Zukama Kua Nzambi

‘Jihova Mubhidi Uami’

TALA o foto bhabha. O kuila ua mu mona kiebhi kia mu divua o kambudi kaka, bhu maku ua mubhidi uê? Mu divulu dia Jisálamu 23, o Bibidia i tanga o musoso ua mubhidi ni mbudi, phala kulondekesa o henda ia Jihova ia lungu ni ku langa o abhezi’ê. Muéne ua mesena kuma tu divua kiambote, kála kiambe o mukua jisalamu ni kidielelu kioso: ‘Jihova Mubhidi Uami.’ *—Velusu 1.

Davidi o musoneki ua divulu dia jisálamu uexile mubhidi, kioso kia kexile munzangala. Muéne uejidile o ibhindamu ia jimbudi, ni kikalakalu kia mubhidi. Davidi ua monene o henda ia Nzambi mu ku langa o muenhu uê, ua soneka o izuelu a ixana, “jisalamu ja kidielelu.” O dijina, Jihova, di moneka mu dimatekenu, ni mu disukilu dia jisálamu. (Velusu 1,, 6) O izuelu íii, ilondekesa maukexilu atatu a Jihova ku langa o mundu uê, mukonda muéne mubhidi, muéne u langa o jimbudi jê—Jisálamu 100:3.

Jihova uendesa o jimbudi jê. O jimbudi sé mubhidi, ji jimbidila. Kiene kimoxi ué, etu tua bhindamena kikuatekesu phala ku sanga o njila ia kidi ku muenhu. (Jelemiia 10:23) Jihova ua jimbulula Davidi, kuila muéne uendesa o mundu uê mu “iangu ia sabhelela” ni bhu ‘kididi bhuala menha a tululuka.’ Muéne u a endesa “mu njila ia kuiuka.” (Velusu 2, 3) O ukexilu iú ua kuinga, u tu londekesa kuila, tu tena ku dielela kua Nzambi. Se tu ehela ku tu endesa ku nzumbi iê, kála ki zuela o Bibidia, tua-nda kala ni kisangusangu, ku kondama, ni kutululuka ku muenhu uetu.

Jihova u langa o jimbudi jê. Sé o mubhidi uâ, o jimbudi ji kala ni uôma, ka tena ku di langa. Jihova uambela o mundu uê, kuila ene ka tokala ku kala ni uôma, né muene se enda “mu njila ia dikôlo dia kitômbe”—né muene kioso ki ku moneka ima ia kitombe ku muenhu. (Velusu 4) Jihova u a langa, uala polondo phala ku a kuatekesa. Muéne u tena ku a bhana unjimu, ni nguzu phala ku dibhana kiambote ni ibhidi.—Filipe 4:13; Tiiaku 1:2-5.

Jihova u dikila o jimbudi jê. O mubhidi muéne u dikila o jimbudi. Etu tuala ni ibhindamu ia nzumbi, Nzambi muéne ngó u tena ku zubha o ibhindamu ietu. (Matesu 5:3) Tuejiia kuila Jihova, ua uabhela o ku Bhana, u bhana kudia kuavulu mu nzumbi ku jiselevende jê. (Velusu 5) O Bibidia, ni madivulu metu, ni kadivulu kaka, ku ua mu tanga, kudia mu nzumbi, ku tu kuatekesa ku zubha o ibhindamu ietu mu nzumbi, phala tu tene kuijiia se mukonda diahi tuala ku muenhu, ni iebhi o vondadi ia Nzambi ko kuetu.

Davidi ua kexile ni kidielelu, mu kuijiia kuila se muéne ua kolokotele o ku zukama ku Mubhidi uê, muéne ueji mona o henda ia Jihova mu ku mu langa ‘izuua ioso ku muenhu uê.’ (Velusu 6) O kuila eie ua mesena ué ku kala ni kidielelu kiki? Se ua mesena, ejiia kiebhi ki u tena o ku zukama kua Jihova. Kienhiki eie u tena ku divua kiambote bhu maku ua Mubhidi ua Dikota, uendesa, u langa, u dikila oso a kolokota o ku mu kala fiiele.—Izaia 40:11.

[Tanga mu luji]