Di Longe O Mak’â Nzambi

Mukonda Diahi ku di Longa ia Lungu ni Nzambi?

O mbandu íii, ia-nda tambuijila o ibhuidisu nange i ua di bhangele kiá, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.

1. Mukonda Diahi o ku di Longa ia Lungu ni Nzambi?

Nzambi uala ni njimbu iambote, phala o athu oso mu ngongo. Muéne u tu tangela ia lungu ni njimbu íii, mu Bibidia. O Bibidia iala kála mukanda ua tu bhana Tata ietu ia diulu.—Tanga Jelemiia 29:11.

2. O njimbu iambote ihi?

O mundu ua bhindamena unguvulu uambote. Se-ku nguvulu mu ngongo u tena ku bheka ku tululuka, ni ku zubha o ujibhangânga, o usuéia, o mauhaxi, mba o kufuá. Maji saí-ku njimbu iambote. Nzambi ua-nda bhana ku athu, unguvulu uambote. Ua-nda zubha o ima ioso iene mu bheka o jiphaxi mu ngongo.—Tanga Daniiele 2:44.

3. Mukonda diahi kima kiambote ku di longa ia lungu ni Nzambi?

Kua kambe ngó bhofele, Nzambi ua-nda buika o athu oso ene mu bheka o jiphaxi mu ngongo. Maji mu kindala, muéne ua mu longa athu a iuka o mixima phala n’a kale ni ukexilu uambote ku muenhu, mukonda dia henda iê. Bhu kaxi ka Maka a Nzambi, athu a mu di longa se kiebhi kia tena ku dibhana ni ibhidi ku muenhu, kiebhi kia tena ku sanga o ku zediua kua kidi, ni kiebhi kia tena ku bhanga o vondadi ia Nzambi.—Tanga Sofoniia 2:3.

4. Nanhi ua Bhange o Bibidia?

Mu Bibidia, muala 66 a madivulu. A i soneka ku 40 athu. O madivulu a samanu a dianga, a a soneka kua Mozé, mu 3.500 ja mivu ku dima. O madivulu a sukina-ku, a a soneka kua poxolo Nzuá mu 1.900 ia mivu ku dima. Maji o asoneki a Bibidia a soneka o ibanzelu ia Nzambi, ka soneka o ibanzelu iâ. Kienhiki, o Bibidia a i bhange kua Nzambi.—Tanga 2 Timote 3:16; 2 Phetele 1:21.

Etu tuejiia kuma o Bibidia divulu dia Nzambi, mukonda iene ia tange ni kidi kioso o ima ioso ieji bhita ku hádia. Se-ku muthu ueji tena ku bhanga kiki. (Izaia 46:9, 10) O Bibidia i tu tangela ué o ídifua ia Nzambi. Iene iala ni kutena kua ku lungulula o mienhu ia athu oso mu ukexilu uambote. O kidi kiki, ki bhangesa athu ku xikina kuila, o Bibidia, o Maka a Nzambi.—Tanga Josuué 23:14; 1 Tesalonika 2:13.

5. Kiebhi ki u tena ku tendela o Bibidia?

Jezú a mu ijidile kála mulongexi ua Maka a Nzambi. Sumbala o athu akexile mu a longa, ejidile kiá o Bibidia, maji ene a mesenene kikuatekesu phala ku i tendela kiambote. Phala ku a kuatekesa, Jezú ua a jimbulula kibatulu kia Bibidia, kioso kia zubha ku a jimbulula, ua a kuatekesa “kuívua kiambote o Madivulu a Ngana.” O mbandu iambe, “di Longe o Mak’â Nzambi,” ia-nda sidivila ué phala ku ku kuatekesa.—Tanga Luka 24:27, 45.

Ua-nda diuana kiavulu kioso ki u di longa o kikanenu kia Nzambi kia lungu ni muenhu. Maji saí athu, nange a-nda dizangala mukonda dia eie ku di longa o Bibidia. Maji eie kana ku luuala. Mukonda o kidielelu kiê, kia ku kala ni muenhu ua kalelaku ku hádia, kijila ngó se uijiia kiambote Nzambi.—Tanga Matesu 5:10-12; Nzuá 17:3.

Phala kuijiia dingi, tanga o kibatulu 2 kia divulu didi, a di bhange ku Jimbangi ja Jihova.