni kuijiia ku dibhana ni ituxi ietu.

8. Ima iahi i tu kuatekesa ku tambula o nzumbi ikôla?

⁸ Mukonda dia kuijiia kiambote o Bibidia, Jezú ua ditundu kiambote ku jitendasá, muéne ‘uezalele ué ni Nzumbi Ikôla.’ (Luka 4:1) Phala tu tene ku bhanga kiki, tua tokala ku zukama kua Jihova, ni ku katula mbote ku ima ioso iene mu bhanga, phala tu kale ni nzumbi ikôla. (Tiia. 4:7, 8) O ima ia tu bhana, o milongi ia Bibidia, o musambu, ni ku dilunga ni jiphange mu kilunga. Athu avulu ene mu katula ué mbote mu ku kala ni ukexilu ua ku bhanga o ima ia nzumbi, i kuatekesa ku kala ni ibanzelu iambote.

9, 10. (a) Jitendasá jahi ji uene mu mona ku diembu diê? (b) Kiebhi o ku xinganeka, ni kusamba ku tena ku kuatekesa o muthu ku dibhana ni jitendasá?

 ⁹ Jitendasá jahi ji ua tokala o ku dituna? O kuila a ku tendala kiá phala ku tangesa muhatu, mba diiala, ki kaza diê? Se eie u dikudi hanji, o kuila a ku tendala kiá ku mesena ku tangesa muhatu, mba diiala, ki kidistá? O Jikidistá a tena ku a tendala kioso kia mona kima kia ufusa mu mutelembe ua izunzumbia, mba mu Internete. Se kiki ki bhita ni eie, ihi i ua tokala o ku bhanga? Kima kiambote o ku xinganeka kuila, o kituxi ki dianga, ki bhangesa ku ta ituxi ia mukuá, mba kituxi kia dikota. (Tiia. 1:14, 15) Xinganeka ngó o ndolo ieji kuívua Jihova, ni kilunga, ni muiji uê se u bhanga kima kia iibha. Maji o kilunji kia zele, kijila ngó mu ku kumbidila o itumu ia Nzambi. (Tanga Jisálamu 119:37; Jisabhu 22:3.) Kioso ki ku moneka o jitendasá, kolokota o ku samba kua Jihova, phala ku di tunda kiambote.

¹⁰ O kima kia mukuá ki tua tokala ku xinganeka, o jitendasá ja Diabhu. Satanaji ua zukama kua Jezú, kioso Muéne kia bhiti 40 a izuua, sé kudia mu kikangalakata. Mu kithangana’okio, o Diabhu ua xinganeka kuila kiki ‘kithangana kiambote,’ phala ku polovala o kixikanu kia Jezú. (Luka 4:13) Satanaji u sota kithangana kia tokala phala ku tu tendala ué. Mukonda dia kiki, tua tokala ku dilanga mu nzumbi. Satanaji u kuata athu mu ukexilu uâ uaiibha. Kienhiki, kioso ki tu mona kuila tua bhuila, mba tua luuala, tua tokala ku kolokota ku bhinga o kikuatekesu kia Jihova, ni nzumbi iê ikôla.—2 Kol. 12:8-10.

Kikuatekesu Phala ku Dibhana ni ku Bhuila ni ku Luuala

11, 12. (a) Mukonda diahi athu avulu a luuala kiavulu lelu (b) Ihi i tena ku tu kuatekesa ku dibhana ni ku luuala?

¹¹ Mukonda tu ati a ituxi, saí ithangana, tu luuala. Kiki kidi, mukonda tuala mu izuua ia bhonzo. Kiki nuka kia bhitile ku mundu. (2 Tim. 3:1-5) Mukonda tua zukama ku Alumajedone, o ku kamba o kitadi, ni ima ia mukuá, iene mu dimendala dingi. Ki tua tokala ku diuana, se athu ka mu tena ku dikila o miji iâ. Kiki kiene mu bhangesa athu ku bhuila, ni ku luuala kiavulu. Se kiki ki bhita ni eie, kiebhi ki ueji tena ku dibhana ni maka enhá?

¹² Lembalala kuila Jezú, ua kanena ku maxibulu mê kuila ueji ku a bhana kikuatekesu—o nzumbi ikôla ia Nzambi. (Tanga Nzuá 14:16, 17.) Íii iene o nguzu ia Beta-kota mu  ngongo. Mu nguzu íii, Jihova u tena ku tu bhana ‘kikuatekesu kiavulu’ phala ku tu kolokotesa, kioso ki tu kala ni ibhidi. (Efe. 3:20) Mu kuijiia o kidi kiki, o poxolo Phaulu uambe kuila, tua tambula, “o nguzu i lenda” sumbala “a tu xina mbandu mu mbandu” (2 Kol. 4:7, 8) Jihova ka tu kanena ku tu katula o ibhidi ioso, ua tu kanena ku tu bhana nguzu, phala tu tena ku dibhana na-iu.—Fil. 4:13.

13. (a) Kiebhi Stephanie kia mu kuatekesa ku dibhana ni uhaxi? (b) Tanga musoso u uejiia?

¹³ Xinganeka o phangu ia Stephanie, muboki ua thembu ioso, uala ni 19 dia mivu mu sidivisu ia thembu ioso. Kioso kia kexile mu 12 dia mivu, muéne ua kexile ni uhaxi mu uongo. Tundé mu kithangana kieniókio, muéne a mu bhange pelasa ku mutué, a mu bhana milongo, ua kate dingi veji jiiadi, mu veji íii, ua nemana o mbandu ia kiasu, ka kexile mu mona dingi kiambote. Stephanie, uene mu bhaka o nguzu iê phala ku bhanga o ima iejiia kuila ia beta-kota, kála o kuia mu iônge, ni mu sidivisu ia kuboka. Muéne uejiia kuila Jihova uene ku mu kuatekesa mu maukexilu avulu. Mu madivulu metu, tu sanga-mu misoso iavulu ia jiphange jetu, a ditundu kiambote kioso kia luualele. O jiphange ja mala, ni ja ahatu, a mu kuatekesa mu ku mu sonekena mikanda, a zuela nê mu ukexilu uambote, ande dia ku mateka o kiônge ni kioso kia zumbuka mu kiônge. O maxibulu a Stephanie, a mu sakidila ué mukonda dia ku kala mulongexi uâ, ni kuia ku a longa o Bibidia ku mabhata mâ. Stephanie u sakidila kiavulu Jihova. O kibatulu kia Bibidia kia beta ku mu uabhela, o divulu dia Jisálamu 41:3, mukonda muéne ua xikana kuila o velusu íii, ia mu di kumbidila kua muéne.

14. Ihi i tua tokala ku bhanga kioso ki tu luuala, ni mukonda diahi?

¹⁴ Kioso ki tu bhuila, mba tu kala ni maka, ki tua tokala ku banza kuila tua tokala ku sosola o ikalakalu ietu mu kilunga. Ki tua tokala ku bhanga kiki. Mukonda diahi? Mukonda o ikalakalu íii, kála o ku di longa o Bibidia u bheka uetu, ni ku di longa ni muiji, ni sidivisu ia ku boka, iene i tu kuatekesa ku tambula o nzumbi ikôla. O ikalakalu mu nzumbi, i bheka kisangusangu. (Tanga Matesu 11:28, 29.) Jiphange javulu ja ahatu, ni ja mala, aia mu iônge a bhuila, maji kioso kia zumbuka, ene a kala kiambote, a kala kála a a katula o ku bhuila kuoso!

15. (a) O kuila Jihova u kanena ku bhana muenhu ku Kidistá ka mu bhange nguzu? Jimbulula (b) Ihi ia tu kanena Nzambi, ni kibhuidisu kiahi ki tua tokala ku di bhanga?

¹⁵ Maji kiki, ki kilombolola kuila, o kikalakalu kia Kidistá ki kia neme. Ku bhinga nguzu phala ku kala u Kidistá ua fiiele. (Mat. 16:24-26; Luka 13:24) Maji bhu kaxi ka nzumbi ikôla, Jihova u tena ku bhana nguzu ku muthu ua bhuila. O polofeta Izaia ua soneka, ‘muéne u bhana kutena kua ió ua zôndo, oso a kinga kua ngana-phe, a tambula nguzu iobhe, a di leka ku mabhabha kála ji holokoko; a lenga sé ku zonda, enda muene sé ngó ku bhuila.’ (Iza. 40:29-31) Tua tokala ku dibhula, ihi i bhangesa o muthu ku bhuila mu nzumbi?

16. Ihi i tua tokala ku bhanga phala ku zubha o ima i tu bhangesa ku bhuila, ni ku luuala?

¹⁶ O Maka a Jihova, a tu suínisa kuijiia ‘o ima ioso ia beta-kota.’ (Fil. 1:10) Mu ku xinganeka mu ukexilu ua muenhu ua Kidistá, o poxolo Phaulu ua tendelesa: “Tu tudienu  ioso i tu lalamesa . . . , tu lengienu ni ku kolokota o dikanga dioso dia tu kala ku pholo.” (Jihe. 12:1) Kiki kilondekesa kuila tua tokala tu eha o ku kaiela o ima ioso, i tena ku tu bhangesa ku bhuila. Nange tua mu sosola kiá o ima i tuala na-iu. Kienhiki, se uene mu bhuila kiavulu, ua tokala kuijiia kiambote kiebhi ki ua mu bhanga o sidivisu iê, ia ku sota o mbolo, ni kuijiia se veji ji kuxi ji uene mu tunda phala kuenda njila mu ididi iéngi, ni ithangana i kuxi i uene mu zanga mu itonokenu, ni mu ima ia mukuá. O kuijiia kuila ki tu tena ku bhanga ioso, ki tu kuatekesa ku kolokota ué mu ima i tu tena ku bhanga, ni ima ki tu tena ku i bhanga.

17. Mukonda diahi o muthu u tena ku luuala, maji kikanenu kiahi kia tu bhana Jihova?

¹⁷ Nange etu ué tu luuala, mukonda o dizubhilu dia mundu iú ki dia bhixila mu kithangana ki tua kingila. (Jisa. 13:12) Muthu uoso-uoso u mona kuila ua bhuila, ua tokala ku xinganeka mu izuelu iala mu divulu dia Habakuke 2:3, NW izuela: “Mukonda kisunji kiki, kia-nda ku bhita bhu thembu ia tokala, ni kidi muene kuma mu thembu ia xindi kia ka bhita muene, ki kifulu kana, se ua mono kia laleka mu kuiza, eie-phe kinga na-kiu, kuma ni kidi muene kia kà bhita, ki kia-nda ku kokoloka, kana.” Etu tua dielela mu kikanenu kia Jihova, kuma o dizubhilu dia mundu dia-nda kuíza mu kithangana kia tokala!

18. (a) Ikanenu iahi i tu kuatekesa? (b) Mbote iahi i tua-nda katula, mu milongi i tua-nda di longa?

¹⁸ Mu kidi, o jiselevende ja Jihova, a kingila o kizuua kia-nda bhua o ku bhuila, ni ku luuala kuoso, ni kioso o athu, ‘o jixitu jâ, ja-nda buingita’ (Jobe 33:25) Kiene kimoxi ué, lelu, tu tena ku buingita moxi, mu kaxi ka nzumbi ikôla, kioso ki tu bhanga ikalakalu mu kilunga. (2 Kol. 4:16; Efe. 3:16) Kana kuehela kuila o ku bhuila, ku ku fidisa ku tambula o muenhu ua kalelaku. O ibhidi ioso—ijila mu jitendasá—ku mundu uobhe ua Nzambi, ki ia-nda kala-ku dingi. Mu milongi i tua-nda di longa, tua-nda kuijiia kiebhi o nzumbi ikôla i kuatekesa o Jikidistá ku dibhana ni kizukutisu, ni ibhidi ia mukuá.

Kiebhi ki Ueji Tambuijila?

• Kiebhi o ku tanga o Bibidia ku tu suínisa?

• Kiebhi o misambu, ni ku xinganeka, ku tu suínisa?

• Kiebhi ki u tena ku zubha o ima i luualesa?

[Ibhuidisu ia ku dilonga]

[Foto ku bandu 26]

O iônge i tena ku tu bhana nguzu mu nzumbi