“Mu Dielela O Dijina Dia Jihova”
“Mu Dielela O Dijina Dia Jihova”
“Nga ka xisa mu’axaxi kê ió oso a di tululula, ka moneka izala mba ukumbu, o jingadiama; ene a kà kala jinga thembu joso mu dielela o dijina dia Jihova.”—SOF. 3:12.
1, 2. Kitembu kiahi kia zukama o kuíza ku athu oso mu ngongo?
EIE ua bhindamene ku lengela moxi a mulonde (ponte), phala ku lenga o nvula ia dikota, mba nvula ia matadi a nzaji? O mulonde nange, i tena ku kala kididi kiambote phala ku lengela-mu, maji ki i tena ku langa o muthu mu kitembu kia dikota.
2 Saí kima kia zukama kuíza, kia beta-kota o kitembu ndenge—kuma athu nuka a ki muene. O kima kiki, ‘o kizuua kia difu ni kitembu.’ Kiki, o “kizuua kionene kia Jihova” kia-nda kuíza ku athu oso mu ngongo. Maji, etu tu sanga o dilangelu dia kondama. (Tanga Sofoniia 1:14-18.) Kiebhi ki tu tena o ku sanga dilengelu, mu “kizuua kia njinda ia Jihova” kia-nda kuíza?
Izuua ia Hadi M’ukulu
3. Kibuikilu kiahi kia bhekele Jihova ku akua Izalaiele?
3 O kizuua kia Jihova, kia-nda buika o jingeleja joso ja makutu mu ngongo. Phala ku sanga dilangelu, tua tokala kuijiia ioso ia bhitile ni mundu ua Nzambi m’ukulu. Izaia ua kexile ku muenhu ande dia kibuikilu kia bhitile ku muvu ua 740, A.K.K., ni kibuikilu kia bhekele Jihova ku akua Izalaiele, “o nvula ia matadi, nvula ia kibuika” o athu ka tenene ku di fikidila. (Tanga Izaia 28:1, 2.) O kikanenu kiki, kia di kumbidila ku muvu ua 740, A.K.K., kioso akua Izalaiele kia buikile ku masoladi a akua Asídia.
4. Ihi ia bheka o “kizuua kionene kia Jihova” mu Jeluzaleme, ku muvu ua 607 A.K.K.?
4 O kibuikilu kia tula ku akua Izalaiele, kia bhitile ku muvu ua 607 A.K.K. mu “kizuua kionene kia Jihova” mu mbanza ia Jeluzaleme, ku utuminu ua Juda. O kibuika kiná kia tudile ku akua Juda, mukonda ene a kitukile akua makutu. O masoladi a Babilonha mu kaxi ka sobha Nabukodonozolo, a mesenene ku buika Juda, ni mbanza iê Jeluzaleme. O akua Juda, a dielele ku “dilengelu dia makutu,” mu ku bhanga ukamba ni akua Ijitu. Kála o kitembu kia nvula ia matadi a nzaji kitula ku athu, akua Babilonha a bobesa o “disuamenu” diâ.—Iza. 28:14, 17.
5. Ihi ia-nda kuatekesa o mundu ua Jihova ku bhuluka, kioso kia-nda buika o jingeleja ja makutu?
5 O kizuua kia dikota kia Jihova kia buikile o mbanza ia Jeluzaleme, ia londekesa o kizuua kia kufundisa kia-nda kuíza ku akua Kidistándade mu izuua ietu. Lua ka mukua o “Babilonha ia dikota,” o kisangela kia jingeleja ja makutu, a-nda i buika. Mu kusuka-ku, o maukexilu a mukuá a Satanaji, a-nda ku a buika ué. Maji o mundu ua Nzambi, ua-nda bhuluka, mukonda ene a mu bhanga Jihova dilengelu diâ.—Dij. 7:14; 18:2, 8; 19:19-21.
Dilengelu mu Nzumbi ni mu Kizuua Kia Jihova
6. Kiebhi o mundu ua Jihova, u tena ku sanga dilengelu?
6 Kiebhi o mundu ua Nzambi, u tena ku sanga dilengelu lelu, mu izuua isukidila-ku? Etu tu sanga dilengelu mu nzumbi, mu ku samba, ni ku “xila o dijina dia [Nzambi]” ni ku mu sidivila ni ku suína kuoso. (Tanga Malakiia 3:16-18.) Etu ki tu tokala ngó o ku ximana o dijina didi, saí dingi kima ki tua tokala ku bhanga. Kála kiambe o Bibidia: “Uoso u kola o dijina dia Jihova, u bhuluka.” (Lom. 10:13, NW) O ku kola o dijina dia Jihova, ku bheka ku bhuluka. Athu avulu a tena ku tungula o Jikidistá ja kidi, u “kola o dijina diê” u mu sidivila kála Jimbangi jê, ni muthu ua ditunu ku mu bheza.
7, 8. Kiebhi o Jikidistá mu hama ia dianga, kia bhuluka, ni kiebhi o Jikidistá lelu kia tena o ku bhuluka, kála m’ukulu?
7 O ku bhuluka kua tu kanena, ki ku lungu ngó ni ku sanga dilengelu mu nzumbi. A tu kanena ué o ku bhuluka o muenhu uetu, mu kizuua kia Jihova. Kiki tu tena ku ki mona, mu kizulukutu kia bhitile ku muvu ua 66 K.K. kioso o masoladi a Cestiu Galu mukua Loma kia kondoloka o mbanza ia Jeluzaleme. Jezú uambe kuma o izuua ienioió, Nzambi “ua i tolesa.” (Mat. 24:15, 16, 21, 22) Kiki kia bhitile kioso o masoladi a Loma, a xisa o mbanza, kua bhuluka ‘athu,’ o athu enhá, o Jikidistá ja kidi a “bhuluka.” Mukonda ene a lengela ku mbanza iéngi ia zukamene. A mukuá a lengela ku milundu, a mukuá a lengela ku sámbua ia ngiji ia Njolodá, kuenhoko a sange dilengelu mu milundu.
8 Etu tu tena ku sokesa o Jikidistá m’ukulu, ni mundu ua Nzambi lelu. Mukonda o Jikidistá m’ukulu a sotele dilangelu, kiene kia tokala o ku bhanga ué o jiselevende ja Nzambi lelu. Maji mu kizuu’okio-phe, ki kua-nda bhinga ku lengela mu kididi kiéngi, kála kia bhange o Jikidistá m’ukulu, mukonda o Jikidistá ala mu ngongo ioso. O athu oso a a “solo” a-nda bhuluka kioso kia-nda buika o Kidistándade, mukonda a lengela kua Jihova ku mulundu uê, o kilunga kiê.
9. Nanhi uene mu bhangesa kuila athu a jimba o dijina Jihova? Jimbulula.
9 O Kidistándade a tokala muene ku i buika ku kibuikilu kia-nda kuíza, mukonda dia ku bhangesa athu ku kamba kuijiia Nzambi, ni ku zemba o dijina diê. Mu izuua ietu, o dijina dia Nzambi a di ijidile kiambote ku jixi ja Europa. O dijina didi, a di soneka mu isoneku iuana mu dízui dia Ngeleku, a di xana Tetagrama, kála kiene mu kisoneka, YHWH (mba JHVH), kiene mu moneka mu kitadi, ku mabhitu a jinzo, mu madivulu, mu Bibidia, ni mu jingeleja ja Katolika ni ja Protestante. Lelu athu a mesena ku jima o dijina dia Nzambi mu ji Bibidia ja ubhe. Kiki tu ki mona mu mukanda ua 29 ua mbeji ia Kanake ia muvu ua 2008, O Ngeleja ia Katolika ia Loma ia longesa kuila o kisoneku YHWH (mba JHVH), a tokala ku i jima mu ji Bibidia ja ubhe phala ku ta-mu o kizuelu “Ngana.” O Vatikanu ua longesa kuila o dijina dia Nzambi, ka tokala ku di tumbula mu mimbu, mba mu misambu ia bhanga mu jingeleja ja Katolika. O atuameni a jingeleja ja mukuá, ka tokala mu Kidistándade, a fidisa ué athu avulu kuijiia o dijina dia Nzambi ia kidi.
Dilengelu Phala ió a Xila o Dijina Dia Nzambi
10. Kiebhi kiene mu xila o dijina dia Nzambi lelu?
10 O Jimbangi ja Jihova, kene mu bhanga kála ki bhanga o jingeleja ja mukuá, ene a ximana o dijina dia Nzambi. A di tumbula kála kia tokala ku di tumbula. Jihova ua zolo oso a mu dielela, muéne u bhanga ioso phala ku besoala ni ku langa o mundu uê. “Jihova uejiia oso a mu dielela muene.”—Nah. 1:7; Ikalakalu 15:14.
11, 12. Nanhi ua dielele o dijina dia Jihova mu mbanza ia Juda, nanhi uene mu bhanga kiki mu izuua ietu
11 Né muéne o athu mu Juda a kitukile akua makutu, kua kexile hanji athu a “dielele o dijina dia Jihova” (Tanga Sofoniia 3:12, 13.) Kioso Nzambi kia kaxtikala akua Juda a kambele o ku mu dielela, muéne uehela o masoladi a Babilonha ku buika o mbanza iâ, ni kuambata o mundu ku ubhika, maji saí athu, kála Jelemiia, Baluke, ni Ebede-Meleke, a bhuluka. Ene akexile “mu kaxi” ka athu akua makutu. A mukuá a kolokota jifiiele kioso kia kexile ku ubhika. Ku muvu ua 539 A.K.K., o masoladi a Mediia, ni Pélesa, a a tumina kua sobha Silu, a buika o mbanza ia Babilonha. Silu ua soneka mukanda ua londekesa kuila o Jijudé a tokalele ku vutuka mu ixi iâ.
12 Phala ió eji vutuka ku ubhezelu ua kidi, Sofoniia ua kanena kuma Jihova ueji ku a bhulula, ueji sanguluka dingi ni ene. (Tanga Sofoniia 3:14-17.) Kiki tuene mu ki mona ué mu izuua ietu. Kioso o Utuminu ua Nzambi ki ua mateka o ku tumina ku diulu, Jihova ua bhulula ku ubhika o Jikidistá a a solo phala kuia ku diulu, mu ukexilu ua nzumbi mu Babilonha ia Dikota. Jihova uene mu sanguluka kiavulu kate ni lelu.
13. Ufolo uahi uala nau o mundu ua ifuxi ioso?
13 Ió a dielela ku kala mu palaízu mu ixi, ene mu tunda mu Babilonha ia Dikota, a sanguluka mukonda a bhuluka ku ilongesu ia jingeleja ja makutu. (Dij. 18:4) Kienhiki o izuelu ia Sofoniia 2:3, iambe: “Sotenu Jihova enu oso mua batama mixima muala mu ngongo.” Athu oso a batama mixima a ifuxi ioso, ene a bhana ujitu ku muenhu ua-nda tambula ku diulu, mba mu ixi, a dielela lelu ku dijina dia Jihova, kiki kiene mu dikumbidila mu izuua ietu.
O Dijina Dia Nzambi ki Kiteka Kiala ni Kutena
14, 15. (a) Ihi iene mu kala na-iu athu kála iteka? (b) Kima kiahi athu ka tokala ku ki mona kála kiala ni kutena?
14 Saí akua Izalaiele, a banzele kuila, o tembulu iexile kiteka kieji ku a langa ku jinguma jâ. (Jel. 7:1-4) Mu dimatekenu, o akua Izalaiele a banzele kuila o álaka ia kikutu iexile kiteka kieji ku a langa ku ita. (1 Sam. 4:3, 10, 11) Constantino Grande, ua soneka o izuelu iiadi khi ni rho, mu Ngeleku, o mixinda iiadi ia dianga, ia tundu ku dijina “Kristu” mu dízui dia Ngeleku. Muéne ua fikile kuila o ku soneka o mixinda iiadi íii ku ngubu ia masoladi mê, ieji langa o masoladi mê ku ita. O Sobha Gustav Adolph II, mukua Suécia, uexile disoladi mu makuinhi Atatu a Mivu, ua zuatele o mbinza i moneka mu mbandu 7. O dijina “Iehova” di moneka kiambote ku mbinza iê.
15 Saí jiselevende ja Nzambi, akexile mu ku a zukutisa ku madimonho, a lengela kua Jihova mu ku kola o dijina diê ni dízui dia suína. Kima kioso-kioso ki moneka ni dijina dia Nzambi, ka tokala ku ki mona kála kiteka, kima ki langa o muthu izuua ioso ku muenhu, kála kima kiala ni kutena kia ku bhanga madiuanu. Kiki ki kiene kilombolola ku dielela kua Jihova.
Sota Dilengelu Lelu
16. Kiebhi ki tu tena ku sanga o dilengelu mu nzumbi lelu?
16 Etu tu sanga dilengelu mu kaxi ka mundu ua Nzambi, ua sanguluka mu kilunga kiê. (Jisá. 91:1) Mu kaxi ka “kimbadi kia fiiele” ni tufunga mu kilunga, ene a tu dimuna ku ukexilu ua iibha ua mundu ueji zanga o ukexilu uetu uambote mu kilunga. (Mat. 24:45-47, NW; Iza. 32:1, 2) Ua tokala ku lembalala kuma, izuua ioso a tu dimuna ku luímbi lua ku sota o jimbote, xinganeka ué kiebhi o milongi íii i tu langa mu ukexilu ua nzumbi. Ni kiluezu kijila mu ku kamba ku bhana valolo ku ima ia nzumbi, ihi i tena ku tu zozesa mu sidivisu ia Jihova? O Maka a Nzambi, ambe: “Kuma o ku bhaluka kua jisemenhi kene o kalunga kâ; o ku bhanduluka kua iôua, kuene kua kà a buikisa. Maji uoso u ng’ividila ki ngi zuela u tunga u soma, kana-ku kia iibha ki mu kuatesa uoma.” (Jisa. 1:32, 33) O ku di suínisa phala ku kala tu athu a zele, ki tu kuatekesa ku langa o ukexilu uetu mu nzumbi.
17, 18. Ihi ia mu kuatekesa nzungule dia athu ku dielela o dijina dia Jihova lelu?
17 Xinganeka ué mu kikuatekesu ki tu bhana o kimbadi kia fiiele, phala ku kumbidila o kitumu kia Jezú kia kuboka o njimbu iambote ia Utuminu ua Nzambi mu ngongo ioso. (Mat. 24:14; 28:19, 20) Saí kima kia tange Sofoniia, ki kuatekesa o athu ku dielela mu dijina dia Nzambi. Kála ki tanga o mikanda ikôla: “Kuma kienhókio-phe ifuxi ioso nga kà i bhana mizumbu ia zele, phala ene oso a tene ku hingila o dijina dia Jihova, phala ene oso a mu bhikile ni muxima umoxi.”—Sof. 3:9.
18 Ihi ilombolola o kizuelu, mizumbu ia zele? O mizumbu ia zele, o kidi kia lungu ni Jihova Nzambi, ni ikanenu iê i tu sanga mu Mikanda Ikôla. O kuila eie ua mu zuela o dízui didi, kioso ki uia mu tangela akuenu o ima i ua di longo ia lungu ni Utuminu ua Nzambi, ni ku ximana o dijina diê, ni kioso ki u tangela athu o mabesá a-nda tambula mu ixi. Mukonda dia kuzuela o dízui didi, athu avulu a ‘mu hingila o dijina dia Jihova’ ni ku ‘mu bhikila ni muxima umoxi.’ Mukonda dia kiki, nzungule ia athu ku mundu uoso, a dielela kua Jihova.—Jisá. 1:1, 3.
19, 20. Kiebhi o kidielelu ku “dilengelu dia makutu” dia luezele m’ukulu?
19 Athu ku mundu uoso, ene mu dibhana ni maka a bhonzo. Mukonda dia ku mesena ku batula o maka enhá, ene a dielela ku athu, akua ituxi. Mba a kingila o jinguvulu ku batula o maka enhá, kála kia bhangele akua Izalaiele m’ukulu, a sotele o kikuatekesu, ni ku bhanga ukamba ni ifuxi iéngi. Kála ki uejiia kiá, kiki ki kia kuatekesa akua Izalaiele. Kienhiki, kia londekesa ngó kuila, se-ku nguvulu lelu, mba o kisangela kia Nações Unidas ka-nda tena ku zubha o maka athu. Mu kiki, mukonda diahi eie ua mesena ku dielela ku jinguvulu jiji, kála dilengelu? O Bibidia iamba kuma ene “dilengelu dia makutu.” Kiki kidi, mukonda oso ene mu ku a dielela, a-nda diela.—Tanga Izaia 28:15, 17.
20 Kua kambe ngó bhofele, o nvula ia matadi a nzaji, ilombolola o kizuua kionene kia Jihova, kia-nda tula mu ixi. Athu a makutu ka-nda tena ku bhana dilangelu, né muéne o ididi iene mu bhanga athu phala ku lengela-mu, né o kitadi, kia-nda tena ku langa athu. O divulu dia Izaia 28:17, diambe: “Anga bhuà kala mvula ia matadi ia kà kungulula o dilengelu dia makutu, o menha anga a kà bobesa o disuamenu diâ.”
21. Mbote iahi i tua-nda katula se tu belesela o kibatulu kia Bibidia kia muvu ua 2011?
21 Ki kale Lelu, mba mu izukutisu ia-nda bhita ku hádia, o mundu ua Nzambi, ua-nda sanga disuamenu, kua Nzambi iâ, Jihova. O dijina Sofoniia, dilombolola, “Jihova ua sueka,” phala kulondekesa kuila o dilengelu didi, kidi. O kibatulu kietu kia Bibidia kia muvu ua 2011, ki tu tendelesa: “Mu dielela o dijina dia Jihova” (Sof. 3:12) Kienhiki, né muene lelu, tua tokala ku dielela o dijina dia Nzambi. (Jisá. 9:10) Ua tokala ku lembalala izuua ioso o kizuelu kiki, kia Bibidia: “O dijina dia Jihova mukua ni mbonge ia matala ia di jikidila; muthu uoso ua iuka, kuene kua lengela, anga a mu bhaka kididi kia kondama.”—Jisa. 18:10.
Eie ua Lembalala?
• Kiebhi tu tena ku dielela ku dijina dia Jihova lelu?
• Mukonda diahi ki tu tokala ku dielela ku “dilangelu dia makutu?”
• Dilengelu diahi dia kidi dia tu kanena ku hádia?
[Ibhuidisu ia ku dilonga]
[Kilombuelelu ku bandu 14]
O kibatulu kia Bibidia kia muvu ua 2011, kiki: “Mu dielela o dijina dia Jihova.”—Sofoniia 3:12.
[Muxinda ua tokala ku foto 15]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”
