Atangi A Madivulu Metu Ebhula .. . .

O Palaízu Izuela o Bibidia Iene Kuebhi?

▪ Jezú ua kanene ku diiala ua londekesa o kixikanu kua muéne, kuila: “Ua kà kala ni eme ku kididi kiambote mu Palaízu ia Nzambi.” (Luka 23:43) Kuebhi kueji kala o diiala dienhódio? O kuila o Palaízu ieji kala ku diulu, mba mu ixi, mba kididi mu kingila o athu ku a fundisa?

O jitata jetu ja dianga, a tungile mu Palaízu. O Bibidia i tu tangela: “Jihova Nzambi anga u kuna díbhia dia bhange ku mutundila-kumbi mu Edene; anga u tá-mu o muthu a zubha o ku mu iudika. . . . Jihova Nzambi anga u kuata o muthu, u mu ta mu díbhia dia Edene phala ku di dima ni ku di tambula konda.” (Dimatekenu 2:8, 15) Kioso o izuelu íii, kia i te mu dízui dia Ngeleku, o kizuelu “díbhia” a kisoneka pa·raʹdei·sos, muene mua tundu o kizuelu “palaízu” mu Kingileji.

Mu ku bhita kithangana, o dikaza didi eji kala ni ana avulu, kienhiki, Adá ni Eva, a tokalele ku bandekesa dingi o Palaízu ia Edene, kioso muiji uâ ki uai ni ku dibandekesa. Nzambi uixi: “Mu izalese o ixi ioso, mu i tolole.”—Dimatekenu 1:28.

O Mubhangi uetu ua mesenene kuila, o athu a vuala ana mu Palaízu mu ixi. Ene eji kala mu palaízu mu ixi sé ku bhindamena mbalale. O ixi ieji kala o dibhata dia athu oso, ku hádia ni hádia. Se-ku kima kia beta-kota mu ngongo ki bheka o kisangusangu ku athu! O athu a a bhange phala ku kala mu ixi ia iuka.

O kuila o vondadi ia Nzambi ia lunguluka? Kana. Jihova ua tu kanena: ‘O kizuelu ki tunda mu kanu diami, kiene ki kia ka vutuka kia hatu ko kuami. Maji kia ka bhanga kioso kia ngi uabhela eme.’ (Izaia 55:11) Mu ku bhita 3.000 ia mivu tundé kia bhange o muthu, o Bibidia iambe: “Nzambi ua tenene kumba oxi, iú ua i iudika; ua i xikika, ka i’xia kiphulungunzu kia hatu, kana; ua i bhange phala athu ku tunga-mu.” (Izaia 45:18) Nzambi ka lunguluka. O ixi ia-nda kala dingi palaízu.

O ibatulu ioso ia Bibidia, kioso ki izuela Palaízu, ia mu zuela ia lungu ni muenhu mu ixi. Mu kifika, o divulu dia Izaia diambe: “Ene-phe a kà tunga jinzo, anga a kala-mu; a kà dima milenga ia mividi, anga a ka dia idima iê.” (Izaia 65:21) Kuebhi kua tunga o jinzo, ni kuebhi kua dima o mividi, kuebhi kuadia o ibundu? Mu ixi. O divulu dia Jisabhu 2:21, dizuela: “Kuma athu ambote ene a kà tunga mu ngongo, oso aiuka muxima a kà nangenena muenhomo.”

Jezú ua zuelele ia lungu ni Palaízu, mu ixi. Mu kidi, muéne ué ua kanena muenhu ua kalelaku ku diulu, maji ki athu oso aia-ku. (Luka 12:32) Kioso kiafuá, mu ku a fukununa aia mu Palaízu ku diulu, mu ku disanga ni Kristu phala ku tumina o Palaízu mu ixi. (Dijingunuinu 5:10; 14:1-3) O athu enhá a-nda kala ni Jezú, a kanena kuila a-nda tumina kiambote o Palaízu mu ixi, kála kiambe o itumu ia Nzambi.

Jezú uejidile kuila íii, iene o vondadi ia Nzambi phala o ixi. Mukonda muéne ua kexile kumoxi ni Tat’â, kioso kia bhange o jaludim ia Edene. O muenhu mu palaízu phala athu oso ala ni kixikanu lelu. (Nzuá 3:16) Kienhiki, Jezú ua kanena: “Ua kà kala ni eme ku kididi kiambote mu Palaízu ia Nzambi.”—Luka 23:43.

[Muxinda ua tokala ku foto 10]

© FORGET Patrick/SAGAPHOTO.COM/Alamy