Jezú Ua Kexile ni Ukexilu Uahi?

‘Kúdia kuami, o ku bhanga o vondadi ia ió ua ngi tumu, ni ku zubha o kikalakalu kiê, kia ngi tumu o ku bhanga.’—NZUÁ 4:34.

O izuelu ia dianga ia tange Jezú, ia londekesa o kima kia betele kota ku muenhu uê. Jezú, ni maxibulu mê, ende kimenemene kioso, mu mbanza ia Samádia, m’uexile milundu iavulu. (Nzuá 4:6) O maxibulu mê a banzele kuila Jezú ua kexile ni nzala, ia a mu bhana kudia. (Nzuá 4:31-33) Mu ku a tambuijila, Jezú ua a jimbuluila o kima kia betele kota ku muenhu uê. Phala muéne, o ku bhanga o vondadi ia Nzambi, kia betele kota, o kúdia ndenge. Ki kale mu izuelu, mba mu ima ia kexile mu bhanga, Jezú uéza mu ixi phala ku bhanga o vondadi ia Nzambi. Kiki ki bhingile ku bhanga ihi?

▪ Ku boka ni ku longa o Utuminu ua Nzambi O Bibidia izuela se kikalakalu kiahi kia Jezú kia betele-kota: ‘Jezú anga u nhunga Ngalileia ioso ni ku longa . . . ni ku boka o utuminu ua Nzambi.’ (Matesu 4:23) Jezú ka boko ngó o Utuminu ua Nzambi. Muéne ua longo ué o athu—ua a jimbuluila kiambote, ua a bhangesa ku xikina mu ima ia kexile mu a longa. O Utuminu, uene ua kexile o diambu dia kuboka kua Jezú.

Kioso kia kexile mu boka, Jezú ua longo o jingivuidi jê, se o Utuminu ua Nzambi ihi, ni ihi ia-nda bhanga. Xinganeka o kidi kiki kia lungu ni Utuminu, kála kilondekesa o ibatulu ia Bibidia ia tange Jezú, ia lungu ni maka enhá.

▪ O Utuminu ua Nzambi, unguvulu ua diulu, Jezú muéne a mu bhana Usobha kua Jihova.—MATESU 4:17; NZUÁ 18:36.

▪ O Utuminu ua-nda ximanesa o dijina dia Nzambi, ni ku bhangesa kuila o vondadi iê, a i bhanga bhoxi kála kiene mu i bhanga ku diulu.—MATESU 6:9, 10.

▪ Bhu kaxi ka Utuminu ua Nzambi, o ixi ioso ia-nda kituka palaízu.—LUKA 23:42, 43.

▪ O Utuminu ua Nzambi, ua-nda kuíza phala ku kumbidila o vondadi ia Nzambi, ia lungu ni ixi. *—MATESU 24:3, 7-12.

▪ Ua bhange madiuanu Jezú, a betele ku mu ijiia kála “Mesene.” (Nzuá 13:13) Maji mu mivu itatu ni kaxaxi, ia bhange mu ukunji, muéne ua bhange madiuanu avulu. O madiuanu akexile mu bhanga, alondekesa ima iiadi. Kia dianga, phala kulondekesa kuma, muéne a mu tumikisa kua Nzambi. (Matesu 11:2-6) Kaiiadi, phala kulondekesa se ihi ieji bhanga kála Sobha ku Utuminu ua Nzambi ku hádia. Tu di longe o madiuanu a bhange.

▪ Muéne ua tululukisa o menha a kalunga, ni kitembu.—MARKU 4:39-41.

▪ Muéne ua sake athu avulu, ifofo, maxilu, ni inema.—LUKA 7:21, 22.

▪ Muéne ua bhangesa kuila o kudia, ku kale kuavulu, phala ku disa o athu oso.—MATESU 14:17-21; 15:34-38.

▪ Muéne ua fukununa athu mu ithangana itatu.—LUKA 7:11-15; 8:41-55; NZUÁ 11:38-44.

Xinganeka ngó kiebhi kia-nda kala o muenhu mu ixi bhu kaxi ka Sobha uala ni kutena kuavulu!

 ▪ Ua londekesa o kídifua kia Jihova Nzambi Ia lungu ni ku longa o athu o maka a Jihova, ki bhu kexile muthu ni uhete kála o Mon’â Nzambi, ió a mu ijiia kála Jezú Kristu. Mukonda muéne, ‘a dianga o ku mu bhanga, ande dia ima ioso,’ Jezú ua kexile kiá ukulu ku diulu ni Jihova, ande dia ji-anju ja mukuá. (Kolose 1:15) Xinganeka ngó, o kithangana kia kexile nakiu kia ku kala ni ibanzelu ia Tat’ê, ku di longa ia lungu ni vondadi ia Nzambi, ni ku belesela o itumu iê.

Mukonda dia kiki, Jezú uambe: “Ima ioso a ngi bhana-iu eme kuala Tata iami. Kana muthu-phe uejiia se Mona mukua-hi; ua muijiia ngó muène Tata. Kana muthu ue uejiia se o Tata mukuahi; ua mu’ijiia ngó muène Mona, ni ió uoso Mona u sola ku mu tukuluila-nê.” (Luka 10:22) Kioso kia kexile mu ixi, Jezú—ni vondadi ioso—ua londekesa o kídifua kia Tat’ê. Jezú ua zuela, ua longo ioso ia mu longo kioso kia kexile ku diulu, ni Nzambi o Muteni-a-Ioso.—Nzuá 8:28.

O ima ia bhange Jezú phala kulondekesa o ídifua ia Tat’ê ku athu, a tena ku i sokesa ni kikalakalu ki bhanga o makina i tambula nguzu iavulu ia mukengeji. O makina íii, i tambula nguzu iavulu ia mukengeji, phala ku sosolola mu mukengeji iofele, phala o mabhata ku kala ué ni mukengeji ua tokala. Kioso Jezú kia kexile mu ixi, muéne ua kumbidila ioso ia mu longo Tat’ê, iu ua ijimbulula ué ku athu oso mu ixi mu ukexilu uambote, phala athu ku tena ku ki tendela, ni ku ki belesela.

Xinganeka mu pondo jiiadi jiji, ja londekesa kuila Jezú muéne o kídifua kia Tat’ê.

▪ Kioso kia kexile mu longa, Jezú ua longo o kidi kia lungu ni Jihova—o dijina Diê, o kikanenu kiê, ni itumu iê.—NZUÁ 3:16; 17:6, 26.

▪ Mu ima ia bhange, Jezú ua londekesa mu ukexilu uavulu o kídifua kia Jihova. Jezú ua londekesa o kídifua kia Tat’ê mu ukexilu ua iuka, iu uambe: ‘Se ua mesena kuijiia o Tat’ami, di longe ko kuami.’—NZUÁ 5:19; 14:9.

Tua sanguluka kiavulu mu kuijiia o ukexilu ua kexile nau Jezú. Tu tena ku katula dingi mbote se tuijiia mukonda diahi muéne uafú, se tu kumbidila ku muenhu uetu ioso i tua di longo.

[Tanga mu luji]