Muiji Ua Kidistá —“Kalenu Polondo”

“Enu uenu kalenu polondo; mukonda o Mon’a Muthu ua-nda kuíza mu kizuua ki mu ki fikile.”—LUK. 12:40, NW.

1, 2. Mukonda diahi tua tokala ku belesela o kitendelesu kia Jezú, kia ku ‘kala polondo?’

‘KIOSO kia keza Mon’a Muthu-phe, ni ungana uê,’ muéne anga u tungula “akua jixi joso.” Ihi ia-nda bhita n’eie ni muiji uê? (Mat. 25:31, 32) Mukonda, kiki kia-nda ku bhita mu ola ki tu i kingila, o kima kiambote o ku belesela o kitendelesu kia Jezú kia ku ‘kala polondo!’—Luk. 12:40.

² O milongi i tua di longo kiá, ia tu kuatekesa kuijiia kiebhi o muiji u tena ku dilanga mu nzumbi, mu ku kumbidila o ikalakalu iâ mu kilunga. Tua-nda di longa maukexilu a mukuá a tena ku kuatekesa o muiji uetu ku zediua mu nzumbi.

Kalenu ku Mesu “Azele”

3, 4. (a) O miji ia Jikidistá a tokala ku dilanga mu ihi? (b) Ihi ilombolola ku kala ku mesu “azele?”

³ Phala ku kala polondo ni ku kingila o kizuua kia Kristu, o miji a tokala aluka, phala ka lalamane ni ima i tena ku a fidisa ku kala mu ubhezelu ua kidi. Ene a tokala ku dilanga ku ima i tena ku a thandanganhesa. O ku  mesena o jimbote javulu, kibhetu kia dikota, kiene mu nganala miji iavulu. Xinganeka mu itendelesu ia bhana Jezú, ia lungu ni ku kala ku mesu “azele.” (Tanga Matesu 6:22, 23.) Kála o kandeia ka tena ku tu muikina mu njila, ni ku tu kuatekesa kuenda sé ku dibhala mu kibhetu, ‘o mesu a muxima uetu, mu nzumbi,’ a tena ku tu kuatekesa kuenda mu njila sé ku dibhala.—Efe. 1:18.

⁴ Phala o mesu ku tala kiambote, a tokala a kalakala kiambote, a tonginina kiambote o ima ia mu tala. Kiene kimoxi ni mesu a muxima, mu ukexilu ua nzumbi. O ku kala ni mesu azele mu nzumbi, kilombolola ku mesena ngó kima kimoxi. Mu veji dia ku kaiela ngó o jimbote, mba ku thandanganha ngó ni ku dikila o ibhindamu ia muiji mu ukexilu ua xitu, tua tokala ku ta o ima ia nzumbi ku pholo. (Mat. 6:33) Kilombolola ué ku sanguluka ni ima i tu bhana Nzambi, ni ku ta ku pholo o sidivisu iê ku muenhu uetu.—Jihe. 13:5.

5. Kiebhi kia londekesa o kilumba kuila o ‘mesu’ mê, a mesenene ngó ku bhanga o sidivisu ia Nzambi?

⁵ Mbote iavulu ijila mu ku longa kiambote o tuana ku kala ku mesu azele! Xinganeka o phangu ia kilumba, ua tungu mu ixi ia Etiopiia. Muéne ua kexile mu bhanga kiambote o ikalakalu iê ia xikola, iu ua zubha o milongi ia dianga, a mu bhana o ujitu ua ku bandekesa o kuijiia kuê mu xikola ia katunda. Maji mukonda ua mesenene ku di bhakula mu sidivisu ia Jihova, ua ditunu kuia mu di longa mu xikola ia katunda. Mu ku bhita kithangana, a mu bhana kikalakalu kieji mu futa 4.200 US$ ku mbeji—kiki kia kexile kitadi kiavulu, ki kia sokele ni kitadi kiene mu futa ku akalakadi ku ixi iê. Maji o kilumba, o ‘mesu’ mê a mesenene ngó ku bhanga o sidivisu iê ia thembu ioso. Muéne ka banze ku sota o jitata jê phala ku mu kuatekesa ku dituna o kikalakalu kiki. Kiebhi kia divu o jitata jê, kioso kiévu o kima kia bhange o kilumba? Ene a sanguluka kiavulu, a mu ximana mu kima kia bhange!

6, 7. Mukonda diahi kiluezu kia dikota, ku kamba ku kala ku ‘mesu azele?’

⁶ O izuelu ia Jezú mu divulu dia Matesu 6:22, 23, i tendelesa ku dilanga ku luímbi. Jezú ka sokesa ku kala ku mesu ‘azele’ ni kizuelu ‘kia bhonzo’ maji ni kizuelu ‘kia iibha.’ O ‘diesu-phe dia iibha,’ ‘luímbi; ukumbu.’ (Mat. 6:23) Jihova u divua kiebhi kioso kia mona o luímbi? O Bibidia izuela, “o undumbu-phe, ni ufusa uoso, ni hanji jaiibha, [mba, “luímbi”] ka j’ivue né ku ji ta ngó maka mu’axaxe kenu.”—Efe. 5:3.

⁷ Tu tena ku mona kuila akuetu ala ni luímbi, maji ki bhonza kuijiia kuila etu ué tu akua luímbi. Kima kiambote ku belesela o kitendelesu kia Jezú, kioso kiambe: “Ividilenu kiambote! Alukenu, mu di lange ku luímbi.” (Luk. 12:15) Kienhiki, tua tokala ku di tonginina mudietu phala tuijiie, ihi iala ku muxima uetu. O miji ia Jikidistá a tokala kuijiia kiambote o kithangana, ni kitadi kia zanga mu itonokenu, ni mu ku sumba o ima ia mukuá dingi.

8. Kiebhi ki tu tena ku ‘kala ku mesu azele,’ kioso ki tuia mu sumba kima?

⁸ Kioso ki uia mu sumba kima, eie ku tokala ku banza ngó mu ima i ua tokala o ku sumba, maji ua tokala u xinganeka mu kitadi ki ua-nda ngastala, se o kima kia uabha muene mba kana. Xinganeka mu ibhuidisu íii: ‘O kuila nga-nda kala ni kithangana kia ku kukisa o kima ki nga sumbu ni ku ki langa? Nga-nda bhanga izuua ikuxi phala ngijiie ku kalakala nakiu? Eie u munzangala, kana ku xikina mu ima ioso ilondekesa o mundu, ia lungu ni ima iambote, kála izuatu i ta kalu, ni ima ia mukuá dingi ia fuma. Di tumine jihanji mu ima íii. Xinganeka ué, se o ku sumba o ima íii, kua-nda kuatekesa o muiji uê ku kala polondo, ni ku kingila o kizuua kia  Mon’a muthu. Dielela mu kikanenu kia Jihova, kiambe: “Eme nuka nga kà mi xisa, ki nga kà mi ehelela ue, kana.”—Jihe. 13:5.

Suuenu Jimbambe mu Kilunga

9. Ihi i tena ku kuatekesa o miji ku suua jimbambe mu kilunga?

⁹ O ukexilu ua mukuá u kuatekesa o athu oso ku muiji ku kolesa o kixikanu kiâ, ni ku bhangesa o muiji ku zediua mu nzumbi, o ku suua jimbambe mu kilunga. O ku bhanga kiki, ki tena ku kuatekesa o miji, ku kula mu nzumbi, phala ku sangulukisa o muxima ua Jihova, ni ku bhana valolo ku sidivisu ioso ia bhanga mu kilunga.—Tanga Filipe 1:10.

10, 11. Enu mu muiji, jimbambe jebhi mu nzumbi ji mua suu, ni jimbambe jebhi, ji mua mesena ku suua ku pholo?

¹⁰ Katé muene ni ku suua jimbambe mu ithangana ia butu, ki tena ku bheka mabesá avulu ku muthu, ni muthu ku muiji. Xinganeka hanji mu mbambe ia ku di longa o kibatulu kia Bibidia izuua ioso. O itambuijilu ia muthu, ni muthu ku muiji, i tena ku kuatekesa o mutuameni ua muiji kuijiia kiambote se o muiji uê, ua mu kula muene mu nzumbi. O ku tanga o Bibidia izuua ioso kumoxi ni muiji, kithangana kiambote phala o tuana ku kala dingi ni uhete mu ku tanga, ni kuijiia kiambote o njimbu ia Bibidia. (Jisá. 1:1, 2) Ki tua tokala ku suua jimbambe phala tu kale ni uhete mu kusamba? O kulondekesa dingi o ídifua ia nzumbi, i tena ué ku kala mbambe iambote phala ku i suua. (Nga. 5:22, 23) Ihi i tuamba, ia lungu ni kulondekesa o henda ku athu u tu sanga mu sidivisu ia kuboka? O jitata a tokala ku suína phala ku tena ku kuatekesa o tuana tuâ ku di longa ku kala athu a lenduka, nange ene a tena kulondekesa o vondadi ia ku kala muboki ua thembu ioso, mba mukunji ua jixi jengi.

¹¹ Mukonda diahi ua tokala u xinganeka ku mbambe, i ua tokala ku suua, ni muiji uê? O kuila o muiji uê, u tena ku suua mbambe ia ku bhanga dingi mu sidivisu ia kuboka? O kuila eie u tena ku dibhana kiambote ni uôma ua athu, ku boka ni mutelembe ua kafuetele, mu ikoka, mba mu ididi ia ku sumbisa? O kuila u tena ku kalakala mu ididi mua kambe aboki a Utuminu? O kuila ku muiji uê, saí muthu u tena ku di longa dimi diéngi, phala ku longa ni ku tula o njimbu iambote, ku athu a jixi jengi?

12. Ihi ia tokala ku bhanga o atuameni a muiji, phala ku kuatekesa o miji iâ ku kula mu nzumbi?

¹² O atuameni a miji, a tokala ejiia o maukexilu a tokala o muiji uâ ku kula mu nzumbi. Suua mbambe phala ku kuatekesa o muiji uê ku kula mu nzumbi. O jimbambe ji u suua, ja tokala ku kuatekesa o muiji mu ukexilu uoso. (Jisa. 13:12) Mu kidi, o ku kalakala phala ku suua mbambe, ku bhinga kithangana. Mu veji dia ku ngastala kithangana kiavulu mu ku tala o mutelembe ua izunzumbia, ua tokala u ngastala o kithangana kiê, mu ku bhanga o ima ia nzumbi. (Efe. 5:15, 16) Suína phala ku kumbidila o jimbambe ji ua suu phala o muiji uê. (Nga. 6:9) O muiji u suua o jimbambe, o ku kula kuê mu nzumbi, a-nda ‘ku mona ku athu oso.’—1 Tim. 4:15.

Kalenu ni Kizuua Kia Ubhezelu ku Muiji

13. Ihi ia lungulula mu iônge ia ilunga, ni ibhuidisu iebhi i tua tokala ku di bhanga?

¹³ O kima kiambote ki kuatekesa o muiji ku ‘kala polondo,’ kioso kia-nda kuíza o Mon’a muthu, o ngolokela i tuevu mu kizuua kia 1 kia mbeji ia Katatu ia 2009 ia lungu ni ku lungulula o iônge ietu. Tua kexile ni kizuua kia ku di Longa o Divulu kumoxi mu ibuka, maji o kiônge kiki, ene mu ki bhanga kiá ni kiônge kia Xikola ia Ukunji ua Nzambi, ni Kiônge kia Sidivisu. O ukexilu iú, phala ku bhana kithangana ku miji ua Jikidistá ku suínisa o ukexilu uâ mu nzumbi, mu ku kala ni kizuua kimoxi ku semana phala o  ubhezelu uâ ku muiji. Tundé kia lungulula o iônge, kua bhiti kiá thembu, kienhiki, tua tokala ku dibhula: ‘O kuila nga mu kala ni kithangana phala o Ubhezelu ku Muiji, mba phala ku di longa ubheka uami? O kuila nga mu katula mbote mu ukexilu iú ua ku lungulula o iônge?’

14. (a) Mukonda diahi tua tokala ku kala ni Kizuua kia Ubhezelu ku Muiji mba kia ku di longa ubheka? (b) Mukonda diahi tua tokala ku kala ni kizuua kia ku di longa?

¹⁴ Kia dianga, o Kizuua kia Ubhezelu ku Muiji, mba kithangana kia ku di longa ubheka, phala ku kuatekesa o athu ku zukama dingi kua Nzambi. (Tiia. 4:8) Kioso ki tu kala ni kithangana kia ku di longa o Bibidia izuua ioso, tu bandekesa dingi o kuijiia kuetu ku Mubhangi uetu, o ukamba uetu ni muéne u kola dingi. Se tu zukama dingi kua Jihova, o vondadi ietu ia ku ‘mu zola ni muxima uetu uoso, ni muenhu uetu uoso, ni kilunji kietu kioso, ni nguzu ietu ioso’ i kola dingi. (Mar. 12:30) Sé phata, etu tua mesena ku belesela Nzambi, ni ku kaiela o phangu iê. (Efe. 5:1) Kalenu ni Kizuua kia Ubhezelu ku Muiji, phala ku kuatekesa o muiji ku ‘kala polondo’ mu nzumbi, kioso ki tuia ni ku kingila o kizuua kia “hadi ia dikota.” (Mat. 24:21) Kiki kiene kia bhingi phala tu bhuluke.

15. Kiebhi o Kizuua kia Ubhezelu ku Muiji, ki tena ku kuatekesa muthu ni muthu ku muiji?

¹⁵ O Kizuua kia Ubhezelu ku Muiji—ki kuatekesa ué muthu ni muthu ku muiji, ku kala makamba mudiâ. O ku kala kumoxi ni kuzuela mak’â Nzambi semana joso, kiene mu kala dibesá dia dikota, ni ku bhangesa oso ku muiji kuijiia o ibhindamu ia muthu ni muthu. O makaza a bandekesa dingi o ukamba uâ, kioso kia di longa kumoxi o maka a Nzambi! (Tanga Ndongixi 4:12.) O jitata ni ana, ala mu ubhezelu umoxi, nange a beta ku dizola, mukonda o ‘henda iene i bhangesa ku dibhana kiambote.’—Kol. 3:14.

16. Jimbulula kiebhi o jiphange jitatu mu nzumbi, kia katula mbote mu ku di longa o Bibidia, mu kizuua kia ubhezelu.

¹⁶ Xinganeka kiebhi o jiphange jitatu mu kilunga, a katula mbote mu ku kala ni kizuua kia ku di longa o Bibidia. Sumbala kexile jindandu, o adiakimi enhá atudi, a tungile mu mbanza imoxi, ene makamba tundé okulu. Ene a mesenene ku kala kumoxi, ni ku bhana valolo ku ima mu nzumbi, mu veji dia ku di ta ngó mu itonokenu, ene a solo ku kala ni kizuua kia ku di longa o Bibidia. Ene a solo ku di longa o divulu, ‘Dê Testemunho Cabal’ Sobre o Reino de Deus. Umoxi uambe, “tua sanguluka kiavulu ni kizuua kiki, saí ithangana tu bhanga ola imoxi ndenge, tu di longa ima ia bhiti na-iu o jiphange jetu mu hama ia dianga, tu zuela se ihi i tueji bhanga se tua kexile bhu kididi kiâ. Tu kumbidila o jipondo jiji ji tua di longo, mu sidivisu ia kuboka. Kiki, ki tu bhangesa ku kala ni uhete mu sidivisu ietu ia kuboka o Utuminu, ni ku bhanga maxibulu.” Kiki, ki kia a suínisa ngó mu ukexilu ua nzumbi, maji o kizuua kiki, kia bhangesa o jiphange jiji, ku suínisa dingi o ukamba uâ. Ene ambe, “Etu tua tanesa o kizuua kiki.”

17. Ihi i bhangesa o kizuua kia Ubhezelu ku Muiji, ku kala kithangana kia ku sanguluka?

¹⁷ Ihi i uamba ia lungu ni eie? Kiebhi ki uene mu katula mbote mu kizuua kia ubhezelu ku muiji, mba ku di longa ubheka? Se ki uene mu ki bhanga izuua ioso, ki ua-nda tena ku katula mbote mu kizuua kiki. Muthu ni muthu ku muiji, ua tokala u kala polondo phala ku di longa mu kithangana kia tokala. Kima kioso-kioso ki moneka, ki ki tokala ku fidisa o kizuua kiki. O milongi i mua-nda di longa, a tokala ku i sola kiambote, phala ku kuatekesa o muiji. Ihi i uene mu bhanga phala o kizuua kia ku di longa, ki kale kithangana kia ku sanguluka? Kala ni ukexilu uambote ua ku longa, ni ku bhanga o  kizuua kiki, kithangana kia ku sanguluka.—Tiia. 3:18. *

‘Kalenu ku Mesu Azele,’ ni mu ‘Kale Polondo’

18, 19. Mu kuijiia kuila o Mon’a muthu ua zukama kuíza, ihi i ua tokala o ku bhanga, eie ni muiji uê?

¹⁸ O ukexilu ua iibha ua mundu u tuene mu mona mu izuua ietu, ulondekesa kuila tunde ku muvu ua 1914, o mundu iú, ua iibha ua Satanaji, uala mu izuua isukidila-ku. O kitembu kia dikota kia Alumajedone kia zukama. Kua kambe ngó, o Mon’a muthu, ua-nda bhixila phala ku bheka o kufundisa kua Jihova, kua ió oso ka xikina ku mu bheza. (Jisá. 37:10; Jisa. 2:21, 22) O kuiji o kidi kiki, ki kia tokala ku bhangesa eie ni muiji uê ku bhanga kima?

¹⁹ O kuila ua mu belesela o kitendelesu kia Jezú, kia ku kala ku mesu ‘azele?’ O athu ku mundu iú, a thandanganha ni ima iavulu, kála o jimbote, o fuma, ni kutena, o kuila o muiji uê, ua mu bhanga ioso phala ku suua jimbambe mu kilunga? O kuila ua mu bhanga o Ubhezelu ku Muiji, mba uene mu di longa ubheka uê? O kuila ua mu katula mbote mu kizuua kiki? Kála ki tua di longo kiá mu milongi ia dianga, o kuila eie ua mu kumbidila o kikalakalu kiê kala ki tanga o Mikanda Ikola, ki kala u munumi, u muhatu, mba u mona, phala ku kuatekesa o muiji uoso ku kala “ku mesu azele?” (1 Tes. 5:6) Se ua mu ki bhanga, eie ua-nda kala ‘polondo’ phala o kuíza kua Mon’a muthu.

[Tanga mu luji]

Ihi i ua di Longo?

• Jimbulula kiebhi o miji ua kidistâ kia tena ku ‘kala polondo’ mu ku . . .

kala ku mesu “azele.”

suua jimbambe mu kilunga.

kala ni Kizuua kia Ubhezelu ku Muiji.

[Ibhuidisu ia ku dilonga]