Kikanenu 1. Itungutu Ia Ixi

‘O Ixi ia-nda tunguta kiavulu.’—LUKA 21:11.

● Winnie, ua kexile ni muvu umoxi ni mbeji jiuana, ua bhuluka ku kitungutu kia ixi kia bhitile ku Haiti. O kibuka kia mutelembe ua izunzumbia kia mu kalakala ku divua dia kitungutu dia mavu, evu mona ua mu dila koxi dia matadi a jinzo alunduka. Muéne kafú mu kitungutu kia ixi, maji o jitata jê jafú.

IHI ILONDEKESA O IZULUKUTU ÍII? O kitungutu kia ixi kia kexile ni 7.0- ia nguzu, kia tula ku ixi ia Haiti ku mbeji ia Katatu ku muvu ua 2010, nange kuafú 300.000 dia athu ndenge. Mu kusuka-ku 1.3 ia jimidi ja athu a xala sé o jinzo jâ. Sumbala ni kitungutu kionene kia ixi, kia bhiti, mu ixi ia Haiti, ki muene ngó mua bhiti o kitungutu kia ixi. Tundé ku mbeji ia Kasamanu ua muvu ia 2009, ndu ku mbeji ia Kasamanu ia muvu ua 2010, kua bhiti kiá 18 dia itungutu ia ixi.

IHI IZUELA O ATHU? Ki tua-nda bhita dingi mu itungutu ia ixi; mukonda dia unjimu ua jingijiie mu izuua ietu, tuejiia kiavulu ia lungu ni itungutu ia ixi, o athu m’ukulu ndenge.

O KUILA O ATHU A MU ZUELA O KIDI? Xinganeka o kidi kiki: O Bibidia ki izuela se itungutu ikuxi ia-nda bhita mu izuua isukidila-ku. Maji iene izuela kuila o ixi ia-nda “tunguta kiavulu” mu ‘ididi ni ididi,’ phala ku i mona ku athu oso mu izuua ietu, isukidila-ku.—Marku 13:8; Luka 21:11.

IHI I U BANZA? Ki tuene mu mona itungutu iavulu, kála kia kanena o Bibidia?

O itungutu, ki iene ngó ilondekesa kuila tuala mu izuua isukidila-ku. Kiki, kikanenu kimoxi ngó kia mu di kumbidila. Tua-nda di longa o kikanenu kia kaiiadi.

[Kilombuelelu ku bandu 4]

“Etu tu ji jiofiziku [o jingijiie a di longa kioso kia kala o ixi] tuene mu ixana itungutu ionene. Maji athu amba kuila kima kia iibha”​—KEN HUDNUT US GEOLOGICAL SURVEY.

[Muxinda ua tokala ku foto ku bandu 4]

© William Daniels/​Panos Pictures