Jezú Uafú Mukonda Diahi?
Jezú Uafú Mukonda Diahi?
‘Kuma o Mon’a Muthu uéza . . . mu bhana o muenhu uê mu kukula o mundu.’—MARKU 10:45.
JEZÚ uejidile kiambote ihi ieji bhita na-iu. Uejidile kuila keji kala ni ku tululuka ku muenhu. Uejidile ué kuila o muenhu uê eji ku u batula, mu kitala kia 30 a mivu, iu ua kexile polondo phala o kizuua kia kufuá kuê.
O Bibidia i bhana valolo mu kufuá kua Jezú. Saí divulu diambe kuma, o kufuá kua Jezú a ku tange mu 175 ia ji veji, mu Kikutu Kiokulu, ni mu Kikutu Kiobhe kia Mikanda Ikola. Kienhiki-phe, mukonda diahi Jezú ua tokalele ku tala hadi, ni kufuá? Tua tokala kuijiia o kidi, mukonda o kufuá kua Jezú, kuala ni valolo ia dikota ku muenhu uetu.
▪ Ihi ia kexile mu kingila Jezú? Ku muvu ua sukina mu ixi, Jezú ua dimuna kiavulu o maxibulu mê, ia lungu ni hadi, ni kufuá kuê, kua kexile mu kingila. Mu kikoka kia Jeluzaleme kioso kia kexile múia mu bhanga o fesa ia Phasu iê ia sukina, muéne uambela o 12 kia jipoxolo jê: “Mon’a Muthu a-nda ku mu bhakula ku [atuameni] makota ma jinganga, ni ku jimesene ja Kitumu. ‘Ene a-nda ku mu fundisa phala ku mu jibha, a-nda ku mu bhakuila ku akua matumbu. Ene a mu bhanga kasekelu, a mu ta mathe, a mu beta ni jixikote, hé a mu jibha.’” * (Marku 10:33, 34) Mukonda diahi muéne ua kexile mu zuela ni kidi kioso o ima ieji bhita na-iu?
Jezú uejidile ikanenu iavulu iala mu Kikutu Kiokulu, kia lungu ni disukilu dia muenhu uê. (Luka 18:31-33) Di longe o ikanenu ia Bibidia, ijimbulula kiebhi o ikanenu íii, ia dikumbidila
O Mexiia eji ku mu . . .
▪ Sumbisa mu 30 a kitadi kia phalata.—ZAKADIIA 11:12; MATESU 26:14-16.
▪ Bhana jihuxi, ni ku mu ta mathe.—IZAIA 50:6; MATESU 26:67; 27:26, 30.
▪ Phaphela ku taka.—JISÁLAMU 22:16; MARKU 15:24, 25, NW.
▪ Bhanga kasekelu ku taka.—JISÁLAMU 22:7, 8; MATESU 27:39-43, NW.
▪ Jibha se ku mu bukula kifuba.—JISÁLAMU 34:20; NZUÁ 19:33, 36.
O ikanenu íii, ni ia mukuá, ia dikumbidila kua Jezú. Muéne keji bhanga kiki ubheka uê. O ki kumbidilu kia ikanenu ioso íii, ilondekesa kuila Jezú, a mu tumina kua Nzambi. *
Mukonda diahi kua bhingile kuila Jezú u tala hadi, ni kufuá?
▪ Jezú uafú phala ku batula o maka Jezú uejidile o valolo ia maka a mateka mu jaludim ia Edene. Mukonda dia ku a nganala ku anju ia bhukumuka, Adá ni Eva, a solo ku bhukumukina Nzambi. O ku bhukumuka kua dikaza didi, kua bheka maka alungu ni ungana ua Nzambi, ni ukexilu uê uambote ua ku tumina. O kituxi kiâ, kia bheka ué maka a mukuá, se athu eji tena muene ku kala jifiiele kua Nzambi, kioso kia a polovala.—Dimatekenu 3:1-6; Jobe 2:1-5.
Jezú ua tambuijila o maka enhá alungu ni—ungana ua Jihova, ni athu ku kala jifiiele mu jipolova. Mu ku tumaka “katé mu kufuá . . . ku taka,” Jezú ua zokela o ungana ua Nzambi. (Filipe 2:8, NW) Jezú ua londekesa ué kuma, o muthu ua iuka, u tena ku tumaka Jihova, né muene mu ibhidi iavulu.
▪ Jezú uafú phala ku bhulula o mundu O polofeta Izaia ua zuela kuila, o Mexiia a mu kanena, ueji tala hadi, ni kufuá phala ku bhulula o athu mu ituxi. (Izaia 53:5, 10) Jezú uejidile kiambote o maka enhá, iu ua bhana ‘o muenhu uê, mu kukula o mundu’ mu vondadi iê. (Matesu 20:28) O kufuá kuê, kua jikula o njila phala athu oso ati a ituxi, a kale ni ukamba uambote ni Jihova, ni ku a bhulula ku ituxi ni mu kufuá. O kufuá kua Jezú, ku bhangesa ku kala ni muenhu ua kalelaku mu ixi—ni ku kala dingi ni ukexilu ua kexile nau Adá, ni Eva. *—Dijingunuinu 21:3, 4.
▪ Ihi i ua tokala o ku bhanga? Mu milongi íii, tua di longo ihi i longa o Bibidia, ia lungu ni Jezú—ua tundu kuebhi, ua kexile ni ukexilu uahi, se uafú mukonda diahi. O kuijiia o kidi kiki kia lungu ni Jezú, ki zubha o phata iene na-iu athu, ia lungu ni muéne. O ku belesela o milongi íii, ku bheka mabesá avulu—ku tu bhangesa ué ku kala ni ukexilu uambote lelu, ni ku kala ni muenhu ua kalelaku ku hádia. O Bibidia i tu tangela se ihi i tua tokala o ku bhanga phala ku tambula o mabesá enhá.
▪ Di longe dingi ia lungu ni Jezú Kristu, ni kikalakalu kiê, mu kikanenu kia Jihova.—NZUÁ 17:3.
▪ Kala ni kixikanu kua Jezú, londekesa ku muenhu uê kuila, ua mu xikina kuila muéne o Mubhuludi uê.—NZUÁ 3:36; IKALAKALU 5:31.
O Jimbangi ja Jihova, a-nda ku kuatekesa kuijiia dingi ia lungu ni Jezú Kristu, ‘Mona umoxi-élele’ ua Nzambi, mu kaxi kê, tua-nda tambula o “muenhu ua kalelaku.”—Nzuá 3:16.
[Tanga mu luji]
^ kax. 5 Ithangana ioso, Jezú ua kexile mu zuela kuila muéne, “o Mon’a muthu.” (Matesu 8:20) O kizuelu kiki, ki kilondekesa ngó kuma muéne muthu, maji muéne uexile o “Mon’a muthu,” kála ki tanga o kikanenu kia Bibidia.—Daniiele 7:13, 14.
^ kax. 13 Phala kuijiia dingi ia lungu ni ikanenu, ia di kumbidila kua Jezú, tanga o divulu, Mu Kidi Ihi i Longa o Bibidia? Mu kibandekesu kiambe, “Jezú Kristu—O Mexiia a mu Kanena” a di bhange ku Jimbangi ja Jihova.
^ kax. 17 Phala kuijiia dingi ia lungu ni valolo ia kufuá kua Jezú, tanga o divulu, Mu Kidi Ihi i Longa o Bibidia? mu kibatulu 5, kiambe “O Kukula—Ujitu Uonene ua Nzambi.”
