Kuene Athu mu Nzumbi a Nanhi?

Muhatu ua muadiakimi ku Europa, u bokona mu ngeleja ni tersu bhu maku, u fukamena o kiteka kia Madiia. Muiji mu África u lundulula uhôlua ku mbila ia ndandu iâ. Mu America, munzangala u jila o kúdia, ni kúnua, u xinganeka, kioso kia kingila kuzuela ni muthu, u fika kuila o anju iê i mu langa. Mu Asia, o padele u jokotesa mikanda iezala ni ifikula phala ku ji bhana ku jinzumbi ja akuku.

O ATHU enhá a difu mu ukexilu uahi? Ene oso a xikina kuma ku diulu kuene jinzumbi ja tena kuzuela nau, ala ni kutena kua ku kuatekesa athu, mba ku a bhanga kia iibha. Maji ibanzelu íii, ki ia lelu, kana. Ki tua tokala ku diuana, mukonda kuene milongi iavulu ia lungu se nanhi ua tungu ku diulu.

O ji musulumanu a bheza o Nzambi Alá. * O athu mu Kidistándade, amba kuila Nzambi uala mu kitatu kia athu, o Tata, muéne Nzambi, o Mon’a, muéne Nzambi, ni kuila o Nzumbi Ikôla, Nzambi. O akua Hindu, a xikina kuila kuene jinzambi javulu, midi ndenge. Athu a mukuá a xikina kuila o jinzumbi tu ji sanga ku iama, ku mixi, ku matadi, ni mu menha. A mukuá ene mu a nganala ni madivulu, ni jifilme ji moneka mu mutelembe ia izunzumbia ia lungu ni madimonho, ni jinzumbi ja iibha, ni jinzambi.

Kuene milongi iavulu ia lungu ni jinzambi, ni kiebhi ki tu tena ku ji zukama. Mu kidi, ki tu tokala ku zukama kua Nzambi mu ukexilu uoso-uoso. Saí maukexilu a ku zukama kua Nzambi, ka fuama. Xinganeka hanji: Ande dia kuixana o muthu mu mutelembe ua kafuetele, tua tokala kuijiia se tua mu kuixana nanhi, tua tokala kuijiia o muthu, se uene muene ku muenhu, ni kuila se muéne ua-nda tuívua kioso ki tu mu ixana. O ku mesena kuzuela ni muthu kene ku muenhu, uôua. Kiene kimoxi ué, o kuzuela ni muthu mbombo ku mbodi, kiluezu kia dikota.

O kuila o jinzumbi ji tu mona? O Bibidia ki i tambuijila ngó o kibhuidisu kiki, maji izuela ué se nanhi tua tokala kuzuela né, ni ihi i tu kingila ku tambula kua muéne. Kolokota mu ku tanga. Eie ua-nda diuana mu kuijiia o ima ia-nda ku jimbulula o Bibidia.

[Tanga mu luji]