“Kuzonga Kuahi O Unjimu Ua Nzambi!”

‘O jimbongo ja Nzambi kuvula kuahi! Kuzonga kuahi o unjimu ua Nzambi, ni kuijiia kuê! Mu kuahi u tena ku lombolola o ku fundisa kuê? Nanhi u tena ku tongolola o i kutu iê?’—LOM. 11:33.

1. Ujitu uahi uala nau o Jikidistá a a batizala kiá?

UJITU uahi u ua tambula kiá? Mu dimatekenu nange u banza mu ikalakalu i ua tambuile kiá, mba mu ujitu u ua tambula. Kienhiki, phala o Jikidistá a a batizala kiá, o ujitu ua beta-kota u tuala nau, o ku kala ni ukamba ni Nzambi ia kidi, Jihova. Kiki ki bhangesa ku ‘tuijiia kuala muéne.’—1 Kol. 8:3; Nga. 4:9.

2. Mukonda diahi ujitu ua dikota kuijiia Jihova, ni ku tuijiia kua muéne?

² Mukonda diahi, ujitu ua dikota o kuijiia Jihova, ni ku tuijiia kua muéne? Mukonda muéne ki Muthu ngó ua beta-kota mu ngongo ioso, maji muéne u Langa athu oso a mu zolo. O polofeta Nahumu ua soneka: “Ngana uaiuka, muene dilengelu dietu mu thembu ia jiphaxi; Jihova uejiia oso a mu dielele muene.” (Nah. 1:7; Jisá. 1:6) Mu kidi, o ku kala ku muenhu ua kalelaku, ku bhinga kuijiia o Nzambi ia kidi, ni Mon’ê, Jezú Kristu.—Nzu. 17:3.

3. Ihi ia bhingi phala kuijiia Nzambi?

³ O kuijiia Nzambi, ki ku bhingi ngó kuijiia o dijina diê. Tua tokala ku muijiia kála Kamba dietu, ni ihi ia mu uabhela, ni ihi ia mu ibhila. O ku kala ni ukexilu kála ki tu longa o Bibidia, kima kiambote phala kulondekesa  kuila tuala ni ukamba ni Nzambi. (1 Nzu. 2:4) Maji kua bhingi dingi kima se tua mesena kuijiia Jihova. Ki ku bhingi ngó kuijiia ihi iene mu bhanga, maji kiebhi kia bhanga, ni mukonda diahi muéne u bhanga kiki. Kioso ki tuia ni kuijiia o ikanenu ia Jihova, tua-nda diuana kiavulu ni ‘kuzonga kua unjimu ua Nzambi.’—Lom. 11:33.

Jihova, Nzambi ia Ikanenu

4, 5. (a) Kála kia ki jimbulula mu Bibidia, ihi ilombolola o kizuelu “kikanenu?” (b) Bhana kifika kilondekesa se kiebhi o kikanenu a tena ku ki kumbidila mu maukexilu avulu.

⁴ Jihova, Nzambi ia ikanenu, o Bibidia izuela ia lungu ni “kikanenu kiê kiòkulu-kulu.” (Efe. 3:10, 11) Ihi ilombolola o kizuelu kiki? O kizuelu “kikanenu,” mu Bibidia, kilombolola kima kia mesena ku bhanga, mba kia tena o ku bhanga mu maukexilu avulu.

⁵ Mu kifika: Muthu u mesena kuenda njila phala kuia kididi kia mesena. O kididi kiki, ki tena ku kala o kikanenu kiê. Muéne u tena ku kala ni ixinganeku iavulu ia lungu, ni njila íii, ni dikalu dia-nda kuendela, maji ua mesena u bhixila bhu kididi kia xindi. Kioso kia mu kuenda mu njila, muéne u tena ku sanga ibhidi iavulu, kála kitembu, makalu avulu mu njila, jinjila ja xiti, u bhinga kuila muéne u sola kikoka kiéngi. Né muene u bhinga ku sola kikoka kiéngi, maji muéne ua-nda tena ku bhixila bhu kididi kia mesena.

6. Kiebhi Jihova kia londekesa kuila muthu uambote mu ku kumbidila o kikanenu kiê?

⁶ Kiki kilondekesa kiebhi Jihova, kiene mu bhanga phala ku kumbidila o kikanenu kiê, kiokulu-kulu. Mu ku xinganeka o ufolo ua ku sola uene nau o an’ê, ene ni unjimu, muéne ua lungulula o ibanzelu iê, phala ku kumbidila o kikanenu kiê. Mu kifika, tua-nda di longa kiebhi Jihova kia kumbidila o kikanenu kiê, kia lungu ni Mbutu. Ku dimatekenu Jihova uambela o dikaza dia dianga: “Vualenu, mu sokoloke, mu izalese o ixi ioso, mu i tolole.” (Dim. 1:28) O kuila o kikanenu kiki, a ki fidisa kioso kia bhukumuka mu jaludim ia Edene? Kana! Jihova ua bhange kima mu kithangana kieniókio, ua banze ku bhanga “kima kiéngi,” phala ku kumbidila o kikanenu kiê. Muéne ua kanena “mbutu” ieji zubha o jiphaxi joso ja bheka ió a bhukumukine.—Dim. 3:15; Jihe. 2:14-17; 1 Nzu. 3:8.

7. Ihi i tu longa o ukexilu ua Jihova kála kia ki tange mu divulu dia Makatukilu 3:14?

⁷ O uhete ua Jihova ua ku lungulula o ukexilu uokulu, mu ukexilu uéngi phala ku kumbidila o kikanenu kiê, kilondekesa kiambote, o ukexilu uê muene. Kioso Mozé kiambela Jihova kuila keji tena ku kumbidila o kikalakalu kia mu bhanene, Jihova ua mu ambela: “‘Eme kala-dia-kala.’ Uambe dingi: ‘Ua kela kua an’a Izalaiele kuma,’ “kala-dia-kala muene ua ngi katula, iú ua ngi tumu kó kuenu.”’” (Mak. 3:14) Kiki, kilondekesa kuila Jihova, u tena ku kumbidila o ikanenu iê ioso! Kiki a kilondekesa kiambote kua poxolo Phaulu mu divulu dia Loma mu kibatulu 11. Muéne uambe ia lungu ni muxi ua mudiva. O ku di longa ia lungu ni muxi iú, kia-nda bandekesa o ujitu uetu ku unjimu ua Jihova, ki kale se tua kingila kuia ku diulu, mba ku kala ni muenhu ua kalelaku mu ixi.

O Kikanenu Kia Jihova Kia Lungu ni Mbutu ia Kanena

8, 9. (a) Jipondo jiuana jebhi ja-nda tu kuatekesa kuijiia o kifika kia muxi ua mudiva? (b) O kuila o kitambuijilu kia kibhuidisu kiki, kilondekesa o uhete ua Jihova mu ku kumbidila o kikanenu kiê?

⁸ Ande dia ku di longa o kifika kia muxi ua mudiva, tua tokala kuijiia pondo jiuana, ja lungu ni kikanenu kia Jihova kia lungu ni mbutu ia kanene. Kia dianga, Jihova ua kanena Mbalahamu kuila “ku mbutu iê kuene kua kà zediuila ifuxi ioso mu ngongo” bhu kaxi ka mbutu, mba muiji uê. (Dim. 22:17, 18) Kaiiadi, o kifuxi kia Izalaiele a tambula ujitu ua ku kala ‘jisobha mu utuminu.’  (Mak. 19:5, 6) Katatu, kioso akua Izalaiele kia ditunu o Mexiia, Jihova ua bhange kima kiéngi phala ku bheka ‘jisobha mu utuminu.’ (Mat. 21:43; Lom. 9:27-29) Mu kusuka-ku, bhu kaxi ka Jezú, o muthu ua dianga ku “mbutu” ia Mbalahamu, athu a mukuá a tambula ué o ujitu ua ku bhanga mbandu ku “mbutu.”—Nga. 3:16, 29.

⁹ O jipondo jiuana jiji, ji tu longa kuila, 144.000 ja athu a tange mu divulu dia Dijingunuinu a-nda tumina ni Jezú ku diulu, kála jisobha, ni akunji. (Dij. 14:1-4) Enhá a exana ué “an’a Izalaiele.” (Dij. 7:4-8) O kuila o 144.000 oso akua Izalaiele, mba Jijudé? O kitambuijilu kia kibhuidisu kiki, kilondekesa o uhete ua Jihova mu ku kumbidila o kikanenu kiê. Tua-nda di longa o mukanda ua poxolo Phaulu, ua sonekena akua Loma, ua-nda tu kuatekesa kuijiia o maka enhá.

‘O Utuminu ua Jisobha’

10. Kima kiahi kia tokalele ngó o akua Izalaiele ku kingila?

¹⁰ Kála ki tua mono kiá, o akua Izalaiele ene ngó a tokalele ku kala ‘jisobha mu utuminu, mba mundu ua zele’ (Tanga Loma 9:4, 5.) Maji ihi ieji bhita kioso kieji bhixila o mbutu ia kanene? O kuila akua Izalaiele, eji tena ku tenesa o 144.000 a athu eji bhanga o mbandu ia kaiiadi ku mbutu ia Mbalahamu?

11, 12. (a) Thembu kuxi ia mateka ku sola ió eji kala ku Utuminu ua diulu, ni kiebhi o Jijudé kia tambulula o ujitu iú? (b) Kiebhi Jihova kia tenesa o “konda,” ia ió eji bhanga mbandu ku mbutu ia Mbalahamu?

¹¹ Tanga Loma 11:7-10. O kifuxi kiki, kia Jijudé ku hama ia dianga, a ditunine Jezú. Kienhiki o ujitu ua ku bhanga mbandu ia mbutu ia Mbalahamu ua bhuile phala ene. Mu kiki, kioso kia solo oso a tokalele kuia ku diulu, mu Pendekoxi ia 33 K. K., phala ku kala ‘jisobha mu utuminu,’ kua kexile hanji Jijudé jambote a xikinine o ujitu iú. O muxinda ki ua sokele midi, o athu enhá a “subhuka,” a a sokesa ni kifuxi kia Jijudé.—Lom. 11:5.

¹² Kienhiki, kiebhi Jihova kieji tenesa o “konda” ia ió eji kala o mbutu ia Mbalahamu? (Lom. 11:12, 25) Tala kia tambuijila poxolo Phaulu: “Ki tu fike-phe kuila o kizuelu kia Nzambi kia lémbua. Kuma a tokala Izalaiele, ene oso ki akua ‘Izalaiele’ osole kua Nzambi. Sumbala ene oso luvalu lua Mbalahamu, maji ene oso ki an’a Nzambi. Mukonda Nzambi uambelele Mbalahamu . . . Kuma: An’a xitu ki ene an’a Nzambi. Maji ana á vualela mu [kizuelu] kia kikutu kia Nzambi ene a ejiia kuma luene luvalu luê lua kidi.” (Lom. 9:6-8) Kienhiki, Jihova ka jijidikile kuila ió eji bhanga mbandu ku mbutu, a kala muiji ua vuala Mbalahamu.

O Muxi ua Mudiva ua Kifika

13. Ihi ilombolola (a) o muxi ua mudiva, (b) o jindanji, (c) o kixinji, ni (d) jithangu?

¹³ O poxolo Phaulu ua sokesa ué ió a bhanga mbandu ku mbutu ia Mbalahamu, ni jithangu ja muxi ua mudiva. * (Lom. 11:21) O muxi ua mudiva, ulombolola o ki kumbidilu kia kikanenu kia Nzambi, kia lungu ni kikutu kia bhange ni Mbalahamu. O jindanji ja muxi ua zele, ji lombolola Jihova, mukonda muéne ua bhana o muenhu ku Izalaiele mu nzumbi. (Iza. 10:20; Lom. 11:16) O kixinji, kilombolola Jezú, o muthu ua dianga ku mbutu ia Mbalahamu. O jithangu ja tenesa o “konda,” ji lombolola o mbandu ia kaiiadi, ku mbutu ia Mbalahamu.

14, 15. Nanhi a mu ‘bukula’ ku muxi ua mudiva ua kunine, ni nanhi a a phaphe-ku?

¹⁴ Mu kifika kia muxi ua mudiva, a sokesa o Jijudé a ditunu Jezú, ni jithangu ja mudiva “a ji buikile-ku.” (Lom. 11:17) Ene a texi o  ujitu ua ku bhanga mbandu ia mbutu ia Mbalahamu. Nanhi ueji ku a bhingana? Phala o akua ixi o Jijudé, akexile mu dinanza kuila ene an’a Mbalahamu, ene keji tena ku tambuijila o kibhuidisu kiki. Maji Nzuá dia Batizu ua a jimbulula kuila, se Jihova ua mesene, ueji bhangesa ku tundisa ku matadi an’a Mbalahamu.—Luk. 3:8.

¹⁵ Kienhiki-phe, ihi ia bhange Jihova phala ku kumbidila o kikanenu kiê? Phaulu ua jimbulula kuila o jithangu ja muxi ua mudiva ua muxitu, a ji phaphe ku muxi ua mudiva uo kune, phala ku bhingana o jithangu jo bukule-ku. (Tanga Loma 11:17, 18.) Kienhiki, o Jikidistá a a undu, a tundu mu ifuxi ioso kála ió a tokalele mu kilunga kia Loma, akua jixi jengi a a phaphele kála o thangu ku muxi ua mudiva mu kifika. Kienhiki, ene a kituka mbandu ia mbutu ia Mbalahamu. Ku dimatekenu ene exile kála o jithangu ja mudiva ua muxitu, sé kidielelu kia ku bhanga mbandu ku kikutu kiki kionene. Maji Jihova ua jikula o njila phala ene ku kala Jijudé mu nzumbi.—Lom. 2:28, 29.

16. Kiebhi kia jimbulula poxolo Phetele, o ukexilu ua kifuxi kia ubhe mu nzumbi?

¹⁶ O poxolo Phetele ua jimbulula o maka iá, mu ukexilu iú: “O ditadi didi [Jezú Kristu] dia te kiavulu, phala enu oso mua xikana. [o Izalaiele mu nzumbi, ni Jikidistá ja Jixi jengi]. Maji phala ió a kambe kuxikana: Ditadi dia ditunu o jimesene kuila ki di uabha, dia biluka diene dia kuatesa bhu thungi. O bhua mukuá o Mikanda Ikôla, iexi: ‘Didi diene o ditadi dianda ku bhangesa athu ku di bhukana, o ndanji ia-nda ku a bhangesa o ku dibhala.’ . . . ‘Maji enu-phe mu muiji uo sole, mu jisobha, kifuxi kia zele, mu mundu uangene ua Nzambi muene. A mi tungula phala muende ni ku jimbulula o imbamba ia madiuanu’ iene mu bhanga Nzambi ió ua mi katula muavundu, iú ua mi bheka mu mukengeji uê u diuanesa. M’okulu ki mua kexile mu  mundu ua Nzambi, kiki-phe mu mundu uê. M’okulu o henda ia Nzambi ki mua ijidile luua, kiki-phe mua tambula o henda iê.”—1 Phe. 2:7-10.

17. Kiebhi Jihova kia bhange o ‘kima kene mu ki bhanga?’

¹⁷ Jihova ua bhange kima ka ki kingile kuala athu. Phaulu uambe kuila, ‘kima kene mu ki bhanga.’ (Lom. 11:24) Kiki kia bhiti kiebhi? Kiki ki kiene mu bhita, o jithangu ja muxi ua muxitu ku ji phapha, katé ué kieji bhonza o idimakaji mu hama ia dianga ku xikana o kidiuanu kiki. * Kiki kiexile madiuanu a bhange Jihova. O Jijudé a banzele kuila o akua Jixi jengi, keji bhana ibundu iambote. Maji Jihova ua bhange o kibuka kiki kiofele, “kifuxi” kia bhana ibundu ia Utuminu. (Mat. 21:43) Ua mateka ni Koloneliu, o mukua Ixi iéngi a dianga ku mu sola phala kuia ku diulu—ku muvu ua 36 K. K., kioso kia bhana o ujitu kua ió kexile Jijudé, a kambele ku a saia mu ku a phapha ku muxi iú ua mudiva ua kifika.—Ika. 10:44-48. *

18. Ujitu uahi ua bhana ku Jijudé kioso kia bhiti o muvu ua 36 K.K.?

¹⁸ O kuila kiki kilombolola kuma, kioso kia bhiti o muvu ua 36 K.K., o Jijudé ka kexile dingi ni ujitu ua ku tokala ku mbutu ia Mbalahamu? Kana. Phaulu ua jimbulula: ‘O Jijudé uâ, kia kamba kujiza mu kuxibaka kuâ, hadia a kà a phapha dingi bhu kididi kiâ bhua kexile, kuma Nzambi ua soko o ku a phapha-bhu dingi. Mukonda enu ki mu Jijudé, mua kexile mu jithangu ja mudiva ua muxitu, ua di sabhukila, iá a mi bhange kima kene mu ki bhanga, a mi phaphe ku muxi uambote. Maji o Jijudé a di bhange ene o mudiva ua kudima. Kala kiki, phala Nzambi, inda o jithangu jê-muène ji fuama ku ji phapha ku muxi uê.’ *—Lom. 11:23, 24.

‘O Izalaiele Ioso ia ka Bhuluka’

19, 20. Ihi iene mu bhanga Jihova kála kia kilondekesa ku muxi ua mudiva ua kifika?

¹⁹ Kienhiki o kikanenu kia Nzambi, kia lungu ni ‘Izalaiele ia Nzambi’ kia mu di kumbidila mu ukexilu uambote. (Nga. 6:16) Kála kia zuela Phaulu, ‘o Izalaiele ioso ia ka bhuluka.’ (Lom. 11:26) Mu kithangana kia Jihova, “o Izalaiele ioso”—a tenesa o Izalaiele mu nzumbi—a-nda kala jisobha, ni akunji ku diulu. Se-ku kima kia-nda fidisa Jihova ku kumbidila o kikanenu kiê!

²⁰ Kála kia kanena, o mbutu ia Mbalahamu—Jezú Kristu, ni 144.000, a-nda bheka mabesá avulu ku “ifuxi ioso mu ngongo.” (Lom. 11:12; Dim. 22:18) Mu kiki, o mundu uoso ua Nzambi, ua-nda katula mbote ku ujitu iú. Kioso ki tuia ni ku di longa ia lungu ni ikanenu ia Jihova, ki kia-nda tu kuatekesa ngó kuijiia o ikanenu iê, maji tu diuana ué mu ku mona ‘o kuvula kua jimbongo ja Nzambi, ni kuzonga kua unjimu uê, ni kuijiia kuê.’—Lom. 11:33.

[Tanga mu luji]

Eie ua Lembalala?

• Ihi i tua di longo ia lungu ni ukexilu ua Jihova ku kumbidila o ikanenu iê?

• Mu divulu dia Loma mu kibatulu 11, ihi ilombolola o . . .

muxi ua mudiva?

jindanji?

kixinji?

jithangu?

• Mukonda diahi o ku phapha, ‘kima kene mu ki bhanga?’

[Ibhuidisu ia ku dilonga]

[Kidikisu/​Foto ku bandu 26]

Mukonda Diahi o Jithangu ja Mudiva ua Muxitu a ji Phaphe?

▪ Lucius Junius Moderatus Columella, uexile disoladi mu Loma, uexile ué kidimakaji ua tungile mu hama ia dianga, K.K. Muéne a mu ijidile kiambote mukonda dia 12 a madivulu a soneka, alungu ni idima, ni ukexilu ué mu mábhia.

Mu divulu diê dia katanu, muéne ua soneka o sabhu íii, iokulu: “Uoso u kuna o mudiva, u kingila kibundu; ió u xaxa o mavu, u kingila kibundu; ió u ta o milongo i sabhukisa, u kingila kibundu.”

Muéne ua tange o maukexilu atatu, a kuatekesa o muxi ku bhana o ibundu, maji se o muxi u kamba ku bhana ibundu, muéne u tendelesa ku ki bhanga mu ukexilu uéngi: “Kima kiambote ku sota ukexilu uéngi, ku batula o jithangu ja muxi ua mudiva ua muxitu; mu ku bhanga kiki o muxi iú ua-nda bhana ibundu iavulu.”