Di Longe O Mak’â Nzambi

Mukonda Diahi Nzambi Uehela o Kuiibha ni Hadi?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.

1. Kiebhi kia mateka o kuiibha?

O kuiibha kua mateka mu ngongo, kioso Satanaji kia dianga ku tanga makutu ku muhatu. Maji Satanaji ka mu bhange muthu ua iibha kana. Muéne a mu bhange anju ia iuka, maji “mu kidi ka nangiê-mu.” (Nzuá 8:44) Muéne ua kexile ni luímbi lua ubhezelu ua tokalele ngó kua Nzambi. Satanaji ua tange makutu ku muhatu ua dianga, Eva, ua bhangesa ué muadi uê ku mu belesela, mu veji dia ku belesela Nzambi. Adá ua kaiela Eva mu ku bhukumukina Nzambi. O ku bhukumuka kua Adá, kua bheka jiphaxi ni kufuá.—Tanga Dimatekenu 3:1-6, 17-19.

Kioso Satanaji kia bhangesa Eva ku bhukumukina Nzambi, muéne ua mesene ku mu bhangesa ku bhukumukina o ungana ua Nzambi. Athu avulu mu ngongo, ene mu kaiela Satanaji, mu ku dituna Nzambi kála Nguvulu iâ. Kienhiki, Satanaji ua kituka ‘sobha ia mu tumina mu ngongo.’—Tanga Nzuá 14:30; Dijingunuinu 12:9.

2. O kuila o ibhangelu ia Nzambi ki i iukile?

O athu ni ji-anju ja bhange Nzambi, a tena ku belesela o itumu ia Nzambi. (Matendelelu 32:5) Nzambi ua tu bhange ni ufolo ua ku sola o kima kia uabha mu kiki kia iibha. O ufolo ua ku sola, u tu bhangesa kulondekesa o henda ietu kua Nzambi.—Tanga Tiiaku 1:13-15; 1 Nzuá 5:3.

3. Mukonda diahi Nzambi uehela o hadi?

Jihova uene mu kuehela o athu ku bhukumukina o ungana uê. Mukonda diahi? Phala kulondekesa kuila, se-ku utuminu mu ngongo, u tena ku bheka mbote ku athu. (Jelemiia 10:23) Tundé kia tambuijila o maka enhá, kua bhiti kiá 6.000 ja mivu. Maji né kiki, o jinguvulu ja ngongo kene mu tena ku zubha o ita, o usuéia, o kuiibha ni mabhebhu.—Tanga Ndongixi 7:29; 8:9; Loma 9:17.

Maji oso a xikina Nzambi kála Nguvulu iâ, ene mu tambula mabesá avulu. (Izaia 48:17, 18) Kua kambe ngó bhofele, Jihova ua-nda buika o jinguvulu joso mu ngongo. O mundu u sola ku u tumina kua Nzambi, ene ngó a-nda kala mu ixi.—Izaia 2:3, 4; 11:9; tanga Daniiele 2:44.

  4. O muanhu ua Nzambi u tu bhana kithangana kiahi?

Satanaji uambe kuma, se-ku muthu ueji belesela Jihova. O muanhu ua Nzambi, u tu bhana kithangana phala kulondekesa se tua-nda sola ku tu tumina kua Nzambi, mba ku tu tumina ku athu. Tu tena ku kilondekesa mu ima i tu sola ku muenhu.—Tanga Jobe 1:8-11; Jisabhu 27:11.

5. Kiebhi ki tu tena ku sola Nzambi kála Nguvulu ietu?

Etu tu sola Nzambi kála Nguvulu ietu, kioso ki tu sota o milongi iê mu Maka mê, o Bibidia, ni ku mu bheza ni kidi. (Nzuá 4:23) Ki tuene ué mu di ta mu maka a jinguvulu, ni mu ita, kála kia bhange Jezú.—Tanga Nzuá 17:14.

Satanaji mu ku tena kuê, uene mu bhangesa o athu ku bhanga ufusa, ni ima ia mukuá ia iibha. Kioso ki tu dituna o ima ia iibha, saí makamba metu, ni jindandu jetu a tu bhanga kasekelu. (1 Phetele 4:3, 4) Kienhiki, tua tokala ku sola. O kuila tua-nda sola ku dilunga ni athu a zola Nzambi? O kuila tua-nda belesela o itendelesu iê ia henda? Se tu bhanga kiki, tua-nda londekesa kuila Satanaji mukua makutu kioso kiambe kuila se-ku muthu ueji bhanga o vondadi ia Nzambi.—Tanga 1 Kolindo 6:9, 10; 15:33.

Phala kuijiia dingi, tanga o kibatulu 11 kia divulu didi, a di bhange ku Jimbangi ja Jihova, Mu Kidi ihi i Longa o Bibidia?

[Kilombuelelu ku bandu 12]

Adá ka solo kiambote

[Kilombuelelu ku bandu 13]

O ima i tu sola, ilondekesa se tua mesena ku tu tumina kua Nzambi